البطل المغمور "زهور القمر"

الجزء الخامس عشر2

#البطل_المغمور2  "زهور القمر"
#جمان_فريد
#الجزء_الخامس_عشر "كفاح2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
ممر فيه اربع فصول..
الفصل الأول لطلاب سنة أولى..
والفصلين اللي بعدهم لطلاب سنه تانيه والفصل الأخير لطلاب السنة الثالثه ثانوي..
هالفصل كان فصل دانيه..
فيه بعض زميلاتها اللي كانوا يقروا معاها السنه اللي فاتت..
وزادو عليهم ثلاته طالبات جدد...
وحده شاركت ازهار في المقعد اسمها "تسنيم" قريبة وحده من الأبلات..
والتانيه مقعمزة في اللي المقعد اللي قدام دانيه اسمها..
"ربى"
وحده جت جنب دانيه ع حسب تقسيم المدرسه للطالبات في فصولهم..
دانيه بإبتسامه؛اسمي دانيه نقرا في المدرسه هادي من سنه اولى..
:عاشت الاسامي..اني اسمي انبار كنت نقرا في مدرسة الوفاق في عين زارة..
دانيه؛اسمك غريب...ليبيه انتي؟
انبار بإبتسامه؛اني ليبيه المنشأ بس مش الأصل..اني عراقيه..
دانيه بضحكه؛الله جو..كلش نحب لهجتكم..
انبار بضحكه؛صبرك بس..اني مانعرف شي من لهجتنا جيت هني وعمره عام ونص تربيت هني وتعلمت كلامكم..
دانيه:اكيد بوك وامك يدووا قدامك عراقي..
انبار بضيق؛بابا وماما منفصلين وامي تزوجت ليبي هو اللي رباني..
دانيه بإبتسامة إحراج؛آسفه سامحيني..
انبار بإبتسامه:ولايهمك عادي..
التفت "ربى" وقالت؛بست..شن نظامها مدرستكم..
دانيه بضحكه:ع الصراط المستقيم..
ربى:هما قالولي هكي بس اني نبي نتأكد الواحد ماصدق لقي مدرسة باهيه بش يقرا صح ويطلع بمعدل كويس بمجهوده..
دانيه؛شكلك فلته..
ربى: مانحبش نحكي ع روحي هلبه..تعرفي انتي من هما الدحيحات هني..
انبار ضحكت..
دانيه بضحكه؛هديكا اللي مقعمزة في المقعد الاول صفة الروشن..
شبحولها..
دانيه:اسمها ازهار..والتانيه الآمه لله اللي قدامك..
ربى:جديات!!؟
دانيه بضحكه؛ايه..
ربى:مليح بكل يمشي جونا مع بعض..
انبار:واني نستفيد من صحبتكم..
ضحكوا البنات.....
فجأة..
دق الباب وخشت ابله اول ماده....وبدوا مشوارهم الدراسي لهالعام..
في الفصل اللي قدامهم...
كانت سارة تحضر في اول حصه..
لجيهان اول مرة تعطيها...
في الفصل هدا في زوز طالبات جدد جو مع بعض..
صاحبات...
"ميس" "روعه"
الزوز مقعمزات في المقعد الاخير صفة الحيط ويبان عليهم من وجوههم مش متاعات قرايه..واخلاقهم تحت الأرض...
طول ماجيهان تشرح وهما يشبحولها بإزدراء..
ميس بهمس:تو مش حرام مسلوعه زي هادي تاخد الغزال هداكا .
روعه:سعود ياحنه...بس التاني احلى منه ياكبادي يجلط جلط يارب يطلع يقري فينا..
جيهان شبحتهم كيف يهدرزوا وقالت بحده؛الاحاديث الجانبيه مانحبهاش..
ميس رفعت حاجبها وقالت:آسفين ياأبله ماكناش نعرفوا..
البنات شدوا ضحكتهم..
جيهان رفعت حاجبها وقالت؛تو نتعرفوا القدام..
ابتسموا الزوز بسخافه..
وهي تجاهلتهم وكملت شرح..
🍁🍁🍁🍁🍁
"نونو ركبيلي"
نوال ابتسمت وحطت الكتاب ع تركينه وخدت اللعبه من حفيدتها وقعدت تركب فيها...
ع جية بنتها شافتها شن دير قالت بإبتسامه:تركيبها ترجع تفكها وتقولك ركبيها مرة تانيه..
نوال بضحكه وهي تركب في اللعبه؛عادي نركبوها مرة تانيه شن ورانا؟..خودي ننوستي...
نرجس ضحكت..وقعمزت حدا امها..
نوال شبحتلها وقالت:هاه شن قلتي في موضوع البزار؟
نرجس ابتسمت وهزت راسها وهي تقول:ماشي تو نخش معاك فيه خير من الكساد..
نوال ابتسمت وخدت الكتاب وكملت قرايه..
نرجس مررت نظرها ع الكتاب وامها وهي تفكر في التغيير الكبير اللي طرأ ع امها...شن سببه؟...أو...من سببه...
🍁🍁🍁🍁
"وهادي قهوتك يادكتور"
هيثم خدي منها الفنجان وقال:صحيتي..
ماجده:لقيت الشكلاطه هادي في الدولاب تمشي مع جماعة السكر..انت جايبها؟
هيثم شبحلها شويه بعدين قال:وين لقيتيها بالزبط؟
ماجده:في دولاب في المكتبه ورا الماعين..
تفكر هيثم انه اول ماروح طلعها من شنطته وماعرفش شن يدير بيها دسها ورا الماعين في دولاب المكتبه..
▪▪▪▪
◇قال كلامه وهو يضحك...كنت حاس روحي زي اللي داير عمله..داير حاجه غلط...شي داخليا مش مرتاحله..طول خدتها ودستها في دولاب الماعين ووراهم...مافهمتش يعني هدا خوف! من مني!!؟مش عارف...
▪▪▪▪
هيثم رشف من القهوه وهو عاقد حواجبه وقال:اليوم ماشي لزياد..
ماانتبهتش خالته انه غير الموضوع وبفرح قالت:حق!؟
هيثم:اليوم تأكد موعد الزيارة قالولي تقدر تجيبله حوايج وماكله وحاجات عاديه..
ناضت ماجده وهي تقول:مالا خل نوض ندير حويجات يحبهم..
وبسرعه مشت للكوجينه..
هو ابتسم بعدين شبح لقطعة الشكولاته ومد يده بياخد منها..
خدي طرف وجي بياكله...وعيونه يجوا بنظرة عابرة وغير مقصوده ع لوحة زياد..
قعد يشوف لملامح اسيمه فيها..
وحس بضيق في صدره فجأه خلاه يرد الشكولاته لمكانها..
غير عيونه عن اللوحه وقعد يمرر في نظره القدام بشي من الأرتباك ورجع يرشف في القهوة...
🍁🍁🍁🍁
"وهدا اللي نتعلموه من سورة يوسف..اللي تخصنا حني بشكل شخصي  السجناء...صح مش كلنا موجود هني ظلم...لكن السورة توصل رساله حتى للمذنب ان السجن حيكون بالنسبه ليه جنه لو قرر يخليه دار توبه"
زياد بإبتسامه؛صح..وهدا اللي حسيت بيه لما كنت في المركز.
فاتح شبحله وقال:خديتها من لساني..
حط زياد ع كتف فاتح والزوز ابتسموا لبعض..
عقيل بإبتسامه؛هي الدنيا كلها سجن المؤمن ياولدي..والآخره هي دار الحريه والراحه والسعاده الأبديه...
والموجودين متأثرين بكلامه وقاعد يحرك في داخلهم هلبه مشاعر حلوة كانت في سبات عميق واولهم الإيمان..
شويه العجيلي قال؛بارك الله فيك ياشيخ..بعدين قال..ترا اشبحولي هني..
شبحوله كلهم..
العجيلي:اليوم اللي بيشد الغسيل جماعه عنبر ب6..كل مهجع يلموا صحابه دبشهم ويحطوه السله..
كل مهجع السله متاعه بروحه فكونا من اللخبطه ياشباب..تفاهمنا..
هما بأصوات متقطعه:ايه..تم...
العجيلي:هي تحركوا معاش في وقت...
وناضوا كلهم وطلعوا من المصلى والحارس سكره..
فات العجيلي ومعاه الشيخ من حدا زياد وفاتح وجماعتهم..
زياد:العجيلي مافهمتاش كيف ماتلقاه معادي حد ولاعنده مشكله مع حد..
سراج؛العجيلي محبوب ومافي حد يكرهه من لما جانا وهو قعد يكسب في صداقات الكل حتى الشرطه هدا علاش حطينه ممثل للمساجين في ابوسليم..
فاتح:شن تهمته بالزبط..
وائل:قتل...لكن الحكم متاعه 16سنه...وتفاصيل قضيته مافي حد يعرفها هني غير زوز اسعد الكبير..والشيخ عقيل بس..
وزياد وفاتح يسمعوا وعيونهم ع العجيلي وهو يهدرز مع عقيل..
وائل:خليل يقرا ليه ليه..
شبحوا للمكتبه متاع الحبس لقوها مسكره..
سراج:الراجل هدا غامض وغريب ومش قادر نفهمه..
زياد وقف ع باب المكتبه وقال:بعد ربي مايفهمه حد كان الدكتور هيثم..
ابتسم فاتح..
والحارس فتح المكتبه وزياد خش..
مراد؛يابختهم..
فاتح وهو معكرش وجهه:بشن بالقرايه! تي هادي  عذابها احرف من عذاب غوانتامو بحالها..ومشي ..
وهما ضحكوا ومشوا لحقوه...
🍁🍁🍁🍁
الساعه الحاديه عشر والربع..
في باحة المدرسة..
وقت الإستراحه..
سارة؛اسمك حلو ومميز..
انبار بإبتسامه؛انتي الحلوة..
ابتسمت سارة..
دانيه:وتوا اشبحيلي هني..خوي عيي وهو يستنى راهو ساده تشحيط..
انبار ركزت معاهم..
وسارة حست بضيق وخوف وهي تذكر في تهديد رفيق..
"نقتله"..
خدت نفس وقالت؛قوليله يأجل الموضوع توا مانبي شي يشتتني نبي نلهى بقرايتي بس..
دانيه؛تشتيت شني تشبح فيا متشتته! بالعكس دروس القرآن ماشيه فيهم كويس ومتحمسه هلبه للقرايه..
سارة؛انتي مش زيي يادانيه اني نتشتت وشيرتي تنذهب..نبي نركز في قرايتي وبس..
دانيه؛قصدك خلتيه يستنى هدا كله بش فالنهايه يكون هدا ردك!؟
سارة:قصدك حرجتي!
دانيه بضيق:وجعني خوي..
سارة ودموعها في عيونها؛لو مستعجل ويبي يتزوج قوليله مافيش نصيب..
دانيه بشي من الإنفعال:شن تقولي انتي!سارة خوي يحبك راهو مش لعب مفرخ هو..
سارة غيرت عيونها عنها وقالت:هدا اللي عندي يادانيه..
دانيه ربعت ايديها وقعدت تهز بعصبيه وهي تمرر في نظرها ع الساحه..
وسارة شاده روحها بالسيف عن البكي..
وانبار حست روحها في موقف مفروض ماتحضراش بس مادام هما تكلموا قدامها خلاص..
وقعدوا سارة ودانيه ساكتات لين تمت الإستراحه وكل وحده فيهم مشت وقفت في طابورها...
🍁🍁🍁🍁🍁
في حوش كونيه..
اللي صالحه وعفاف جوها يجروا او مااتصلت بيهم بعد اكثر من اسبوعين انتظار..
كونيه:لمة جياب هي ويبوا يديروا قعاد..اول ماكلمتني طول جيتي في بالي..
عفاف ابتسمت وقالت:باهي امتى بالزبط؟
كونيه؛نهار الخميس الجاي..مدتلها ورقه وقالت..وهدا عنوانهم والرقم..
عفاف خدت الورقه وقالت:بارك الله فيك ياكونيه..
كونيه:فيك بارك الله..
وصالحه طول التقعميزة وهي ساكته مازال مش راضيها اللي صاير في عفاف..
🍁وهما مروحات ع رجليهم..
عفاف:شن في قدامي قوليلي ياصالحه..ع عينك الحال..التلاجه تنفض...سلة الخضرا تنفض..دار الخزين اقسم بالله اليوم شفتها مافيهاش كان شيشتين زيت وحكه طماطم...استاحشنا نديروا طاجين باسطي من قلة الدقيق...هدا غير البنت تبي مصاريف قرايتها..وسجى وولدها اللي مخلي هداكا الثور مصاريفهم ع كتاف خوه..وهو مسكين القرش اللي يحصله يقسمه علينا حني ومرته..
صالحه؛رفيق هدا جايبهالي سفارات..حتى بعد عرف ان خوت مرته ماكرين فيها ومايبوا يعطوها شي قاعد راقد في الحوش..ماكنتش نحسابه هكي خسارته...
عفاف وهي تهز في راسها بوعيد:تو نحطله حد تو يشوف..
🍁🍁🍁🍁
"ايه مازال في"
مريم؛والمواصلات عليهم ولا؟
:ايه باص يرفعك ويجيبك...
مريم؛والدوام مسائي..
:ايه يومين في الأسبوع اربع حصص..
مريم بإبتسامه؛ميه ميه خلاص تو لما نروح نفتح الموضوع مع راجلي ويارب يقول باهي..
:ان شاء الله...
مريم؛والمرتب امتى يعطوه..
:من اول شهر..
مريم بإبتسامه رجاء:يارب يوافق يارب..ادعي معاي..
ضحكت زميلتها وقالت؛ان شاء الله يوافق..
🍁🍁🍁
وفي ورشة الحداده متاع بوها وخوتها...
كان يدور نقاش حامي..
:تمشوا تشوفوا اختكم اني قلت..
ياسر:والله مانخشله الشارع اللي هما فيه
واحد تاني قال؛هو من لما كان خاطبها يقول نتحمل
مسؤوليتها..خلاص خليه يتحمل..
بوها؛هدا اخر كلام عندكم..
كلهم قعدوا ساكتين..
بوها:خلاص اني نمشيلها..
شبحوله كلهم بصدمه...
بوها؛مازال مامتش بش تقعد بنتي محتاجه..
معاذ تنهد وقال؛خلاص يابوي خليك اني تو نمشي..
خوته شبحوله..
معاذ؛نكمل الخدمه اللي بين ايديا قبل..
بوه هز راسه وقال؛ربحت ياولدي ربحت...
ومعاذ هز راسه ورجع فتح آلة اللحام وكمل شغله...
🍁🍁🍁🍁
"وااك امتى يتم هاليوم"
دانيه؛كيف بدينا راهو..
ازهار:عارفه كيف بدينا بس اليوم ممل من غير قراية كله تعارفات وخلاص...
ربى بتهكم:شوفوني كيف شاطرة ونحب القرايه..
البنات ضحكوا...
ازهار؛غير اولك يوم بس راهو عرفت كيف نرد عليك.
ربى:لاردي بالله عليك ردي خاطرك في عركه..
دانيه بضحكه؛ريحوا ارواحكم انتي وياها ماتجيبولناش طريحه جماعيه..
ربى؛ع خاطركم يابنات..وشبحت لأزهار من فوق لتحت وغيرت عيونها..
ازهار بهمس:متخلفه...
تسنيم بضحكه؛نديروا شوط..
وحده من البنات؛ودانيه تغنيلنا..
دانيه:لالالا اني اعتزلت..
انبار:صوتك حلو؟
؛يهبل يهبل..
ربى التفتت؛سمعينا ترا..
دانيه:اني قلت اعتزلت خلاص..
تسنيم ؛فوتوها تدلع... خل نديرلكم شوط هي..
ناضت وحده من البنات سكرت الفصل..
وبدت تسنيم دربك وتغني؛يانا يانا مرادي..
وقعدوا يغنوا معاها وانقلب الفصل لصالة عرس...
وانبار اللي كانت متحشمه قعدت تصفق معاهم وعجبها الجو..
وفي عز هياجيتهم..
انفتح الباب بقوة..
جمدوا في مكاناتهم..
هو قعد واقف في الباب ويمرر في نظره عليهم بحده..
وهما كانوا يشبحوله وخلاص..
اسماعيل؛ماشاء الله ماشاء الله ماشاء الله..نويرة وجماعتها..
دانيه شدت ضحكتها بقوة..
اسماعيل؛ديروا في بروفاتكم في المدرسه!؟
انبار كانت تسرقله في النظر..
اسماعيل؛نسمع في الزغاريط والغني من اخر الممر ولادايرين حساب لالأبله ولااستاذ ولااداره....
خش داخل وخلا الباب المفتوح...
حط شنطته ع الطاوله بعدين وقف قدامهم وهو حاط ايديه ورا ظهره وقال:اقعدوا هكي واقفين حصة كامله...
وهما ساكتات ولاكلمه..
اسماعيل:اخ لو الحكم في يدي كلكم فصل نهائي..
فنصت ربى وقالت؛ غير صل ع النبي..
هو بصوت عالي قال؛ضمي فمك ونزل عيونك..
البنات كلهم خافوا ونزلوا عيونهم...
اسماعيل وهو يمرر في نظره عليهم؛للأسف خليتوني في اول يوم تعارف ناخد عليكم فكرة زي الزفت..هدا غير طالبات شهاده ثانويه والعام الجاي في الجامعه...انتم توا في مرحلة بناء شخصيه..وياعليك شخصيات نشوف فيها قدامي...
البنات بدوا يضايقوا من كلامه اللي كان ينزل عليهم زي السيوف...
هو تنهد بعدين قال؛اسماعيل محمود الشركسي..حاصل ع درجة الماجستير من جامعه ******** في امريكا..
عارف مكاني في الجامعه مش هني..بس الظروف حكمت...المهم...بنعطيكم مادة الفيزياء الحراريه..
دانيه في نفسها"شوره جماعة الفيزياء كلهم متخلفين"
اسماعيل؛مافيش داعي نعرف بروحي اكثر من هكي...
شبح لصفة الروشن وقال؛اسمك..
ازهار بإرتباك؛ازهار..
شبح للي في جنبها..
؛تسنيم...
وقعد ياخد في اسمائهم بالوحده لين كمل الفصل كله..
مسح حواجبه وقال؛شن جوكم مع الفيزياء..
شبحوله كلهم وهما خايفات يجاوبوا..
اسماعيل؛جاوبوا باللي يعجبكم مافيش مشكله.
انبار؛نكرهها..
اسماعيل هز راسه..
بنت تانيه قال؛ماده دمها ثقيل..
هز راسه مرة تانيه..
ازهار:ممتعه بالنسبه ليا اني..
شبحولها البنات بدهشه..
اسماعيل؛كويس..اطلعي ع السبورة ترا..
ازهار قريب ماتت..
ودانيه بتضحك عليها لما شافت وجهها كيف ولى..
اسماعيل اشر بعيونه ع السبورة لأزهار..
هي هزت راسها وطلعت..
وهو عطي بظهره للبنات وبدي يمل عليها في مسأله وهي تكتب وترعش...
وبعد كملت حاولت تحل بس ماقدرتش..
اسماعيل؛اني قلت تحليها في دقيقه..مسأله تافهه هلبه هادي..
ازهار بإحراج؛ماراجعتش..
اسماعيل هز راسها واشرلها بيده تخش والتفت للبنات وقال؛باين عليكم مش جايين تقروا انتم..
دانيه رفعت يدها وقالت؛نطلع نحلها..
هو شبحلها واشرلها براسه تطلع..
دانيه مشت بثقه وخدت الخطاط وبدت تحل وتشرح..
وهو منسجم معاها لين كملت..
اسماعيل؛تحبي الفيزياء؟
دانيه؛نهائيا... اشرت ع راسها وقالت..لكن دماغ يااستاذ..
ضحكوا البنات..
هو يدوب ابتسم وقال:ولي لمكانك..
ولت وقفت في مقعدها..
وبعد دانيه تحمسوا زميلاتها وبدوا يطلعوا يحلوا...
واسماعيل بدي يهدا وينسجم معاهم...
لما قربت الحصه تم..
اسماعيل؛بدايه اللقاء كانت زفت واخره فل..
ضحكوا البنات..
اسماعيل بجديه؛طبعا الفيزياء اللي بنعطيهالكم في تعمق واختلاف عن الفيزياء العامه وان شاء الله مايكون في شي صعب نتفاهموا مع بعض انتم تفتحوا دماغتكم وتفهموا واني نحاول جهدي نبسط المعلومه ونوصلها...
مشي خدي شطنته وقال..المهم ردوا بالكم اللي صار اليوم يتكرر مرة تانيه...السلام عليكم..
ولبس شنطه وهو طالع.
بعد طلع..
:رجليا..
ربى؛صح حقير بس يهبل..
ازهار:احرجني التافه..
تسنيم؛انتي احرجتي روحك بروحك..
دانيه:بطليه جو التفلحين متاعك بش معاش تنحرجي..
ضحكوا البنات..
وازهار ضحكت سخرية بعدين خدت شنطتها ومشت طلعت..
وشويه والبنات بدوا يطلعوا.
دانيه طلعت مع انبار  وربى وتسنيم وهما يهدرزوا..
وماركزتش ع سارة اللي كانت واقفه تراجي فيها..
وكأنها نستها بالمره..
انوجعت سارة بس مابتش تكلمها ولاذكرها بيها..
لما وصلوا للباب..
دانيه قعدت دور بعيونها..
انبار؛نشوفك غدوة..
دانيه وهي دور:ان شاء الله..
ربى:باي دنوش.
تسنيم؛سلام..
ومشوا مع بعض لنفس الباص...
ركبوا وتحرك بيهم..
ودانيه وهي دور لقت سارة مشتلها وقالت؛خيرك واقفه هني..
سارة؛مابيتش نطفل عليك..
دانيه؛شن هي!؟
سارة؛درتي صاحبات جدد مانبيش نفرض روحي عليك..
دانيه ضحكت وضربتها ع ذراعها وقالت؛تغاري يابيبي..
سارة:ماتتسهوكيش طلعت وجيتك لفصلك طلعتي معاهم ولاكأنك شفتيني.
دانيه؛واني والله ماشفتك ولاكنت مركزة ع حاجه غير الاستاذ الجديد اللي جانا..
سارة بفضول؛بيقريكم انتم!
دانيه بضحكه؛ايه فيزياء حراريه..واعر نار ياسارة...
سارة:واضح عليه البنات اليوم في الفصل يحكوا عنه هو وبس..
دانيه بضحكه؛طاحت موضة جمعه..
سارة درقت فمها بيدها وضحكت..
شويه وجو باصاتهم وكل وحده فيهم مشت لباصها وروحوا بيهم...
🍁🍁🍁🍁
وصل باص تهاني لأول الشارع.
نزلت منه وهي تبكي بصمت..
كان يوم سيء ليها بكل المقاييس..
معامله كلها استكراد من الابلات..
البنات نافرات منها..نظراتهم ليها كانت زي السهام المسمومه تنزل عليها..
وصلت في الزنقه ومسحت دموعها..
شافت سيارة متجهه لحوشهم ماعرفتهاش لمني..
وين قربت توصل درست قدام بابهم ونزل منها واحد..
تهاني:يارب خير معاش قادرة نتحمل..
وصلت في الباب..
والشخص بادي يدق عليه..
هي معاش عرفت شن دير...بس بعدين تشجعت وقالت.
تهاني؛تفضل..
هو التفت شبحلها..وقعد ساكت..
تهاني عقدت حواجبها وقالت؛جاي لحوش خالد****؟
هو عقد حواجبه بإبتسامه وقال؛نبي جهاد ولده..
تهاني؛مهناش مايجيش توا..
هو ابتسم وقال؛باهي نبي مرته..
تهاني ضيقت عيونها وهي مستغربه بعدين قالت؛اها فهمت..انت خوها..لحظه شويه..حول..
ومشت فتحت الباب بالمفتاح وهو يشوفلها من ورا النظارات بإبتسامه.
خشت داخل وردت الباب في وجهه...
هو ضحك وعض ع شاربه..
🍁خشت داخل وقعدت تنادي..
تهاني:مريم..مريومه..
طلعت مريم من الكوجينه وهي قاعده بالحوايج اللي مشت بيهم للكليه..
مريم وفي يدها شيشة مية:نعم..
سارة؛خوك جي ..
مريم بصدمه؛خوي!..
ومشت طلعت من الحوش..
وتهاني تنهدت بضيق ومشت لدارها...
🍁برا...
فتحت مريم الباب وقعدت تشبح لخوها وهي خايفه..
معاذ؛ماتبيش دخليني!؟
مريم وخرت عن الباب وقالت:خش..
هو ابتسم وخش وسكر الباب..وخداها في حضنه..
هي شدت فيه وبدت تبكي..
معاذ:بتبدي بدسكة البكي خلاص عاد..
مريم ببكي؛استاحشتكم..
معاذ مسح ع ظهرها وقال:حتى حني..
بعدت وقالت؛شن حال بابا وماما...فنصت عيونها وقالت..قول الحق جيت ع خاطر فيهم حاجه ولا؟!
معاذ بضحكه:لا والله مافيهم حاجه كلهم بخير بوي اللي بعتني..
مريم؛علاش؟
معاذ؛باهي مش حتعزميني ع حوشك وتقوليلي تعال اشرب فنجان قهوة..
هي ابتسمت وقالت:تعالى...شدت في يده وخداته معاها لدار الدروج وهو مبتسم طول الوقت..
🍁🍁🍁🍁🍁
الساعه الخامسه والنصف عصرا....
في مكان زياره..
كان مقعمز يستني...ضام ايديه لبعض وحاطهم ع الطاوله وهو سارح..
المكان الموجود فيه توا ماتوقعش يجيه يوم يكون موجود فيه...
زيارة..ومش لأي حد...لولده..
▪▪▪▪▪▪
◇لهداكا الوقت واني مازال مش مستوعب ان ولدي محكوم عليه ومحبوس..الموضوع ماكانش ساهل ع واحد زيي عاش عمره وهو متمسك بالإلتزام بالقوانين...مستقيم...ماخشش مركز شرطه في حياته وللأسف صغاره هما اللي اضطروه ينحط في هالموقف...لكن اني كنت نستحق..اللي كان مفروض يكون في الحبس اني مش ولدي...
▪▪▪▪▪▪
وفي عز سرحانه انفتح باب حديد كبير بدوا يخشوا منه السجناء..
وهو التفت يستنى يشوف ولده بان عليه..
ابتسم من قلبه...وعيونه غرقوا بالدموع...وناض وقف..
زياد لما شافه بانت ع  وجهه الفرحه مشاله طول..
زياد؛شن جو..
هيثم خداه في حضنه وقال:ع قولتكم بيك حلو..
ضحك زياد وضم بوه بقوة..
بعدين باس ع راسه...
واسعد الكبير والعجيلي اللي كانت جايتهم زياره كانوا يشبحولهم..
بس عقيل اللي كانت جاياته زيارة حتى هو لاهي بالمراة المختمرة اللي مقعمزة قدامه ويهدرز عليها..
قعمز زياد مقابل بوه وقال؛هاه شن خباركم شن دايرين..
هيثم؛كلنا امورنا تماما ماتشغلش بالك...انت اللي خبرنا عن حالك ايه نعرفه من مكالماتك لكن توا نبي نسمع بالتفصيل...
زياد بإبتسامه؛كل شي ماشي تمام والحمد لله..يعني اني تأقلمت بسرعه..رفع حواجبه وقال...خديت بروفا ايام المركز..
هيثم ضحك وهز راسه وقال:والقرايه؟
زياد:اهو شادين اني وخليل..
هيثم غير عيونه لإيديه...
زياد:بيدير امتحان المفاضله..
هيثم هز راسه وقال:شن جو فاتح؟
زياد بضحكه؛مليح...باعتلكم حاجه..
هيثم شبحله وقال؛شن هي؟!
زياد؛حاجه حلوة ليك وللعيله..
هيثم بإبتسامه؛شكله امور السجن حق متحسنه..
زياد ابتسم وقال؛ايه كويسه...
هيثم؛عندكم مصلى هني..
زياد:الحمد لله يفتحوا فيه اوقات الصلاة بس وفي معانا سجين هني شيخ هو مانحكيلكش ع الراحه اللي نحس بيها لما نسمعه يتكلم..
هيثم؛شيخ!
زياد بإبتسامه؛محكوم مؤبد لأنه قاتل واحد دفاع عن ارضه وماله اللي جايين بياخدوهم غصب..هوينا اللي مقعمز غادي..
هيثم التفت وين ماأشر زياد بعيونه شاف عقيل لاهي مع المراة المختمره اللي قدامه...غير عيونه عنهم وجو ع اسعد الكبير اللي كان مقعمز قدامه واحد يهدرز عليه..
••اسعد:وشن تاني..
:وكابوريا صفوه هو وخوته وولاد عمه اللي كان هارب عندهم..
اسعد:يبيها الكلب..باهي وشن صار في اللي كلفتك بيه..
:ياسيدي دورت وراه..بعد حبسته الورشه تسكرت ووضعهم مولي بالهون..تعرف انت الدكتور اللي مناسبه قطع علاقته باخته اللي واخدها..
اسعد؛قصدك اخته مازال قاعده ع ذمته؟
:ايه ياكبير وقاعده في حوشها اللي يكون شقه فوق حوش اماليه...
اسعد شبح جهة زياد وبوه وهو يفكر...
:هو شن وضعه داخل..
شبحله اسعد وقال؛غامض ماتعرفله شي..تعرف انه مقدم ع امتحانات الجامعه وبيخش طب..!
؛كيف!
اسعد:زدت تأكدت انه كان يخدم معانا تحت التهديد يعني مش حب في الخدمة معانا ولافالرياسه زي مايقولوا..
:المعنى؟
اسعد:الولد دماغه سم..ولا البيوع هداكا راهو العمليه تمت وكسبنا صفقه خسرنا في جرتها ملايين...مش مفرطين فيه وهو هني لازم نستفيدوا منه ومن وضع ماليه برا...اول شي نزعللوا عيونه ولو مانفعش....بنحط رجلي ع رقبته..
اللي قدامه هز راسه وهو ساكت...
ع بعد مسافه بسيطه منهم...
كان العجيلي يسمع في خوه شن يقول وقلبه محروق..
:هي راهو مادخلها بشي..
العجيلي وهو يحاول يضبط انفعاله:هي اللي دخلها هي..لو كانت ام كويسه وراده بالها من بنتها ماصارش اللي صار..
وعيونه تعبوا دموع..
خوه تنهد وجي بيتكلم..
سكته قبل ليقول اي شي وهو يقول؛تبي لما تجيني مرة نطلعلك تسكر ع السيرة الوسخه هادي معاش نبي نسمع عنها شي..
خوه غمض عيونه وهز راسه بعدين فتحهم وقال؛حاضر...
••زياد:كل مانشوفه نلقاه يضحك اول مرة نشوف في الحاله هادي..
هيثم غير عيونه عن طاولة العجيلي وقال؛شكلك تعودت ع المكان حق..
زياد شبحله وقال؛لازم نتعود تلاته سنين راهم..
هيثم ابتسم بعدين قال؛خالتك بعتتلك حوايج وماكله...وسارة دارتلك هدا...كب كيك وبعتتلك حاجه تانيه..
ضحك وقال:سبحان الله..
هيثم بإستغراب؛شني!؟
زياد بضحكه؛تو لما تروح للحوش تعرف..
••••••••••
"اوووو محشي ياولاد"
وانقلب المهجع تصفير وصيحات..
وزياد يتفرج عليهم ويضحك...
مراد؛هدا شني؟
قام زياد البوكس وقال:تحلايه..
فاتح قعد يشبح للبوكس وقال؛حاجه حوش صح..
زياد؛كب كيك..
فاتح قلبه طار وسط ضلوعه...ضحك وجي للبوكس وخداه..
زياد؛تي وين جيب جاي..
هرب منه وهو يقول؛انساه ياغالي اعتبره ماجاش..
:جيب جاي بلا معيله ياراجل..
فاتح ركب فوق الطاوله وفتح البوكس وخدي اول طرف..
زياد؛فاتح جيب جاي خيرلك..
فاتح وهو ياكل؛خليكم في المحشي...
الشيخ عقيل؛نبوا منه حتى هدا...
زياد؛تي تحشم ياراجل وجيب جاي..
فاتح شبح للشيخ وقال؛الشيخ عمي خالد والزوز الطيبين هدوكا"زوز مساجين من عمر خالد وعقيل"..هادم بس نعطيهم..
سراج ركب وقال؛تبي نشروا منك..
فاتح؛لو تدفعلي وزنك ذهب ماك ذايقه..
زياد؛تافه اقسم بالله..
ومشي وين مافي المحشي وواحد واقف عليه ويقسم فيه..
وباقي المساجين لحقوهم وسراج نزل حتى هو ولحقهم..
فاتح قعد يشبحلهم وهو مبتسم برفعة حاجب..
بعدين نزل ومشي لخالد ومدله؛تفضل.
خالد خدي طرف وقال؛مطرشق..
ضحك فاتح ومشي للشيخ؛تفضل يابركتنا..
خدي الشيخ طرف وقال؛داخل كل هذه الجلبه...إن...
فاتح بضحكه؛شن معناها جلبه..
الشيخ بضحكه:جاب بالعاميه..
فاتح؛اها ايه زبطتها..جلب..جلب زياد المحشي..جاب زياد المحشي..
وعقيل يضحك ويحرك في راسه يمين ويسار..
وفاتح مشي جهة الزوز تانيين عطاهم طرف طرف وقعمز ع الباقي بروحه...وكان في عالم تاني جميل...بعيد عن عالم السجن وكآبته..
🍁🍁🍁🍁
"قالت قوليله يأجل الموضوع توا"
مجاهد.عقد حواجبه وقال؛لأمتى يعني..
دانيه بضيق؛قالت مانبيش نتشتت ..
مجاهد؛تشتت كيف يعني؟
دانيه؛تقصد القرايه..
مجاهد قعد يشبح لدانيه بنظرة فيها شي من الغضب بعدين هز راسه وقال؛تمام...
ومشي من قدام الدار..
ودانيه سكرت الباب وهي مضايقه ع خاطره...
🍁🍁🍁🍁
"واااااو"
ماجده؛ياكبدي حتى فالحبس يديروا في الحاجات هادي..
هيثم بضحكه؛شكله دافع حقها فلوس يعني جاب حاجاته من حر ماله ماهو يخدموا غادي وياخدوا في اجر..
ريحان؛نبي وحده..
ماجده بضحكه:حاضر..
جنان؛واني واني..واني..
سارة وهي مقعمزة ورجلها تهز بعصبيه قالت؛واللي درته اني يافالحات..
ريحان؛ناكلوه الصبح..
سارة؛توا بتاكليه الصبح بعد نقبتي راسي وانتي تزني باش تاخدي طرف!
ماجده بضحكه؛تو ناكلوه الصبح متاعك ان شاء الله زي ماقالت وخيتك.
سارة؛تاكلوه!!!حتى انتي بتفوتي متاعي..
هيثم وهو ياكل في طرف كب كيك بالشوفان مناسب لحالته؛ولا يهمك بابا..اني ناكله متاعك..
كلهم قعدوا يضحكوا..
سارة بغيظ؛يتفهموني ان اللي داره هداكا خير من متاعي!! لكن باهي كان مازال درته..
وناضت ومشت لدارها وهي معصبه
ماجده بضحكه؛نغاره بنتك هادي..
وهيثم؛بكل..ماتحبش حد يفوتها في حاجه تحبها..
ريحان بهمس؛لكن هدا احلى من متاعها..
هيثم بصوت عالي:كيف ياريحان اللي جبته من زياد احلى من متاع ساره..
ريحان بصدمه؛بابا!!!
"باهي ياريحان باهي"..
ريحان؛علاش هكي يابابا!
وهما يضحكوا عليها...
ومن هالأجواء الحلوة...لأجواء مشحونه وكلها طاقه سلبيه في حوش الجيران...
••عفاف بعصبيه:هدا وين تبان الرجوليه ياراجل تبان وقت الشده في وقت زي هدا تخبط الحيط..تحفر الرشاد بش تجيل زرقك وزرق عيالك..
رفيق يسمع فيها وهو ساكت ويحاول يتحكم في أعصابه..
عفاف؛نوض تحشم ع وجهك...نوض تحرك اخدم ع راسك وجيب بش تعيش ولدك...خليك راجل زي خوك اللي قاعد يشقى بش يكفي حاجة مرته ومايخليها محتاجه لحد..اللي يحصله يقسم فيه علينا بش نجيبوا حكه حليب وشمالات لولدك..وانت راقد تحت المكيف وماد رجليك ياصحيح الوجه..
تي حتى مرت خوك مشت خدمت في حضانه تشمل وترضع وترد بالها من الصغار خدمه مش ليها بكل هي اكبر منها بوين لكن باش ماثقلش ع حد رضت بيها بش تكفي حاجة نفسها وتعطي فينا زياده..
رفيق بإنفعال:خلاص خلاص فهمنا..
عفاف؛ماتعليش صوتك عليا..
رفيق؛انتي اللي طلعتيني عن طوري يام..
سجى وهي رافعه ولدها:عندها الحق تبيك دير دم وتنوض وتجيب لولدك مايسكته..
رفيق؛سكري فمك وخشي جيبي حاجه من الذهب متاعك..
سجى؛نعم!
عفاف؛تجيب عينك وعين عينك تبي تولي ع الذهب متاعها يا تافه..
رفيق بعصبيه قال لفظ نابي وبعدها كمل يقول..مايمشي الحال الهم مايمشي الحال لين نلقى خدمه....وقال لفظ نابي تاني..
ضرباته امه ع صدره وقالت:اسكت ياكلب اسكت النساوين يسمعوا..امشي انتلف جيب لولدك حاجاته تحرك..ومن غدوة الفجر تطلع مع خوك ودبر في خدمه..
هو مشي بغضب وقعد يتمتم بألفاظ نابيه وشتائم...
وطلع من الحوش..
سجى في نفسها قالت"ان شاء الله معاد تولي"..
ومشت لجناحها..
وعفاف مشت لدارها وهي تقول:توب عليا ياربي..
وخشت وسكرت الباب بقوة..
وكناينها الزوز في الكوجينه يوتوا فالعشي بصمت تام ومن داخل موجوعات ع الحال...
ع خشة الحاجه صالحه اللي كانت في الحمام تتوضى للصلاة؛ربي يهديه ويصلح حاله...هاه طلعتي الكعيكات يانوسه..
نسيبه؛ايه خالتي.
هزت صالحه راسها ومشت طلعت..
مريم:تسمعي في صوت القطاطيس جعانات شكلهم..
نسيبه؛خل نطلعلهم شويه من القديد..
مريم دفتلها قديده موجوده في صونية دشيشه اللي بيتعشوها..
خدت منها شويه وطلعت بيها للقطاطيس..
طبست وعطتهالهم وهما طول هجموا عليها..
نسيبه ابتسمت وقالت:ربي يرزقنا بيكم يارب...
🍁فهالوقت..
كانوا يتعشوا في السجن ماعدا خليل.
اللي قعد حابس روحه في حجرته ويقرا وين يعيا..
يكرر ذكر"لاحول ولاقوة الا بالله" ويواصل...
•••وفي المطعم..
اسعد؛الزفت...البهيم...وقال شتيمه نابيه..اللي صب زيت في الغساله ع حوايجنا تو نعرفه بروحي من هو ويتحمل كان يقدر يتحمل..
العجيلي بضحكه؛مكبرها ياراس..ماهو صارت معانا قبل غسالتهم ماتنفع..
اسعد؛والغساله ماجتش وفسدت الا ع حوايجي اني..
العجيلي بضحكه؛حظك ياغالي حظك..
عقيل:اني مش عارف ليش داير الدوشه هادي كلها..اللي يسمعك يقول متعود تلبس في النظيف..
الموجودين بين اللي يضحك بكتمان واللي شاد ضحكته..
اسعد هز راسه وقال؛ ع راسي ياشيخ ع راسي..تمون ياكبيرنا..
عقيل ابتسم بتهم ورجع ياكل..
رشف اسعد وقال؛المهم الحيوان هدا تو نعرفه من هو تو نعرف.....
زياد بصوت منخفض:هي حق دير من قبل وهدا يدور في راس من يعكش..ولافي حد دارها قصدها..
سراج؛هيا دارتها قبل صح لكن ع الحوايج كلهم مش حوايج دون حوايج..
مراد؛في من يناشب فيه..
وائل؛نقطع ذراعي من منبتها كان مش فاتح..
شبحوا لفاتح لقوه مع زملائه يضموا في الماكله..
زياد ابتسم وحرك راسه يمين ويسار...
🍁🍁🍁🍁
الساعه العاشرة ليلا..
في الكوجينه مقعمزة هي وياه كان يتعشى وهي تساير فيه..
بعد كمل قال:الحمد لله..
مريم:نزيدك؟
جهاد:لا الحمد لله ساد..
مريم بإبتسامه؛صحتين...
جهاد بغمزة:سلمك ياعزوزة..
هي ضحكت وقلبها بدت تقوى دقاته قعدت بعيونها المغرمه معاه وهو ماشي للاوندينو يغسل في ايديه...
هو بعد كمل قال:بنركب ندوش ونرقد..
مريم:لا ماترقدش بنهدرز معاك في حاجه..
هو شبحلها شويه بعدين قال:تمام ماتعطليش..
ومشي طلع من حداها..
وهي ناضت تغسل في الماعين وتدعي من قلبها يوافق ع طلبها...
بعد ماضمت الحوسه...
سكرت الكوجينه ومشت ركبت فوق...
خشت للشقه....
لقاته مقعمز ع الصالون وحداه شرشاف ومتكي يشوف في تليفونه..
ابتسمت ومشت قعمزت جنبه وقالت:نعيما..
هو نزل التليفون وقال:الله ينعم عليك..قولي في شن بتحكي معاي..
مريم تنهدت وقالت:في حاجتين الاولى ان معاذ خوي جي اليوم..
جهاد وهو متفاجئ:وين؟
مريم؛هني للحوش ركبته الشقه وشربنا قهوة وهدرزنا..
عقد حواجبه وقال:علاش جاي؟
مريم؛يبعتلي سلام من بابا وماما ويبيني نمشي نزورهم..
جهاد؛وشن جد عليهم توا؟
مريم؛بابا ونعرفه مايقدرش ع فراقي ولايتحمل يقعد زعلان مني..وعيونها تعبوا دموع..
جهاد؛تبي تمشيلهم؟
مريم :انت شن رايك؟
جهاد؛اني عليك انتي تبي تمشي نرفعك..
مريم:شن رايك تخليها يوم الخميس؟
جهاد؛خلاص الخميس بإذن الله ناخد اذن العشيه ونجي نرفعك ولاتبي تمشي الصبح؟
مريم؛لا الصبح عندي محاضرات خلاص العشيه..
جهاد رفع حاجبه وقال؛باهي ماعطاك شي..
مريم:شن بيعطيني؟
جهاد؛مريم..
مريم ؛ماخديتش منه قتله جهاد مامنقص عليا شي عايشه في خير ربي وخيره..
ابتسم وقرص انفها وقال؛لسانك مايقدره حد ياعزوزة..
ضحكت وشدت يده بعدين قالت؛وتوا نجوا للحاجه التانيه..
تنهد جهاد وقال؛يستر الله..
هي بلعت ريقها وقالت؛باهي اسمعني للآخر باهي ماتقاطعنيش لين نكمل..
عقد حواجبه وقال؛تمام..
مريم:عندي بنيه تقرا معاي..عندهم حدا حوشهم مدرسه متاع تقويه...ويبوا ابلة انجليزي وانا الإنجليزيه متاعي كويسه..
فك يده من يدها وقاطعها وهو يقول؛لا..
مريم؛جهاد غير اسمعي..
قعد يساوي في المخده متاعه وهو يقول؛حولي بنرقد..
ناضت وهي تقول؛اسمعني قبل باهي..مش هكي جهاد..
خدي الشرشاف وتغطى بيه وقال؛بري ارقدي بري..
حطت ايديها في نصها وقعد تشوفله..
وهو غمض عيونه بيرقد...حس بيها مازال واقفه فتح عين وحده وقال..تي بري ارقدي غدوة تشيطيلي ريقي بش تنوضي..
مريم ضحكت بقلة حيله وقالت؛تصبح ع خير..ومشت لدار النوم...
وهو بعد مشت فتح عيونه الزوز وبدي التخميم اللي ولى ملازمه كل ليله...
ومارقدش الا قبل الفجر بساعتين...
ناض ع الفجر بالزبط ومشي نوض مريم اللي بالسيف فاقت...
هو بعد توضى وجهز نفسه مشي للصلاة..
وهي صلت..بعدين نزلت لوطا..
لقت الكل فايقين
نسيبه توتي في الفطور..
اللي كان شكشوكه دحي وجبنه وطواسي شاهي وحليب وصونية كعك حلو..
قعمزوا فطروا مع بعض..
وبعد الفطور...تهاني وتت روحها وطلعت للباص..
ونسيبه كذلك جهزت نفسها ومشت للروضه...
وهي وتت روحها وقعدت تراجي في جهاد..
كانت مقعمزة في الكوجينه بعد ماشطبتها..
تغمس الكعك في الحليب والشاهي وتاكل..
ع خشته هو ...
لاحظها ليها كم يوم مبدله الميلكا والحليب وبالكعك والشاهي بالحليب..
جاها وقال؛ترا شنطتك..
مريم:عندي فلوس..
هو خدي الشنطه وفتحها وقعد يدور فيها وفي الجزدان..
كان مافيشي اكثر من عشرين جني..والشنطه لافيها شكولاته ولاحليب..
شبحلها وقال؛تمت الشكلاطه؟
مريم وهي تخفي ارتباكها؛لامازال في...
جهاد؛والحليب..
مريم؛ايه حتى هو.
جهاد؛باهي وينهم؟
مريم بإبتسامه؛الحق اني لما جيت هني تبدلت طباعي..عجبوني الحليب والشاهي مع الكعك وادمنت عليهم خير من احسن شوكلاطه..والحليب بدي يزهقلي في كبدي بنفوته..
جهاد مدلها الشنطه وهو يشبحلها..
مريم خدتها وقالت؛خيرك؟
ابتسم وقال::انتي حلوة هلبه عندك علم..
قداش سمعت هالكلام قبل..بس عمرها ماأثر فيها زي توا..
توا بس صدقت انها حلوة حق...
جهاد؛هييي عزوزة وين رحتي..
هي ناضت وقفت وقالت بإبتسامة حب:معاك..
تنهد وقال:تمام موضوع المدرسه اللي امس بنمشيه لكن ع شرط..
مريم بفرحه؛شني؟
جهاد؛اللي تاخديه تصرفي منه ع قرايتك فقط...ماكلتك شرابك لبسك عليا اني بس مريم..
مريم بإبتسامة حب:حاضر..
حط يده في جيبه اللي فيها مدهولها وقال:خودي..
مريم:قتلك عندي..
خدي الشنطه حطهم بروحه..
وهي تشوفله بنظرات الحب يشع منها..ع راس لسانها الكلمه ومش قادره تقولها..
مدلها الشنطه وقال؛هيا...
هي خدت منه..وهو طلع قدامها يقول؛يام ماتبي شي؟
"سلامتك يما ربي يفتحها عليك "
جهاد ابتسم ومشي طلع وهي وراه بقلبها الهايم بحبه...
🍁🍁🍁🍁
في مدرسة المجد الثانويه للبنات...
في الفصل...
دانيه:يوم ميلاد اختي الخميس خاطري نديرلها شي نفرحها بيه بش مش عارفه شنو؟.
ربى:وصلتي..عندي اختي دير في طورطات وكيكات شن رايك نودك بوحده..
دانيه:جديات!
ربي بضحكه؛وعمات وخالات..
انبار ضحكت...
ربى؛عندها هلبه تشكيلات غير خسارة ماعنديش تليفون توا..المهم وحده منهم هكي ديرلك الصورة ع الطورطه..
دانيه وهي تفكر؛حلوة اللقطه...تمام تو نشوف...
شويه تسنيم من مقعدها قالت؛دانيه ..
دانيه؛نعم..
تسنيم:نبي رقمك..
دانيه رمشت عيونها وهي تقول؛ختشيبي مايسمحش..
البنات ضحكوا..
ازهار:تقول ماوحدة انخطبت غيرك..
دانيه؛طبعا في المدرسه هني مافيش بنت مخطوبه غيري.وخطيبي ضابط كبير وحماتي ابله جيهان..
ازهار:سبحان مغير الأحوال..
دانيه:سبحانه وتعالى..وانتي موتي بقهرتك..
البنات قعدوا يضحكوا..
ازهار:مش حنرد عليك عارفاتك فرحانه وماصدقتي شبطتي في الراجل ع علتك..
البنات شبحوا لدانيه..
وحده منهم قالت؛سكري فمك ازهار شن القطاف هدا..
ازهار؛والله اللي يطق الباب يسمع الجواب..
دانيه غيرت عيونها وقعدت تشبح لصوابعها اللي كانت تفرك فيهم ببعض بش ماتبكيش..
وربي وانبار يشبحولها بضيق..
ع خشة ابلة الماده..
دانيه تماسكت ولهت بيها عن اللي صار...
🍁اما في الفصل اللي قدامهم..
كانوا ياخدوا في حصة فيزياء..
يعطي فيها جمعه...
كان يسأل في سارة وهي تجاوب وهو يشكر فيها..
وميس في اخر مقعد مشغوله بيه وكانت منغاضه من سارة..
جمعه:تمام...توا بنخشوا في المنهج واول درس السنه هادي..
وميس تنهدت وقالت بهمس:ياحليلي..
وروعه شبحتلها بإبتسامه وحاجبها مرفوع بعدين شبحتله...
🍁واستمر اليوم الدراسي بالروتين المعتاد..
بس سارة كانت حاسه ان دانيه موليه بعيده عنها ومشغوله بصاحباتها الجدد..
مقعمزة معاهم وهما يهدرزوا ويبصروا ويضحكوا وهي مضايقه...
وين تم الدوام سارة مابتش تمشيلها نزلت لوطا طول...
🍁قدام المدرسه..
"سارة يامعفنه وينك"
سارة:اهو هني .
دانيه؛كيف تنزلي من غيري..
سارة:ماببتش نزعجك انتي وصحباتك الجدد..
دانيه قعدت تضحك..
سارة؛مافي شي يضحك.
دانيه بضحكه:انتي متحسسه ع الفاضي اني اليوم كله معاك انتي ع التليفون في الجامع حتى ع الفيس مهما ندير صحابات تقعدي انتي الأقرب..
سارة؛اني مادرتش غيرك انتي وتهاني تعرفي ماعنديش ع كترة الاصدقاء سادني زوز نطلع بيهم من الدنيا..
دانيه بضحكه؛ووك عليك دارما درتيها انتي صاحبتي الوحيده حتى لو رديتي خوي..
سارة بفجعه؛لالا مارديتاش اني..قلت يأجلها..ان شاء الله قلتيله رداتك؟!!
دانيه بضحكه؛لا ياهبله نبصر عليك..
سارة زفرت براحه وقالت؛خزي وقفتي قلبي..
ع جية باصاتهم..
سارة؛هي سلام يااقرب صاحبه.
ومشت لباصها...
دانيه بضحكه وهي ماشيه لباصها؛وعليك السلام ياصاحبتي الوحيده...
وعيون جمعه وهو في سيارته معاها لين ركبت وتحرك الباص..
تنهد بعدين حط يده ع الكلاكس مافكها الا بعد مادار دوشه قدام المدرسه..
جت جيهان تجري ركبت وهي تقول:درت العار خيرك..
جمعه بحده:ساعه هدرزة قدام الباب!
جيهان:كنت ناخد منها في رقم الأرتست للمة اختك يوم الخميس..
جمعه؛ماتشرحيلي شي..
وشغل السيارة وتحرك طول..
وجيهان تشبحله ع جنب بنظرة غضب...
🍁🍁🍁🍁
"بجد مش عارفه شن نقولك ابله نسيبه اولياء الامور يشكروا فيك هلبه وبسببك انتي بدي عدد المشتركين يزيد"
نسيبه بإبتسامه؛الحمد لله..
المديرة مدتلها ظرف وقالت؛تفضلي..
نسيبه؛هدا شني؟
المديرة؛مكافأه مني ليك ع مجهودك..
نسيبه؛صحيتي بس هادي خدمتي يعني..
المديرة:هدا فوق تعب يانسيبه لو سمعت كلام اولياء الامور عنك كنتي عرفتي ان هالمكافأه ماتجي شي قدام اللي حققتيه..
خدت الظرف وهي تقول بإبتسامه؛بارك الله فيك..
🍁وطلعت نسيبه من الروضه وهي في قمة الفرح..
ركبت سيارتها وهي تقول:اللهم لك الحمد حمدا يليق بجلال وجهك وعظيم سلطانك...
بعدين قامت هاتفها وشافت الخلفيه...
كان فيها صورة مكتوب عليها...
"لاحول ولاقوة الابالله لها تأثير عجيب في دفع الفقر.."
العبارة اللي حفظها جهاد..وهي لقتها مظلله في كتاب الوابل الصيب...خدتها وحطتها خلفيه وقعدت لازمتها طول الوقت...
فجأة رن تليفونها..
ضحكت بفرح وردت طول..
نسيبه؛ياروحي القلوب عند بعضها..
"كنتي تفكري فيا"
تنهدت وقالت؛امتى بطلت تفكير فيك..
سمعت تنهيده من الأعماق...بعدها قال
"ماعنديش وقت هلبه حبيبتي امتحاني يوم الاحد ان شاء الله تعالى نبي نشوفك غادي"
نسيبه؛من غير ماتقول حبيبي اني اصلا نراجي في اليوم هداكا بفارغ الصبر..
"تمام...ردي بالك ع روحك وامي وتهاني.."
نسيبه؛شن حال زيزو مانوصيكش عليه..
"اطمني اطمني اموره تم...."
وفصل الخط...
نسيبه؛الو...خليل...ايوه...تعبوا عيونها دموع..
نزلت التليفون وشبحت للشاشه...
طاحوا دموعها..دمعه وراها دمعه لين رجعت الرؤيه ادرقت..
مسحت دموعها وخدت نفس..بعدين حطت تليفونها قدامها..
شغلت السيارة وتحركت...
ومشت خدت بالمكافأة حاجات للحوش..
خدت دجاجه...وفازو زيتون..وشويه جبنه مبشورة...وطماطم..ومشلتت بالعسل والشوكلاته...
كانت تبي هاليوم يكون استثنائي..
ليهم هلبه ع الماكله القنينه....
وين وصلت للحوش..
كان خوها كيف مدرس قدام حوشه..
هي قعدت تشبحله..
وهو خش للحوش بدون مايعبرها..
بلعتها عبرتها وسكتت وخشت لحوش شيابينها...
🍀🍀🍀🍀
ويمروا يومين..
مريم بدت تخدم فيهم العشيه تعطي ساعتين وتروح...
وراجلها حصل لخوه خدمه في ورشه تانيه وبدي يخدم فيها غصب عنه...
وايام الدراسه كانت ماشيه عاديه..وسارة بدت تأقلم في روحها ع صاحبات دانيه وعجبتهم وبدت تتعرف مع دانيه عليهم...
ومجاهد خلا كل همومه ومشاكله ع جهه وولت سارة شغله الشاغل...ردها عليه وجعه هلبه وخلاه خايف من فقدانها..
لهدا قرر يدير شي من راسه..وكان ناوي ينفذه يوم الخميس..
🍁واه من يوم الخميس..
ومن اللي صار يوم الخميس..
بدايه من مدرسة البنات...
الساعه الحادية عشر والنصف...
دانيه؛هادي هي صورتها بالله عليك ردي بالك عليها..
ربى؛ماتخافيش في ايد امينه خدمتنا هادي راهو...المهم رقمي عندك امتى نكملوها نتصل بيك تبعتي حد يجيبها..
دانيه؛تمام..والتفتت ع سارة وقعدوا يهدرزوا وهما راكبين لين وصلوا لفصولهم..
في فصل دانيه كانت في حصة لإسماعيل..
والبنات لقوه في الفصل يراجي
خشوا وهما يلقوا في السلام برهبه
وقعمزوا ع مقاعدهم .
وهو كان لاهي باللاب توب متاعه
والبنات يطلعوا في الكتابات والكراسات
ربى كيف جت بدس الصورة
اسماعيل ناض وقال؛ماتفتحوش الكتابات وانتبهوا معاي هني..
هي حطت الصورة في وسط كتابها..
وركزت معاه..
وهو بدي يشرح..والعيون بنظرات اعجاب محاوطاته
 اسماعيل:يعني متلا يجيكم مثال زي هدا..
وقدم لمقعد ربى وخدي الكتاب وفتحه وهويقول صفحه 19..
والبنات بدوا يفتحوا في كتاباتهم...
هو حط ع الصفحه 19..وفجأة انطمس..
قعدوا يشبحوله بإستغراب يراجو يقرا المثال..
ربى حطت عيونها ع الكتاب فنصت وقالت في نفسها..
"حي ياحي"..
والبنت اللي جنبها ركزت..
هو بلع ريقه..وحك حاجبه بعدين قال:احمم..تمرين...شبحلهم ومرر نظره عليهم..رقم 3...
سكر الكتاب وقال:اقريه تسنيم..
ومشي وقف قدامه السبورة..
وربى خدت الكتاب فتحاته طلعت منه الصورة وحطتها في الشنطه..
وهو يسرقلها في النظر..
وهدا كله ودانيه مش منتبهه ع حاجه غير الدرس وبس..
🍁🍁🍁🍁
وصلوا صالحه وعفاف لحوش اهل المناسبه..
كانت لازم طيب من توا لان اللمه ع الغدي...مش في الليل...
اهل زوج المراة يسكنوا برا طرابلس جايين بيحضروا ويروحوا...
قعدوا صالحه وعفاف يراجو لين طلعتلهم...
صالحه؛والله العظيم ريحة تطييب..
عفاف قعدت تشم في الريحه وهي مستغربه..
جتهم مولاة المول وقالت؛اهلا..
عفاف:اهلين بيك..
؛علاش جيتوا توا حتى بعدين؟
عفاف؛قصدك عطلنا!؟
:لا مش هدا قصدي نقصد ان غسيل الماعين اخر حاجه..
صالحه:غسيل ماعين!!!..
؛ايه..مش انتم جيتوا من طرف كونيه ..
عفاف هزت راسها..
:واني قلتلها الطباخات حصلتهم نبي من يغسل الماعين بس..
صالحه؛لا وخيتي حني جينا بش نطيبوا ومادام عندكم من يطيب خلاص..
المراة؛لا بالله لا ماحصلتكم الا بالسيف...مستعده نعطيكم الف الف غير ماتحطونيش في موقف بس...
صالحه:قتلك احني مش وقفات..
عفاف:كله زي بعضه ياصالحه..
صالحه بصدمه؛قصدك بتغسليهم!؟
عفاف:لاعيب ولاحرام..
المراة:والله نعطيكم شن ماتبوا..
عفاف؛اللي بتعطيه باهي...
المراة ابتسمت وقالت؛تمام...معناها تفضلوا نوريكم الطريق..
ومشت وعفاف مشت وراها وصالحه لحقتهم وهي متكنطيه..
كلفتهم المراة لأنهم فاضيات بتجهيز السفر..
وقعدوا يوتوا فيهم..
وعفاف تخدم من قلبها ع خاطر القرش لأنها بأمس الحاجه ليه..مش وقت كبرياء ولاغرور.....
لازم تساير ظروفها...
وفي عز ماهي تخدم..
"هاه شن صار في الرز طاب"..
وقفت ع حيلها لما سمعت الصوت تعرفه كويس..
طلعت صاحبة الصوت ومعاها وحده تانيه تعرفها عفاف عز المعرفه..
عيشه"ام جمعه"؛لا ماشاء حاجه صح..
امنه"عمة جمعه":قتلت نعرفهم نفسهم في الماكله الله يبارك...
وعفاف تشوفلهم هما الزوز والدمعه فرت من عينها غصب عنها....

#الحوقله
#كفاح
#البطل_المغمور2