البطل المغمور "زهور القمر"

الجزء التاسع عشر2

#البطل_المغمور2  "زهور القمر"
#جمان_فريد
#الجزء_التاسع_عشر "آلام الآثام2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
واقفين مع بعض في جنان حوشه..
يسمع فيه كيف يحكي بألم وارتباك شديدين وكيف قاعد يقاوم بش مايبكيش..
جهاد بنبرة مرتجفه:مش عارف كيف ندير مش عارف..ماتحسابش روحي خشيت ع حاجه صعبه هكي..كلمة صعبه شويه على اني فيه..انت قتلي رد بالك تكسرها واني قعدت نحاول والله قعدت نحاول..لما جيتها نبيها..نبي تولي مرتي..جي بين عيوني كل شي..ماقدرتش والله ماقدرت..طلعت من حداها واني هارب منها ومش عارف..شن ندير..
هيثم حط يده في نصه وهو يشوفله بقلق:شن كانت ردة فعلها...
جهاد خبط جبهته وقال؛مانعرفش..مانعرفش طلعت خديت وجهي وقعدت ندور بالسيارة في الشوارع..
هيثم ضيق عيونه وهو يشوفله..بعدين حركهم بإتجاه حوش خالد لشقة جهاد تجديدا وقعد يفكر لثواني..
بعدين قال...برالها...
جهاد:شن نقوللها باهي..
هيثم شبحله بتوتر وقال بإنفعال:مش وقت كلام برالها قبل حاولت تنتحر ياجهاد!..
جهاد جاه شاهد العقل...وتفكر لما منعها مرتين من الانتحار..
طول طلع يجري من حوش هيثم..
وصل في حوشهم فتح الباب وخش يجري زي المجنون..
ركب يجري لين وصل في باب الشقه .
وهو يرعش مع بعض فتح الباب بصعوبه وخش يجري وينادي:مريم...مريم..
مشي لدار النوم مالقهاش...شاف الحمام مش موجوده...ولى للصالون وشاف الفيرندا لقاها مسكره..شبح يساره شاف المطبخ..
بان عليه زي الخيط من الدم..
توسعوا عيونه ع الأخر من الفجعه..
خشلها طول...شاف مريم طايحه ودمها مغطي الارضيه حداها..
سمع صوت انينها اللي لايكاد يسمع..
جاها يجري طبس عليها وهو يقول:علاش يامريم علاش ...
خداها وقامها بين وطلع يجري من الشقه وهو يقول..
ياربي لا..يارب..يارب..لا...ماديرهاش فيا مريم بالله عليك..
نازل يجري بيها من الدروج لين طلع بيها برا وهو يقول..
"ماديرهاش فيا يامريم.."
امه كانت في الحمام..طلعت منه لما سمعت صوته..
قلبها قريب وقف من الخوف..طلعت تجري..
لقاته طالع بالسيارة من الحوش..بعدين شافت اثر الدم قريب ماتت...
وخشت داخل تجري..
🍁وبرا..
جهاد طلع بالسيارة...وهيثم في الباب كان واقف..
وين شافه جهاد نزل بسرعه وقال:بالله عليك تعالى سوق عليا..
هيثم سكر الباب وجاها بسرعه خدي منه المفتاح وركب وهو ركب جنب مريم..
وطول هيثم طلع بالسيارة..
طبعا صوت الدوشه فيق بعض من الجيران..
وحوش خالد كله فاق...
عفاف بفجعه؛قعد يقول ماديريهاش فيا مريم...المراة اشبح شن ترالها اشبح شن دارلها..
ع جية نسيبه تجري؛هيا عمتي..
تهاني؛كيف بتعرفوا وين مشي بيها.
نسيبه بتوتر؛لأقرب مستشفى هني ماعنده وين يمشي تاني كان حالتها خطيره..هيا عمتي..
ربطت عفاف محرمتها ومشت مع نسيبه..
صالحه بقلق:يارب سترك وعفوك ياربي..
وتهاني تشوف لصالحه كيف تدعي وقلبها يدق بقوة من الخوف..
🍁🍁🍁🍁
في الطريق..
هيثم؛لفه ع يدها وحاول تشد عليها..
جهاد وهو يلف في الشاش قال بصوت يرجف:باهي باهي..
وبعد مادار اللي قاله عليه..قعد يبوس في راس مريم وهو يقول؛ماديرهاش فيا والله ذنبك مانقدر نتحمله..وضمها بقوة..
وهي خلاص فقدت الوعي..
وصل هيثم للمستشفى خش بسرعه ودرس قدامها ونزل يجري وهو ينادي...اسعاف ...اسعاف..حاله خطيره...
اللي شافوه عرفوه طول...
ولحظات وجوهم يجروا بالباريلا..
حط جهاد مريم عليها..وخشوا بيها يجروا..
هيثم؛تبي دم مية في ميه..شن فصيلتها هي..
جهاد وهو في قمة الخوف؛+O...
هيثم بأسف؛زمرتي لكن مش حيخلوني نعطيها....
جهاد:كيف ندير باهي..
هيثم اشر بيده عليه وقال؛خليك هني اني تو نتصرف..
ومشي من حداها بسرعه..
وجهاد يكاد يفقد وعيه من اللي قاعد يصير..
رفع راسه فوق وقال:يارب ارحمني..مانقدرش نتحمل ذنبها ياربي ارجوك ارحمني..
🍁قدام المستشفى..
خشوا عفاف ونسيبه يجروا..
سألوا عن حالتها وعطوهم عنها معلومات..
انصدموا بقوة لما عرفوا انها حالة انتحار..
مشوا وين ماهي موجوده...
عفاف اول ماشافت جهاد كيف مقعمز ع روس صوابعه وحاط راسه بين ايديه..جاته تجري وهي تقول؛خيرها المراة شن جاها.
جهاد رفع عيونه شاف امه وقف طول وضمها بقوة...
هي تفاجئت فيه..
وهو قاعد يضم فيها بخوف شديد..
هي حطت ايديها ع ظهرها وقعدت تمسح عليه وهي تقول؛خيرك ولدي شن في...شن جاكم..
ونسيبه تشبحلهم بنظرات كلها قلق ودموعها ينزلوا...
ع طلعت الممرضه تجري..
بعد جهاد عن امه وجاها وقال؛شن صار فيها..
الممرضة بتوتر:تبي دم نزفت هلبه...ومشت تجري وخلاته..
هو غمض عيونه بشده وقال...يارب...
فتح عيونه ولف ومشي للحيط وخبط راسه فيه وقال:يارب..
عفاف بشهقه؛لاياجهاد..
ونسيبه حطت يدها ع فمها وهي تشبحله بصدمه..
جهاد شبح لامه وقال؛كان صارت فيها يام ربي مش مسامحني يام مش مسامحني..
هي ضماته وقالت؛مايصيرلها شي ولدي مايصيرلها شي..
🍁جهاد حس ان مريم ممكن تموت
بسببه وشاف ان هدا ذنب كبير مش حيقدر يتحمله..
خلاها تموت منتحره..خلاها تخسر فرصتها..وهو معاها خسر فرصته...
شن ممكن يمحي ذنب كبير زي هدا..!؟
جهاد جرب القرب من الله...وعرف شن معنى الخوف منه..
وطبيعي اللي زيه ينصابوا بحالة من الهلع من اللي قاعد يصير توا...🍁
اما هيثم بعد ماحصل متبرعين في المستشفى من الموجودين..
رفعهم معاه دارولهم تحاليل وبعدين خدوا منهم دم...
وهو بعد ماطمن ع وضع مشي يشوف شن صار فيها...
وصل فيهم..
جت نسيبه قدامه هي لما شافاته اندهشت.
اما هو فاتها ومشي لجهاد وقال؛هاه شن صار..
جهاد وهو يشوفله بنظرات ضعف؛يزيدوا فيها دم..
هيثم:كويس..اني حصلتلها متبرعين بإذن الله كل شي حيولي تمام ماتخافش..
وعفاف تشبحله وهي متفاجئه فيه..
شن قاعد يدير هني!؟ ومع جهاد بالذات...
بعد عنهم ومشي بيدير اتصاله بخالته بش يبلغها...
ونسيبه معاه بعيونها وهي محتاره في امره...
🍁وفي هالوقت..
تحديدا عند مريم...
اللي كانت غايبه عن الدنيا تماما..وفي عالم تاني..
في مرر طويل مظلم..ظلامه شديد..دامس..
كانت شبه فاقده الجاذبيه فيه  وكأنها طير..
هي كانت حاسه بخوف شديد..فاتوا من حداها اطياف ناس من السرعه متاعهم ماقدرتش تشوفهم..
بس كانت تسمع في صوت عياط وصراخ يشق السما الشق من قوته...
وكأنه صراخ ناس قاعده تتعذب..
هي زادت خافت لدرجة الرعب..
وكانت كل مالها تقرب من مصدر اصوات الصراخ..
كان في اخر هالنفق المظلم ضي..
لا ماكانش ضي..كانت نار ...
واصوات الصراخ تشتد وتزيد..
والاطياف تمر من جنبها بسرعه وتوصل لاخر الممر وتختفي..
وهي كل مالها تزيد تقرب..
••••••••
:دكتور النبض وقف..
الدكتور شاف للشاشه وقال:بسرعه شغلوا جهاز الصدمات...
وبرا...
كانوا كلهم يدعوا بخوف..
جهاد كان مغمض عيونه بشده ويدعي بهمس.
"يارب..يارب..عطينا فرصه يارب..يارب عطينا فرصه يارب"
امه سمعت همساته..شبحتله وهي مستغربه وتتسائل في نفسها...شن قصده!!؟
وداخل..
الدكتور حط جهاز الصدمات ع مريم وبدي ينعش في قلبها..
••••••••
قربت من اخر الممر المظلم خلاص وكانت حطيح في هاويه..
كانت اسفلها نار منظرها يخوف ماتشبحش النار اللي تعرفها..
وتسمع في اصوات الصراخ..والإستغاثه.....
بدت تعيط حتى هي بس صوتها ماباش يطلع...
••••••
الدكتور:قوي..
وحط الجهاز عليها مرة تانيه...
••••••
ومريم خلاص وصلت للنهايه...ومازال تحاول تصرخ من هو ماشافت بس صوتها ماباش يطلع..
•••••••••
الدكتور وهو داهش:اخر مرة قوي...
وحط عليها الجهاز مرة تانيه..
••••••••
ومريم لما وصلت ع النهايه...فجأة في شي وقفها...
وضربها بقوة ع صدرها...وردها بسرعه البرق للخلف لين طلعت من هالممر الطويل المظلم المرعب...
•••••••••••
"دكتور النبض رجع"
الدكتور شبح للشاشه بعدين غمض عيونه براحه وقال هما..
"الحمد لله"
🍁🍁🍁🍁🍁
واقفين في الممر يستنوا حد يطلع يطمنهم...
وجهاد مازال حاله مغمض عيونه ويدعي..
ع طلعة الدكتور..
هيثم مشاله طول وقال؛بشر!
عفاف:جهاد..
فتح عيونه وشاف جهة هيثم والدكتور ومشالهم طول..
الدكتور:الحمد لله نجت بمعجزة حقيقة لأنكم لما جبتوها حالتها كانت خطيره جدا نزفت هلبه وكنا حنفقدوها..
وجهاد قلبه ينعصر عصر من الألم..
هيثم هز راسه وقال:الحمد لله..باهي توا شن وضعها بالزبط..
الدكتور؛قاعدين نزيدوا فيها دم وبإذن الله حيكون وضعها احسن....
جهاد تنهد وقال؛الحمد لله...
الدكتور:بس موضوع الانتحار نبي نعلق عليه..شن اللي صار معاها بش وصلها لهالحاله..
جهاد معاش عرف شن يقول..
"القرايه"
شبح جهاد لهيثم..
ابتسم هيثم بربكه وقال:هي طالبة طب في السنه الثالثه وصايرلها ضغط نفسي رهيب من القرايه مش اول مرة تحاول تنتحر..
الدكتور:فعلا في طلبه صار فيهم هكي من الضغط النفسي مذكر قصة طالب سنه خامسه قبل اخر امتحان ليه لقوه شانق روحه في داره...ع العموم ردوا بالكم في الجديد لازم تراقبوها وتحاولوا تخففوا عنها الضغط النفسي...
هيثم شبح لجهاد..
جهاد غير عيونها وشبح للدكتور وهز راسه وقال:إن شاء الله ان شاء الله..
الدكتور:الحمد لله ع سلامتها..
هيثم وجهاد:الله يسلمك..
مشي الدكتور....
وعفاف نادت جهاد؛جهاد..
التفت ومشالها..
ونسيبه بعيده عنهم شويه وتشبح لخوها..
هيثم كانوا عيونه ع جهاد وعفاف..بعدين غيرهم وشبح لنسيبه..
هي ملامح وجهها كان باين فيهم البكاء..
وهو غير عيونه عنها وقال؛جهاد..
التفت وشبحله..
هيثم؛اني مروح...
جاه جهاد وقاله؛بارك الله فيك مش ناسيلك معروفك معاي لاخر يوم في عمري..
هيثم؛درت اللي درته ع خاطر المسكينه اللي داخل بس..موقفي منكم قاعد هو هو ماتغيرش..
جهاد قعد يشبحله بأسف..
هو تجاهل نظرته وقال:السلام عليكم...
ومشي من حداهم...
وعيونهم معاه لين درق عنهم...
نسيبه بدت تبكي..
وعفاف حطت يدها ع ذراعها وقعدت تمسح وهي تشوفلها بحزن...
🍁🍁🍁
ومن حالة شخص كان يبي يتخلص من الم الإثم بألم اعظم منه..
لشخص تاني قاعد يعاني في الألم وهو صابر وظان بالله انه قاعد يكفر عنه في ذنوبه باللي يعاني فيه..
خالد...اللي طلعوه من مشفى السجن في الليل..
كاز معاها في سيارة السجن صبري العجيلي مع العناصر..
صبري كان يشبح لخالد وهو يذكر في كلام الدكتور..
《الوضع مولي خطير مع الأسف وضع القرحه تآزم وخوف كبير من مضاعفاتها لازم ينتظم عن الدوا يحاول قدر الامكان يبتعد عن اي شي يوتره ويتعب نفسيته ونظامه الغذائي لازم يكون صار مافيشي تهاون..وياإما لاقدر الله مش حيتحمل مرة تانيه》
خالد تنهد وهو يشوف للفراغ..
العجيلي:شن جو..
خالد هز راسه وهو ساكت..
🍁وصلوا للسجن...
وصلوا خالد للمهجع متاعه...
والعجيلي مشي للمهجع متاعه...
•••خش خالد عليهم..
لقي بعض منهم راقد والباقي ساهرين..
منهم زياد وفاتح وجماعتهم سراج ومراد ووائل..
كلهم قعدوا يتحمدوا ع خالد بالسلامه بالكلام..
وهوبس كان يهز في راسه ردا عليهم..بعدين خش لداره وسكرها عليه..
سراج؛قلب ولده حجر لادوره ولاسأل عليه..
زياد؛ماتقولش هكي..مافي حد يعرف شن صاير بيناتهم..
سراج؛شن من ماكان اللي صاير يقعد بوه..
فاتح بإبتسامة متهكمه:ساهل الكلام ياسراج..شي ماعشتاش ماتحكمش عليه..
مراد؛مزبوط..كلام خليل امس كان واعر واضح الراجل موجوع ع الآخر وماشافش شويه في حياته..
وائل:في النهايه بوه اللي وصله لهني..
زياد؛علاقتهم بيه كانت فريده من نوعها كانوا مايحبوا حد قد بوهم..نقصد خليل وخوته..خليل بالذات بوه كان عنده بالدنيا ع عيوبه..هدا علاش اني مستغرب الوضوع بيناتهم وحاس ان في شي تاني لهدا التمسوله العذر...
سكتوا كلهم وهما يفكروا في كلام زياد..
🍁والعجيلي لما خش للمهجع قد يدور بين الفايقين ع خليل مالقاشي..مشي طول لداره خشلها وسكر عليه...
وفي دار تانيه في نفس المهجع...
مكالمه هاتفيه..بهاتف نوع"بيلا"
اسعد؛مافيش عنده اي مشكله يارايس اطمن من ناحيته ع الآخر.
"ومع هذا رد بالك..المدة الجايه حتخش بضاعه للبلاد وضع خشتها فهالظروف صعب شويه اني بنحكيلك التفاصيل وانت عاود احكيله وشوف شن يطلع منه"
اسعد؛ان شاء الله..بس يارايس...التموين هني ناقص وجماعتنا بيطلعوا عن طورهم..
"في شي جايكم عن قريب بس زي ماقتلك حني مش ناقصين لفت نظر الموضوع يبي تكتيك"
اسعد؛تمام...
"اسعد...رد بالك يااسعد"
اسعد بإبتسامه؛قتلك اطمن ياغالي كل شي تحت السيطره..
نهي المتصل المكالمه..واسعد مشي دس التليفون كويس في مرتبه السرير متاعه من داخل...بعدين اتكى عليه وبدي يفكر في اللي بيديروه مع خليل القدام...
🍁🍁🍁🍁🍁
تاني يوم..
الساعه العاشرة صباحا...
في وسط حوش كبير...
في وحده من دياره...
دار نوم العريس الجديد..
كان مقعمز يفطر مع عروسه ويهدرز هو وياها..
ضرار:امي مش من نوعية العزايز المتسلطات طيبه هلبه وجوها مليح..
دنيا بإبتسامه؛ايه ربي يحفظها عمتي عسل..
ابتسم وقال؛توا بعد تقرب الصلاة نبيك تلبسي حاجه قنينه واطلعي للعيله غدانا معاهم راهو نبيك تخشي فيهم من اول يوم تتعرفي عليهم  وتعرفي جونا وتنسجمي معاه..
دنيا بإبتسامه؛ان شاء الله..
ضرار بإبتسامه؛كملي فطورك..
هزت راسها وولت تاكل..
وهو فرحان بيها..حصل وحده تبان قطوسه مغمضه ومطيعه وصوتها لايكاد يكون مسموع..
هدا كان حالها معاه من لما عقد عليها...
بعد الفطور...هو بدي يجهز في نفسه لصلاة الجمعه..
لبس عربي وتأنق وطلع للعيله...والزغاريد والشتاوات بدت..
وهي في دارها كانت تجهز في نفسها..
رن تليفونها مشت طول ردت عليه.
دنيا:هلا امل.."اختها"
"هلا ياعروس شن جو ؟!"
دنيا بإبتسامه؛تمام..
"باهي الحمد لله...ضرار حداك؟"
دنيا؛لالا..
"باهي بنقولك هداكا كلمني امس وسألني علاش رقمها مقفل قتله فوتها تزوجت خلاص توا وشفرتها طربقتها"
دنيا:وشن قالك الحقير.
"قال ربي يهنيها وسكر"
دنيا بكره؛سحيقه افتكيت منه ومن خليقته المنحسه...اسمعي امول بنسكر توا باهي بعدين اني نتصل بيك كان حصلت فضوة..
"باهي تمام..سلام"
دنيا؛سلام..وسكرت...
وولت تجهز في نفسها...وبعد كملت حطت وشاحها ع راسها حط..
ومشت طلعت من الدار وهي مرتبكه...
كانت تسمع في صوت الهدرزة والضحك..
رجاله ع نساوين..الوضع هدا اربكها مش متعوده بيه..
ماعرفتش كيف دير تولي ولاتخش..
وفي النهايه قوت قلبها وخشت عليهم..
الصاله كان فيها خالات ضرار وبناويتهم ونساوين عمامه من بينهم ام مريم..وخوته المتزوجين ونساوينهم ماعد رضوان كبيرهم اللي كان عزابي...
لما شافوها قعدوا يزغردوا..
وضرار يشبحلهم وهو مبتسم..
هي مشت طول لخديجه سلمت عليها وكبت ع راسها..
خديجه:تبوسي ع الكعبه بنيتي..
دنيا؛سلمك عمتي...
وقعدت تسلم ع نساوين العيله والبنات اما الرجاله..
وقفت وشبحلتهم وقالت بخجل؛كيف حالكم..
خديجه؛بري سلمي عليهم سلمي زي وخيينك هدوما ماتتحشميش..
هي شبحت لضرار هز راسه بالمواقفه..
قدمت سلمت ع خوته بالواحد ولما وصلت في رضوان صافحها وقال لخوه:ماعندهاش خوات...
هي تحشمت هلبه..
ضرار بضحكه؛للاسف كلها محجوزات..
رضوان؛كان نندري عليها هكي راني سبقتك..
هما يضحكوا وهو معاهم..
لكن دنيا كانت متحشمه ولما بتجي تجبد يدها رضوان يشد عليها بقوة.
رضوان:حشوميه هلبه..انطلقي جونا عادي حني
بصايريه وفرفوشين..
خديجه؛خلي البنت عاد خلاص..
طلق يدها وهو يضحك..
وهي اللي كانت مرتبكه ومتحشمه مشت قعمزت حدا عزوزتها..
خديجه؛فطرتي باهي..
دنيا:الحمد لله...
وقعدوا يهدرزوا عليها وهي كل مرة ترد ع حد وكانت مازال منحرجه شويه...
وهي تهدرز شبحت لراجلها لقاته يهدرز مع خوته..غيرت عيونها عنه جو في عيون رضوان..
دارلها حركه بأنفه وهو مبتسم..هي ابتسمت بإرتباك وغيرت عيونها عنه...
🍁🍁🍁🍁
"بالله خشي لبسيها وغطيلها شعرها كويس"
الممرضه خدت البالطو والوشاح وقالت:تمام..
ومشت خشت ع مريم الحجره..
وجهاد مشي قعمز ع الكراسي..طلع من جيب الكاشمير متاعه مصحف صغير فتحه وبدي يقرا...
••وامه في الحوش قلبها معاه ومع مرته وتبي تعرف شن اللي وصل المراة للإنتحار مامشتش عليها حكاية القرايه لأنه مابانش ع مريم انها كانت مضغوطه بكل..
فاقت من سرحانها وهي تسمع في نسيبه تقول..
نسيبه؛غدوة تطلع نتيجة امتحان المفاضله..
تهاني؛تتوقعيه ينجح قصدي الامتحان صعب زي السم مش اي حد يفوته..
نسيبه بإبتسامة ثقه؛خليل يفوته..
عفاف؛كان تعطيني شويه من الراحه اللي عندك وين تحكي ع خليل تقول شهرين تلاته وبيطلع..
ضحكت نسيبه وقالت؛مانبيش نرد عليك بش ماتقوليش هادي هبلت ياعمتي..
عفاف؛لالا مانبيكش تردي خليك مرتاحه هكي تبردي في ناري شويه...
ضحكت نسيبه..
وتهاني ابتسمت بعدين قالت؛امي مش مخبرين اهل مريم باللي صار؟
عفاف:خوك حلفني قالي مانقولش خايف من اللي بيصير كان علموا...
نسيبه؛عنده حق الحكايه كبيره هلبه...
ع جية الحاجه صالحه؛درتوا لعروفه مكيرينه مايحبش الكسكسي..
نسيبه بإبتسامه؛اني درتهاله الزعيم..
طلعلهم من الروشن وقال:والله انتي الزعيمه يانوسه..
ضحكوا..
صالحه؛شن دير غادي..
عرفه؛نلعب مع نوسه وعيلتها..
نسيبه؛باهي اللي ذكرتني خل نطلعلهم ماياكلوا..
عرفه؛جيبهولي ..
نسيبه بضحكه؛باهي..
صالحه:راك تنسى قرايتك ياولد..
عرفه بملل:حاضر ياحناي حاضر...
ونسيبه تشوفله وتضحك...
🍁🍁🍁🍁
الساعه الثالثه بعد الظهر...
مقعمزين في الصاله يتغدوا كلهم مع بعضهم في صمت...
شويه هو تكلم وقال...
مجاهد؛يام..
سدينه؛نعم..
مجاهد؛شن رايك في بنت اخت مقبوله..
كلهم شبحوله..ودانيه وقفت ماكله..
سدينه بإستغراب؛والله ع اللي نشوف فيه بنيه كويسه ومحترمه..علاش تسأل..
مجاهد؛بوي حكالي عليها ويبيني نخطبها..
دانيه بصدمه؛كيف!!؟
ورتاج تشبحله..
هو شبحله ببرود وقال؛خيرك !
دانيه:من جد تسأل انت بنت اخت مقبوله!
مجاهد؛علاش شن شايفه عليها..
دانيه:ماشايفه عليها شي لكن سادها ان هديكا خالتها..واشرتله بحواجبها وحركت راسها..هو فهمها تقصد خو مقبوله عمران..
غير عيونه لأمه وقال؛مادام امي شكرت فيها معناها نتوكل ع الله..
رشيد قعد يشبحله بإستغراب شديد ومش قادر يعلق بكلمه..
سدينه بتردد؛والله كان انت راغب ماعندي مانقول...
مجاهد هز راسه وقال؛بعد العصر ان شاء الله نفتح الموضوع معاهم هي وبوي..ورجع ياكل عادي..
ودانيه تشوفله ودمها محروق ومش عارفه كيف دير بش تمنعه من الكارثه اللي ناوي يديرها...
🍁🍁🍁🍁
في مطعم السجن..
كانوا السجناء مقعمزين يتغدوا..
ماعدا زياد اللي كان واقف ع بوفيه وقدامه فاتح..
فاتح؛خلاص هو هدا ارفعله..
خدي زياد السفرة وقال؛حتى الماكله الصحيه متاعك تسهف منور...ومشي..
وفاتح يضحك وبعدين قال؛من مازال ماخداش حوت...
وزياد مشي بالسفرة وهو يشوف لخليل كيف مقعمز ياكل بروحه ومش مهتم لأي شي حواليه..
تنهد بضيق..
ومشي طلع بطريقه للمعجع متاعهم..
وصل فيه وخشله ومشي طول لدار خالد..
دق عليه بعدين فتح الباب وخش..
خالد كان يقرا في القرآن....
لما شافه زياد هكي وقف في مكانه..
سكر خالد المصحف وشبح لزياد بعدين ابتسم وقال:تعالى..
زياد ابتسم ومشاله حطه السفره ع السرير وهو يقول:وهدا غداك..
خالد شبح للسفره وقال:والله ماعندي نيه حتى فالعسل ياولدي..
زياد؛مش بالنيه ياعمي خالد انت مريض ولازم تاكل..
خالد شبحله وقال؛معدتي مش قابله..
زياد؛لاتقبل هادي كلها ماكله تناسب وضعك..وبعدين انت ذوق واحكم من ايدين فاتح راهو الولد هدا حتى السم من ايديه عسل .
قعد يضحك خالد..
قعمز قدامه زياد وقاله بإبتسامه ود:اني مانعرفش شن صاير بينك وبين خليل..
بدت تختفي ضحكة خالد..
زياد؛لكن اللي نعرفه ان الواحد لما يزعل من بوه ولاياخد منه موقف مايقدرش يكرهه..بالعكس يزيد يحبه ويخاف عليه ..
قام خالد عيونه في زياد..
زياد؛ماريتش في حياتي حد في الدنيا يحب بوه زي ماخليل يحبك هدا علاش في الزعل متاعه كان قاسي..لومه قاسي صح معليشي هو يبي يطلع كل شي مش كويس ناحيتك من قلبه بش يهدا ويولي صافي من ناحيتك..
ابتسم خالد بحسره..
زياد تنهد بإبتسامه وقال:هي نخليك تاكل ع راحتك وراهو بندير طبه نلقى الصفره قاعده زي ماهي نتفاهم اني وياك..
ضحك خالد..
وزياد ناض وقف وهو يقول:ماتبي شي تاني..
خالد؛صحيت ياولدي صحيت.
هز زياد راسه وهو مبتسم ومشي طلع من الدار وسكر الباب..
وخالد تنهد بألم بعدين شبح لسفرة الغدي..وخدي الكاشيك وبدي ياكل...
🍁🍁
الساعه الخامسه عصرا...
جي من الجامع طول للمستشفى وهو ماشي لحجرتها تلاقى مع الممرضه اللي قالتله بإبتسامه..
:مرتك فاقت..
ابتسم جهاد بفرح وقال:صحيتي..
ومشي طول لحجرتها..
فتح الباب وخش..
لقاها راقده وتشبح جهة الروشن...
سكر الباب وقال؛مريومه..
هي حركت عيونها وشبحتله..وابتسمت بتعب..
هو طول قدملها طبس عليها وباس جبينها.
وهي غمضت عيونها...
وخر عنها وشد ايديها وقعمز شبح ليدها اليسار وقال:علاش درتي في روحك هكي قوليلي اقسم بالله اني مانستاهل بالله ولااي حد في الدنيا ضيعي اخرتك ع خاطره..
مريم ودموعها بدوا ينزلوا قالت بتعب:كنت كارهه روحي..درت هكي لاني كرهت روحي...
جهاد؛تكرهي روحك وربي يحبها!؟
قلبها رجف من لما سمعت شن قال...ربي يحبها....!
جهاد؛كان مايحبكش يامريم ويبيلك التوبه راهو خلاك تموتي هالموته...
مريم بنبرة باكيه؛ربي يحبني اني؟!
جهاد؛ايه يحبك انتي..نتفكر الدكتور مرة قالي يابختك ربي يحبك..قتله يحبني اني...تعرفي شن قالي..قالي كيف ماتعرفش ان ربي يحب التوابين..
مريم غمضت عيونها والدموع ينزلوا منهم...
جهاد؛اقسم بالله من لما قالهالي واني ندير في جهدي بش مانخسرش هالحب..شن يبي البنادم تاني بعد يحبه ربي طز  في البنادميه وحبهم..
فتحت عيونها وشبحتله..
جهاد:اقسم بالله امس مت وحييت الف مره عمر راح من عمري يامريم..تعرفي لو صارت فيك حاجه نقعد طول عمري عايش في عذاب مالاش حد..
مريم؛ماذنبك شي..
جهاد؛لاذنبي..اني مفروض عرفت نتصرف ..والله يامريم انتي بنيه عسل وتنحبي وتستاهلي خير مني الف مرة مستخسرك فيا يامريم انتي تستاهلي واحد زيك..
مريم شدت ع يده وقالت بصوت متعب:فاهمه عليك..فاهمه...اني من بعد اللي صار وليت نعرف كويس ان حياتي معاك مؤقته ومش حتستمر..ونويت نعيشها كيف ماهي...اني وياك رفاقه في طريق توبه في اخره كل حد حيمشي في حاله...ويكمل حياته بعد تعلم درسه كويس..
ابتسم وقال؛سامحيني..
مريم ابتسمت وقالت:من لما عرفتك ماشفت منك شي جرحني ولازعلني بش نسامحك عليه..
تنهد من قلبه وناض..وقربلها باس جبينها مرة تانيه..
دق الباب..
وخر عنها وقال؛تفضل..
انفتح الباب وخشوا امه ونسيبه..
عفاف:الحمد لله ع سلامتك بنيتي..رعشتينا عليك..
مريم:سامحوني..
نسيبه؛حمد ع سلامتك مريومه..
مريم؛الله يسلمك نوسه..
عفاف؛هاه شن حالك توا..
مريم؛كويسه..الحمد لله..
🌼وهدرزوا عليها شويه بدون مايجيبوا سيرة اللي صار بش مايضايقوهاش..بعدين روحوا وقعد معاها جهاد..
قعد يهدرز عليها ويغير في جوها..وهي مع الاسف..
مش قادره تمنع قلبها عنه....
🍁🍁🍁🍁
ومن مريم..للوجه التاني للبنات اللي عاشوا ماعاشاته مريم..
سجى..بنت اخت عفاف..ومرت رفيق..اللي ليه قريب اسبوعين ملوحها في حوش اهلها هي وولدها ومايندريش عليهم...مايندري ع شي...
•••فوق السطوح..
في دار الخزين..
كانت سجى مقعمزة قدام شاشه تليفونها وهي بكامل اناقتها ومن غير حجاب..
"نبي نشوفك ع الطبيعه حبي"
سجى؛لالا فكني المرة اللي مامشيت وروحت لين قريب متت من الخوف..
"وشن صارلك..هاك توا تهدرز عليا عادي"
سجى؛بس كثرت الطلوع بتحل العيون عليا..
"غير حاولي حبي ع خاطري"
تنهدت وقالت:تو نشوف الوضع ونقولك..
"تمام لكن ماطوليش بطولي نزعل"
سجى بضحكه:كله الا زعلك ياعمري...
"سجى ياسجى وينك تعالي لولدك"
سجى بتذمر؛اوووف...
"خلاص انزلي توا في الليل نهدرزوا"
سجى بضيق؛باهي..
ونهت معاه المكالمه..ونزلت لولدها اللي كانت مش طايقاته..
سجى؛عارفه روحي اخرتها بنلوحه لبوه..
امها:والله كان بوه بيقعد هكي داير ماغير اطلقي وافتكي من هالشكالات ولوحيله فرخه..
سجى؛هدا اللي بيصير..
وقعدت تهز بولدها بعصبيه....
🍁🍁🍁🍁
مقعمزه قدام اللاب توب دير في بحث عن موضوع البحث الدراسي متاعها..
بس مش قادره تركز...شبحت لأختها لقتها لاهيه بتليفونها قالتلها؛تو من جد خوك هدا بياخد بنت اخت مقبوله!؟
رتاج،هكي الباين..
دانيه؛وخيرك انتي بارده هكي..
رتاج؛شن تبيني ندير كان هو حطها في راسه خلاص مرات تطلع كويسه وتنسيه سارة..
دانيه؛تطلع عينك اصلا الربيع من فم الباب يبان البنت احرف من خالتها..
رتاج مطت شواربها للأسفل بعدم معرفه وقعدت ساكته..
دانيه بعصبيه؛مبردك الهم...وحدفت عليها كراسه..
رتاج؛ياسفتوله..وحولت عنها الكراسه...
ودانيه ولت تشوف للاب توب ودمها محروق...
🍁🍁🍁🍁
"فاتح بشر زيارة"
كلهم شبحوا لفاتح وهو بإستغراب رد..
فاتح بتعجب:زيارة!!ليااني!؟
؛ايه هيا تحرك ...
ناض فاتح وهو مستغرب ومشي طلع مع العنصر..
سراج؛خيره مستغرب هكي شن ماعنداش مالي..
مراد؛عنده لكن زي قلتهم..
ابتسم زياد بتهكم وقعد ساكت..
🍁وفاتح ماشي مع العنصر وهو يتسائل في نفسه من بيكوم جاه..
خوته مستحيل...زهير مايقدرش لأنه ممنوع يزوره حد من غير اقاربه بالدرجه الأولى..
وصلوا بيه لمكان الزيارة..
فتحوا الباب ودخلوه..
هو قعد يدور بعيونه لين طاحوا ع اخر شخص توقعه يشوفه في المكان..
وهي كانت تشوفله بإبتسامه عمره ماشاف ابتسامه احلى منها في حياته..
طبعا...ابتسامة الام لما تكون من القلب ماتساويهاش ولاابتسامه...
غير عيونه عنها وشبح حواليه..
بعدين حط ايديه في جيوبه وعقد حواجبه ومشالها..
وصل فيها وقال؛شن تبي جايه..
هي ابتسمت وقربت منه وضماته..
هو كان قلبه يفر فران...بس ماباش يبادلها الحضن..
وخرت وقالت؛قعمز ولدي.
بلع ريقه بش يشد دموعه بعد سمع كلمة ولدي..
قعمز قدامها وقال:علاش جيتي..
هي قعمزت وقالت؛جايه نشوفك..
فاتح؛وبعدين...
هي كيف جت بترد..شافت الباب كيف انفتح مرة تانيه وطلع منه شخص لما شافاته تفاجئت هلبه...
هو كان خاش ومش مركز مشي طول للطاوله اللي يبيها..
فاتح؛خيرك سكتي!؟
والتفت شبح وين ماتشبح بعدين رجع شافلها وقال:خيرك؟!
نوال عقدت حواجبها وقالت؛-هدا محبوس معاكم هني؟!
فاتح بإستغراب؛كيف قصدك انتي تعرفي واحد زي هدا..
هي شبحت لولدها وقالت:بوك كان يعرفه بس من زمان هلبه..
فاتح بصدمه؛وشن يدير بوي يعرف اشكال زي هادي!؟؟
نوال؛وقتها لما كان يعرفه كان ضابط في الشرطه..
فاتح زاد انصدم والتفت وشبح لنفس الشخص وهو مش مصدق..بعدين رجع شاف لأمه وقال:هدا كان ضابط في الشرطه..
نوال:ايه..زي توا مذكراته...
وفاتح يشوفلها وهو مصدوم بقوة ويفكر في اللي عرفه منها شي لا ع البال ولا ع الخاطر...

#آلام_الآثام
#البطل_المغمور2

.....يتبع....