فى ليله شتاء بارده كان يجلس فى قهوه الميدان صبحى صاحب السوبر ماركت ينتظر قدوم حازم مدير أعمال سالم الصافى . صبحى : اهلا يا حازم باشا اتفضل . حازم : معلش معنديش وقت خد الجواب ده وصله مكان ما انت عارف .صبحى : استنى بس اقعد خمس دقايق عايزك فى موضوع . حازم : اتفضل يا سيدى خير . صبحى : الجماعه زى ما انت عارف بقالى سنين بتعامل معاهم ولا مره شوفتهم وعلى طول بوصلهم جوابات وحاجات وعمرى ما فتحتها عشان دى أمانة بس الصراحه انا المره دي قلقان انت مابتسمعش اللى بيحصل فى المكان والناس بقيت بتخاف تقرب ناحية المحل عشان قريب من مكانهم . حازم : ايوا يعنى انت عايز ايه دلوقتي يعنى المفروض انا اعملك ايه . صبحى : انا بس عايز اعرف اذا كان الجماعه دول أنس ولا جن اعوذ بالله يعنى اصل بأمانه ربنا كل ما قرب ناحيه بابهم ببقى هموت من كتر الرعب . حازم : اسمعنى كويس عشان الكلام ده انا مش هكرره تانى اللى انت بتوصلهم الحاجة بشر زيهم زيك بالظبط لكن مابيشوفهمش ولا بيسمعهم غير اللى عزرائيل بيختاره تحب تشوفهم بقى ؟! صبحى : لا اعوذ بالله انا عندى عيال عايز اربيها . حازم : حلو يبقى تاخد الحاجه توصلها وانت ساكت والهبل اللى بتقوله ده ماسمعوش تانى واى حد يتكلم تخليه يخرس عشان الباشا الكبير لو عرف الهبل ده هيزعل اوى مفهوم . صبحى : مفهوم يا باشا . بعدما غادر حازم ذهب صبحى إلى مكان إقامه سفراء جهنم ليضع الجواب أسفل الباب كما يفعل فى كل مرة ويدق جرس الباب ليأخذ بيلى الجواب ويقوم بفتحه امام الآخرين ويقرأ مضمون الرسالة . بيلى : إلى سفرائى الاعزاء فى منتصف الليل حفله غنائية على متن باخره رجل الأعمال أحمد سليمان سيكون فى انتظاركم سيارة فى الشارع الخلفى اريد الانتهاء فى هدوء تام كما عودتمونى احرصوا على أن لا يراكم أحد . بعدما انتهى بيلى من قراءة الرساله ذهب الجميع للاستعداد للذهاب إلى الحفله . عندما حل منتصف الليل خرج الجميع إلى. الشارع الخلفى يرتدون عباءات سوداء ذات غطاء للرأس ووجوههم مغطاه برسومات تنكريه حتى لا يتعرف عليهم أحد فى تمام الساعة الواحدة صباحا وصل الجميع إلى متن الباخرة .حراس الباخرة : انتو مين . مادى: احنا الفرقه الموسيقيه اللى حضراتكم طلبتوها . حراس الباخرة : ثانيه واحده أتأكد ليقوم حارس بمكالمه صديقه ليتأكد من طلبهم للفرقه الموسيقيه . الحراس : انتو اكيد غلطانين فى العنوان محدش هنا طلب فرقه موسيقيه . لتقوم ريانة بالرد على الحارس . ريانة : مافيش حفله ينفع تقوم من غيرنا باختصار احنا مش بنطلب احنا اللى بنختار نعزف فى أنهى حفله ووقع اختيارنا على حفله الباشا بتاعكم . الحارس : طيب يلا بقى من هنا مش ناقصين مجانين . شيكو : لا لا انت كده بتغلط فينا وانت ماتعرفش احنا مين . الحارس : هتكونوا مين يعنى . لترد عليه مريم قائله : احنا سفراء جهنم . فى الوقت نفسه يقوم بيلى وديدى بتخدير الحراس . ليدخل الجميع داخل الباخره وتقوم الحفل على انغام سفراء جهنم . فى عصر اليوم التالى تقابل صبحى وحازم مره اخرى . حازم : خد الظرفين دول اللي على الشمال ده بتاعك والل على اليمين بتاعهم . صبحى : تسلم يا باشا وصل سلامنا للباشا الكبير . ليذهب صبحى مره اخرى الى مكانهم ليضع الظرف مره اخرى أسفل الباب . أخذت مريم الظرف لتفتحهم أمام الجميع وتقرأ الرسالة . مريم : احسنتم كانت ليلة موفقه لتعثر بعدها على صوره من الاخبار التى تتحدث عن مقتل رجل الأعمال أحمد سليمان . ليذهب الجميع بعدها إلى غرفهم .
