The Billionaire's Fake Wife (Completed)

Chapter Seventeen

Eksaktong alas siyete nang lumabas siya ng silid at bumaba sa sala, nakita niya si Mamita kasama si Sofia at ang isa pang magandang babae. Sa sobrang ganda nito ay nagmukha ng anghel. Nakaupo ang mga ito sa couch at sinisilbihan ng inumin nina Ara at Amy. Nilingon lang siya ng mga ito at walang sinabi. Maging si Mamita ay mataas ng kilay sa kanya. Malamang ay nakita na nito ang mga larawan online at galit rin sa kanya katulad ng galit sa kanya ni Sebastian kagabi.

Lumapit sa kanya si Jo na parang nagulat pa sa bihis niya at sa mukha niyang may band aid at pasa. "Ma'am Rei may bisita tayo, si Mamita kasama sina Ma'am Sofia at Ma'am Bianca."

Para siyang nahilo bigla sa narinig. Si Bianca ang babaeng mala-anghel na iyon? Kaya naman pala halos ipagtabuyan siya ng lalaki kagabi, alam pala nitong darating na ang babaeng iyon ngayon. Wala na siyang silbi dito at mas lalong hindi na siya kailangan nito.

"At ito po, gusto kang makausap ni Ma'am Veronica."

Iniabot nito sa kanya ang teleponong hawak. Wala sa loob na kinuha niya iyon mula sa kamay nito at saka inilapit sa kanyang tainga.

"Hello?" mahina niyang sabi.

"Why are you still there? Ganyan talaga kakapal ang mukha mo? After what you did to my son? Hindi mo ba alam kung gaano kalaking gulo ang ginagawa mo? Leave my son alone!"

Napalunok siya sa labis na galit na naririnig niya mula rito sa kabilang linya.

"Alam ko naman na noon pa ay hindi n'yo ako gusto para sa anak n'yo. You know what? Tama kayo, I'm just causing trouble. I'm sorry."

Ibinalik niya iyon sa kasambahay saka siya huminga nang malalim. Maybe the news article was a blessing in disguise for him. Mas magiging madali na sabihin sa madla at media na naghiwalay sila dahil sa third party. Malinis na ang pangalan nito, ito pa ang lalabas na biktima.

"Magpapahatid lang sana ako kay Mang Jun, nasa likod-bahay ba siya?" Mahina niyang tanong kay Jo.

Sa gilid ng kanyang mga mata ay nakita niyang pababa ng hagdan si Sebastian, hindi na siya makakapaghintay na umalis. Para siyang sinasakal sa pamamahay na iyon kaya gusto na niyang makalayo sa lalong madaling panahon.

She was about to walk towards the door when Mamita called her.

"B-bakit po?" tanong niya nang lingunin ito, walang bahid ng kahit anong emosyon sa kanyang boses.

Si Sebastian ay nasa ibaba ng hagdan at ipinaglipat ang tingin sa kanya at sa abuela nitong tumayo na. Hindi pa yata napapansin ng binata si Bianca na nakaupo dahil hindi iyon kita sa direksiyon nito. Sa hitsura ni Sebastian, mukhang wala itong kabalak-balak na pigilan siya. Maybe she really made that huge of a mess. O siguro ay excited na rin itong mawala siya sa landas nito.

"Why are you leaving so fast, hija? May sorpresa pa naman ako sa 'yo. Nahirapan si Veronica na ipahanap siya para sa 'yo. He should be here soon. Oh, there he is!"

Mula sa kusina ay lumabas mula roon ang lalaking ni sa panaginip ay hindi na niya gustong makita pang ulit. Hindi siya makapaniwalang makikita ulit ang ama niya matapos ang maraming taon matapos niyang makaligtas mula sa mga kamay nito. Tumanda lalo ang hitsura nito ngunit naroon pa rin ang nakakatakot na tingin sa mga mata. She froze. Awful memories came back to her as if everything just happened yesterday. Nang mahamig niya ang sarili ay mabilis na binuksan niya ang pinto at nagtatakbo sa likod-bahay.

"Mang Jun! Mang Jun! Please! Mang Jun!" sigaw niya, nanginginig sa takot.

"Reina!" boses iyon ng kanyang ama.

Nakasunod ito sa kanya at nakahabol. Hindi pa rin siya makapaniwala na nakita ito ulit matapos ang mahabang panahon! Hindi siya makalingon dahil nanginginig ang buong katawan niya sa takot. She never wanted to see her father again! Halimaw ito at ito ang dahilan kung bakit nagpakamatay ang pinakamamahal niyang kapatid.