.
.
• ليـنا •
وصلت الدور الرابع في مبنى يتكون من خمسة طوابق .. و بمجرد ما انفتح المصعد شفت وجه فجر المبتسم بطريقة مستفزة قدامي
مدت يدها للسلام .. لكني تجاهلتها
مشت قدامي بإحراج و هي تتكلم عن انها كانت متوقعة اني راح اوافق اقبل تمويلهم بالأخير
و على كثر ما تكلمت الا اني كنت مستمرة بتجاهلها
قالت فجر بعد ما وقفت فجأة
: واضح مزاجك مو تمام .. تشربين قهوة؟
وقفت معها .. و قلت لها بنفاذ صبر
: انا جايه هنا للشغل .. و ان الشغل يربط بيننا ما يعني اننا ننسى الي صار و نسوي نفسنا أصحاب
كانت فجر بتتكلم .. قبل ما يفتح شخص من وراها الباب و يطلب مننا ندخل ..
دام اجتماعنا ربع ساعة فقط .. عرضت له الملف الي جهزته غيد و اتفقنا مبدئيًا على حجم التمويل وكيفية دفعه ..
و بالرغم من ان الاجتماع ما اخذ وقت طويل الا اني كنت احس باختناق طوال الوقت الي كنت جالسه فيه مع فجر بنفس المكان
طلعت باتجاه المصعد .. و سمعت صوت فجر جاي من وراي وهي تقول
: مو مشكلة بنتظرك تشكريني بعدين
التفتت عليها .. و كانت تناظرني و تبتسم قبل تلف و ترجع لغرفة الاجتماع و تقفل الباب
وقفت مذهوله.. ما كنت قادره أحدد اذا انا احس بالصدمة او القرف .. او كلهم مع بعض
لكن غالبًا كانت الصدمة وقعها أكبر
صدمة من انقلاب فجر المفاجىء .. لدرجة خلتني اشك اني سويت لها شيء
ما أفهم ليه فجر صارت تتعمد تستفزني بهذا الشكل و كأني انا الي اخطيت و خنتها ..
مشيت لبرا المبنى و الغضب يملاني .. كنت أحس بخليط مشاعر سيئة
طلب المساعدة سيىء لوحده .. و طلب المساعدة من أحقر شخص بالعالم اسوأ بكثير
وصلت البيت و انا بحالة سيئة .. كانت غيد عند الباب تنتظر وصولي
كنت أفتح الباب بالمفتاح لما سألتني غيد
: وش صار؟
فتحت الباب و دخلت بدون اي رد .. دخلت وراي و كنت أقدر استشعر قلقها ..
اتجهت للمطبخ، شربت مويه و انا أحاول أرجع لطبيعتي
قلت لغيد : راح يمولوننا
جلست مع غيد في صالة البيت .. شرحت لها الي صار
حرصت اخبرها عن اعجاب المدير بعملها .. بعيد عن كل شيء غيد كانت تستحق الاشادة
