أرواح مقيـدة

البـارت الـ١

الحياة مو عادلة ابد .. دائمآ اذا تنطينا شي لازم تاخذ منا شي بالمقابل.. اتذكر مرة جنت اشكي لصديقتي عن شغلة وسمعتني اختها واجت يمي كالتلي الناس حظوظ .. اكو ناس حظها بدارسة واكو ناس حظها بشريك حياة يناسبهم واكو ناس حظهم بالجمال .. الذكي بس هو الي يكدر يستخدم حظه ويعيش حياته مثل مايريد .. لهسة كلامها ابالي بس للاسف اني ماكدرت استخدم حظي او هيج جنت افكر ..
قصتي مثلي مثل اي بنية عراقية احلم اكمل دراسة واعيش قصة حب واتزوج ، اشتغل اكون لنفسي مستقبل مستقر وحلو ..
من نجحت للخامس بديت اشتغل حتى احقق احلامي ، اهلي مجانو مهتمين وحتى يمكن ميعرفون اني يا صف صرت واني هم ماجنت اهتم لهيج سوالف متعودة عليهم..

لحظة نسيت اعرفكم على نفسي ، اسمي دُرة مواليد سنة ٩٥ ، اني اصغر وحده بعائلتنا اخواني ٣ واخت وحده هي الجبيرة ..

تعالو احجيلكم من البداية ..

سنة ٢٠١٣

رجعت من المدرسة وطايرة من الفرح جنت خايفة من الرياضيات متوقعة ارسب بي واطلع دور ثاني بس الحمد لله نجحت ، دخلت للبيت شفت ماما تطبخ الغدة رحت بستها وكلتلها نجحت هي باستني وباركتلي .. سألتها على بابا كالت بالصالة وبقت تحجي اني ركضت عليه ماسمعتها ..
دخلت اكمز من الفرح واعيط نجحت نجحت فتحت عيوني لكيت بابا وسراج اخوية وأكرم ابن عمي كاعدين ..
- لج شبيج تعيطين اهدي
- سوسو نجحت نجحت
- حبيبتي الف مبروك شو تعاي
رحت كعدت يمه واخذ شهادتي يباوع بيها