أرواح مقيـدة

البـارت الـ١٧

للفجر وماكو اي تغيير ، بديت اتعب وأكرم انتبهلي
- حبيبي وجهج صار اصفر كومي غسلي وخل اجيبلج شي تاكلي
- ماريد خليني كاعدة هنا عفية
- عمري ابقي ماكتلج روحي بس اكلي يعني شلون يصير بيج حيل تنتظرين وانتي مماكلة شي
- ماريد
ماحجة بس عافني وطلع ماعرف وين .. نص ساعة واجة جايب اكل كوة قنع بابا وعمار ياكلون .. واجة يمي

- يلة حبيبي بلة عناد.. اكلي وهسة اجيبلج جاي
-ماريد عفية والله مالي نفس
- خوش لتاكلين وهم تخربطي ونخليج بغرفة مدامنا بالمستشفى
اجة بابا وكف يمي
- بابا اكلي ميصير هيج ترة ارجعج للبيت اني اصلا كوة علية مبقيج هنا ادري يضل بالج ، لا تشغلين بالي ترة البينا مكفينا
هزيت راسي اي واخذت الاكل منه اكلت قليل بس شبعت وصحصحت ..

كملت ورحت غسلت وجهي باوعت بالمراية بسرعة التعب بين علية .. غسلت وطلعت يمهم .. صارت بل٦ الصبح جان تجي عمتي وابراهيم .. كمت اسلم عليها وحضنتني
- ياحبيبتي بنيتي الله يساعدج.. شلونها امج شكالو
- الحمدلله احسن شوية بس بعدها ماصحت ، تعاي كعدي عمة شجابج من الصبح
- هو اني ماصدكت يطلع الصبح واجي .. ليش ماخابرتيني جان اجيت وياج ليش باقية وحدج
- احتاريت والله وخفت كوة خابرت سراج ..
- ومريم شلونها خابرته ماحصلته
-زينة اجو هنا سوو دوبلر والطفل زين بس هي خطية ضهرها متأذي لازم تنام باقي الاشهر
- خطية الله يعينها .. اكلتي شربتي شو وجهج اصفر
- اي اكلت قبل ساعة

- ترجعين للبيت تغسلين وترتاحين شوية تنامين
- لا عمة ماكدر اعوف امي ماريد اروح
- شوية ساعة ساعتين ورجعي ..
- لا ماريد ..
جانت جايبة ملابس لأكرم لان ناسي جنطته بالدوام اخذهن راح بدل ورجع ..ساعتين وبدت تصير حركة وكومة كرايبنا اجو .. دخت من السلام والحجي وتعبت كلش .. جان واكف كدامي أكرم انتبهت عليه يحجي وية مهند ابن عمتي ويباوعلي.. عافه واجة يمي

-شبيج عمري محتاجة شي يوجعج شي
- تعبت ودخت شوكت يروحون جان هدوء
- حبيبي غير يريدون يطمنون عليها شلون لعد نكللهم طلعو ..
ضجت وبرطمت وهو اجة كعد يمي .. نص ساعة اجة الدكتور رجال جبير حجة وية بابا وبعدين دخل يشوفها .. ربع ساعة وطلع
كمت يم بابا اريد اسمع شيكول

- هسة سكرها وصل لل٢٢٠ وبالنسبة لوضعها زين بدت تستجيب للاختبار وان شاء الله تصحى بس يراد صبر .. توكلو ع الله
- يعني حالتها زينة اكو امل
- ان شاءالله منفقد الامل احنا .. كم ساعة وارجع اشوفها وان شاء الله خير ..
- شكراً دكتور تعبناك
-عفواً هذا واجبي ..

رجعنا ننتظر وكل شوية اروح اشوفها من الشباك .. كلبي ممرتاح رغم ديطمنونا ويكولون دتتحسن بس كلبي مقبوض .. بقيت مكابلتها وادعي .. كم دقيقة وحسيت ايد على جتفي ..
- حبيبي امشي نروح للبيت بدلي ملابسج وغسلي
- ماريد عفية خليني هنا
- عمري ارجعج والله بس ساعة ارتاحي ورجعي .. يلة يابة لا تشلعين كلبي
- ساعة ونرجع مااتاخر
- اي وداعتج