# طوبى "شارع القهوة"
#جمان_فريد
#الجزء_العشرين"20ابريل2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
جنوب شرق ليبيا...
الكفرة...
خشت بنت الحاجه فاطمه لحوش امها بعد مافتحاته بالمفتاح..
سكرت الباب..وقعدت تمرر في نظرها ع الجنان وهي تقول..
ماشاء الله...ماشاء الله..
كملت القدام لقت باب الحوش الدخلاني مفتوح..
خشتله وبدت تشم في ريحة المطهرات الحلوة..
والحوش كالعاده..يبرق برق من النظافه..
ابتسمت وقالت؛عبدو..
تقصد ان النظافه هادي كلها وراها ولد خوها..
نظيف هلبه ومرتب ومايحبش الفوضى نهائي..
ماعدا فوضى الأطفال..يعشقها..
وهي ماشيه وصلت في دار المعيشه لقت امها مقعمزة فيها تسمع في الراديو...
ضحكت وقالت:_امى ماتوليد تجوضيد؟
"امي كيف حالك"
فاطمه بفرح:تبراضتين توسيد!
ماتوليد كم مايجندم
"بنتي جيتي!...كيف حالك انتي ياحنه"
بنتها:اخمادغ مسينغ كم ماتولا الصاهتنم
"الحمدلله امي انتي شن حال صحتك"
فاطمه:اخمادغ مسينغ اخمادغ مسينغ فول النغمة...
"الحمد لله الحمد لله في نعمه"
وقعمزت هدرزت على امها شويه بعدين مشت للكوجينه بتبدا تحوس ع الغدي..
شويه وخش عبد القيوم وهو جايب معاه فواكه وصتهم عليه حناه..
وين خش للحوش داخل ماركزش ع كندرة عمته اللي فم الباب..
مشي طول للكوجينه وين خشلها تفاجئ....
عبدالقيوم بإبتسامه وهو يحط فالأكياس ع الرخامه:عمتين ديغ؟؟! "عمتي هني"
التفتت شبحتله بإبتسامه:غبدو ابراضين ماتوليد؟؟؟
"عبدو ولدي شن حالك"
عبدالقيوم:اخمادغ مسينغ..كم ماتوليد مادولان ايبراضن
"الحمد لله شن حالك انتي شن حال الصغار"
عمته:نخماد مسينغ نمدا نوجضي
"الحمد لله كلهم بخير"
عبدالقيوم:ماجن تويتند؟
"وينهم ماجبتيهم"
عمته:كلا كلا اويقنين غور عمتين نسن وريغ ايدسكموغ امى ايغف...
"لالا خليتهم مع عماتهم مانبيش نوجع راس امي"
عبدالقيوم:مافول والله نوينافتن هولان
"حرام والله مشتاقلهم هلبه"
عمته:اسيد ايهنان تنتنيد
"تعال لحوشي ياسيدي وشوفهم"
عبدالقيوم رفع حاجبه وقال:ادي فول اواغ اريغ امجين ميغ امكلي
"نبي غدي ولاعشي متكم على هكي"
عمته بإبتسامه:استيطونين غير اسين... اني امي تكيد بنغازي
"من عيوني انت غير ادلل..قولي امتى بتمشي لبنغازي"
عبدالقيوم عقد حواجبه وقال:ضفر تيويت نالنبي كود يكتب
"بعد الميلود ان شاء الله"
عمته:ايدفتح فولك مسينغ المهندس ننغ
"ربي يفتحها عليك ياباش مهندس"
عبد القيوم بإبتسامه:تنميرت ادكم يحفظ عمتين
"يسلمك ويحفظك عمتي"
ومشي طلع من حداه متوجه لداره وهو يغني..
نك ليغ الزمن...ايلان ايويتيان
نماغي ترهى
هيغ اكالين...اي ميديوان...
وين وصل فيها وخش رن تليفونه..
طلعه من جيبه وشاف المتصل..
فتح الخط ورد..
عبدالقيوم؛ايوه..
"وينك يارا..من بدري نرجى فيك راني"
عبدالقيوم:والله انشغلت ياعبدالله وتوا عمتي جتنا مانقدر نطلع ونخليها..
"باهي كيف يصير تو..الشباب بيجوا ويسألوا عنك شن نقوللهم"
عبدالقيوم:قوللهم جاي العشيه ان شاء الله..
"وهما العشية بيروحوا ياغالي"
عبد القيوم قعمز ع سريره ومسح حاجبه وقال:خلاص بعد الغدا نكون عندك بإذن الله..
"خلاص نرجى فيك مش ترخي اخرى"
عبدالقيوم:عمري رخيت بكلمه نعطيها!؟ هي هالمرة انشغلت مع جدتي وعمتي جت مابنخليهم عشان حضراتكم.!
"باهي خيرك رقتلك انت! مش قصدي'
عبد القيوم؛باهي عدي عدي...
ضحك صاحبه وقال..
"سلام"..
وسكر..
وعبد القيوم حط تليفونه ع السرير وناض للدولاب متاعه فتحه وطلع منه وراق وقعد يشوف فيهم..
🌻🌻🌻🌻🌻🌻
ومن اقصى الشرق ...الى الغرب..
طرابلس..
كانت طوبى مع بوها اللي يضم في داره ويطلع في الحاجات القديمه..
طوبى:عندك هلبه حاجات حلوة حرام تتلوح..
لطفي بإبتسامه:كان في حاجه عجباتك دسيها..
طوبى بضحكة:حاضر..
وقعدت طوبى ضم معاه..لين طاحت في مجموعة صور..
خدتهم وقعدت تشوف فيهم..
كانوا لبوها ايام الشباب ومعاه زملائه في عمله الحكومي..
لطفي يخدم اداري في شركة الكهرباء..
طوبى:الله بابا ايام كنت صغير زي الاجانب شكله..
ضحك لطفي وهو يضم ويقول:زعمه!
طوبى:والله..حي هدا عمي عبدالمطلب قداش كان حلو زمان!
ابتسم لطفي وماعلقش..
وقعدت طوبى تقلب في الصور..
لين طاحت في صورة لواحد..
قديمه..بس هو كان وسيم للغايه ولاحظت ان فيه شبه منها ومن أمها..
شبحت لبوها وقالت:بابا من هدا؟!
التفت بوها وشبح للصورة تبدلت ملامح وجهه للضيق ولون وجهه تغير..
قرب وخدي الصورة وقعد يشوفلها..
طوبى:حسيت في لمحه مني ويشبه امي الله يرحمها هلبه..
تنهد لطفي وقال:هدا خوك مختار..
تعبوا عيون طوبى دموع وخدت الصورة من بوها وقالت:الله محلاه يهبل!
بوها سرح بتفكيره وقعد ساكت..
طوبى بحزن:ياريته يروح ياريت..خاطري نعيش شعور يكون عند خو..وين تصير فيا حاجه يحمق ع خاطري ويقلب الدنيا زي مادارو حسين ويوسف لما مرضت اميمه..هو كم عمره بابا..
لطفي تنهد وقال؛من عمر عمك المهدي..
طوبى ابتسمت بتمني وقالت:ياااه...لوكان قاعد معانا راهو متزوج تو وعنده صغار نصاحبوهم اني واريج وألو..
التفت لطفي ورجع يضم وهو موجوع..
ع خشة سدرة عليهم وهي تقول:مازلتوا..
قدمت لطوبى..وطاحوا عيونها ع صورة خوها..
انفعلت وجبدتها بقوة وقالت:شن دير عندك هادي!؟
انفجعت طوبى..
والتفت لطفي شبحلها.
سدرة وهي منفعله:وين لقتيها!؟
لطفي:سدرة!
سدرة ودموعها في عيونها:اني حرقتهم كلهم صوره الحقير هدا هادي من وين طلعت..!
جت بتمزقها..خدتها طوبى وقالت:نبيها!
سدرة بغضب:جيبي جاي..
طوبى بتشبت:لا نبيها نبي صورة خوي..
سدرة:طوبى وماطلعيش جنوني عليك!
لطفي:سدرة خيرك هبلتي!
سدرة مش واعيه لروحها قالت بغضب:قلت جيبي هني!؟
طوبى بتحدي ودموعها في عيونها:لالالا..
وسدرة بدون وعي ضربت اختها كف من قوته بوها حسه في قلبه..وماتحملاش..
وطول رده لسدره بأقوى منه..
طوبى ماوجعهاش الكف اللي كلاته..قد ماوجعها الكف اللي نزل ع خد سدرة..
سدرة شدت خدها وهي تشوف لبوها..
لطفي بغضب:تضربي في اختك قدامي مش حاسبتيني واقف وسطكم!
دمعوة عيونها ولفت ومشت بسرعه وطلعت من الدار وهي مازال شدها خدها..
طوبى بألم:علاش يابابا هكي!؟
لطفي شبح لطوبى وقال:بنتي جيبي الصورة خليها عندي .
طوبى بألم مدتها لبوها..
خداها بوها ومسح ع راسها وقال:بري قعمزي ع الكرسي بنتي..
هزت طوبى راسها..وقعمزت ع الكرسي وقعدت تبكي بصمت وبوها قاعد يضم في الدار وهو مضايق ع الآخر..
🌻🌻🌻🌻🌻
"شن رايك انت مش عارف هكي حاس فيه غلط"
طاهر وقف ع رسمة التصميم متاع الجالي وقعد يشوفلها بتركيز بعدين قال:ايه..الباب اللي هني غيره وديره من هني احسن حتكبر المساحه ويكون مشرح اكثر..
الجالي بإبتسامه:حسيت..تمام...
طاهر بإبتسامه؛جديات لو استمريت هكي حيكبر اسمك في سنتين تلاته..
الجالي وهو يعدل في التصميم قال بضحكه:ان شاء الله..
فجاة رن تليفون طاهر وكانت نجاه:هي نستأذن توا..
الجالي بضحكه:خود راحتك..
ابتسم طاهر ومشي طلع من دار الجالي لقي قدامه عمر..
عمر فات من جنبه وخش للجالي وسكر الباب..
تنهد طاهر ومشي رد ع نجاه..
طاهر:ياهلا..
"اهلين حبيبي اني توا في جرابه وعجبني قفطان بناخده للبيان بس نقصوا عليا الفلوس"
طاهر:تمام تمام شويه وجايك..
"هي بسرعه حبيبي"..
وسكرت..وهو حط تليفونه في جيبه ومش خش لداره خدي المفاتيح ونزل من الدروج...
في دار الجالي .
عمر وهو مقعمز حاط رجل ع رجل قال:وليتوا صحبه..
الجالي وهو لاهي بالتصميم:خوت في النهايه..
عمر:شكلها نظرتك فيه تغير..
الجالي:لا قاعده زي ماهي مصلحجي صح بس فيه حاجات كويسه..
عمر:انت ديما تحب تستفيد وتقوي علاقتك مع الناس اللي تنفعك حتى لو كنت مش متقبلها..
الجالي:الحياة تبي هكي..شويه مجامله ع شوية مسايرة بش تمشي امورك فيها..
عمر:مانقدرش نكون زيك مع الاسف..
ابتسم الجالي ع جنب وقعد ساكت..
تنهد عمر وهو يشوفله..
حط الجالي المسطره والقلم..بعدين شبح لعمر وربع ايديه وقال:احكي..
رفع عمر حواجبه وقال:شن بنحكي!
قعمز الجالي ع الكرسي متاعه وقال:ع اللي داسه في قلبك ليك يومين لتوا..
شبحله عمر شويه بعدين مرر نظره ع الدار..ورجع شبحله..
الجالي دار حركه بيده ع فمه وهو يضحك بمعنى..
"تكلم"
تنهد عمر وبدي يحكيله في القصه كامله بالتفصيل بدون مايقص منها اي حاجه...
الجالي وهو مصدوم:تؤ تؤ تؤ....هو انت حقير وهلبه..بس غرفه هادي احقر منك بوين..معقوله دير هكي في بنت عمها!؟
عمر:لما عرفت اميمه عن قرب زبطت ان غرفه تغير منها..
الجالي:تي هادي مريضه مش قصة غيرة بس لاحول ولاقوة الابالله..اما انت ولا نقولك من توا حولها من راسك..
عمر قعد يشبحله بضيق وقلبه واجعه..
الجالي:ماتشبحليش هكي..اللي درتوه مش ساهل بكل قسما بالله لو كنت مكانها وبالذات بعد الكلام اللي قلته لو تنزلي نجوم السمي مانعبرك..
عمر:تحبني..
الجالي:شوف اني ماحبيتش قبل تمام..بس ع اللي نشوف فيه قدام..قصة خوك المهدي مع سدرة..حتى لة تحبك تعفس ع قلبها ولايمكن تسامحك..
عمر:اني جايك نبي حل علاش تسكر فيها فوجهي بكل!
الجالي:في حالتك انت صدقني مافيش حل بكل..ممكن في محاوله اما حل لا...
عمر:قصدك نحاول معاها ..
الجالي:اهو تكسب شرف المحاوله..
عمر:علاش تبيني تفقد الامل بكل!!؟
الجالي بضحكه تعجب:لأن وضعك معاها ميؤس منه..نينتي امل خونا..
تنهد عمر بضيق واحباط بعدين ناض ومشي طلع من الدار بكل..
ضحك الجالي وحرك راسه يمين ويسار وهو يقول:ياعليك عمر وخلاص..يحساب الكون تحت امره..
ورجع يشوف في التصميم متاعه...
🌻🌻🌻🌻🌻🌻
الساعه 4:00قبل العصر..
في حوش عبد الله صديق عبدالقيوم..
كانوا مجتمعين بأصدقائهم اللي يقروا في كلية الهندسه تخصص هندسة كهربائيه في بنغازي وكانوا من كذا مدينه في الجنوب والشرق...
عبد القيوم وعبد الله انجبروا يروحوا للكفرة ويقعدوا مدة ويوقفوا قيدهم سيمستر كامل..
لظروف خاصه..
عبد الله بوه مرض..
وعبد القيوم خاله توفى....
وتوا بيرجعوا للجامعه ع الفصل الربيعي...
:بس قبل مانعدوا بنغازي ياشباب بنقوللكم اني منظم مشية لطرابلس ع الميلود نقعدوا سبوع غادي..
عبدالقيوم بعد مارشف من الشاهي قال:طرابلس!؟
:اها...ليا وقت نبي نعديلها بس مش بروحي قلت نلمكم مجموعه معاي ونعدوا مع بعضنا..
عبدالله:الحق عمري ماعديت لطرابلس وخاطري فيها..كلا انا معاك من تو...
وكلهم بأصوات متقطعه قعدوا يقولوا..حتى اني معاك..
عبدالله:عبدو سمعنا صوتك..
قعد يفكر وهو يشوف لطاسة الشاهي بعدين شبحلهم وهز راسه بالموافقه وشرب الشاهي في مرة..
:خلاص ع اسبوع ميلود متفقين!؟
عبد القيوم:قبلها جو ولابر..
:لاجو فكنا من البر...
عبدالقيوم:معناها المشيه لبنغازي لابد منها..
ضحك وقال:اها..
عبدالقيوم هز راسه وقعد ساكت..
:هاه ياشباب متفقين..
كلهم بأصوات متقطعه قالوا:تم...خلاص متفقين..
☘☘☘☘☘☘☘
طلعت للجنان ودموعها في عيونها لقتها مقعمزة تحت شجرة السرول..
مشتلها وهي خايفه وقلبها موجوع..
وصلت فيها وقربت منها وطبست باست ع راسها بعدين بعدت وقالت:اسفه..
سدرة بحزن:تعالي حبيبتي..
قعمزت طوبى جنبها وخشت حضنها وقالت:سامحيني ضربك بابا بسببي..
سدرة:ضربني بش يوعيني ع روحي ماكنتش في وعيي اني..
طوبى:علاش تكرهي مختار لهالدرجه!؟
سدرة بألم:لأن سبب كسرتنا مختار هدا..امي ماتت من القهرة بسبب عمايله بسبب انانيته وحبه لنفسه..
طوبى:هو شن دار باهي..اني مانعرف شي..
سدرة تنهدت من قلبها وقالت:شن بنقولك ياطوبى بس صغيرة ع الدوة هادي انتي..
طوبى:لامعاش صغيرة ياسدرة اني واعيه راهو ونفهم..
ضمتها لحضنها وقالت:محبوس برا..
طوبى وهي مصدومه؛محبوس!! علاش شن دار..
سدرة:ضرب واحد وسببلها عاهه يعني مشكله جسديه مالهاش علاج..
طوبى بصدمه:حي!!!؟
سدرة:وحبسوه غادي 20سنه...امي لما سمعت رعشت عليه ومرضت بعدين ماتت بحسرتها..مسحت سدره دموعها ورشفت بعدين قالت..هو سبب عذابنا ياطوبى..
طوبى قعدت ساكته وهي حزينه..
سدرة:هذا علاش كارهاته وكارهة كل شي منه..وضمتها هلبه
وطوبى حضنتها وقالت..لو نعرف مادرتلكش هكي بكري..
سدرة:خلاص ياعيوني انسي..وحتى اسفه اللي ضربتك..وبعدتها شويه وباستها ع خدها اللي ضربتها عليه..
حطت طوبى راسها في حضن اختها وقعدت تبكي بصمت..
وسدرة وهي حاضنتها قعدت تبكي بصمت حتى هي وتتفكر في امها..واخر لحظتاها في الدنيا...
🍀🍀🍀🍀🍀
....بعد مرور يومين....
الساعه الثامنه صباحا..
واقفه قدام المرايه وهي تساوي في عبايتها..
بعدين خدت وشاح لونه وردي..ولبساته وقعد تساوي فيه...
طلع عليها حلو بالمرة..
خدت نفس وغمضت عيونها وقعدت تقول لروحها..
"دكتورة اميمه الواعر اخصائيه جراحة مخ واعصاب..
دكتورة اميمه الواعر اخصائية جراحة مخ واعصاب"
فتحت عيونها وابتسمت وهي تشوف لروحها في المرايه..
بعدين التفتت بتاخد شنطتها وشيتاتها..
جو عيونه ع الكيسه اللي فيها الجاكيت المحطوطه بين الحيط والدولاب..
شبحتلها بحده بعدين مشتلها خدتها بغضب..وحدفتها فوق الدولاب..
"اميمه قالك يوسف اطلعي"
ارتبكت وقالت:هيا طالعه طالعه..
خدت حاجاتها ومشت طلعت تجري..
وين وصلت برا..
كان عمر طالع من حوشهم...شاف جيهتهم طالعه..
شافها وهي طالعه...
فيها شي متغير...
العباية جديده وطرازها مختلف...والوشاح حتى هو جديد اول مرة اميمه تلبس لون زي هدا..
عكس عليها هلبه...
والاهم انها كانت ماشيه بإتجاه سيارة خوها مشية مختلفه..
معاش فيها هداكا التردد والخجل..
فتحت باب السيارة وركبت بدون ماتنتبه انه موجود..
شاف خوها كلمها..وهي ضحكت واشبح شن ردت عليه بش ضحك..
وتحرك بالسيارة بعدها...
يعني اللي يحس بيه هو شي طبيعي!؟
غار حتى من خوها...!
باهي كيف غيره...!؟
مشي ركب سيارته وهو يحرق من داخل..
وتحرك متوجه لكليته بش يدير امتحانه....
☘☘☘☘☘
لما وصلت اميمه لكلية العلوم.
خشت لقسم الكيمياء وهي تقول في نفسها ...
"خليك واثقه من روحك..تعرفي تمشي...تعرفي تشبحي..تعرفي تتكلمي..تعرفي تتصرفي..تعرفي كل شي ياأميمه..اوثقي في روحك اوثقي في روحك"
هي تردد فهالكلام..ومشيتها تلقائيا كانت تبان واثقه..
لفتت الانتباه هلبه..مشيتها برزت جانب من شخصيتها وان كان بسيط بس كان مميز..
وصلت في المكان اللي بيديروا فيه الامتحانات..
شافت وحده من زميلاتها.
ابتسمت وقالت:صباح الخير..
:اهلا اميمه صباح الخيرات.
عقدت اميمه حواجبها وقالت:مازال؟
:شويه تانيه قالوا وبيدخلونا..
اميمه هزت راسها وقالت:مالا خل نمشي نراج شويه..
مررت نظرها ع المكان..شافت الدروج اللي قدام القسم..
مشتلهم حطت حاجه فوقهم وقعمزت عليهم..
بعدين حطت شنطتها جنبها وبدت تراجع..
اسامه كان مقابلها ومعاه بنات وولاد يراجعوا..
بس وين شافها...نساهم بكل وقعد معاها هي..
حس بشوق لشوفتها ليه 6ايام ماشافهاش وكان مشغوب عليها هلبه ومش عارف كيف يوصل فيها..
واليوم لما شافها حس وكأنه الدنيا كانت باهته من غير الوان ولما شافتها تعبت بالألوان الزاهيه فجأة..
لاحظ انها مختلفه اليوم..طلتها..شكلها..فيها شي مختلف...
شويه وبدوا ينادوا فيهم..
هي كانت منغمسه في القرايه ومش مركزة..
ضحك وقدملها وين قرب يوصل فيها نادى..
"اميمه"
قامت عيونها وقعدت دور..
ضحك ورفع يده وقعد يأشر بيده..
شافاته.. ابتسمت بإحراج..
هو ضحك واشرلها ع مكان الامتحان..
هي شافت الطلبه يخشوا..
فنصت عيونها وناضت وهي شادة حاجاتها وقامت شويه من عبايتها وقعدت تجري..
واسامه حط يده ع عينه وقعد يضحك عليها..بعدين نزلها ومشي بيخش مع زملائه...
🌻🌻🌻🌻🌻
في احدى المستشفيات العامه...
في وحده من ممراتها...
كانت عواطف بنت نجمه جايه تزور صاحبتها ممرضه..
عواطف حتى هي ممرضة متخرجه من كلية التمريض..
وخبرة سنين طويله وهلبه عيادات ومشافي خاصه يتمنوا وحده زيها تخدم عندهم..
وهي تخدم في مستشفى عام..وفي زوز عيادات..
والمستشفى اللي جاية تزور فيه كانت تخدم فيه وسيباته ولتوا يتمنوها تولي..
عواطف؛لالالا تملحت هني مستحيل نولي لو يخلوني نخلص بالدولار..
:خسارة الحق..المشكله الممرضات توا ولى اكثرهم متاع المعاهد والدورات فاشلات ومايعرفوا شي..كان مش من الكادر الاجنبي وحني معاهم راحت ليل..
شويه فاتت من جنبهم ممرضة صغيرة في السن..
اخر مكياج..واللبس المبهرج..والريحه تجيب من وين وين وتمضغ في المستكه وطقطق بالكعب..
قعدت تشبحلها عواطف من فوق لتحت بعدين قالت لصاحبتها:هدا شنو..
:هادي وحده استغفر الله وخلاص..جاية تعرض في روحها وتبي طيح في اي ذكر يمشي ع رجليه في المستشفى..حركاتها مشيتها تصرفاتها..استغفر الله وخلاص.
☘واللي يحكوا عنها وصلت في الاستعلامات تهدرز هي وموظف غادي وتضحك معاه...
:اما انتي ياصابرين..
وهي تضحك وضحكتها صوتها واصل لأخر الممر..
اللي كان جاي منه محي الدين راجل خديجه وهو يدور عليها...
لين عتر عليها وشافها ولما شافها قريب طار من الفرحه...
سوا روحه ومسحه ع شعره ومشالها...
وين قرب منهم قال:السلام عليكم..وعيونه ع صابرين..
وهي تشوفله..
الموظف:وعليكم السلام استاذ تفضل..
محي الدين؛جيت بنسأل ع دكتور اسمه ***** **** يخدم هني؟
صابرين؛ايه يخدم هني..
ابتسم وقال:موجود اليوم؟
صابرين؛لا اليوم لا..
محي الدين؛خسارة..وزعيمته ضرب بيده ع طاولة الاستعلامات من التحسر .
الموظف:يجي غدوة وبعده استاذي..
محي:اني غدوة وبعده مشغول عندي بضاعه بتوصل للميناء لازم نستلمها وشغل تاني برا طرابلس..
وصابرين تسمع فيه وهي تمرر في نظرها ع لبسه..
لاحظت انه غالي فعلا..
رفعت حاجبها وشبحت للموظف وقالت؛بنمشي حميدا..
:تمام نشوفك بعدين..
هي مشت..ومحي معاها بعيونه..
والموظف لاحظه قاله؛استاذي..
هو فاته ومشي لحق صابرين..
الموظف ابتسم بتهكم وقال:جاي ع خاطر الدكتور صار!..
☘صابرين كانت تمشي وحاسه بمحي يلحق..
دارت روحها مش حاسه بشي وتمشي عادي..
"ياأبله..ياأبله"
هي وقفت والتفتت وقالت؛نعم؟
محي الدين بإبتسامه:شن جوك شن امورك..
صابرين:تعرفني!؟
محي الدين بضحكه:تقريبا..
ضيقت عيونها وقالت؛بس اني هادي اول مرة نشوفك فيها..
محي الدين بإبتسامه:متأكده؟
صابرين:متأكده..
هز راسه بعدين مد يده وقال:خلاص نتعارفوا معاك محي الدين..
هي شبحت ليده..بعدين صافحاته وقالت:اكيد تعرف اسمي ..
محي الدين بضحكه:صابرين..
ابتسمت برفعة حاجب وقالت؛لا الفضول ضربني نبي نعرف من وين تعرفني..وجبدت يدها من يده..
محي حط ايديه في جيوب الكبوط وقال:تقدري تقول شفتك صدفه عجبتيني قعدت ندور ونسأل عليك لين عرفت عنك كل شي..
صابرين رفعت حواجبها وقالت:اوو خطير انت..
محي الدين بضحكه:هلبه..
ضحكت وقالت؛فرصة سعيده يامحي..توا بناخد اذنك بنمشي لخدمتي..
محي:مش عاطيك الاذن..
رفعت حواجبها وهي تشوفله..
هوضحك وقال:نبصر عليك..تفضلي ونشوفك مرة تانيه..
ابتسمت وقالت:ان شاء الله..
ولفت ومشت وهي تقول:باي..
ومحي يلحق فيها بعيونه وهو يقول؛باي..بعدين تنهد من قلبه وقال..تو هادي مراة واللي عندي في الحوش مراة!؟اااخ وخلاص..لو الحاجه بس...
ولف ومشي بيطلع من المستشفى..
وهو مش عارف ان في من كان يشوف فيه ويسمع في الحديث اللي دار بينه وبين صابرين..
عواطف بضحكه؛والله توقعته يخون فيها..
وشويه ومشت حتى هي بتطلع من المستشفى وهي حريصه ان خوها مايشوفهاش..
☘☘☘☘☘
طلعت من المكان اللي دارت فيه الامتحان وهي مرتاحه ع الاخر..
بعدين مررت نظرها ع المكان مالقتش زميلاتها اللي تعرفهم بس شافت داليا واقفه تهدرز مع صاحباتها..
قعدت مركزة فيها وهي تقول في نفسه..
"واضح انها حبيبته مش صديقه زي ماكان مفهمني..بجد طلع انذل مخلوق ع وجه الارض"
ولفت ومشت وهي تفكر وين بتمشي توا..
وين وصلت في الكياس اللي يفصل بين قسم الكيمياء ومبنى كلية العلوم وشافاته..
خطرت عليها غرفه..
رفعت حاجبها بعدين مشت وقصت الطريق لين وصلت في الكليه وخشتلها..
فالوقت اللي وصلت فيه سيارة عمر لمبنى قسم الكيمياء..
نزل منها...
وخش داخل وهو يدور عليها...ومايبيش يشوف غيرها..
وتشوفه داليا..
داليا؛اهلا بسيد عمر!...خل نمشي نشوفه خيره معاش دورني ومعاش يرد ع اتصالاتي..
ومشتله طول..
وقفت عليه وهي تقول؛اني هني قدامك..
شبحلها وهو متفاجئ بعدين قال:شني!؟
داليا؛خيرك تلكمست هكي لما شفتني مالا مش جاي ع خاطري!؟
عمر بإنزعاج؛داليا مش فايقلك
ولف ومشي وخلاها مصدومه ودموعها في عيونها هو طول مشي لكلية العلوم برغم ان واثق ان العلاقه بينها وبين بنت عمها انتهت بس قال في نفسه خل نجرب حظي ونشوف..
وصل غادي وخش...
☘واميمه وقتها كانت في الكافتيريا..
محتارة شن تاخد وحاسه بجوع شديد .
هي تشوف للي عندهم..واللي واقف ع الكاصه يتأمل فيها..
رفعت عيونها دار روحه عادي..
اميمه:نبي سكالوب..
هو ابتسم وقال:تمام..
طلعت اميمه من جيبها الفلوس وعطتهوله..
وهو عطاها الورقه وقاللها؛-غادي..
مشت اميمه وين ماقاللها وهو اشر للي معاه عليها بش يتوصى فيها ويديرلها ساندويتش متكم ع قولتنا..
هي عطاته الورقه وقعدت واقفه تستنى..
ع خشة غرفه ومعاها ولد وبنت وهما يهدرزوا ويضحكوا..
شبحتها اميمه وانصدمت فيها..
وجهها كله مكياج..وتهدرز مع الولاد عادي...
وتضحك..طق في الايدين..
غيرت عيونها عنها وهي مصدومه فيها..
"تفضلي ياأبله"
هي شبحتله وخدت الكيسه متاعها ومشت طلعت بدون ماتخلي غرفه تشوفها..
طلعت من الكافتيريا وهي مصدومه ومش مصدقه..
برغم اللي داراته غرفه ماهانتش عليها..
ولاحيهون عليها عمها وسمعته لكن شن اللي تقدر ديره فهالحاله..!؟
طلعت من دوامه التفكير في غرفه لتفكيرها في السكالوب وين بتاكله..
قعدت دور ع مكان مناسب لين لقاته..
مكان مستخطي والشجر درقها..
مشت قعمزت فيه..
بعدين فتحت الكيسه طلعت السكالوب وتفاجئت..
اول مرة تاخده..
اميمه:كيف بنخش فيه ونطلع هدا مستحيل نكمله!!
شافت في الشكارة لقت شوكه بلاستيك خدتها وبدت تاكل في البطاطا..
هني عمر وصل للجهه اللي ترفع للكافتيريا..
قعد يمشي ويدور فيها..لين خش الكافتيريا...
ويجي بعده اسامه..حتى هو ويمشي ويدور فيها لين خش الكافتيريا..
اميمه بإبتسامة متعه:اممم تهبل البطاطا مع الكاتشب نموت فيهم..
في الكافتيريا..
عمر خش لكل مكان فيها وهو يدور لين طلع من الجهه التانيه..
عمر:مستحيل تكون روحت مازال عندها امتحان تاني..
وقعد يمشي وهو يدور لين فات من حداها من غير مايشوفها..
اميمه شدت النص وبتبدا وهي تقول؛يارب مايشوفني حد..
وبدت تاكل..
فهاللحظه..
اسامه طلع من الكافتيريا من القدام وقاعد يدور فيها وهو يقول؛وين مشت!؟
لين طاحوا عيونه عليها وهي مدرقه تفطر..
ابتسم وهو عاقد حواجبه..
قدملها..
لقاها حاصله..تاكل وتمسح في فمها بالكلينكس ومرات ايديها..
ضحك وقال في نفسه يخليها ع راحتها لين تكمل..
ومشي قعمز في تركينه وقعد يراجي فيها...
🌻اما عمر طلع من كلية العلوم ومشي لقسم الكيمياء..
ركب سيارته ومشي بيها درسها قدام مبنى الكليه..
قلبه مصر يقوله ان اميمه في العلوم..احساسه قوي هلبه..
☘والحلوة ..
اللي قاعده تعاند في السكالوب..
اميمه:خلاص معاش نقدر...لفاته وحطاته في الكيسه ودساته في شنطتها...
وخدت كلينكس قعدت تمسح في ايديها كويس وفمها..
بعدين ناضت بحاجاتها..
لوحت الكلينكس في اقرب جردل قمامه..
ومشت بسرعه بطريقها للكيمياء..
واسامه يتكلم بالتليفون لما شافها ماشيه..
استعجل ونهي المكالمه ومشي لحقها..
وقعدت تمشي وهو وراها لين طلعت من الكليه..
وهني عمر اللي ناصب عيونه ع مدخل الكليه شافها..
قلبه بدي يرف رفان..
طول نزل من السيارة..وسكر الباب ومشالها..
هي كانت تمشي بإستعجال ومش مركزة عليه...
هو لحق عليها وجي قدامها..
انفجعت ولون عيونها انقلب للأشهب..
عمر بلهفه ورجاء:اميمه بالله عليك نبي نكلمك شويه بس..
هي نزلت عيونها..
مشت من الجهة التانيه ومع بعضها ترعش..
هو قعد يمشي وراها ويقول .
عمر:كذبت عليك في كل حرف قلته يومها..اكبر كذاب..اميمه غير وقفي واسمعيني شويه بالله عليك..
وهي تمشي بسرعه هاربه منه..
مازال ماعندهاش القدرة ع المواجهه...قاعده وين تشوف تحس بدقات قلبها تتسارع...خافت تضعف..
لهدا قعدت تهرب وتهرب..
وهي تمشي ع طول الرصيف..
عمر:اميمه ورب العزة ورب الكون ياأميمه ماكنت صادق في كلمه قلتها اميمه والله العظيم والله..
"نحبك"..
وعمري ماحبيت غيرك..
"وداليا صاحبتك يااستاذ"
وقفت اميمه والتفتت وشبحت لعمر بنظرة حاده في داخلها حزن والدموع مغرقتها..
هو شاف النظرة هادي التفت ع اللي قال هالكلام..
اسامه؛داليا حبيبتك هونا تراجي فيك برالها..
التفت عمر لاميمه لقاها مكمله طريقها..
اسامه:خلي البنت في حالها وسادك تحشم ع وجهك راعي حق الجيرة ع الاقل..
عمر خلاص وصلت عنده اصفار كيف مانقولوا بعصبيه قال:خير فية اصلك انت..وجبده وقعدوا يضاربوا...
اميمه لما سمعتهم يضاربوا ويشتموا في بعض..
التفتت شافتهم خافت هلبه هلبه..
دموعها نزلوا ومشت بدون وعي بتقص الكياس..
لاحظها اسامه صاح وهو يقول:اميمه السيارة..
التفت عمر وشافها وقريب انجن وهو ينادي؛-اميمه..
هي سمعت صوت الفرينو..
وقفت في نص الطريق بإستسلام وحطت ايديها ع وذانها وغمضت عيونها بقوة...
والدنيا كلها تتفرج ع الموقف...
"ربي يهديك يابنتي خيرك مش منتبهه وانتي تقصي في الطريق!"
فتحت اميمه عيونها ونزلت ايديها وشبحت لمصدر الصوت لقتها مراة كبيرة في العمر..
عمر واسامه تنفسوا براحه...
والناس الحاضرة حتى هما تنفسوا الصعداء..
اميمه من الرعشه ومن اللي صار بدت دمع وهي تقول:بالله عليك سامحيني اسفه..
المراة:خلاص بنتي خلاص معاش تبكي..اركبي معاي نوصلك للكيمياء
اميمه كانت حاسه روحها مش قادره تمشي ع رجليها..
وافقت ع العرض المراة وركبت معاها..
والمراة تحركت طول..
فاتت سيارتها من قدام عمر واسامه..
اسامه مشي طول بيقص الطريق..
عمر شبحله وقال:تخدم ع نهايتك رد بالك..
اسامه شبحله بهزوة بعدين مشي وقص الطريق..
وعمر مشي ركب سيارته وتحرك بيها ودرس في قسم الكيمياء وقعد في وسطها..
واميمه بعد ماوصلتها المراة..شكرتها ونزلت..
تلقوها زميلاتها..
وقعدوا يعطوا فيها ميه ويهدوا فيها لأنها حصلت رعشه..
وعمر يشوفلها بألم وهو في سيارته..
واسامه واقف من بعيد وعيونه عليها..
قعمزوها البنات ع الدروج وقال..
:خيرهم اسامه وصاحب داليا..
اميمه وعيونها مليانات دموع:صاحبها يعني علاقة حب؟
:ايه وليهم مع بعض سنتين زي ماتقول.
نزلت اميمه عيونها وهي تشوف لشيشه الميه بحزن..
"معليشي شويه ترا شويه..هيي انتي"
قامت اميمه عيونها شافت داليا واقفه تشوفلها بعجرفه وهي تقول:شن تبي من عمر انتي فهميني!؟ خيرك ماتتحشميش ع وجهك وتخليه في حاله الراجل مرتبط..مرتبط خلي عندك كرامه واستحي..
البنات كانوا مصدومات ع الاخر..
واميمه تشوف لداليا بحده وهي تفكر كيف بترد عليها..
حطت شيشة الميه ع تركينه وناضت وقفت وقالتلها بإبتسامه:المرتبط اللي محروقه غيره عليه جاني وقالي انك مجرد صديقه عاديه ومافيش بينك وبينه شي.
المرتبط اللي تحكي عليه انسان تافه وعينه فارغه ومتكبر واناني لدرجة انه يبدلك بميه ومايديريش اي اعتبار لمشاعرك..لهدا نصيحه مني دوري ع اللي يستاهلك لأن هدا مايستاهلكش حتى انتي..
اشرت ع الباب متاع مكان الامتحان وقالت:يخشوا..
والتفتت خدت شيشه الميه ومشت بتخش...
والبنات اللي معاهم قعدوا يشبحوا لداليا بعدين مشوا ورا اميمه..
وداليا كانت حاسه روحها بتموت..
شبحت لسيارة عمر..
مشتله طول وهي مندفعه..
لين وصلت في سيارته..
داليا بعصبيه:تعرف ان حقير ونذل وواطي..
عمر بإزدراء قعد يحرك في يده وهو يقول:بري بري بري..بري..
داليا ودموعها ينزلوا قالت:تفو..ع الساعه اللي حبيت فيها عديم رجوله زيك..
قعد يشبحلها بقرف بدون مايرد..
وهي خدوها صاحباتها وقعدوا يهدوا فيها ومشوا بيها لقاعة الامتحان...
#عشرين_إبريل
#طوبى
...يتبع....
