Imperfect Love

Imperfect Love XXXIV: Confrontation

Tulad ng inaasahan ay galit na galit si Julian nang marinig ang sinabi niya. Agad itong nagtungo sa ospital kung nasaan sila at saka pilit na pinapauwi si Jayden.

"Are you crazy? What are you doing here?" Si Jayden ang una nitong hinarap. Halata ang frustration sa mukha nito ngunit halata rin ang matinding pagpipigil ng inis.

"May sakit ang mama ko, anong gusto mong gawin ko?"

"Ang gusto ko ay umuwi ka na, sa bahay, hindi sa condo. At tigilan mo na 'tong kalokohan mo, Jayden."

"Kalokohan?"

"Oo kalokohan, ang bilis mo namang nakalimot. Hindi mo na ba natatandaan kung anong nangyari sa iyo dati at kung anong nangyayari sa iyo ngayon?"

"Kailangan niya ako, Kuya Julian."

"At nasaan siya noong kailangan mo siya? Nakalimutan mo na ba?"

"Kuya Julian,"

"Nasa baba ang kotse, umuwi ka na at hinihintay ka ng lolo sa bahay. I don't want you to be near this place or that woman ever again, Jayden. Naiintindihan mo ba?"

"Pero Kuya Jul-"

"Naiintindihan mo ba?"

At sa halip na sumagot ay mabilis na tinalikuran ni Jayden ang pinsan at padabog na naglakad palayo.

Matapos tignan si Jayden ay si Penny naman ang binalingan ni Julian at sa kanya nito ibinuhos ang inis na hindi mailabas kanina.

"M-magpapal-"

Bago pa man niya matapos ang una niyang salita ay agad na siyang hinawakan nito sa kamay at iginiya palayo sa pwesto nila kanina hanggang sa tuluyan silang makalabas.

"N-nasasaktan ako," binawi niya ang kamay niyang hawak nito at saka niya hinawakan iyon.

"Matigas talaga ang ulo mo 'no? Hindi ba at nag-usap na tayo tungkol dito?"

"Magpapaliwanag nga ako, hindi ko rin al-"

"You know his situation, at alam mo na any time pwede siyang matrigger pero anong ginawa mo?"

Hindi na kumibo pa si Penny dahil alam niyang wala rin namang papakinggan si Julian, hinayaan na lamang niya itong matapos hanggang sa siya naman ang magkaroon ng pagkakataon na magsalita.

"I want your resignation first thing tomorrow morning."

At ikinagulat nga niya ang huking sinabi nito.

"S-sir Julian,"

"You leave me with no choice, I told you, hindi pwedeng mastress si Jayden and he's not okay. Tapos ano, dito ko siya dadatnan? With you? Ano? Dinala mo ba aiya rito? Pinilit mo pa rin iyong gusto mo despite everything that I've said?"

"Hindi ko nam-"

"Paano kung may mangyari kay Jayden while he's here? Mapapanagutan mo bang lahat iyon? May magagawa ka ba? Ang hirap kasi sa iyo lahat gusto mong pakialaman, kahit iyong mga wala ka naman nang karapatan." Hindi pa nakuntento si Julian sa mga sinasabi nito sa kanya, ikinagulat niya ang paglapit nito at paghablot sa isang braso niya habang galit ang itsura.

Nakaramdam naman siya ng takot dahil doon pero gayunpaman ay hindi siya nagpatinag.

"N-nasasaktan ako,"

Pero sa halip na bitawan siya ay lalo namang humigpit ang pagkakahawak nito sa kanya.

At doon na tuluyang naubos ang pagtitimpi ni Penny.

"Wala akong masamang intensyon at hindi ko gustong mapahamak si Jayden. Bakit ko naman gugustuhin na masaktan siya, sige nga?"

Si Julian naman ang hindi nakaimik, niluwagan na ein nito ang pagkakahawak sa braso niya hanggang sa kusa na siyang makawala.