حب في ازقه نينوى

البارت (18)حب_في_ازقه_نينوى الكاتب #احمد

#حب_في_ازقة_نينوى
بقلم #احمد
البارت_18
.
.
معتز: واكف مثل الصنم وماعرف شسوي لا اكدر امنع نرجس ولا اكدر اخفف وجع امها مجرد تمثال واكف ودموعي اني وامي واسماء تصب عليهن
.
.
اجت اسماء تريد تاخذ نرجس وما قبلت بقت ماسكة ايد امها وتبجي وتشجعها علمود تتحمل اخير شي ما تحملت وكع راسها فوك ايد امها
.
.
ركضت عليها شلتها وحطيتها على سريرها وجابتلي كلاص ماي اسماء مسحت وجها بلشت تفتح بس وجهها اصفر وعيونها ذبلانات ومبين عليها الخوف
.
.
نرجس: جنت خايفة على امي وماعرف شسوي ووضعها ما يتحملو بشر وتريد تموت بس المهم تخلص من الوجع البيها بعدها حسيت بماي على وجهي فتحت عيوني جان معتز كاعد يمي وعيونو كلها دموع وخايف علي كلش
.
.
معتز: نرجوسة بيج شي اخذج لدكتور
نرجس: فدوة معتز سوي شي لامي مو كادرة اتحمل وضعها
معتز: ما بيدي شي لازم تتحمل علمود تطيب
نرجس: شنو من علاج الي يدمر المريض بدال ما يشفيه
.
.
معتز: اتركج من العلاج امج بحاجتج صيري قوية لخاطرها لازم انتي تهتمين بيها اذا كل شوية تفقدين راح تزيدين مرضها وماراح تكدرين تهتمين بيها لازم تتحملين
نرجس: مو بايدي كلش خايفة عليها
.
.
معتز: خوفج هذا من حبج الها واني مدا احاسبج على خوفج بالعكس اذا تخافين عليها راح تهتمين بيها اكثر بس سيطري على نفسج وحاولي تتحملين علمود ما توكعين كل شوية على سبيل المثال لو واكعة انتي واحنا مو هنا جان بقت امج لحالها
نرجس: ماشي
.
.
معتز: شفتها كامت غسلت وجها ورجعت كعدت عند امها وتمسح على ايدها مثل الطفلة ودموعها تنزل بهدوء لحد ما تحسن وضع امها وكدرت تنام
.
.
الدنيا جانت عصر وصيت اسماء تسويلهن غدا وطلعت رجعت للبيت وبقت امي واسماء عندهن خليت زينب تحطلي غدا تغديت وطلعت زياد جان نازل من دوامو اخذتو ورحنا لنهر دجلة كعدنا نحجي هناك
.
.
زياد: شبيك
معتز: صاير احس نفسي ارملة وما تشوفك اذا ما تحجيلك عن وضعها
زياد: لعد ليش تعتبرني اخوك اذا ما اسمعك وقت ضيقك
.
.
معتز: كفو منك يخوي بس الوضع دا يصعب يوم ورا يوم
زياد: احجيلي
معتز: شحجيلك غير رجال شكبرني كمت ابجي وياهن مثل النسوان
.
.
زياد: احجيلي شصار
معتز: حجيتلو من اخذت ام نرجس لحد ما طلعت منهن انتبهتلو حتى هو نزلن دموعو على كلامي .
.
زياد: وهسا شلونهن
معتز: وحدة نامت بعد ما شاغت روحها من الوجع والثانية بس الله يعلم بحالها
.
.
زياد: والله ماعرف شحجي
معتز: والله يخوي حتى اني احس هموم الدنيا كلها فوك راسي ولو بايدي اخذ المرض منها بس المهم تبقى ويا بنتها
.
.
زياد: هاي حكمة ربك وهو يعرف شيسوي
معتز: والله اعرف يخوي بس صعبة علي اشوفهن بهالحالة وماكدر اتصرف
زياد: انت ابقى ويا ام نرجس وإن شاء الله خير
.
.
معتز: هو هيج راح ابقى وياها ومن اداوم اخلي جواد يبقى وياها
زياد: هسا الدوام مو مشكلة شغلتو سهلة
معتز: تمام
.
.
حجينا لليل رحنا لمطعم تعشينا ورجعتو للبيت ورجعت اني للبيت مريت عليهن طلعتلي اسماء سألتها عن نرجس وامها كالت الحمدلله احسن حمدت ربي ورحت علمود انام واستلمتني زينب
.
.
زينب: همزين تذكرت عندك مرة
معتز: يا مرة
زينب: لعد اني شنو رجال
.
.
معتز: من ايمتى انتي مرتي
زينب: هاي شبيك معتز
معتز: اني لو انتي بدال ما تشجعيني على فعل الخير جاية تلوميني
.
.
زينب: يعني روحتك العصر وتركتك الي وحدي بيها خير
معتز: زينب رحمة على والديج ترا تعبان ومالي خلك اتناقش بشي
.
.
زينب: لو نرجس جان بقيت تتناقش وياها للصبح
معتز: بالضبط
زينب: وتكولها كدامي فوكها
.
.
معتز: اي صح
زينب: وديني لاهلي دقيقة وحدة ما ابقى
معتز: خلي جواد او ابوي ياخذج تعبان واذا طلعتي من البيت ما اوصلج لو تنكلب الدنيا
.
.
تركتها ونمت ورا بشوية اجت امي تسأل كلتلها دايخ باجر نحجي وجنت مقفل ما جاوبت على كلشي وكملت نومتي
.
.
نرجس: بقيت عند امي لحد ما نامت اجت اسماء كلتلي عالغدا انتبهت ان معتز وامو رايحين كلتلها ما اشتهي اكل شي
.
.
اسماء: كومي حبيبتي وراج دراسة ولازم تاكلين علمود من تكعد امج توكليها وتنطيها علاج
نرجس: شلون تريديني اكل واني اشوف امي بهالحالة
.
.
اسماء: يا عمري والله اعرف وحتى اني مو مشتهية بس لازم تاكلين علمود تتقوين واذا ما اكلتي انتي ما اكل
نرجس: لا تضغطين علي فدوة اسماء
.
.
اسماء: لعد كومي وامج نايمة واصلا لو كاعدة وتشوفج ما تاكلين تزعل عليج
نرجس: تمام جاية وراج
.
.
راحت اسماء كمت بست ماما من راسها ورحت بدلت ملابس المدرسة وغسلت وجهي ورجعت عليها لكيتها مسوية تمن ودجاج مقطعتو صغار يعني بحجم لكمة وحامستو وطالع كلش طيب بس اني ما الي نفس اكل اكلت شوية وكمت
.
.
جنطتي جايبتها اسماء للغرفة طلعت كتبي وكعدت ادرس ماما جانت تكدر تتحرك بس اني ما اخليها لان تتعب بسرعة ومن تتعب جسمها ما يبقى بيه طاقة يهضم الاكل
.
.
جانت بس تسبح وترجع لفراشها والباقي اني متكفلة بيه بقيت ادرس عندها للمغرب شفتها كعدت كلتلها صح النوم
.
.
الاء: صح بدنج
نرجس: شلون صرتي ماما
الاء: شوية احسن
.
.
نرجس: بعدو جسمج يحرقج
الاء: لا بنيتي
نرجس: اذا يحرقج خلي اخذج للحمام علمود تسبحين بلكي احسن
.
.
الاء: لا بنيتي البارحة سبحت وجسمي بيه خمول بس جوعانة
نرجس: ابتسمتلها وكلتلها من عنوني
الاء: اروح فدوة لعنونج
.
.
نرجس: بستها وكلتلها يولي شكد حلوة انتي
الاء: هههههه ترا اني امج مو صاحبتج
نرجس: خيولن صاحباتي
.
.
اسماء: يا خاينة يولي عبالج ما اسمعج مو
نرجس: ولي حبيبتي لا اكوملج
.
.
الاء: ترا ما اقزعلج اني
نرجس: لا ماما لا تورطيني
الاء: دبري نفسج
.
.
نرجس: تقدمت علي اسماء عود تكتلني دفعتها عالسرير وانهزمت وهن يضحكن وراي رحت للمطبخ جهزت الاكل لماما ورجعت وانطيتها هي تاكل واني كعدت عندها ادرس
.
.
من خلصت اخذت الصينية ودا اغسل المواعين سمعت الباب وقبل ما افتحو اجت اسماء فتحتو سمعتها تحجي ويا معتز وبعدها رجعت كالت يسأل عنج انتي وامج
.
.
من خلصت المواعين رجعت للغرفة لكيت ماما دا تغفي لان علاجها بيه منوم من نامت رجعت للمطبخ حجينا اني ولسماء شوية بعدها سوينا عشى وتعشينا وبال ١١ نمنا
.
.
معتز: كعدت ثاني يوم زينب ماكو بالغرفة نزلت تحت عرفت انها رايحة لاهلها تركتها ورجعت للغرفة بدلت ملابسي واخذتلي ملابس بجنطة وطلعت بدون ما احد يعرف وتوجهت لبيت عمي ابو اسد بالطريق اتصل ابوي وجاوبتو
.
.
الوالد: شنو صاير بينك وبين زوجتك البارحة
معتز: تريديني اكعد وياها بالبيت مثل المرة
الوالد: معتز ترا مو جهال انتو واني مليت من قلة عقلكم
.
.
معتز: والله يابة هالحجي احجيه لبنت اخوك وين اكو مرة تحاسب زوجها لان طالع من البيت هاي البقت علي اخذ اذنها علمود اطلع
.
.
الوالد: وانت وين رايح من الصبح
معتز: عندي شغل ويا زياد واحتمال ما ارجع لباجر
الوالد: وشعندك بايت برا البيت
معتز: راح ابات بدوامي يابة
.
.
الوالد: تمام وباجر من ترجع نروح نجيب مرتك
معتز: يابة لو يجي جد جدها ما اوصل بيت اهلها
الوالد: من تجي باجر نتفاهم
معتز: تمام
.
.
سكرت منو وكلت اخر احلامها واحلام ابوها اروحلهم وصلت بيت عمي قبل الظهر بشوية جان اسد موجود وعمي بالبستان استقبلني اسد ورحب بي دخلت ورا شوية اجى عمي سلمت عليه وكعدنا نحجي
.
.
عمي: ليش ما كلتلي جاي جان جهزنا غداك
معتز: مو جاي اجربك عمي بعدين اني مثل اسد ما يحتاج تسوي رسميات بينا
.
.
عمي: الله يعزك بس مهما كان لازم نوجبك
معتز: ما تقصر عمي وكفو منك
عمي: اي احجيلي اكيد عندك موضوع جايبك كل هالمسافة
معتز: تفهمني بدون ما احجي
.
.
عمي: مفضوح امرك يبن اخوي
معتز: ههههههه اي والله يا عمي بس خليني اكمل الموضوع واحجيلك
عمي: مثل ما تريد
.
.
معتز: تغدينا ورا الغدا اتصلت باسماء تطمنت عليها وعلى نرجس وامها وسكرت منها وبعدها اتصلت على واحد من كاريبنا معرفتي بيه مو قوية بس احسن من البقية
.
.
كلتلو جايك للبيت شربت الجاي ورحتلو رحب بي ترحيب قوي لان اول مرة اجيهم للبيت اسمو عامر وابوه يصير ابن خال ابوي وعندو جدتو ام ابوه فد عاجوز تعرف حتى اسرار ابليس واني جيت من هناك علمودها
.
.
عامر: حياك الله شلون خطرنا على بالك
معتز: الله محييك والله يخوي تعرف وضعي وشغلي بس الصراحة متعني من بغداد علمود احجي ويا الحجية
.
.
عامر: قصدك جدتي
معتز: اي
عامر: تدلل هسا انطيها خبر
معتز: تمام
.
.
راح داخل البيت جاب الجاي وكال شوية وتجي وراها بشوية اجت كايدتها ام عامر سلمت علينا وراحت وكام عامر سندها اني كمت بوستها من خدها وايدها
.
.
الحجية: هلا وليدي شلونك شلون اهلك
معتز: الحمدلله
الحجية: ما تركت احد ما سألت عليه حتى دوختني وياها ههههه
.
.
معتز: حجية جايج بموضوع واعرف ماكو غيرج يعرف جوابو
الحجية: احجي وليدي
معتز: تعرفين بموضوع زواجي وانو طالع حجي على زينب قبل ما نتزوج
.
.
الحجية: اي ييمة اتذكر
معتز: الحجي منو الي طلعو
الحجية: هنادي بنت محمد ابن عم خالت ابوك
.
.
معتز: حجية رحمة لوالديج حتى امي نسيتها على هالوصف
عامر: ههههههههه والله ما ينلام يا جدة
الحجية: هههه خايب غير اوصفلك بالمضبوط
.
.
معتز: كليلي فلانة حجت وما اريد توصفيلي عشيرتها
الحجية: هنادي هي الي نشرت الحجي عن زينب
معتز: وهاي منين واصلها الحجي
.
.
الحجية: خايب غير مريتك زينب حاجيتلها
معتز: وشلون عرفتي انتي
الحجية: جبتها هنا اول ما سمعت بالحجي ولو مو معترفة جان كسرت هالعصى على ضهرها
.
.
معتز: بس شلون زينب تشوه سمعتها بنفسها
الحجية: خايب دهر صابك هو اكو مثل كيد النساء هي سوت هيج علمود تنجبر تتزوجها
.
.
معتز: يعني هيج الحجي
الحجية: اي يا وليدي هيج
معتز: مشكورة حجية واني استرخص
.
.
عامر: ما تطلع اذا ما تتعشى
معتز: بيتكم عامر وعشاي عند عمي ومو جاي اجربكم ومشكورة مرة ثانية حجية
.
.
طلعت وعند الباب وصيت عامر ما يطلع الحجي ورجعت عند عمي ابو اسد لكيتو حاط عشانا ويا اهلو ويكول مو غريب انت وفعلا اني مو غريب بس لان قليل ننجمع فما متعود على بناتو وما اريد اضايقهن بس انجبرت هالمرة
.
.
كعدت وحاولت احجي وياهن علمود يتعودن علي وما ينحرجن كملت يومي عندهم وتونست كلش وياهم ثاني يوم جان جمعة من الصبح ودعت عمي وعيلتو ورجعت للبيت
.
.
واخيرا فهمت السالفة كلها طلعت تعرف تخطط زينب من وصلت سبحت عالسريع ورحت للصلاة ومن رجعت دا نتغدا وحجى وياي ابوي
.
.
الوالد: اليوم نروح نجيب مرتك عيب صارلها يومين عند اهلها
معتز: خليها تبقى واني كلتها ما اروحلها يعني ما اروح
الوالد: وتكسر كلمتي
.
.
معتز: تعرفني يابة ما يحتاج اسولفلك على ابنك وتعرف ما امشي ويا الغلط
الوالد: وشنو الغلط بالموضوع
.
.
معتز: اني حذرتها ما تروح وكسرت كلمتي وثانيا هي ورا سالفة الحجي الي طالع عليها
الوالد: وشعرفك هي ورا السالفة
.
.
معتز: ماكو شي يبقى مستور بهالوقت
الوالد: متأكد
.
.
معتز: فكر بيها يابة محد يعرف بالموضوع غيرنا احنا واهلها وعمي ابو اسد ومحد بينا يحجي بس هي رايحة حاجية لهنادي مدري شنو اسمها بيتها قريب من عمي ابو اسد وهنادي ناشرة الحجي
.
.
الوالدة: اعرفها هاي الخبر العدها يوصل خارج الدولة شكد ما تحب الاخبار والفضايح
الوالد: وانت شعرفك
.
.
معتز: اني عرفت وما اريد احجي باسم الشخص الي وصلي المعلومة لهذا يابة سالفة اروح لزينب لو شمايصير ما اوصل لبيت ابوها
.
.
الوالد: وتتركها هيج
معتز: لا تخاف باجر يدزون اخوك لان ما رحتلهم
.
.
خلصت غدا ورحت لغرفتي نمت لان راجع تعبان وهم كعدت من الصبح لهذا نعسان ومن حطيت راسي عالمخدة فورا نمت
.
.
نرجس: ثاني يوم جنت رافضة اداوم واترك ماما لحالها بس من كعدت زعلت علي ودزتني غصب عني للمدرسة وما قبلت ابقى ابد وتكول مدرستج اهم من كلشي
.
.
رحت للدوام صحيح هي ببالي بس وجود ام معتز وياها مطمني وبالاخص انو ماعندها مراجعة عند الدكتور لان كمت اخاف من روحتها للدكتور
.
.
وقررت بالمراجعة الجاية اروح وياهم لو تخرب الدنيا اريد اشوف شنو هالعلاج الي دمرها ووصلها لهالحالة من رجعت اتصل معتز على اسماء واستغربت هو كل مرة يجي يسأل يلا يجوز مشغول بكيفو بعد
.
.
حطينا غدانا اني واسماء مع ماما وتغدينا ثاني نهار جمعة وماعندنا دوام خلصنا شغل البيت ودرسنا شوية بس علمود ما ننسى المواضيع
.
.
واسماء وصت جواد على كرزات بين ما جابهن خلصنا دراسة حطينا الكرزات وكعدنا اني وهي وماما نحجي وناكل كرزات ورا العشى راحت اسماء لبيت اهلها
.
.
ورجعت كالت زينب زعلانة عند اهلها ومعتز ما موجود امي ضاجت لان اكيد زينب زعلت بسببنا واني هم انغثيت من الخبر بس مابيدنا شي نسويه
.
.
وضعنا جان مثل الي بحلكو موس لا يكدر يبلعو ولا يكدر يطلعو كل الي يكدر يسويه يتحمل الوجع واحنا كل الي نكدر نسويه نتحمل لحد ما تتحرر الموصل
.
.
لان بهيج وضعية مستحيل نبقى يوم واحد وكلها ايام ويرتاحون من وجودنا ويعيشون زينب ومعتز براحة بغيابنا
.
.
ثاني يوم جان جمعة حجيت لاسماء على عادتي انو احب اسمع الخطبة وصعدنا هالمرة سوا اني وياها وسمعنا الخطبة ونزلنا
.
.
من اسمع الخطبة احس الدين حلو بس من اشوف اعمال الناس اكو تناقض فضيع بين الكلام والافعال بالخطبة يوصي عالامانة والناس تبوك بعضها ويوصي عاليتامى والناس تظلم اليتامى
.
.
وبالخطبة هواي توصيات والناس تسوي عكسها تماما تجاهلت تفكيري وتغدينا سوا وبعدها نمنا اني وامي واسماء تكول اروح لبيتنا اجمع الاخبار وارجع ههههههه امي ضحكت على حجيها ومن راحت سكرت الباب وراها ونمت
.
.
معتز: كعدت العصر وما نزلت من غرفتي بقيت اكلب بالتيلفون واشوف الاخبار بالفيس واليويتوب الحمدلله انكسرت شوكة داعش وما باقي هواي وينتهي رعبهم بالعراق
.
.
صحيح انطينا هواي شهداء بعمر الورود بس استشهدو علمود العوائل تعيش بوضع احسن وعلمود تبقى الاعراض محافظ عليها
.
.
ويرجع العراق عراق ما يتغير اسمو مثل ما هم مخططين انتظرت لوقت العشى ونزلت تعشيت وكعدت ويا اهلي شوية واجت اسماء
.
.
اسماء: مساء الخير
معتز: هلا اسماء خوما اكو شي
اسماء: لا بس اريد ابقى هنا لان ماما لحالها
.
.
معتز: شلون نرجس وامها
اسماء: الحمدلله بخير
معتز: الحمدلله
.
.
اسماء: وانت شصار وياك انت وزينب
معتز: ماكو جديد
اسماء: ليش ما ترجعها
معتز: خليها تتأدب
.
.
دا نحجي واندك الباب راح جواد فتح الباب ورجع كال عمي اجى ومبين عليه معصب ابتسمت وانداريت لابوي كلتلو دزوه
.
.
الوالد: اسكت هسا وكوم خلي نشوفو
معتز: اذا اجيت راح ازعلو
الوالد: كوم وياي وانت ساكت
.
.
معتز: رحنا عليه جان بالاستقبال سلم عليه ابوي ورد السلام سلمت عليه اني وبقى ساكت ابتسمت وكلتلو السلام لله عمي
.
.
عمي: السلام للي يستاهل السلام
معتز: لا عمي هاي ما مرجية منك
عمي: لعد شتريد اخذك بالاحضان وانت طارد بنتي بنص الليل
.
.
الوالد: افه عليك ابو رعد احنا نطرد بناتنا بنص الليل
عمي: لعد شتسميها هاي من رجعتلنا بنتنا بالليل
.
.
الوالد: بنتك اني بنفسي حجيت وياها وكالت ما ابقى هنا قابل نجبرها
عمي: شلون تبقى وهو طاردها
.
.
معتز: كوة متحمل ما اريد انفجر بيه وبالاخص هو عمي ووياه ابوي يعني اذا حجيت حتى ابوي راح يغضب علي لان راح احجي بعصبية وصوتي يصير عالي
.
.
بس من كال طاردها بنص الليل واني بنفسي كلتلها لا تروحين ومحذرها ما تحملت اسكت بعد وانفجرت بيه
.
.
يتبع
ارائكم وتوقعاتكم للبارتات الجاية ❤ 
وحطولنا كم تعليق بطريقكم ❤

https://www.facebook.com/الكاتب-احمد-106346968747988/