The Man's Perfect Wife Myanmar Translation

အပိုင်း ၄

“ သူ ဘာတွေဖြစ်နေတာလဲ ? ”

ယွန် က စင်္ကြံလမ်းမှာ ဆက်တိုက်လမ်းလျှောက် နေရာကနေ ရပ်လိုက်တယ် ...

သူမ ဒေါသထွက်ရလွန်းလို့ အနားမှာရှိတဲ့ပစ္စည်းတွေကို ဆွဲယူလွှင့်ပစ်ချင်နေပြီ ၊ ဒါပေမယ့် အဲဒီလို မလုပ်မိဘူး ။ ခုချိန်မှာ သူမရဲ့တည်ငြိမ်ကျက်သရေရှိတဲ့ အထက်တန်းစားအမျိုးသမီးတစ်ယောက်ရဲ့ဟန်ဆောင်မျက်နှာဖုံးက ကွဲအက်လာတော့မလိုပဲ။

ကောင်းကင်တစ်ခုလုံးမိုးခြိမ်းသံတွေကြောင့် တုန်ခါနေပြီး အခန်းထဲကအလင်းရောင်တွေနဲ့ ပြတင်းမှန်မှာ ပုံရိပ်ထင်နေတယ် ၊ မိုးရေစက်တွေစီးကျ‌ နေပုံက ပိုးကောင်ငယ်လေးတွေလိုပဲ။ ယွန်က မျက်နှာကျက်ကို မော့ကြည့်လိုက်တယ် ၊ သေချာတပ်ဆင်ထားတဲ့လျှို့ဝှက်ကင်မရာတွေ နေရာတိုင်းလိုလိုပဲ... ဒီလို မရေမတွက်နိုင်တဲ့ကင်မရာ‌‌ ပေါင်းများစွာနဲ့ သူမရဲ့လှုပ်ရှားမှုတိုင်းကို စောင့်ကြည့်ခံရတဲ့နေရာက သူမအတွက် “ အိမ် ” လို့ ခေါ်တဲ့ နေရာပါတဲ့လေ။

အဲဒီနေရာကနေဆက်လျှောက်လာတော့ ကြမ်းပြင် နဲ့ သူမ ဒေါက်ဖိနပ်ထိမိတဲ့ တဒေါက်‌ဒေါက် အသံတွေပြန်လည်ထွက်ပေါ်လာတယ်... အဲဒီခဏမှာ သူမရဲ့ တည်ငြိမ်ပြီး အေးစက်တဲ့ အမူအယာတွေ ပြန်ပေါ် လာတယ် ၊ ဒီလိုစောင့်ကြည့်ခံရတဲ့ဘ၀မှာ နေသား ကျနေလွန်းလို့ သူမအရိုးထဲထိတောင် ပျော်၀င်နေခဲ့ပြီ။ ပုံမှန်ခြေလှမ်းတွေနဲ့ပဲ သူမအဆောင်ရှိရာကို ပြန်လာခဲ့တယ် ...

အဆောင် ဆိုတဲ့စကားလုံးက ဒီနေရာအတွက်တော့ အသင့်တော်ဆုံးပဲ။ ဒီအဆောက်အဦမှာ မြေညီထပ် အပါအ၀င် အထပ်ပေါင်း ၅ ထပ်ရှိတယ် ၊ မြေညီထပ်မှာတော့ ကားဂိုထောင်ရှိပြီး ဒုတိယထပ်မှာ ဧည့်ခန်း ၊ တတိယထပ်မှာ ထမင်းစားခန်း နဲ့ စာကြည့်ခန်း ၊ လေးထပ်မြောက်မှာတော့ ရေကူးကန် နဲ့ ကိုယ်ပိုင်အားကစားခန်းတွေ အသီးသီးရှိတယ်။ အပေါ်ဆုံးထပ်ကတော့ သူမတို့နှစ်ယောက်အတွက် သီးသန့်အသုံးပြုနိုင်တဲ့ ကိုယ်ပိုင်အခန်းတွေ ရှိတဲ့နေရာ ...

အရှေ့ခြမ်းကတော့ ဆောဂျွန်ဟွန် အပိုင်ဖြစ်ပြီး အနောက်ခြမ်းကတော့ ယွန် ရဲ့ နေရာ... သူမရဲ့ ကိုယ်ပိုင်အဆောင်မှာ ဧည့်ခန်း၊ ပန်းချီဆွဲတဲ့ studio နဲ့ အိပ်ခန်းတို့ရှိတယ် ...