بدت مهرة تتسوق و تجهز حق عرسها
و ميرة معاها بكل خطوة
غيث كلم ابوه عن ميرة و قررو انه يخطبونها
الجمعة 6:30pm
منصور : حياك يا بو غيث تفضل استريح
علي : اخبارك منصور
منصور : بخير الحمدلله من صوبك
علي : بخير دامك بخير ... شحالج ام مهرة
سلمى ابتسمت : بخير دامك بخير بو غيث... وين ندى؟
علي : الله يسلمج ندى شوي تعبانه و ما قدرت اتيي
سلمى : سلامتها
علي : الله يسلمج
منصور : انزين يا بو غيث شو سبب الزيارة المفاجاة... "ضحك" عندك مفاجاة ؟
علي ضحك : انا اليوم ياينكم .. عشان اطلب ايد بنتكم ميرة حق ولدي غيث
سلمى و منصور لفو على بعض
علي : ها .. شو رايكم...؟
منصور : والله غيث ولد زين و طيب و ما شاء الله عليه .. نحن بنشوف شو راي البنت و ان شاء الله بنرد لكم خبر
علي : ان شاء الله
غيث كان منزل راسه و ساكت
ما كان يعرف اذا يقول لهم عنه ... ولا يسكت ... حس انه ماله داعي يعرفون دام ميرة تعرف .. و موافقة
تمو يسولفون و تعشو
و راحو غيث و ابوه
10:30pm
ميرة كانت يالسه في غرفتها تقرا
اندق الباب و دخلت امها
سلمى : هلا
ميرة سكرت الكتاب و حطته على الطاولة
ميرة : اهلين
سلمى راحت و قعدت عندها
سلمى : شسمه ...
ميرة : ...؟
منصور : بكلمج في موضوع و انتي استخيري و قولي لي رايج
اول ما قالت سلمى ها الكلام
ميرة عرفت انه غيث خطبها
ميرة : رايي في شو؟
سلمى : غيث اليوم كان في بيتنا مع ابوه
ميرة : انزين..؟
سلمى رفعت حاجبها : و ... خطبج
ميرة تمت ساكته و تطالع امها
سلمى : استخيري و شوفي لو ارتحتي قولي لنا عشان نرد لهم خبر
ميرة : ان شاء الله
سلمى ابتسمت و مسحت على راس بنتها و قامت طلعت
تمت واقفه عند الباب تفكر
كيف تزوج بنتها لواحد عنده ماضي....؟
سلمى كانت تعرف..
تعرف عن غيث و حمد.. ذياب قال لها كل شي...
كل شي حمد و غيث كانو يسوونه..
اذا ميرة وافقت عليه ما بتقدر هي تقول شي
بتم ساكته نفس ما سكتت لما حمد خطب مهرة
ما تقدر تقول حق منصور
هي تعرف انهم تابو .. بس بعد للحينها مب مرتاحه
سلمى : ان شاء الله ما اندم ... "خذت نفس عميق" ما بيصير شي ان شاء الله... كانو طايشين و الحين عقلو.. بس ... مافيها مشكله
