Heart Like Brilliant Words || ဘာသာပြန် 《Completed》

Chapter 41

ခွဲခွါခြင်းကမည်မျှပင်ခက်ခဲသည်ဖြစ်စေ သူတို့ရင်ဆိုင်ရမည်သာ။

လင်းယွီရန်မှာ သူ၏ခက်ခဲပင်ပန်းလှမည့်အထက်တန်းစီနီယာနှစ်ကို စတင်တက်ရောက်ရန်အတွက် Mostine ၏အေးစက်သောဆောင်းရာသီမှ လင်းကျိုး၏ နွေလယ်ခေါင်သို့ပြန်လာခဲ့ရလေသည်။သူနှင့်ကုယောင်ယန်တို့က နေ့တိုင်းဗီဒီယိုကောလ်ခေါ်ရန် ချိန်းဆိုထားခဲ့ပြီး သူတို့၌ဖြစ်ပျက်သမျှ စိတ်ဝင်စားစရာကောင်းသည့်အရာမှန်သမျှအကြောင်း ပြောတတ်ကြလေသည်။

ကုယောင်ယန်က ပြိုင်ပွဲအတွက်စတင်ပြင်ဆင်နေပြီဖြစ်၏။လင်းယွီရန်ဆွဲ၍ပြီးစီးသွားသော ပန်းချီကားကို မစ္စတာကျန့်ကဂရုတစိုက်ဘောင်သွင်းကာ ဖုန်မပေနိုင်သောအဝတ်ဖြင့်အုပ်ပြီး တရုတ်နိုင်ငံသို့ပြန်ပို့ပေးမည်ဖြစ်လေသည်။၎င်းကို သူ့မိဘများအတူတူရောက်လာသည့်အခါ ပြမည်ဟုလည်းစီစဉ်ထားခဲ့၏။

တစ်ယောက်နှင့်တစ်ယောက် ဗီဒီယိုကောလ်ခေါ်၍မရနိုင်သည့် နေ့ရက်များတွင် ဖုန်းခေါ်ကာအသံနားထောင်ရန်တော့ အချိန်ရနေဆဲသာ။လင်းယွီရန်မှာအလွန်ပင်ကပ်တွယ်နေတတ်ကာ ကုတင်ပေါ်၌လှဲရင်း ကုယောင်ယန်လေ့ကျင့်မှုများပြုလုပ်နေသည်ကို ကြည့်နေလေ့ရှိ၏။တခါတရံ ညဉ့်နက်သွားသည့်အခါ သူကလက်ထဲ၌ဖုန်းကိုကိုင်ရင်း အိပ်ပျော်သွားတတ်လေသည်။ကုယောင်ယန်မှာတော့ လေ့ကျင့်ရေးပြီးသွားသည့်နောက်တွင် အိပ်ပျော်နေသော ထိုကောင်လေး၏မျက်နှာကို မြင်ရလေ့ရှိ၏။

လင်းယွီရန်၏ မျက်တောင်များက ဖန်သားပြင်နှင့် ဘေးတိုက်ပွတ်တိုက်နေကာ ပါးစပ်မှာလည်းအနည်းငယ်ပွင့်ရင်း သွားရည်များက သူ့နှုတ်ခမ်းပေါ်မှ အနည်းငယ်ကျနေတတ်၏။ကုယောင်ယန်က စခရင်ရှော့ရိုက်ထားပြီး နောက်တစ်နေ့မနက်၌ သူ့လက်နှင့်ကိုယ်တိုင် ဝက်နှာခေါင်းပုံဆွဲကာ လင်းယွီရန်ဆီ ပို့ပေးခဲ့၏။လင်းယွီရန်မှာ သူ့မျက်နှာကိုဓာတ်ပုံရိုက်ခံရသည့်အတွက် ဒေါသထွက်သွားကာ maskတစ်ခုကိုအထူးပင်ပြင်ဆင်ထားပြီး ညအိပ်ရာမဝင်ခင်၌ maskတပ်ရန်စီစဉ်ခဲ့လေသည်။

"သဘက်ခါ အနီးကပ်လေ့ကျင့်ရေးလုပ်ရမှာလား?"

လင်းယွီရန်က ကုတင်ပေါ်၌လှဲရင်းမေးလိုက်လေသည်။သူ၏လက်ချောင်းများက စခရင်ပေါ်ရှိ ချွေးသီးများတွဲခိုနေသော ကုယောင်ယန်၏ခန္ဓာကိုယ်ပေါ်တွင် ပြေးလွှားနေကာ ညှပ်ရိုးပေါ်၌ရပ်တန့်သွားလေသည်။