تيريزا🥀مكتملة🥀

🥀الجزء 118🥀

تيريزا 🌹 118
في عرفنا الشرقي .. دائما ما يرتبط الإنفصال بمأساة لا نجيد الانفصال بِرُقي .. لا ننفصلُ بسلام..!!"
"آحببتُكـ اكثر مما ينبغي..وأحببتني أقل مما أستحق.!".!
وصلات سارة للقصر ديالها حلاتو من بعد ماسدات ابوابو بانلها بارد و كئيب فلحظة تذكرات حياتها هنا ايام كانت كتاكل العصى من عند علي او نهار عاشت مع نيار هنا بزااف دالاشياء او الاصوات كتردد فذاكرتها عاشت الاحزان اكثر من الافراح او قبل ماترمي رجلها باش تدخل تراجعات او هي مغمضة عينيها او كتهضر مع راسها
سارة: لافاليز ديالي تسنايني هنا انا شوية او نجي
طلعات سارة لبيت هزات فلوس او وراقها او الاشياء الثمينة حطاتهم فشانطا او رجعات هبطات حطاتها حدا لافاليز او مشات للكوزينة هزات ليصانص او بدأت كترشو فارجاء الكوزينة او الصالة او البيوت كاملين عومات القصر بليصانص او خرجات لبرا عند لافاليز ديالها هزاتها هي او شانطا او بعدات شوية على القصر او شعلات القداحة او رماتها فالارض او تشعلات العافية سرعة البرق كتلتاهم القصر كولو
سارة: انبدا حياة جديدة او خاص نحرق الحياة القديمة
ضارت سارة عطات ظهرها للنار او خرجات من تماك أو بحكم ان القصر جا فمنطقة خارجة على المدينة حتى واحد ماساق لخبار بلي القصر كيتحرق بقات هي كتمشى خطوة بخطوة مدة طويلة كتعيا او تجلس ترتاح او تبقا تمشى حتى وصلات لبلاصة الطوبيس بقات كتسناه وصل عندها ركبات فيه او قالتلو احطها فالمدينة القديمة مقررة انها تمشي للدار نتاع زمرد فحي شعبي حيت بقا عندها ساروت ديالها او داكشي لي كان دخلات ليها حلاتها لقاتها كيما خلاتها خاصها غير شوية د التنظيف حطات اغراضها فبيت النعاس او بدأت كتنظف او دارت لغدا او جلسات كترتاح شعلات تيليفون ديالها لقات 100 ابيل من عند قصي او زمرد تنهدات او حيدات لاكارط من التيليفون او هرساتها او بقات كتفكر شوية بداو كيبانو فيها ملامح الحزن او بداية البكا حطات يديها على وجها او كترد دموعها
سارة: شششش ماتبكييش صافي هادي حياة جديدة نساي كولشي نتي ماشي تيريزا نتي سارة فقط سارة او خصك تقلبي على خدمة تعيشي منهاا او تبداي صفحة جديدة
ناضت سارة كلات الطاجين لي وجدات او رتبات حوايجها او لبسات بيجامة او نعسات باش ترتاح شوية ...فاقت فالعصر كتسكسل خرجات للسطح بحكم ان دار قريبة للسطح او لقات بنت كتنشر لحوايج
فتيحة:(كطرطق المسكة او كطلع او تهبط فيها) نتي جديدة هنا
سارة: وي
فتيحة: نااري على وي باينا نيت غير وحدة من صحاب العاقة يدك روطب او ماتعرفي ديري والو
سارة: (جبدات فيها حجبانها) نتي شغلك ؟؟ باش ضرك هادشي دخلي سوق راسك شوية (مشات كطل من السور)
فتيحة:(هزات شبكة د النشير ) الله يبقي ستر قلنا جيران او نتعارفو ولكن مابقا خير يييخ (خرجات فتيحة من سطح عيطات لدارها او بقات سارة كتفكر فشنو ادير اش هاد الحياة اش هاد الناس لبلاصة جديدة عليها محلات د الخضرة دراري فراس الدرب كيتكيفو او الشطايرية كيبيعو سلعتهم الهرج كاين تماك بقات غير كتبحلق ف عويناتها حتى غرغرات ليها كرشها بالجوع دخلات للدار لبسات كسوة طويلة ولكن عازلة طايتها او خلات شعرها مطلوق لبسات غير كلاكيطا او هزات فلوس تشري الخبز سدات الدار او تمات هابطة مع العمارة غير حطات رجليها برا تسمع الصقير الزوافرية او شمكارة اياكلوووهااا بعينيهم هي متوترة او خايفة
حماد: نااااري اغووويااا سلعة جديييدة
عزيز: وا تشيتييييز اصااااحبييي
بقاو كيتغامزو عليها او لعيالات كيشوفو فيها فاكيد راه ملكة جمال دايزة من حداهم دازت من حدا راجل كبير شوية فالقهوة كيشيش او يشرب قهوة او هو يحط الشيشة او تنهد او هضر بصوت عالي
حسن:(فتح يديه أو طلع زفير قوي ) ااااش بغيييتليييك امرااااتي غيييير الموووت الزييين قدااامي كيتساراا احححح الى بغات لموت تجي تجي
تهزات القهوة بالضحك او سارة حنات راسها او زادت كلشي كيحاول استلطفها اول مرة اشوفو زين فحومتهم وصلات لعند البقال لي حاط سلعتو برا او هي تهضر
سارة: واخا تعطيني جوج خبزات
الحاج: الله على صويت مرحبا بالزين (عطاها الخبز)
سارة:(بغات تخلصو) هاك
الحاج: لاواه نتي باين جديدة هنااا خوديها فابور ..اش سماك الله
سارة:(شافت فيه قاصح ) اش سماك نتا
الحاج: كيقولولي الحاج
سارة: او حجيتي
الحاج: معلووووم نكون حجيت
سارة: اوا خصك تعاود تحج باش تمحي الذنوب اسي الحاج
الحاج: (كيتبسم ) علاه لي شاف الزين اخطاوه الذنوب الآلة سارة
سارة:(حطاتلو الخلصة تماك) اوا هاك شد فلوسك (ضربات ضورة او رجعات من طريقها حتى شافت ولد صغير كيشوف فالمصاصة ) بغيتي مصاصة
الولد:(حركلها راسو ب اه )
سارة:(شراتها ليه او هوما يجيو بزاف د الولاد بغاو حتى هوما مصاصة ) ههههه حتى نتوما بغيتو مصاصة
الولاد: اه
سارة:(شافت فالبقال ) عطيهم مصاصة
عطاهم البقال مصاصة او هو يهضر واحد فيهم
الولد: شنو سميتك
سارة: سميتي سارة الكتكوت او نتا
الولد: حمزة او هادا رضوان او هادا حسام او هادا عبد الرحمان ....
سارة: ههه متشرفين
حمزة: نتي زوينة بزاف اول مرة نشوفو بنت زوينة او ظريفة لاهيلا فوقما حتاجيتينا حنا هنا
مشاو فرحانين كيضحكووو او كيجريو او كيعيطو بصوت عالي : طاطا سارة ظريفة بقات كتشوف فيهم او ضحك كولشي عرف سميتها بغات ترجع للعمارة او هو يوقفها الراجل الكبير لي قال ديك الهضرة فالقهوة او كولشي كيشوف فيهم
حسن: مرحبااا بالضياف بانليا نتي جديدة هنا
سارة: كاين شي موشكيل
حسن: لا بالعكس مرحبا بيك انا سميتي حسن او انا هو الرأس لكبير فالحومة الشور شواري او حتى حاجا ماكاتكون بلا خباري
سارة: مزيان
حسن: الى حتاجيتي اي حاجا الآلة سارة مرحبا
سارة: سير سول مراتك واش محتاجة شيحاجا اسي حسن (غمزاتو او مشات او ضحكو الناس لي تماك رداتلو الدقة اما هو بقا كيضحك او هز يدو للناس بمعنى سكتو او مابقات الدبانة كتزنزن )
حسن: عمر قاد الجمر فديك الشيشة
عمر: هي اللولة اسيدي حسن
....طلعات سارة لدار او بقات كتحل الباب او هي تجي فتيحة هي او صاحبتها كيهضرو قدامها
فتيحة: اوا كثرووو القحبات فالعمارة اختشي
صاحبتها: والله ماكذبتي اختي الله انجينا منهم او من فعايلهم
سارة:(كانت عارفة لهضرة عليها او مابغاتش تهضر حلات الباب او دخلات حطات الماكلة او كلات او هي كتفكر اش هاد الجو اش هاد الناس الله اخرج العاقبة بيخير او على خير شعلات التلفازة او شافت اخر الاخبار على القصر تحرق او ماعرفوش شكون حرقو او كيتساءلو فين هي او فين عليقلبات القانة او نعلات الشيطان مشات التوضات او صلات من صباح حتى العشاء او رجعات شعلات تلفازة كتفرج فالفيلم د Aashiqui 2 حتى تسالا او طاحت نعسات او هي مقررة غدا تمشي تقلب على خدمة )
....