#إنسومنيا4
قضيت الليل كلو في المخزن.. وتاني يوم ابوي حبسني في غرفتي ومنع اخواني يشوفوني لكن هم كانو بتفقدوني كل ما هو يطلع.. طلعني بعد يومين عشان امشي اسجل للسمستر الجديد لبست عبايه سوداء وطرحة سوداء وكاب اسود شلت بطاقتي واقرب ATM صرفت القروش واتوجهت على الجامعه سجلت ورجعت البيت💙
"ثقيلةٌ هذه الأيام كأنها تسيرُ فوق صدري😔💙"
___________________💙
بلسان اسيل
مروا اسبوعين ومافي جديد زول فينا شغال بالتاني مافي... ايهم مع تلفوناتو وطلعاتو الكتيرة وانا بحاول اشغل نفسي ب اي حاجه لحدي ما في يوم جاني بالليل وهو زي الدايخ وشويه وح يقع سندتو ودخلتو غرفتو لم شغلت النور لقيت وشو كلو جروح ضمدتها عليهو واديتو مسكن ولم قست حرارتو لقيت عندو حمى قعدت اعمل ليهو كمادات لحدي ما خفا وبدون احس لقيت نفسي نمت جنبو ولم صحيت لقيتو بعاين لي صبحت عليهو بس وجري على غرفتي وما فتحتها إلا الساعه عشره...طلعت على أساس هو مشى الشغل دخلت المطبخ وفتحت التلاجة وانا بغني ولم قفلتها لقيتو في وشي من الخلعه رميت العصير الكنت شايلاهو في يدي وبقيت اعاين ليهو هو طوالي قال لي يا ما كنت عارف انو شوفتي بتلبشك كدا!🙂💔قلت لالا عشان اتخلعت بس قال لي تعالي تعالي قعدني في الكنبه ومشا جاب لي عصير اداني ليهو وقال لي أمس اختلفت لي مع واحد وهو استفزاني شديد عشان كدا اتضاربنا بعدين هو طلع خا'يب وجاب صاحبو واتلموا علي الاتنين لكن بعد دا ما قصرت معاهم 😌قلت ليهو من كلامك دا افهم انو انت زول مشاكل؟ قال لي انا ما زول مشاكل ولا اي حاجه قلت ليهو اها؟ قال لي اها شنو يا زوله؟ سكت وبقيت اعاين ليهو تاني قال لي صحي انا عازم اصحابي بكره عايزه شنو اجيبو ليك عشان انا طالع .. كتبت ليهو ورقة واديتها ليهو وهو المساء جاب لي الحاجات...تاني يوم من بعد صلاة الفجر دخلت المطبخ وطبخت كذا صنف..الشغاله نضفت لي وعملت لي العصير بسبوسه لي للحلا وجهزت مكسرات للجبنة .. أيهم صحى قبل الظهر بي شويه لقاني قاعدة في الصالة قال لي انتي لسه ما جهزتي شي؟ارح عشان اساعدك قلت ليهو خلصت عاين لي بي دهشة كدا قال لي نعم قلت ليهو خلصت دخل المطبخ وجاني قال لي متأكده عملتيهم براك قلت ليهو اااي مع بعض المساعده حك طرف حاجبو باصبعو وقال لي يعني اقول ليهم تعالو خلاص؟؟وقتها م'ت ضحك😂 ولم لقيتو بعاين فيني شديد اتوترت وقلت ليهو اااا انا ماشه اجهز دخلت غرفتي وجهزت نفسي وما طلعت الا لم سمعت صوتهم كنت لابسه عباية استقبال كحلية جابها لي عمران اخوي سلمت عليهم كانو ولدين وبتين ضيفتهم وقعدت معاهم كانو بتونسوا وبضحكوا وانا كنت متوترة شويه ف ما اتكلمت كتير لم يسألوني بجاوب ختيت ليهم الغداء وواحده من صحباتو من ما جات كانت بتتخافف قالت عايزه تعمل الجبنه قلت ليها انا بعملها قالت لالا انا بعملها وقالت لي عادي حبيبتي البيت دا بيتي عديل انا لا ضيفه لا شي..بعدين كل مره بجي هنا بعمل القهوة صح يا هومي؟أيهم قال ليها ااي...مع انهم الاتنين استفزتوني لكن انا بطبعي ما بحب اتهور ف سكت خليتهم🙂 ... طلعوا قبل المغرب بي شويه أيهم مشا يقدمهم وانا دخلت المطبخ لقيت الشغاله لمت باقي الاكل قلت ليها امشي انتي عشان ما تتأخري على أولادك..كنت عايزه اغسل العدة أيهم قال ح يغسلها هو قلت ليهو لالا بغسلها قال لي انا عايز اغسلها قلت ليهو راحتك وكنت ماشه قال لي انتي زعلتي؟ قلت ليهو وازعل من شنو؟حك طرف حاجبو وقال لي يا بت انتي صريحه كدا مالك؟ قلت ليهم نعم؟ قال لي لالا المهم تعالي لميها لي زيت؟! قلت ليهو تمام..سكت شويه وقال لي لم زول يقول ليك زيت؟؟ قولي ليهو زيت ما تمام.. زيت؟! قلت ليهو تمام ضحك وقال لي تاني تمام قلت ليهو خلاص زيت قال لي ايوه كدا خليك اصلية ضحكنا وبدينا في العده ولم جيت آخد منو الصحن وقع واتكسر بدون قصد نزلت في الأرض بي سرعه وبقيت ألم فيهو وانا دموعي نازلة وبقول ليهو اسفه اسفه والله ما بقصدي جرحت يدي ولسة كنت بلم في القزاز نزل لي تحت وقال لي دقيقة يا بت ارفعي يدك..وبعدين انتي خايفه كدا لي دا مجرد صحن قلت ليهو لكن قال لي ولا لكن ولا كلام كتير .. وعايني شال صحن وكسرو قال لي حصل شي هزيت ليهو راسي ب لا قال لي طيب مالك؟ سكت... قال لي ارح اعقم ليك حرجك قلت ليهو لالا خليهو ما مستاهلة قال لي يا بت ما مستاهلة في عينك تعالي يلا قمت معاهو..عقم لي الجرح وقال لي ارتاحي انا ح اغسل العدة قلت ليهو لالا خليها بغسلها انا قال لي خلاص رأيك شنو تونسيني؟ قلت ليهو تمام جريت لي كرسي وقعدت فيهو قال لي قعدتك دي ما ظابطه شالني وختاني في المصطبه طبعا انا من الإحراج راسي ما قدرت ارفعوا بعد عملتُو دي🤦♀️وهو لم ركز قال لي احم احم سلطة الجزر دي عملتيها انتي قلت ليهو مالا ما حلوه؟ولا ملحها كتير؟ قال لي بالعكس طلعت ظابطة اعمليها تاني قلت ليهو ظابط قال لي ما شاء الله والله اتعلمتي لهجتي بسرعه وقعدنا نضحك 😂💙يومها حكى عن نفسو وحكيت ليهو نفسي ... والونسه جرت...بعد العدة عملنا قهوة واتونسنا لحدي الساعه 2ص بعد داك ما قدرت اقاوم ونمت ولم صحيت لقيت نفسي في سريري... لي اول مره من بعد زمن طويل انوم مرتاحه واصحى مرتاحة ف لم طلعت لقيتو عمل الشاي استغربت طبعا قلت ليهو الليله مبكر مع انك ساهرت قال لي ما فرقت هسي بمشي اكمل نومي شربنا الشاي وهو مشى كمل نومو زي ما قال وانا دخلت غرفتي لكن نهائي ما كنت فاكره انو الأدوار حتتقلب💙
