#عرس_الذيب
🖊 خولة الغريب 🖊
الفصل الثاني - رهان القبل - 🍾💋بارت66💋🍾
شريفة:( هزات كتافها ) غير يلا بغيتوو تعقدوو الأمور و صافي ..!
حكيم:( هز عينيه فيها و باستهزاء قال ) نقصي شوية من الأفلام ..!
ميقات فيه و رجعات جلسات حاطة رجل على رجل كتضور فعينيها باغى غير فوقاش تخرج تمشي تبدل عليها .. قنطاااانة براسها و فنفس الوقت مرتاحة حيث ما قال تا كلمة أو شم شي رائحة ماشي تال تم ...!
شافت فيه بلا ما تعييق .. غير من التحت للتحت باش ما يحصلهاش و تتحشم ..! باغى تتأكد من ملامح وجهوو واش بصح ما شمش ريحتها ؟
كيبان عليه مشغول و مركز فخدمتوو ..! حاط قداموو وراق بويض كيكتب فوحدة منهم ..! ركزات فيديه لي مشعرين بطريقة جميلة و نقيين فنفس الوقت غير من الحمورة د كفوو ..! داير كورميط دالخيط مضفرة فيديه متوسطاها دائرة ذهبية منحوتة على شكل نسر ..!
مصات شنافتها متبعة معاه و هو كيكتب بخط مقروء واضح .. واخا كيزرب فالكتابة و ما كيشوفش فالورقة نهائيا ..! داير شدة فريدة للقلم ..! كمل و هز الطابع كيسوط عليه و يطبع فالوراق لي كتب .. فوق السينياتور ديالوو ..!
حكيم:( رد بالزربة خارج من البيرو ) أنا راجع ما تقيسي حتى حاجة ..!
زدح الباب موراه تا تسمع الصوت فداك الجهة كاملة ..! مخلي شريفة كتزرب تبدل عليها داك الحالة ..! حيدات السروال لي لابسة من تحت الجلابة و لواتوو مزيان خاشياه فصاكها ..!
هزات مراية صغيرة كتشوف فوجهها و تقاد شعرها طايح عليها السر بالتزنيكة واخا العينين منفوخين و حوومر ..! رشات عليها من عطرها حتى ولات ريحتها تتشم من بعيد و جلسات جامعة رجليها كتقلب فوراقيها واش حتى حاجة ما ناقصة ..!
شريفة:( تكات فوق البيرو بفشلة و شوية بشوية بدات تديها عينيها و نعسات تما كتمدغ فالهضرة كتتفكر كاع لي وقع ..! ) شف ننن شفااار امننن شدوه
نعسات لمدة طوييييلة من بعد العذاب لي داز عليها و الطبخة د البكى لي بكاتها ..! طاح الظلام عاد تفتح الباب و دخل حكيم كيتكسل بتعب .. شاف جهتها و بهدوء قرب لعندها كيفيقها ..!
حكيم: شريفة ( دوز يديه على شعرها ) نوضي يالاه نمشييو .. براكة من النعاس ..!
حلات عينيها بالشوية .. شادة على عنقها لي كرفساتوو فالنعاس تا ضربها الضوو فيه ..! ذاتها كاملة كتحرقها و عيانة ما قادراش تتحرك نهائيا ..!
شريفة:( حطات يديها على فمها كتفوه ) ففف ساليتي ؟ تعطلتي بزاف ..!
حكيم: زيدي يالاه .. أسية كتسناك برا ..!
هزات صاكها و خرجات قداموو لقات أسية كتسناها وجهها صفر و بان فيها العيى و الجوع كثر من شريفة لي غير شافتها عنقاتها بالجهد كتبوس فراسها و كتقلب فنفس الوقت بعينيها على كريمة لي ما بقاش بانلها الأثر ..!
YOU ARE READING
عرس الذيب 🐺مكتملة🐺
Romance💎مكتملة💎 هناك قلوب عاشت وماتت وهي تنتظر فقط لحظة عطف وإحتواء ! وهناك قلوب قد غدر بها رغم أنها لم تنبض يوما إلا بالوفاء ! و قلوب من الرحمة معدومة ، و بالغدر موصومة ، ملوثة بالكذب ، لاتعرف معنى للنقاء ! 🐺 عرس الذيب ...
