الحوت الهاجس

bart (22)

(الين)
تعبت من تفكير ساعه اكول احد من اهلي يعرفون ساعه اشكك واحد من ولد عمي موصين عليه
اني شكد غبيه شلون ما فكرت شلون
وين اكو مرة دخلني بيتها وتائمن بيه ما تخاف ليش ما جانت تسئلني جانت تعرفني
اخخ خاله وينج تعبت شنو اسوي وين اروح الدنيا تخوف
وخاص هسه اني وحدي معقوله ديحجي احمد لمنطقه تخوف نصها مخدرات
زين إذا هو ضابط ليش ما وصل لاهلي ليش مرجعني راسي راح ينفجر
منا تعبانه مشتاقه لخاله ومنه هاي السالفه
اكعد ابجي وانام أقفلت البيبان بقفل مو كيلون لا قفل عمود اخاف يجي احمد
اسمع الباب يندك ما افتح لاي احد
اكوم ابجي وبس اصلي وادعي كون صح حجي احمد واطلع نظيفه ماريد اصير نكسه ماريد شغل حرام متندمه والله متندمه
ما اكل اخلصها بجي على المصلايه وما احس لا واني نايمه من البجي اكعد اكل لو لبن لو كوه خبزه وخيارة مالي خلك طبخ ولا لي نفس
تقربيا اسبوع واني هذا وضعي
عيوني احسهن نار بيهن ابجي كل يوم يمر عليه سنه حيل تعبت وتغيرت
خوف وتفكير كل يوميه اخلي شيلتها وانام احس بامان
اسمع كل يوميه باب يتفلش ما افتح لاي احد واسبوع صار اسبوعين
وتقربيا اكل ما بقى وخبز ما اكل يدوب اسكت جوعي باي شيء
بيوم كل عادة ابجي واشكي لربي
يارب فدوة لا تعوفني بوحدي يارب اخاف من عبادك اخاف من النفوس الضعيفه يالله اني لا حوله لي ولا قوة يارب لا تسلط عليه من لا يحرمني
كمت اشهك تعبت وانت تعرف شكد متندمه مردت هيج حياتي كافي بعد ما اكدر على عقابك فراق اهلي وحمل لي شلته صعب
محد يمي اشكيله ماعندي ثقه بأحد
يارب سامحني فدوة والله ما عيدها اعرف ذنبي ما ينغفر بس انت غفور رحيم.

كمت ابجي بصوت عالي احس كلبي يوجعني سجدت واني دمعتي على خدي ما حسيت لا نمت مثل كل مرة انام واحس مطمئنه لابسه جادر صلاة احس الله وياي مراح يعوفني واني متوجه اله
حسيت ايد على راسي اني بحلم معقوله خالتي اجت احس قريبه عليه احاول افتح عيوني ما اكدر غشاوه عليهن  فزيت كمت أصيح اكوو احد هنا
يمه منووو هنا كمت افتر بالبيت كل مقفل
يارب يارب
احس كلبي يريد يطلع من مكانه خوف وكل جسمي يرجف يارب سكنهم بمساكنهم

وين كعدت على صوت الباب طلعت بالجادر فتحته خاله أم عقيل
أم عقيل: يا يمه عمت عيني عليج يمه

كمت ابجي حضنتها وهي هم تبجي وكامت تنعى على العلويه

ام عقيل: ليش يمه ليش هيج كل يوم افلش الباب وما طلعين واني بالي يمج لو ما حماده جان كسرنا الباب

مسحت عيوني ليش شكال

ام عقيل: طمننه وكال حزينه لازم نعوفها وخطيه وحدها

هزيت راسي

ام عقيل: هاج يمه اكلي بثواب العلويه

تسلمين أن شاءالله واصل اخذت الصينيه وراحت
جنت جوعانه عبالك جاهز الاكل لفه ولبن 
اكلت واحس اريد انام
كبل لغرفه تمدت نمت  ما كعدت على ثاني يوم كوه متكسرة سبحت عمود اصحصح ماكو راسي يريد ينفجر صليت صلاة الظهر
شغلت الماطور لكيت علاليك بالحديقه فتحتهن مسواك متاكده احمد 
دخلتهن جوه  واني احس دنيا طالعه من عيني اريد اموت واخلص
دنيا سوده بعيني  صفنه تأخذني وصفنه ترجعني.
اصعب شيء هو شعور بندم كلش متندمه كل يوم اموت الف موته
طلعت دفتري وكمت اكتب بي اخخ كون ارجع لاول ورقه بي كل يوم اريد ارجع لباجر خوفي من مستقبل
كلما اتقدم يوم أفقد شيء عزيز عليه
كمت اضحك واني رجعت لورقه لي  جانت بيها عايشه العلويه وهي تمشط شعري وتقراء ايات وادعيه عمود يطول واني اضحك وهي تكلي ولج خلي ايمانج قوي لا تستهزئين ترى ما يمضي بيج الدعاء
دمعت عيوني واني اقراء بالورقه.
ما جنت اعرف هيج دنيا تسحب منه اغلى انسان بحياتنا مفاجئه تأخذه منك
هنا تحس الدنيا مالها طعم دنيا فاشله دنيا محلوة وعبارة عن افلام وقصص تنتهي
رجعت لورقه
واني حايرة شنو اكتب ايامي كله نفس الشيء ماكو جديد محد يمي
كل يوم أحسه سنه يمر عليه
صعب كلش وحدي بيت غريب بس صار باسمي بس مو الي والله بيت ما يربطني شيء بي مجرد ايام احس ضيفه خطار رغم بي احلى ايام كلها حنان ودفوا
بس مو أهل غربه واموت الف موته واني عايشه لوحدي لو احد يموتني محد يدفني محد يذكرني ولا احد يبجي عليه
عفت اهلي اخخخ لو بس ارجع لهذاك اليوم والله لو يخلون طلقه براسي ما اشرد  متندمه
تمر الايام وماكو جديد
والغريب احمد ما بين ولا سئل
وقربت صير لأربعين واني ام عقيل مرتين سوكت الي وكالت جانت تطلبني العلويه
كتلها ثوبي لها كالت
ام عقيل: لا يمه هي كالت من فلوس لينه هاي
الين: خاله ترى عندي فلوس ليش هيج سوين