ကောင်းကင်တမျှ (Completed)

Episode 145

Uni

"No One can rewrite the stars

How can you say you'll be mine

Everything keeps up apart

I am not the one you are mean to find"

"အားနာလိုက်တာဗျာ။ ကျွန်တော့်ကို ခဏလောက်ခွင့်ပြုပါဦးနော်"

လိုတ အရှေ့ကလူကို အားနာနာနှင့်ခွင့်တောင်းခဲ့ပြီးမှ ဆိုင်ပြင်ကို ထွက်လာလိုက်သည်။ ဖုန်းကိုထပ်ကြည့်လိုက်တော့ "ခန့်မင်း"ဆိုသည့် Contactက ပြူးတူးပြဲတဲ။ သူဌေးရဲ့သူငယ်ချင်းက တိုက်ခန်းတစ်ခုလောက် ဝယ်ချင်နေတာမို့ VIPအနေနဲ့ လိုတကိုယ်တိုင် လိုက်ပြီး တွေ့ပေးရတာဖြစ်သည်။ ဒီလိုအချိန်မှာ အရေးကြီးသည့်ဖုန်းမဟုတ်ရင် သူ မကိုင်ချင်။ သို့သော် ခန့်မင်းဆိုတာကလည်း အားတိုင်းယားတိုင်း ဖုန်းဆက်နေတတ်သူ မဟုတ်ပေ။ အကြောင်းတစ်ခုခုရှိတာ သေချာသည်။

လိုတက အထဲမှာ အေးဂျင့်နှင့်စကားပြောနေသော သူဌေးကို ပြန်ကြည့်လိုက်ပြီး ဖုန်းကို နားဆီကပ်လိုက်သည်။

"ဟယ်လို ခန့်မင်း ပြော"

(အေးလိုတ။ ငါ မင်းကိုပြောစရာရှိလို့ဆက်လိုက်တာ။ ပိုင်ဥာဏ်က မင်းနဲ့အသက်ကို အထင်လွဲနေတုန်းပဲဆို။ ဟုတ်လား)

ခန့်မင်း၏ သုတ်သုတ်ပျာပျာစကားကြောင့် လိုတ အော်ရယ်ပစ်လိုက်ချင်သည်။ ဒီငတုံးစုံတွဲက ဒါကို အခုမှ သိပုံပင်။

"ခုမှသိလား။ မင်းတို့ကို ဘယ်သူပြောတာလဲ"

(ဘယ်သူရှိရမလဲ မင်းလင် ပိုင်ဥာဏ်ပေါ့။ ငါ့အသက်ကိုဖုန်းဆက်ပြီး ကိုယ့်ရည်းစားကိုယ်ထိန်းဖို့ ပြောသွားတာတဲ့။ အသက်က သဘောပေါက်မြန်လို့သာပေါ့။ နို့မို့ရင် မင်းတို့လင်မယားလုပ်တာ ငါတို့စုံတွဲက ကြားထဲက ကွဲဦးမယ်)

"မင်းကြီးတော်ကို လင်မယားလား။ ပေါက်ကရတွေပြောတယ်နော် ခန့်မင်း အဟွန်း"

လိုတက စိတ်ဆိုးဟန်ဖြင့် တုံ့ပြန်လိုက်သော်လည်း သူ့အသွင်အပြင်က စိတ်ဆိုးနေပုံ နည်းနည်းလေးမှ မပေါက်။ နေပူရှိန်ကြောင့်လားတော့မသိပေမဲ့ ပါးဖြူဖြူတွေထက်မှာ အနီရိပ်တွေတောင် ထင်နေလိုက်သေးသည်။