في اليوم الموالي
فاقت ياسمين ، وبقات كاتسنا محمد يجي يقولها واش باها قبل ولا لا ، بقات جالسة شحال عاد شافت الباب تحل و دخل محمد : صباح النور
ياسمين : صباح الخير
قرب وجلس حداها :هدرت مع باباك
شافت فيه و هي كلها أمل : وشنو قال ؟؟
محمد : من اليوم غاترجعي لحياتك الطبيعية الآلة
ياسمين : واش بصح ؟؟
محمد :واش غانكدب انا ؟
عنقاته ياسمين بلا شعور و قالت : شكرا امحمد عمرني نسا هادشي لي درتي معايا
محمد تصدم منها و بادلها العناق
فاش حسات بيه عنقها استوعبت شنو دارت و بعدات
محمد : ماشي مشكيل خاصك تعرفي على ودك ندير اي حاجة ❤️
ياسمين : احممم ... شكرا
وقف محمد و خرج في طريقه للخدمة و هو فرحان
اما ياسمين كانت فرحانة واخا عارفة راسها غاترجع الشقا و تمارة ولكن مهم عندها هي تخرج و تلاقا مع الناس لي كاتبغي
مشات خرجات عامت و رجعات لبسات عليها و نشفات شعرها و خلاتو مطلوق و خرجات كاتقلب على حكيمة باش تطلب منها السماحة واخا هي عارفة بلي ماشي منها الغلط لكن باش تبرد شوية من جهتها
لقات حكيمة في الكوزينة لي كانت صغيرة
ياسمين : صباح الخير
دارت حكيمة شافت فيها و دارت كاتكمل توجاد الفطور
قربات ليها ياسمين و قالت : سمحي ليا أخالتي حكيمة عارفة راسي غالطة و ماكانش خاصني نقلل الاحترام عليك حيت كاتبقاي في مثابة ماما الله يرحمها
حكيمة (حسات براسها و قالت بنفخة ):ماشي مشكيل المرة جايا ماتعاوديهاش يلاه سيري قضي داكشي لي كنت كاتديري راك ولفت الراحة
ياسمين : واخا
مشات ياسمين الكوري لقاته موسخ سيمانة كاملة ماتنقاش مشات كاتغسل و كاتنقي حتى سالات و مشات كملات الاشغال الاخرى لي بقات هزات القراعي و مشات كاتجري السقاية لقات البنات كيف العادة واقفين ولكن فين أسماء ؟؟؟
بقات كاتقلب على أسماء ولكن والو ماكايناش قالت يمكن باقا ماجاتش عمرات البوديزات و جلسات تحت واحد الشجرة صغيرة كاتحاول تخبا من الشمس تحتها تسنات شحال ولكن والو ماكايناش أسماء
مشات جهة واحد جوج بنات كيسكنو قراب لأسماء
ياسمين : السلام البنات لباس عليكم
البنات في دقة وحدة : السلام
قالت وحدة فيهم لي كانت سميتها عايشة : لباس عليك ، اش هاد الغبرة ؟
ياسمين : راك عارفة أختي غير مشاكيل مع ديك حكيمة وصافي
قالت البنت الأخرى لي سميتها كريمة : ايوا الله يدير ليك تاويل أختي معاها
ياسمين : آمين .. البنات بغيت نسولكم
كريمة : سولي أختي
ياسمين : واش أسماء جات قبيلا و مشات ولا شنو ؟.
كريمة : لا أختي ماجاتش في خطرة اليوم شي سيمانة دابا يمكن
ياسمين دخلها الشك و الخلعة على صاحبتها : و ماعرفيش أختي مالها ؟
قالت كريمة : لا ماعرفتش
نقزات عايشة و قالت : لا أختي راه عارفين علاش
شافت فيها كريمة بحال الى كاتحدرها ماتقولش
ياسمين : مالكم البنات ؟؟ واش مابغيتوش تقولو
عايشة : شوفي أختي من الاخر واخا هي حلفاتنا ما تقولوش باش يبقا داكشي مستور و يسهل فيه الله
ولكن غانقول ليك
ياسمين : شنو أختي خلعتيني قولي دغيا ها العار
عايشة : اليوم كاين العرس ديال خوها
ياسمين جاتها صدمة كيفاش خوها ؟ بلاتي ياك هي عندها اخ واحد ؟ بلاتي واش عماد لا لا ميمكنش
شافت فيهم باستفهام كاتسناهم يكدبو داكشي لي في بالها : واش عماد ؟؟؟
عايشة : اه هو ياك هي عندها غا واحد ، ولكن شوفي سرنا يبقا بيناتنا ما تقولها لحد
ياسمين كانت في عالم اخر عقلها وقف و الوقت وقف مابقات كاتحس بوالو و ماكاتسمع والو غير الكلمات لي قالت لي كايدورو في عقلها "اليوم العرس ديال خوها "
حسات بيدين كيحركوها شافت لقاتها عايشة : مالك أياسمين واش لباس ؟
ياسمين : قالت بصوت متقطع : ل..باس
كريمة : ايوا بالسلامة أختي حنا غادين
جلسات على الارض كاتحاول تستوعب شنو سمعات و دموعها نازلين وقفات قررات باش تمشي لدارهم قالت يمكن يكونوا غالطات
مسحات دموعها و خلات البوديزات تما و ناضت في اتجاه دار أسماء و عماد ....
شنو كاتظنوا عماد بصح يكون تزوج و خلا ياسمين ؟؟
أنت تقرأ
" وُرُودٌ ذَابِلَة "
Romance"تحكي الرواية عن فتاة تُدعى✨ ياسمين✨ ، هذه الأخيرة التي ذاقت كل أنواع العذاب و الخيانة حتى من أقرب المقربين ما دفعها لتصبح قاسية و تغير من شخصيتها لتعيش وسط الذئاب " لا أريد حرق الأحداث لذا تابعوا الرواية لتتعرفوا على ياسمين و ما معاناتها في الحياة؟...
