س/ منو نقلج القصة القديمة ؟
ج .... جد حفيدة القلعة اللي نشرت حسابها بالأنستا .. حجي جبير بالعمر عمره ما يقارب ٩٥ سنة
س/ شلون يتذكر هذه الاحداث احنا وبعدنا شباب ننسى شسوينا البارحة رجال بهالعمر شلون يتذكر ؟
ج... هو ينسى شسوا وشأكل البارحة بس الذكريات والسوالف القديمة يتذكرها وكأنها البارحة صارت
س/ رجال عمره ٩٥ سنة يراسل وينطي قصة ؟ هيج فارغ ووين يعرف هالسوالف
ج ... هو لا يعرف يلزم تليفون ولا يعرف للتكنلوجيا الحديثة .. كل القصة حفيدة القلعة لما قرت قصة كحل عرب راسلتني حتى تنقلني قصة اجدادها وكالتلي اخلي جدو يساعدج هو يتذكر كلشي ودائما يحجيلنا عن اخبارهم بالزمن القديم قصتهم تموت.. فحجتلي هي الموجز وبقت تتواصل ويا اي سؤال واستفسار ترجع تسأله (جدو هاي شلون صارت) وهو ما يعول احد يحجي وياه عن ذاك الزمن ينطلق سالفة تجر سالفة ويحجي هي تسجلي فيدوهات وتسجيلات وتدزلي ادون نقلاً عنه .
س/ بيا سنة هالاحداث
ج... الحجي يتذكر الاحداث كلش زين ويتذكر ادق التفاصيل بس ما عنده اي فكرة عن التواريخ من تسأله ميدري .. لهذا استغنيت عن ذكر التواريخ بالقصة .
س/ شنو ربط قدس بقلاع الضر مجاي نشوف اي ربط واي اسرار
ج... لما تنتهي القصة راح ترجعون لهالسؤال وراح تضحكون عليه وراح تشوفون الربط الجميل بالرواية واحداث رهيبة تكشف الأسرار وتربط ما بين القصتين .
س/ نظام النشر شلونه
ج/ مخليت نظام نشر وكت ما انطيكم علم ان اليوم اكو بارت ينزل بارت لإن ملتزمة بدوام مرات ناخذ اوف بنص الاسبوع ومرات يكون عدنا لود ما اكدر اخذ استراحة .. بس مكملة بالقصة وياكم على راحتنا اليحب يتابع ويانا بعيوني اخلي واللي ميتحمل ينتظر تكمل الرواية ويقراها براحته
وكالعادة اللهجة شوي شوي تتعودون عليها وتحبوها
مثل ما حبيتوا لهجة كحل عرب وادمنتوها
اعتبرها هالقصة ثمينة ومميزة
وجنت اتمنى لو عدنا دراما عراقية تثمن هيج اعمال ونطرح هيج قصص بمسلسلاتنا عن تاريخنا واعراقنا واحداثنا وواقعنا بدل السيناريوهات المعتادة او المقتبسة من التركي والمصري .
شفت من المفترض ارد على بعض اسئلتكم وانشرها حتى تتوضح عدكم حيثيات الرواية وشكراً الكم ولمتابعتكم ان شاءالله البارت القادم بأقرب وقت بعنوان (البشارة)
