#قلاع_الضر
((( بقلم زينب ماجد )))
( ملاحظة قبل لا ابلش .. احداث السجن ما عندي ولا عند اقربائها تفاصيل عنها ولا وسام ذاكرة شي من تفاصيلها كل اليعرفونه احداث اللي صارت بالسجن اكثر من هيج محد يعرف فراح اكتبها بحقيقتها واتعدى تفاصيل السجن دا ابلغكم حتى لتكولون ليش اختصرتيها )
الحلقة_٢٦
<< السجن >>
بـ عيوني بچي
بگد الحچي المضموم عند الناس
(الكاطع)
عد ما شردت وسام …
الشرطة ضلت تنبش بحديقتها ليما طلعت جثة عطا وزبيدة من الكاع … الديرة كلها التمت على هالحادثة ..
االشرطة هدت الجثث وراحت تدور وسام بزوايا الديرة
وانتشروا مفارز بكل مكان .. والناس ضجت اعلى هالمصيبة
بس محد يعرف ليش وسام جتلت رجلها
اليعرفوه عطا رجل وسام ما عده غير مرة
من عرفوا مجتول هو وزبيدة … واهل عطا ومرجانة واولاد خالد ومجبل واخوته كلم التموا ..
تعجبت الناس اعلى هالحال
شجاب زبيدة على عطا وعليش وسام جتلتم ودفنتم ؟
مرجانة شجت ثوبها وكامت تصرخ وتملخ براسها اعلى جتلت بتها .. وخوات عطا التمن عليه يتصايحن ويتباجن .. واتلايمت الوادم والهوسة للضالين
اجت يازي تركض خاطر تعرف شصار لكت مجبل واصل كبلها كضبتو وهي تكلو : خير يولي شنهو الصار
- وسام جاتله رجلها وزبيدة
- صخاااااام ييمة .. شلون جاتلتم
- مطبرتهم ودافنتم بحديقتها .. يظهر عطا ماخذ عليها مرة وهي ما متحملة وجاتلتم .
دحجت بمرجانة حالها تراب وهي تهيل التربان فوك راسها وتصرخ بجزع وتصيح ابتها .. تكربت من مرجانة ووكفت جريب منها .. غشعتها وتمعنت بيها وي كن تطفي نار سنينها بهالمنظر
حطت ايدها على ثمها وهلهلت : كللللللللللللللللللللللللللوش حكج بان يشذرة يمه وجتالج ما تهنى .. الوجع كلبي بيج الله طكه وفجع كلبه بعزيز كلبه …. كللللللللللللللللللللوش
كلها الناس التفتت ادحج على يازي
اندارت الها مرجان وهي تكلها : يبت الحرام تتشفين جتلت بتي
- والله وادفى اعلى نارج .. كل الصار ويبتي من تحت راسج نامت بكبرها مهضومة بلا سبب .. وهاي جرمج طلع ببزرج … كللللللللللللللللللوش
تخبلت مرجانة واهل عطا اعلى فعلت يازي
ومجبل واخوته كامو يجرون بامهم ومرجانة تهد عليهم ويازي تصيح : احب ايدج وسام جددددددة خذيتي بثار امج وحطيتي العلة بكلب الحطها بكلب شفيتي كلبي يجدددددددة احبج براسج يبعد بيتييييييي
الناس كلها ما رضت ابفعل يازي
جان فعلها حالة شماته بوقت كلش صعب يصعب على الكافر
لكن ما صعب على يازي .. واتشمتت بمرجانة اختها جدام الكل
