( Unicode )
ပုဂံမြေ၏ လမ်းမများအပေါ် ကျွန်တော့်ခြေရာတွေထပ်နေခဲ့သည်။ မိုးဦးရုံတို့အိမ် ဘယ်မှာရှိသည်ဆိုတာမေးမြန်း၍ ခပ်သွက်သွက်ကလေးလျှောက်လာမိသည်။ မင်းနန်သူရွာထိပ်ရှိ အရှေ့အိမ်ကိုဖြတ်ကျော်ခဲ့၍ လျှောက်လာအပြီး၌ ခပ်လှမ်းလှမ်းတွင် နောက်ထပ် ခိုင်ခံ့သောအိမ်တစ်ခုကိုတွေ့ရသည်။ ထိုအိမ်ဆီသို့ ဦးတည်ကာသွားလိုက်ရင်း ပွင့်နေသည့်ခြံတံခါးကနေပဲ ဖွင့်ဝင်ခဲ့ကာ မှိုင်းငယ်အား လှမ်းခေါ်မိသည်။
" မှိုင်းငယ် မှိုင်းငယ် ကိုကိုပါ မှိုင်းငယ် "
ကျွန်တော့် အော်သံနောက်တွင် မိုးဦးရုံနှင့်အတူ နောက်ထပ် အသက်ကြီးကြီးအဒေါ်တစ်ယောက်ကိုတွေ့ရသည်။ ခန္ဓာကိုယ်မှာပိန်ပါးပါးပဲဖြစ်ကာ ကြည့်ရတာ မိုးဦးရုံ၏ အမေပင်ထင်သည်။
" ညီလေး....မှိုင်းငယ်ရော။ အစ်ကို မှိုင်းငယ်နဲ့တွေ့ချင်လို့ "
" မြူမှိုင်းက ဒီမှာမရှိဘူး ကိုချမ်းမြေ့ "
" ဟုတ်လား သူရှိမယ့်နေရာလေး အစ်ကို့ကိုပြောပြနိုင်မလား "
ကျွန်တော်မေးတော့ မိုးဦးရုံနှင့်သူ့အမေက တစ်ယောက်ကိုယ်တစ်ယောက်ကြည့်ကြသည်။ ပြီးနောက်တော့ အဒေါ့်ဆီကနေ စကားသံထွက်လာသည်။
" သားက ချမ်းမြေ့ဦးဝေထင်တယ်။ အချိန်ရမယ်ဆိုရင် အဒေါ်စကားနည်းနည်းပြောချင်တယ်ကွယ် "
မှိုင်းငယ်ကို ရှာဖို့ရှိနေသော်လည်း လူကြီးသူမက တောင်းဆိုလာသည်မို့ ကျွန်တော်ငြင်းဖို့ခက်သွားသည်။ ထို့ကြောင့် ခေါင်းညိတ်လက်ခံလိုက်ရင်း အဒေါ့်၏ ခေါ်ဆောင်မှုကြောင့် အိမ်၏အနောက်ဘက်နေရာကျယ်လေးဆီသို့လိုက်လာခဲ့ရသည်။ ဘယ်ဘက်တွင်တော့ နွားတင်းကုတ်ငယ်လေးရှိကာ အထဲတွင် နွားတစ်ကောင်က ခပ်ခွေခွေလေးအိပ်နေသည်။ သူ၏ မျက်နှာချင်းဆိုင်တွင် တမာပင်ကြီးတစ်ပင်ရှိကာ ထိုအပင်ရှေ့၌ ကွပ်ပျစ်တစ်ခုကို အပင်အားပတ်၍ဆောက်ထားသည်။ အဒေါ်က ထိုနေရာတွင် ထိုင်လိုက်သည်မို့ ကျွန်တော်လည်း ဘေးတွင် ထိုင်လိုက်ပါတော့သည်။
" နွားမလေးလေ။ မိနွေတဲ့။ မြူမှိုင်း အဲ့ဒီ့ကောင်လေး ကနာမည်ပေးထားတာ "
YOU ARE READING
မှန်လေးတစ်ချပ် ခြားထားသလို
General Fictionနှစ်ရှည်ကြာစွာ ဆက်၍ရေးချင်မိတဲ့ ပန်းချီကားငယ်... အဆုံးမသတ်ချင်မိတဲ့ ဒိုင်ယာရီတစ်ပုဒ်... ဖြတ်မျဉ်းနှစ်ကြောင်းရဲ့ အညိုရောင်မျှော်လင့်ချက်လေး... နောက်ပြီး အမျိုးသားနှစ်ဦးကြားက ကာဆီးထားတဲ့ မှန်လေးတစ်ချပ်... ဒီလိုနဲ့ပဲ နီးနေရင်းကနေ ဆွေး... - Yoon Yeik -