ငါ့ယောက်ျားက သူ့ကိုယ်သူ သဝန်ပြန်တိုနေတယ် (ဘာသာပြန်)

Chapter 18

Unicode

လမ်းတစ်လျှေက် စူးယိရန်ဟာ ခိုးကြောင်ခိုးဝှက်ဖြင့် သကြားလုံးများစွာစား​ခဲ့သည်။

အလွန်ပျော်စရာကောင်းလှ၏။

နှစ်ယောက်အိမ်ပြန်ရောက်ပြီးနောက်မှာတော့ မီးဖိုချောင်တွင် ညစာအတူပြုလုပ်လေသည်။

ယနေ့ညစာကို ခရမ်းသီးကြော်နှပ်၊ ငါးပေါင်း၊ ငရုတ်သီးကြက်ဥကြော် နှင့် ငါးခေါင်းဟင်းရည် လုပ်မည်ဟု စီစဥ်ထားသည်။

စူးယိရန်က ခရမ်းသီးကိုအိုးတွင်းသို့ဦးစွာထည့်လိုက်သည်။ ကြွပ်အောင်ကြော်၍အိုးထဲမှဆယ်ထုတ်ပြီးအသင့်ပြင်ထားသည်။ ပြီးနောက် နုတ်နုတ်စင်းထားသောအသားကိုကြော်သည်။ တစ်ဖန် အိုးပူထဲသို့ဆီထည့်၍ ဂျင်း၊ကြက်သွန်ဖြူနှင့် ကြက်သွန်မြိတ်တို့ကို အမွေးနံ့ထွက်လာသည့်အထိကြော်ဖို့ဟန်ပြင်လိုက်သည်။

ကြက်သွန်မြိတ်မှာရေအနည်းငယ်စိုနေသေးသည်ဖြစ်၍ ဆီနှင့်ထိသောအခါ ရှဲခနဲအသံတွေထွက်လာပြီး ဆီစက်တွေက ပေါက်လာကာ စူးယိရန် လက်ဖမိုးပေါ်သို့စင်လေတော့သည်။သူ နာကျင်မှုကြောင့် "အာ့ ခနဲအော်လိုက်ရင်း လက်ကိုအမြန်ပြန်ရုတ်၍ နောက်ဆုတ်လိုက်သည်။

ကုယွမ်းထင်က လက်ထဲရှိလှီးနေသောငရုတ်သီးကိုချက်ချင်းချ၍ မျက်မှောင်ကြုတ်ကာ စူးယိရန်၏လက်ကိုကြည့်လေသည်။

"ဘယ်လိုနေလဲ"

"ကိစ္စမရှိပါဘူး"

စူးယိရန်က ကုယွမ်းထင်၏လက်ကိုရှောင်ကာ ယောင်းမကိုအလျင်အမြန်ပြန်ကိုင်လိုက်ရင်း အော်လိုက်၏။

"တူးကုန်တော့မယ် တူးကုန်တော့မယ်"

ကုယွမ်းထင်မှာ ဤသည်ကိုမြင်သော် ယောင်းမကိုလုယူ၍ ဂျင်း၊ ကြက်သွန်ဖြူ၊ ကြက်သွန်မြိတ်အရောတို့ကို လျင်မြန်စွာမွှေလိုက်သည်။ ဆီသည်ဆက်၍ ပေါက်နေဆဲပင်။ ကုယွမ်းထင်၏လက်ပေါ်သို့လည်း ဆီစင်လေသည်။ သို့သော်သူ ဂရုမစိုက်။ ဂျင်းကြက်သွန်ဖြူနှင့် ကြက်သွန်မြိတ်တို့ကိုသာဆက်၍ မွှေကြော်နေလိုက်သည်။

စူးယိရန်က ဘေးတွင်ထား,ထားသောအသားကိုအလျင်အမြန်ထည့်လိုက်ရာမှ ဆီပေါက်တာ ရပ်သွားသည်။ ဂျင်း၊ ကြက်သွန်ဖြူ၊ ကြက်သွန်မြိတ်နှင့် အသားတို့ရော၍ မွှေကြော်ထားသောရနံ့သည် မွှေးကြိုင်၍လူကို သားရေယိုလာစေပေသည်။