الايام البعديها انضطغنا مع الامتحانات كانت فترة صعبة ومرهقة شديد خاصة بالنسبه لي... انا من النوع البنسى سريع وما بركز، مع اني بقرا اول باول لكن فترة الامتحانات بلقى نفسي اغلب القريتو نسيتو والحاجه دي كانت عاملة لي عقدة خلتني انفسن عديل، خلصنا الامتحانات واجزنا اسبوع بعدين نزلنا كلنا مع اولى وتانيه.. امتحاناتنا النهائية كانت بعد العيد بي شهر حاولت في الفترة دي اجتهد على قدر ما اقدر قريت الماده الواحده تلاته واربعه مرات، عدا علينا رمضان وكنا مؤجزين اولى وتانيه امتحاناتهم كانت سادس يوم وبعد يخلصو نحن بنزل، امي تعبت شديد مع انو كنا مقسمين الشغل انا ويارا لكن كنا بنلقاها سبقتنا وعملتو ولمن نشاكلها بتقول لينا ركزوا على قرايتكم بس ما دايرة شي تاني منكم ، ياسين خلص امتحانات قبل رمضان جا الخامس ونتيجتو ما كانت كعبه شديد لكن امي زعلت قالت ليهو اصلا السنه دي انت اتهاونت وكان عملت نفس حركاتك في السنه الجايه حاكلم ليك ابوك بس..... يوم العيد الكنا بنستناهو كلنا انا ويارا زي الشفع🤣 من الصباح ابوي وياسين وسليم طلعوا الصلاه ونحن نظفنا وفرشنا وبخرنا البيت
"
كتبت ليك والله يا قمر الزمان ، كتبت ليك والله يا قمر السماء، شان جيتي بالزمن المحنة *وشفت في عينيك حس اهلي القدام*.. كتبت ليك ....
كتبت ليك وانا جاي من زمن الشقاء المرسوم علي وش السوادِ مظللة، كتبت ليك وانا جاي من زمن الشقاء المرشوم علي وش السواد مظللة.. تتمدد الساعات سنين تفتح الاحزان غريبة ومذهله، كتبت ليك وانا جاي من زمن الشقاء... واشتاق افتش نسمه في الزمن العذاب ، اشتاق افتش نسمه في الزمن العذاب. وايامي من كتر الاسى وكتر العذوب والاغتراب، وايامي من كتر الاسى وكتر العذوب والاغتراب صارت حروب مترهلة لحظات اسيفه ومُهملة.
وقفت ليك لمن لقيتك جايه في قلب الطريق ولمحت فيك راحة المشاوير البعيده ولفحة النسمه الحنينه الجايه من جوف المضيق.. حسيت عجايب الدنيا اتلمت بقت جاياني من عصرا سحيق، عينيك حس اطفال بنادو القمره للغايب يعود وجبينك الضواي حُجى الحبوبة في الزمن السعيد.. عينيك حس اطفال بنادو القمرة للغايب يعود وجبينك الضواي حُجى الحبوبة في الزمن السعيد"
سكت لمن صوت الغنى وقف كنت بتمر في التربيزة رفعت راسي لقيت يارا واقفه وخاته ايدينها في نصها
يارا: دي ما كانت تربيزة قاعده فيها ساعه واغانيك الكئيبة دي بالله ما تشغليها لينا يوم العيد
__ كئيبة؟؟؟؟ يارا احسن ليك بنختلف
_ الناس الزمن دا بتسمع لي جاستن بيبر، آلان وولكر، سيلينا ،ديفيد.. وانتي اقعدي اسمعي اغاني العجايز ديل، مصطفى سيد احمد دا احفادو زاتو بكون ناسينو وانتي ٢٤ ساعه قاده اضانا بي الطبلة البغنيها بيها دي
__ اي اغاني العجايز عاجباني انتي مالك
_ في اختراع اسمو سماعه قاعد في الحافله جوا الكباية تشيليه تسمعي بيهو العايزاه.. هسي نسيتيني جاية لي شنو ااا صحي خلي الترابيز دي وامشي اكوي لي ابوي العلى الله قال بعدين ما ماشي بالجلابيه
