Can You Love Me Like That?

6.

"ထပ်ပြီးဘာဖြစ်ပြန်တာလဲ ကျနော့်ကိုတစ်ရက်လေးတောင် လွတ်မထားပေးနိုင်ဘူးလား"

"ဘာမှန်တာလုပ်ထားလို့ငါ့ကိုလာအော်နေတာလဲ ဟမ်"

ဂယူဘင်းသူဆွဲထားတဲ့လက်ကိုအားနဲ့ဖိညှစ်ပြီးအံကြိတ်ကာပြောလိုက်တော့ ထိုကောင်လေးကမျက်ထောင့်နီနီတွေနဲ့ပြန်စိုက်ကြည့်လာတယ်။

တကယ့်အကြောတင်း။

ဘယ်လောက်တောင်ခေါင်းမာတဲ့အမျိုးလဲဆိုတာ သူ့ကိုမထေ့တထေ့ပြန်ကြည့်နေတဲ့မျက်နှာအမှုအရာနဲ့တင်သိနိုင်တာမျိုးပဲ။

ဂယူဘင်းစိတ်ထဲက ကလိကလိနဲ့ရိုက်ပုတ်ပစ်ချင်လိုက်တာမှအသည်းတယားယား ၊ လက်တယားယားနဲ့။

အဲ့စူပုတ်နေတဲ့မျက်နှာချောချောလှလှလေးကိုပဲစိတ်ရှိလက်ရှိကုပ်ဖဲ့ပစ်လိုက်ရရင် ရစရာမရှိအောင်စုတ်ပြတ်သတ်သွားဦးမယ်။

"ခများလက်ကိုလွှတ်!"

ဂယူဘင်းထိန်းထားရတာတွေများလွန်းလို့ မနေနိုင်ဘဲ စိတ်ထဲကလို အဲ့ဒီမျက်နှာလေးကိုမကုပ်ဆွဲမိခင် ပါးမို့မို့လေးနှစ်ဖက်ကို လက်ညိုးလက်မ သုံးပြီး အားနဲ့ဆွဲညှစ်ထားလိုက်မိတော့တယ်။

"မလွှတ်တော့ဘာဖြစ်ချင်လဲ ဟမ်။ ငါမဟုတ်တဲ့လူတိုင်းကိုလိုက်ပြုံးပြနေရတာသိပ်ပျော်နေတယ်ပေါ့ ဟုတ်လား။ နောက်တစ်ခါမပြုံးပြရဲတော့အောင် မင်းရဲ့ဒီနှုတ်ခမ်းတွေကိုအပ်နဲ့ချုပ်ပစ်လိုက်ရမလား"

လက်တစ်ဖက်က ခွေးကောင်လေးရဲ့ပါးကိုမနာနာအောင်ဆွဲညှစ်ထားပြီး နောက်လက်တစ်ဖက်က ထိုကောင်လေးရဲ့အသည်းပုံနှုတ်ခမ်းလေးကိုတို့ထိရင်း ကြောက်စရာကောင်းအောင်ပြောလိုက်တော့...

"အရူး ၊ ရူးနေတာခများက"

"အေး ရူးနေတာသိရင် သိသလိုနေလိုက်"

ဂယူဘင်းမျက်နှာကိုရှေ့တိုးပြီး နီးနီးကပ်ကပ်ပြန်ပြောမိတော့ ခွေးလေးက သူ့လက်ကိုကုပ်ဆွဲလာတာမို့နာကျင်မှုကစူးခနဲ။

သူတစ်ခုခုလုပ်တိုင်းပြန်လုပ်ရဲတာဆို ဒီအကြောတင်းပဲရှိတယ်။

အခုလည်းကြည့် သူမလွတ်ပေးမချင်းကုပ်ဆွဲထားတာများသူ့အရေပြားကိုဆွဲဖြဲတော့မယ့်အတိုင်းပဲ။