عجبتني جدااااااا 🤣🤣🤣🤣🤣
- صلاح انا جوزي مسافر ٣ ايام عايزين نتقابل
= أنا كمان مراتي بايتة عند امها، نتقابل، امتى وفين🙄
- النهارده بالليل، نروح ناكل لقمة في قصر الكبابجي، اعتقد بتحتاجوا ترموا عضمكو قبل ما تخونوا ؟😨
= آه بس المكان هناك مش مضمون، ابراهيم محلب بياكل هناك، كابتن رضا عبد العال، الفنان هاني شاكر 😒
- وانت خايف من ابراهيم محلب ورضا عبد العال ليه، محدش فيهم يعرف جوزي ولا مراتك😂
= أنا خايف من هاني شاكر 🤔
- مبقاش نقيب الموسيقيين خلاص، مفيش منه خوف 😅
= هو انا رايح اغني مهرجانات في المطعم يا عزة، أنا خايف من حاجة تانية خالص
- إيه هي ؟🤔
= انتي عارفة يعني إيه هاني شاكر رايح ياكل ملوخية وطرب، يعني ٤٠ موبايل بيصوروه، واحتمال كبير انا وانتي نظهر في أي صورة من دول، ومش بعيد نلاقي نفسنا طالعين في ڤيديو طشة الملوخية متركب عليه أغنية إلا دموعك انت، ونلف الفيس وتبقى فضيحة 🤯😨
- عندك حق فعلا، بلاش ناكل، احنا نروح أي لوكاندا رخيصة من اللي مبيطلبوش ورق ونقضي اليوم هناك😁
= لسه فيه احتمال ان واحد اهبل يفتكرنا متجوزين وممعناش فلوس ننزل في فندق كبير، يصورنا ويحط الصورة على الفيس ويكتب عليها كلمتين من بتوع النزول من الطبقة، والبوست يتشير 😱😱
- نتمشى على الكورنيش وخلاص ؟👏😀
= كورنيش ايه في الأيام دي يا عزة ؟ الشوارع كلها مرشقة تيك توكرز، وممكن حد فيهم يصورنا ڤيديو وهو بيدينا مصاصة😎🙈
- طب إيه رأيك ندخل سينما أو مسرح، آهي دي أماكن الموبايلات ممنوعة فيها أصلا 👌👌
= متنسيش ان فيه فوتوجرافر بيصور الجمهور والصور دي بتترفع على البيدچ بتاعة الشركة المنتجة كنوع من الدعاية، يبقى شكلك ايه قدام جوزك لما يشوف صورتنا مع بعض واحنا بنضحك على إفيه لعلي ربيع ☹️
- دا يطلقني عالضحك دا بس 😹
= نعمل نفسنا عيانين ونروح مركز مجدي يعقوب ؟😔😔
- ونطلع في الاعلان ويتلم علينا تبرعات ؟ هنتاجر بخيانتنا يا صلاح ؟🤨
= لأ احنا خيانتنا أشرف من كدا طبعا 😘
- طب إيه ؟🤔
= أنا بقول نتوب يا عزة عشان التكنولوچيا واقفة بيني وبينك 😔
- كنت عايزة اقولك كدا برضو بس حبيتها تيجي منك 😒
= ماشي أنا هروح اجيب تورتة وشمع وهستنى مراتي لما ترجع🤓
- وانا هصبغ شعري برتقاني واستنى جوزي لما يرجع 😂
= ربنا يكون في عونه لما يرجع 😉
- هتصوم الاتنين الجاي ؟👳♀️
= ان شاء الله وانتي ؟
- هصوم اه
= ربنا يتقبل يا أخت عزة 🤷♀️
Cut
* هايل يا أساتذة، نقفل الإعلان🍅⏏️ على كدا ونحط عليه ڤويس أوڤر ..
لولا الإنترنت كان زمان الاتنين دول لسه بيخونوا، ڤودافون هتعلمك العفة .📵🔞
