هيام قلبي

Chapture 15

جا صباح نوضني باه نروح خدم بالسيف باش نضت لقيتو راح لحال خلي ندير روطار ديما نروح فالوقت، طيبتلو قهوة انا منشربهاش تضرني، لبس قشو خرج يحوس علا خدمة انا لبست في عقلي قالي فوتي ديري زوج مفاتح قلت كي نروح، خرجت قفلت لباب هبطت لقيت ولاد صغار يلعبو رحت علا رجليا قريب لحال تهنيت من طرونسبور، مع قريب نوصل لقيت طوموبيل محمد دخلت تفكرت بلي راح يدي تصااور زربت دخلت حتا طابليتي ملبستهاش رحت نشوف وش يدير، وقفت بعيدة ونشوف فيه مدتلو سكريتارة الضرف هزو راح للبيرو تاعو ايي هذاك الزهر لازم نشوف كيفاه ندير يااربي، قلت ندير روحي نسقسيه علا لمفتاح وخلاص خخخ، دخل لحقتو  فاتت دقيقة طبطبت وفتحت لباب ديراكت  تخيلو لقيتو بلا تريكو تشوكا كي شافني قفلت لباب يااربي وش هاذ راجل ديما نتحرج كي نفكر فيه بصح تاع لمرة هاذي قمبلتها،ياو وجهي رجع حمر وش داني درتلو خطة رجعت عليا رحت لشومبرة وين نبدلو حنا نسا قفلت لباب نحيت خيماري ونندب مبعد سمعت صوتو برا يقولهم مشفتوش مدام وجدان صاي وليت نترعد يااربي وش هاذ لموصيبة، مبعد راح قلت نطلع للمديرة نقولها عندي ظرف اذا محبتش خلي تنقصلي ياخي لكرا خلص مستحييل نبقا، رجعت خيماري رجعت النفس خرجت طلعت بالروعة للبيرو تاع لمديرة طبطبت.. ادخل.. دخلت هزت حاجبها، سلام عليكم.. وعليكم السلام اتفضلي مدام وش عندك ضرك.. اا ليوم متصلحليش نخدم رحلت لدار جديدة لازم نفرزها هكذاك و يطبطب هدرتي مكملتهاش دخل محمد.. مع شميت ريحتو برك تقلبت مصلحتلي نخرج مصلحتلي نبقا شاف معايا.. وجدان راكي هنا وانا نحوس عليك وش قتلك علا الروطار راكي معايا ليوم.. راسي بقا فاللرض راح نطرشق بالحشمة حتا نطقت المديرة.. شوفي اذا يقبلك هو اذا محبش اعذريني بصح نخرجك قبل لوقت اخدمي شوي و روحي متصلحش هكذا.. معليش تعيشي وجيت خارجة نروح نروح الله لا قبل خصني غير نشاورو هو نبقا ولا لا،، لحقني.. وش بيك نتي معايا وش صحانية لوجه هاذي لي عندك تصدمي علا لبيرو  امشي امشي مبعد نتفاهمو عليها.. جيت جيهت لباب تاع برا خارجة.. اسمعي وين رايحة اذا غابتلك الطريق راهي منا.. منخدمش ليوم منيش حابة عندي شغل يستنا فيا.. والله علا ڨوسطوك واقيل امشي قدامي.. مشيت خليتو راح نخرج من عقلي قلبي يفرفر كي نشوفو و هو يترجل عليا، حكمت طريق لكبيرا ونمشي تهنيت قدقد افف شوية و نشوف طوموبيلتو حارقة طريق وحبست قريب مني هبط منها وخبط لباب وجا جيهتي انا كي شفتو قصيت طريق نجري خليتو يعيط ورايا.. يوجدان ارواحي وشبيك تهربي.. طلقتها نجري وهو ورايا خلاص مخلاش فيا عقل من بكري مبهدلة خلي نتبهدل كثر، وصلت للبلوك طلعت نجري فسكليات هو ينهج وانا ميتة بالتعب بصح واللغير نطلع حتا وصلت لدار يديا يرعشو عييت نلقا المفتاح حتا لقيتو في وجهي طاحلي ساك جا حكمني من فمي.. اشششت بهدلتي بينا وش بيك هاربة هكذا وينهج وشوف معايا كي لمهوف انا عييت نتحرك.. حتا نحا يدو دار يدو علا شعرو ويستغفر.. وجدان حرام عليك شوفي وش درتي فيا وصلتيني ندير حوايج اففف اسمعي شتيتي ولا كرهتي منا لسمانة لجاية نديرلك لخاتم شيطان يوسوس فيا خايف نضرك و نضر روحي ادخلي لدار يااربي راح تهبلني هاذ الطفلة بركاي ما تشوفي فيا هكذا علا واه تحوسي نتي ملي شفتي فيا وانا لعقل مبقاش فيا هز ساك حوس علا لمفتاح جبدو فتح لباب وحكمني من ذراعي دخلني و خبط لباب وراح بقيت مشوكيا رحت لدوش نشوف فالمراية و نضحك وحدي راح يجي يخطبني ياااااي وزيد هابل عليا خلاص راح نموت من لفرحة نحيت قشي بلاكيت شعري درت الريحة درت لغنا ونشطح بردت قلبي خلي نعرس قبل لوقت والله ما نخليها في خاطري شطحت شطحت حتا طحت فاللرض من تعب حتا طبطب لباب.. او شكون لي راح يجي ضرك، خالد قالي نجي فليل، رحت شفت من لعين تاع لباب لقيتو خالي ناصر معاه رجال ماللور، لبست حجاب تاع صلاة طويل فتحت ورحت لشامبرة جا عندي خالي باسني و حضني.. وش دير بنتي مرحتيش تخدمي.. ايه قعدت نفرز دار.. معليش ياخي راكي مرتاحة ولا معجباتكش دار... لالا بالعكس عجبتني وانا لي خيرتها.. خلاص راني تفاهمت مع مول دار يزيدلكم شوي حوايج وراني جبتلك فريجيدار و تلفزيون قالي خالد هذا ما خص.. لالا واللغير بزاف عليك علاه تعب في روحك.. واجبي بنتي مش بزاف بالعكس قليل خلي نشوف رجال.. اييه، راح جبت تليفون ندير بيه حتا خرجو قالي خالي فيلامان وراح خرجت نشوفهم جابلنا بلازما مسعيناهش في دارنا وفريجيدار الله الله فرحت قدقد درت طورطة صغيرة طيبت فريت بالبيض جا خالد وجهو مقلب راح لصالة مهدرش معايا، اوو وش بيه هذا ثاني رحت عندو حطيت لعشا.. هزي *** من قدامي.. تشوكيت وش بيه هذا اول مرة يطيح قدامي، خالد وش بيك كشما صرالك.. وجدان اخرجي متخلينيش نوض عندك نكسرك بطريحة.. وش بيك وش درتلك انا.. قلب طابلة اخرجي منا ازربي روحي لشامبرتك.. هبطولي دموع و بقيت نعيط.. والله ما نخرج حتا تقولي وش درتلك.. تحبي نقولك وش كنتي ديري مع راجل هذاك بسبتو تحاوزتي من دار وش داك دوري بساحتو وتزيدي دخلي فيه لدار مكيش وجدان لي نعرفها.. خالد اعرف وش تهدر هذاك راهو طبيب يخدم معايا فسبيطار ومدخل لدار ما هبلت ندخلو وش هاذ لهدرة لي تهدر فيها خساارة عليك تشك فيا حتا نتا.. اوووف اووف مخليتو فيا عقل شكون نصدق انا.. شكون قالك.. لجيران شافوكم.. خلاص خلاص علابالي مديريهاش وسوسني شيطان ارواحي عندي خلاص مكان والو، رحت عندو حضني، خلاص ختي اسمحيلي والله ما قصدي راني راجل نخاف علا ختي وزيد كي خليتك وحدك خفت بزاف حتا توسوست و مصلحتش نجي اول نهار تاع خدمة.. علاه راك تخدم.. ايه لقيت خدمة عند واحد حتا شهرية مليحة.. قول والله.. والله شوفي كيفاه راني تعبان ميت.. خسارة لعشا راح علاه نتوما رجال كي تتقلقو تكسرو و تقلبو حرام عليكم هكذا مهيش رجولة هاذي.. ايي عليك تقلاق يخليك ديري كلش خلاص خلينا ضرك نهزو انا وش هاذ تليفزيون جايو خالي.. ايه عمر دار.. نوضي تراه نشوفو فيه شوي.. اصبر نجيب ناكلو شوي كشما حاجة.. سمحيلي بزاف والله مكان قصدي.. خلاص نورمال بصح متعاودهاش.. لالا اخر مرة ناض بدل قشو دارو فالماشينة ولم الماكلة و لقزاز انا جبت شوي كاشير و قليت بيض فالفرماج وشوي خبز و موناضا كلينا جبتلو لاطارط جات تهبل قلت غدوا نعيط لماما تجي لفال تاع دار غسلت لماعن طفيت التيلي و ضو خالد رقد بالنوم، رحت لشامبرتي نحيت لڨندورة بقيت بالتريكو و سروال تاعو تفرجت شوي بتليفون وبقيت نخم في محمد ياربي والله دارلي بزاف مشاكل بصح قلبي سيطر عليا مقدرتش نكرهو بالعكس زدت حبيتو كثر مفهمتش علاه، تاع الصح الحب واعر بزاف سورتو كي تحبي من قلبك و تلقايه يبادلك الشعور وتكوني حشامة تتخلط عليك صحصح،،