"အမေ့သားက အရင်လိုပဲ ခရမ်းချဉ်သီးထောင်းကို စွဲစွဲလန်းလန်းကြိုက်တုန်းတော်
ငါ့သားက အရင်လောက်တော့ အစပ်မစားနိုင်တော့ဘူးလို့ 'ည'ကပြောလို့ အမေငရုတ်သီးလျှော့ထည့်ထားတာ"
မြိုချလက်စထမင်းတို့က လည်ချောင်းဝမှာ ခဏတာတစ်ဆို့သွားတဲ့အခါ ဘေးကရေနွေးကြမ်းခွက်ကို ဆွဲယူပြီး မြိုချလိုက်ရသည်။
အိမ်ပြန်ရောက်နေတာ ၂ရက်၊တစ်နည်းပြောရရင် တစ်ယောက်သောသူဆီက ရှောင်ပြေးလာခဲ့တာ နှစ်ရက်...အခုထိ နာမည်ကိုကြားရင်တောင် ဘာလုပ်ရမှန်းမသိအောင် လမ်းပျောက်နေရဆဲ။
မှုံမှုံဆေးရုံကဆင်းပြီး နောက်ရက်မှာပဲ ရုံးကိုခွင့်ယူပြီး အိမ်ပြန်လာခဲ့တာက မျက်စိရှေမှာမြင်နေရရင် စိတ်ဆိုးပြေမိမှာစိုးလို့၊အဲဒီလူနဲ့ပတ်သက်လျှင် ဘယ်တုန်းကမှ မမာနိုင်ခဲ့တဲ့အသည်းမို့ ရှောင်ပြေးခဲ့ခြင်းသာ။
သူ့ကိုတွေ့တွေ့ချင်း အမေကငိုသည်၊မရှိတော့တဲ့ ညီမလေးကိုတရင်း အမေငိုတဲ့အခါ သူလည်းမျက်ရည်ကျရသလို အဖေသည်လည်း သူတို့သားအမိနှစ်ယောက်ကိုကြည့်ပြီး မျက်ရည်အဝဲသား။
နောက်ပြီး ထက်လင်း၊သူ့ဗိုက်ကို တစ်ချက်ပြီးတစ်ချက်ထိုးရင်း အဆက်အသွယ်ဖြတ်သွားတဲ့အပေါ် မကျေနပ်ကြောင်းပြသည်။ထင်ရာတွေစွတ်ပြောပေမဲ့အခုထိမမှန်သေးတဲ့ ထက်လင်းအကျင့်ကတော့ အရင်လိုမပြောင်းမလဲပါပဲ။ကျော်ထက်ကတော့ အွန်လိုင်းမှာ သူဆက်သွယ်ကတည်းက 'ည'နဲ့ပြန်တွေ့ပြီလားလို့ အရင်ဆုံးမေးလာခဲ့သူ၊ ဒီသူငယ်ချင်းနှစ်ယောက်ရဲ့ သိနိုင်စွမ်းကလည်း တကယ်ကိုဆန့်ကျင်ဘက်ပါပဲ။
"ဒီတစ်ခေါက်က ကြာကြာနေလို့မရဘူးပေါ့"
"ဟုတ်တယ် အမေရဲ့၊လကုန်ရက်နီးတော့ အလုပ်တွေကရှုပ်တယ်၊မနက်ဖြန်ပြန်မှရမယ်"
"အင်းပါ၊အမေ နှမ်းဆုပ်တွေလည်းလုပ်ထားတယ်၊မှုံမှုံကြိုက်တဲ့ နှမ်းပျစ်ရော
နောက်ပြီး နွားနို့လည်းခဲထားသေးတယ်၊ကြော်လည်းကြော်ပေးလိုက်ဦးမယ်၊အခဲလည်းထည့်ပေးလိုက်မယ်၊ဟိုရောက်မှ သား'ည'ချက်ကျွေးလိမ့်မပေါ့"
"အလုပ်ပိုအောင် အမေရယ်၊အလုပ်တွေသိပ်မလုပ်ပါနဲ့တော့ဗျ၊အဖေရောပဲ"
