ذنوب ملقاه

الجزء الأول

انا مسيم عمري ١٨ سنه
تخرجت من الثانوي بشهادة امتياز
حلمي اكون دكتورة اسنان
ولانه اهلي يثقون فيني وافقوا اني ابتعث واكمل دراستي برا الكويت
انا حيل بيتوتيه ما احب اطلع الا للضروره
ما تهمني الطلعات ولا تجمعات البنات
من المدرسة لي البيت ومن البيت لي المدرسة
شي واحد يهمني وهو تحقيق حلمي
حلمي من كنت صغيره كبرت وكبر حلمي معاي
حلمي الي تمسكت فيه ولي كنت على وشك اني احققه
بيوم من الايام استغربت انه الدورة الشهريه عندي تأخرت
تأخرت علي ولاول مره
ما جا على بالي اقول لامي
قلت يمكن من الهرمونات تتغير عندي كون اني قاعده اكبر
وبيوم من الايام لاحظت نفسي صرت احب اكل ليمون على اني ما كنت اكله !!
وكنت بكل اكله احط ليمون
لين ما جا اليوم الي اغمى علي
فتحت عيوني شفت نفسي بالمستشفى
كانت الدكتوره مبتسمه
اما اهلي الغضب مرسوم على وجههم
الخوف تملكني وانا اسأل نفسي واسأل عيوني الي شافت غضب اهلي " شلي صار فيني ؟"
ما كنت عارفه اسأل منو ليش اغمى علي ؟
غضب اهلي ! ابتسامة الدكتوره !
انزرع الخوف والتوتر فيني
رجعنا البيت وطول الطريق
لا انا سألت شفيني ولا اهلي قالوا شنو فيني
لين ما رجعنا البيت
وسمعت امي تقول : مستحيل الي سمعته اكيد في غلط
عقدت حواجبي وانا ماني عارفه مقصد امي شنو الي مستحيل ؟ شنو الي سمعته امي ؟!
طالعت اخوي وشفت جامع اصابعه بغبضة ايده
وعروقه بارزين وباين عليه حيل معصب
نطق ابوي بفضول عن اغمائي المفاجئ وبخوف عن بنته الوحيده الي عيونه شافت اغمائي : شنو الي مستحيل ؟ شفيها مسيم ؟
واخيراً قال ابوي السؤال الي كنت بقوله " انا شفيني ؟ "
تكلم اخوي والشرار طالع منه : بنتك يا يبا حامل !!
توسعت عيوني بصدمه
حسيت بقفص صدري ينكمش ويتمدد
شلون انا حامل وانا عزباء؟
شلون انا حملت ؟
تذكرت انقطاع الدورة الشهريه علي
تذكرت اكلي لليمون
معقوله انا حامل ! بس شلون ومتى ومن منو ؟

_
_
انا لتين عمري ٢٥ سنه
متخرجه وعندي شهادة محاسبة
اشتغل ب احد بنوك الكويت
كبرت على حبي لولد خالتي
والجميل من هالحب انه من كان من طرف واحد
كان من طرفين
عشت ايام جميله بحياتي
لانه هو كان بحياتي
ولي كان هو اجمل شي بحياتي
اليوم كان اجمل يوم بحياتي
لانه اليوم راح اكون زوجة حبيبي
زوجة ولد خالتي الي اعشقه
كان شعوري جداً شعور جميل
راح انزف للشخص الي احبه
للشخص الي طول عمري اتمناه يكون نصيبي
ولي كنت دائماً ارفع ايدي لربي واطلب من ربي يكون نصيبي
مو لاني ما اثق بحب ولد خالتي
لا لانه كنت خايفه من الحياة تبعدني عنه
بس الحمدلله ربي حقق دعائي
وصار حبيبي زوجي
كنت اسعد ما خلق ربي وانا اشوف حبيبي الي صار حلالي يقترب مني
الي طول ما احنا نحب بعض لاهو لمسني ولا انا لمسته
حتى ايدي ما لامست ايده
كنا نتمنى اليوم الي نصير حلال بعض
كنت ناطره هاليوم الي اعيش بين احضانه
لكن انصدمت من تجاهله
اقترب وبعدين صد عني!
تفاجأت وانصدمت واستغربت
ليش صد عني ؟
قام من على السرير وكان باين عليه معصب
قمت ووقفت جدامه
كنت توني بسأله شفيك ؟ ليش معصب؟
ما حسيت الا كف جا على وجهي
ضربني على وجهي من غير لا اسوي او اقول شي !! للحظه حسيت انه حبه لي كان كذب
لكن صدمني من مسكني بقوه على كتفي وقال : سويتيها مع منو يا .....
بعدت ايدي عنه والصدمه متملكه ملامح وجهي : انت شقاعد تقول ؟!
نطق كلمه هزت فيني
كسرت قلبي من قال انتي مو بنت !!
_
_

انا اجوان عمري ٣٢ سنه
متخرجه وعندي شهادة ولله الحمد بشهادتي اقدر اشتغل بالمكان الي ابيه
لكن انا فضلت اركز على بيتي وزوجي وبنتي
تزوجت زواج اهل
لاني ما اؤمن بالحب الي يكون قبل الزواج
لاني سمعت دراسه تقول انه الحب يقل بعد الزواج
عكس من يكون زواج اهل والحب يجي بعد الزواج
بعترف اني اول ما تزوجته ما كنت احبه
لكن بعد مرور شهور عشقته
وحبي له كل يوم يزيد
لين ما ربي رزقنا ببنوته حلوه
شعور جداً جميل من تشوفون جزء منكم ومن الي تحبونه بين ايدينكم
ماقدر اوصف شعوري
لانه هالشعور صعب اني اوصفه
زوجي متفوق بشغله
وكان دايماً ياخذ ترقيه
جا اليوم الي اشوفه راجع من شغله حزين
وهاليوم كان اول يوم اشوفه ب هالحاله
قلبي اختبص
تضايقت من قالي : حبيبي انا لازم اسافر عندي شغل بالامارات الشركه هناك راح تخسر ولازم اروح واخليها توقف على رجولها تكفين سامحيني ماقدر ارفض عرض المدير لانه ما يثق الا فيني
على اني كنت متضايقه الا انتي ابتسمت
لانه مدير زوجي ما يثق الا فيه
هذا يكفي يخليني فخوره فيه وجداً
مرت سنتين وهو بعيد عني وعن بنتنا
على انه بعيد بس كل يوم نكلم بعض
او بالاصح كل شوي
حبنا ما نقص على هالبعد
وبيوم من الايام كنت دايماً ارجع
شنو ما اكل ارجعه
قلت اكيد ماخذه برد
بس برد بعص هالصيف!!
كانت الاعراض الي فيني نفس الاعراض من كنت حامل ببنتي !!
قررت اشتري جهاز كشف الحمل
مادري ليش شريته !
ولاني ادري ليش شكيت اني ممكن اكون حامل وزوجي غايب عني سنتين !!
لكن الشيطان وسوس لي وانا سمعت كلامه
رحت وشريت جهاز كشف الحمل
واول ما رجعت البيت كشفت
صُعقت من طلع لي بالجهاز خطين
وهذا يعني انا حامل
جربت مره ثانيه
وطلعت حامل
شلون حامل وزوجي بعيد عني ؟!