UNICODE
ကျွန်တော့်နာမည်က အော်စကာ(Oscar) တဲ့ ။ ကျွန်တော်က ခွေးတွေထဲမှာဆိုရင် Alsakan Malamute မျိုးပေါ့ ။ ကျွန်တော်တို့ကို လူတွေကသမုတ်ကြတယ် ။ အရမ်းစကားများတာပဲတဲ့လေ ။ ကျွန်တော်တော့ အဲ့လိုမထင်ပါဘူး ၊ ကျွန်တော်က စကားတတ်တယ်ပဲဆိုရမလား ၊ လူတွေနဲ့ဆက်သွယ်ရတာ ကျွန်တော်အရမ်းသဘောကျတယ် ။
ကျွန်တော့်မှာ ချစ်ရတဲ့သခင်နှစ်ယောက်ရှိတယ် ။ ကျွန်တော်ကတော့ သခင်တို့ကို ပါပါးနဲ့ဒယ်ဒီလို့ခေါ်နေကျဆိုပေမယ့် ဒါတွေကို ပါပါးတို့ကတော့နားလည်မယ်မထင်ပါဘူး ။ ဒီကောင် တအူအူနဲ့ဘာတွေအော်နေလည်းမသိဘူးပဲ တွေးနေလောက်မှာပေါ့ ။
ကျွန်တော်က လသားအရွယ်ကတည်းက ပါပါးတို့ဆီရောက်နေခဲ့တာ အခုဆို ၂နှစ်ကျော်ခဲ့ပါပြီ ။သံယောဇဥ်တွေကလည်း တစ်စတစ်စတိုးလာခဲ့သလို ကျွန်တော့်ကိုလည်း ပါပါးနဲ့ဒယ်ဒီဟာ သားလေးတစ်ယောက်လို ချစ်ပေးခဲ့ကြတယ် ။ ကျွန်တော့်အတွက် အခန်းတစ်ခန်းလည်း သီးသန့်အပိုင်ပေးထားပေမယ့် အလိုလိုက်ခံရတဲ့ကလေးတွေက ပိုဆိုးတတ်သလိုပဲ ကျွန်တော်ဟာ တစ်ခါတစ်လေ တစ်ချို့ညတွေမှာ ပါပါးနဲ့ဒယ်ဒီကြား ဒီခန္ဓာကိုယ်ကြီးနဲ့ မဆံ့မပြဲ ဝင်အိပ်ရတာလည်း အရမ်းသဘောကျပါသေးတယ် ။
အဲ့လိုအချိန်တွေဆိုရင် ဒယ်ဒီက *အော်စကာ!!!* ဆိုပြီး အေးစက်စက်အသံကြီးနဲ့အော်ထုတ်တတ်ပေမယ့် ပါပါးကတော့ ကျွန်တော့်ကိုယ်လုံးကြီးကို အားပါးတရဖက်ထားပြီး * ပါပါးသားလေးက လိမ္မာလိုက်တာ * လို့လည်းပြောတတ်ပါသေးတယ် ။ အဲ့အတွက် အလိမ္မာလေးအော်စကာဟာ ဒယ်ဒီ့ဘက်ကိုဖင်ပေးပြီး ပါပါးဘက်ကိုခေါင်းလေးတိုးလို့ နှစ်နှစ်ခြိုက်ခြိုက် အိပ်တတ်ပါသေးတယ် ။
* အော်စကာ အပေါ်မှာ အိပ်နေတဲ့လူဆိုးကိုသွားနှိုးချည် သွား သွား *
ဒီမနက်လည်း မီးဖိုချောင်းထဲမနက်စာပြင်နေတဲ့ ပါပါးနားမှာ အမြီးလေးနှံ့ကာနှံ့ကာဖြင့် အဖော်ပြုပေးနေတုန်း ပါပါးရဲ့တစ်ချက်လွှတ်အမိန့်ကြောင့် အော်စကာလည်း အပေါ်ထပ်ကိုပြေးတက်ချင်ပေမယ့် ခပ်ဖြေးဖြေးသာလျှောက်ပြီးတက်ခဲ့လိုက်တယ် ။ မနက်အစောကြီးကတည်းက ပါပါးကအဝတ်အစားလဲပေးထားတာဖြစ်လို့ အော်စကာတော့ ဟန်ပျက်မခံနိုင်ပါ ။