خطوات متعثرة

الـرف الـثـانـي ¦| حُلم جميل

اللهم صل وسلم على نبينا محمد وعلى آله.

.
.
.

لا تصدقوا الكلام الحلو والطويل
خذو الحقيقه من أفواه المواقف
.
.

دنيا بارده وصوت المطر على سقيفه الحوش
ينزل بغزارة وتنزل معه الراحه النفسية كدامي صوبه كهربائية وكتبي وايبادي واقرا،تثاوبت بنعاس وشلت كتبي حطيتهم بالجنطة واخدت علبه الماي ورحت للمطبخ مليتها ورجعت لغرفتي البسيطة الي تحوي سرير جرارات جوزيه مراية سوداء طويلة رجعت علبه الماي بالجنطة وطفيت الصوبه اخذت غسولي غسلت وجهي وفرشت اسناني ورجعت حطيت مرطباتي مشطت شعري وتعطرت ودخلت لفراشي واني مرتاحه نفسيا صليت العشا ودرست وشبعانه ومسلسلي الكوري نزلت حلقه جديدة افكر بحياتي شكد مرتاحه وكل شي عندي سعيدة لابعد الحدود اصدقائي دور مدايرلي اهلي نوعا ما ما ماذيني وكل الي اريدو يمي دخلت لحلقتي شفتها بس خلصت طفيت الموبايل ونمت

.
فزيت على صوت المنبة كعدت بنشاط غسلت وجهي وجيت علكت الصوبه احمي عليها ملابسي وارجع اللبسهم كملت وتعطرت ورحت للمطبخ طلعلتي تفاحه وكعدت بحوش البيت انتضر الاشتراك وبيدي موبايلي اقلب بالإنستا شويه ودك هورن الاشتراك طلعت  قابلت صديقاتي كاعدات باخر الباص رحت الهم بفرحه ستيت نفسي بينهم احلى لحظات عمري

نفس : هلا بالجذابين كلهم رئيستهم
نزلت جنطتي من كتفي وخليتها بحضني
وتين : ليش خايسه شسويتلج
نفس : وين الورق عنب والله حسويلج واجيبلج والله كيكه بالكاكاو والله والله تالي متالي حتى عفطه ما عفطيلي
دلو : ولا يهمج كلنا هين مستعدين نعفط الج طول الوكت يومنا كلو نكضي عفاط لاجلج
براء : حرام تعرفين النبي (ص) كال هل شي يخلي ثمج نكس لمدة ٤٠ يوم
مرام : حجه ملا فسيفس
براء :انتي خليج استهزاء بس والله باجر تصيرين حطب جهنم بس صبري
مرام : وين الله واصير مع جونغكوك نشتعل بحطب واحد
براء: هاي شبيها ولا فلا عندج عقل ولله يحرم اذا براسج عقل
وتين : والله اني جنت احبهم واتابعهم بس مو عبادة صايرة عبدة الاوبا لج مرام تفشلين
مرام : دولي مو عبدة اوبا بس احبهم حيل
نفس : والله بنات مدرسنه أحياء ترا راح ناكل خرا والله
وتين : اني درست البارحه شويه بس شني جنت نعسانه حيلل
دلو : خو انتي كلمره هيج تكولين وزط بط يا ٨٥ يا٩٠
وتين : أعوذ باللة من شر شيطان الرجيم شيلي عينج لا افكسها

قطع كلامنا عمو غيث صاحب الباص

عمو غيث : يا بنات الاخير هوو وين عايشين يلا اريد اللحك اجيب وجبة الثانيه

مرام : عمو مو تعرف هاي براء سوتلنا ختمه
عمو غيث : يلا عاد فضوني وراي كومه شغل
نزلنا وحده ورا الثانيه وكالعادة بنات المتوسط مطالعات لازم ندك نص ساعه يم باب المدرسة يلا نفوت وبهل الاثناء جنا نكضي أجمل أوقاتنا مع بعض واكو بنات يكضونها مع ام حمد الي عدها دكان يم المدرسه تبيع بي حلويات وجبوسه ومكياج وقرطاسيه نروح نشوف شنو جايبة جديد
جان اكو بيت كدام المدرسه عدهم دجه نكعد عليها لان فيي ساته كل ثكلي على حضن نفس ودور مدايرنا البنات،، نفس دتكتب اسم المعربل وتشخبط عليه وصافنه بغير عالم وبراء وحده يم اللخ يسولفون والله يدوخون ما اريد اصدمكم بس براء عدها نفس اهتمامات مرام ولكن براء بحدود ومو بهوس اما مرام فضيعه روحها دنيتها الكوريين طبعا الي علمهم على هذا كله اني جنت ازيد من مرام وما تتقارن بيه ابدا مجان اكو رقصه للفرق الكوريه ما حافظتها ولا فرقه تعتب عليه ورا ما علمتهم حسيت خف اهتمامي وبدأت فقط اتفرج كيدراما واسمع اغاني لكن مو مثل قبل،دلو كاعده تعدل بحجابها ومنتجيه عليه عكسها فات بامعائي
لطمتها بكفخها على راسها بعدتها عني
وتين : ترا مو قنفة يم الخلفج
باوعتلي بصدمه عافت المرايه من ايدها وغمتني
وتين : نفيسه تعاي نروح لم حمد
نفس : مجايبه فلوس شيوديني
راسها بالدفتر وتغني هسا شنو صارعة جدي بيها
وتين : دمشي عندي خمسميه ربع الي والج
مرام : هذا الغني فينا
جانت مرام ملح الشلة دايما تضحكنا بسوالفها الي واضح عليها اعراض إدمان السوشل ميديا والكيبوب عكس براء المشددة لابعد الحدود ودايما عراك هيا ومرام كمنا ننفض بالصدريه ووحده ماسكه باللخ أيدي بجيب قمصلة نفس  مع اني لابسه جاكيت بس قمصلتها تخبل
نفس : انعل ابو حضي لاحكتني على هل قمصله الي صارلها ملك سنتين تلبس بيها وبزور يلا نطتني هيا خرا بي لحظي
وتين : هسا شبيج هوا جيب
غمتني واني مجلبه بيها نفس روحي من هل دنيا اذا اني حوصف سعادتي  اختصرها بكلمه وحده نفس عمري ودنيتي هيا كل شي حلو بحياتي نفس صديقة عمري وطفولتي من صف الثالث ابتدائي واحنا هسا خامس اعدادي،فزيت على دفعه من البنات مو باب محل معركه اشبع دفرات يلا تفوت
مرام : ام حمد ايمت يصير براس دكانج خير وجيبين قرطاسيه براسها حظ
ام حمد : شو شبيها والله خوش قرطاسية
مرام : لا اريد مال جونغكوك عالاقل بيها شي يفتح النفس
ام حمد : شني هيا خاله هاي اكله شني
إلهام : يمه شبيج يا اكله هاي هذا واحد كوري
وانتي مرام شبي دكان امي ميعجبج لتجين
مرام :وانتي شكو دخلتي بالنص اني وهيا نسولف
إلهام : جا غير امي شبيج لدوسين

وضلت تتناكر ويا إلهام وهاي البطرانه تكللها ما عندج كندر ما عندي ريدبول مدري شتشرب عبالها فايته لماركت عالميه،عفتهم وصفنت مدري ششتري فزيت على كرصات نفس
نفس : بالجذب ذكريني عندي ربع يمج مديتي عنكج وصرتي حاكم طي والله انطيج ربع
وتين : ووجع امي ووجع الاهجع من ايمت والشمس تركعنا ما تشترين لتسوين نفسج ادميه
اشترينا وطلعنا نتمشا ننتضر رحمه الله جان يصيح الحارس تعالو فوتو للحديقه،جنت دايما اكعد افكر بي ويسرح خيالي لوووين كاعده على بلوكه يم شجره والبنات يحفرن عليها ذكريات لو عدها اللسان جان صيح مو بس حجه لو عدها ايد جان كفختنا خصوصا مرام بكل مكان كاتبه جونغكوك ومدري شني كعدت كبالي نفس ووراها دلال يهزن ايديهم كبال عيوني يصحوني من صفنتي

دلو : ايه والله هنيالو سعيد الحظ
باوعت لنفس بخزره عبالي كايله الهم شي جان ترفع حواجبها بمعنى لا

نفس : يا سعيد حظ يا بطيخ يمعوده اني راح اضل سنقل مامه اني مالي بسوالف الحب والخرط مطيرين
دلو : علينااا خو شفتكم شون تتغامزن صايراتتت اهل اسرارر
نفس :الله اكبر انفتحت شيسدها بعدين هيا مو مثلج ام المولل
وتين : يا موللل تكول عليه ام أسرار الخايسه؛
اشوف دلال شون رتبكت وصارت تتعثلم بالحجي
دلو : يا مول يابه شسالفة نفس لجذبين
نفس : وحقق هذاا الله شفتها تكتب لبت خالتها شفته بالمول
وتين : هلووو هلووو عينييي
قطع كلامنا لجرس كامت دلو دتفوت
جريتها من ايدها كعدتها بمكانها
وتين : كعدي خلي يطلعن وتخف الهوسه واحجيي لتغبين ياويلج مني
دلو :اني اعلمج شو منو تنطيج الباسورد تشوفين ستورياته الله كريم والله فلا احجي اذا متحجين
مرام : زيزي كبرنا وصرنا نحب ونخبي
براء : حرام اصلا هاي كلها علاقات محرمه
مرام : انتي بس سكتي وكل خير الله يجي خل نسمع احجن عييني صداقه وصداقه اهل السرار ونتي نفيسه انتي اكبر بربوك كل السوالف عندج اكولج وتين مبينه تحب تكولين لااا هيا نفس خبالج وينها وين الحب اثاريكم حيايه خانسه
نفس : هاا وكعت براس خريسه وكعت اني شكو هنا كالن لا. تحجين وامنني خوما اخون الامانه
مرام: اي عفيه يلا صيري براء اقصد ملا فسيفس
براء : والقرآن راح احجي معاج غير حجي شعليج كولولها لضل  تصنف شعليها بيه ملتزمه بديني هيا شكو قابل اصير كافره مثلها
وحده ترفع وحده تكبس اخذت ايد نفس وفتنا للمدرسه وكلهم كمزن ورانا عيني بعين دلو ادحك عليها بتحدي
وتين : بالفرصه حجينا
صفكت ايديها وغمتني وافترقنا للصفوف مرام ونفس واني بصف ودلو وبراء بصف
معرفت شون خلصن الدروس واني ما اريد احجي كلش متوتره ما اريد اعترف اني احب ابدا حتى بيني وبين نفسي خايفه حيل احس حيصير شي ورا هل اعتراف

.
.
.

انتهى.