ايوجد نور بنهايه النفق؟

الفصل الرابع عشر

بص لها حسام ومتكلمش دا لانه مش قادر يتكلم خالص من الالم اللي حاسس بيه وزاد عليه النار اللي ولعت في قلبه من كلامها بس بان علي ملامح وشه انه اتصدم جامد فهنا حاتم حس بيه اوى واتكلم هو وقاله ايه ياحسام لسه المُسكن مبداش يعطي مفعول فهز راسه بايوة، وهنا عضت فرح علي شفايفها بضيق وانها مكنتش المفروض تتكلم خالص في الوقت ده او حتي عالاقل تساله عن صحته وفكرت في هي قد ايه قليله الذوق معاه، فاتنحنحت وقالت احم الف سلامه عليك يادكتور حسام ربنا يتم شفاك علي خير ويطمنا عليك وحقيقي بشكرك من كل قلبي علي وقفتك جمبي واللي عملته معايا فرد حسام عليها ووشه لسه باين عليه التعب الله يسلمك ياانسه فرح وحمدا لله علي سلامتك انتي كمان انتي تستاهلي كل خير عشان خاطر باباكي عم حسن ومامتك الحاجه زينب ربنا يعطيهم الصحه وهنا دخل عليهم دكتور نباطشي لان اياد روح بيته ينامله كام ساعه فقال الدكتور متجمعين عند النبي بإذن الله الكل في صوت واحد عليه افضل الصلاه والسلام،فقال الدكتور بما ان الكل تعبان كده فايه رايكم اخلي التمريض يوصلوكم اوضكم ترتاحوا وتحاولوا تناموا شويه لانكم محتاجين كده وبالفعل الممرضين اخدوا غيداء وفريده اوضتهم، وممرض جاب كرسي لحسام وحاتم راحوا اوضتهم وفرح ومامتها في اوضتهم وكلهم اتعشوا واخدوا علاجهم وناموا وحسن كان هيروح لاولاده بس بعد اما يتطمن عليهم كلهم فقبل اما يروح قال في نفسه يبص تاني علي فرح لانه كان سابها هي ومامتها نايمين، وراح اتطمن عالباقيين لقاهم كلهم ناموا واحسن حاجة ان الاوض كلها جمب بعضها في نفس الدور. لما دخل بشويش من غير مايعمل اي صوت لقي فرح بتعيط اووى فاخدها في حضنه وبيتكلم معاها بالراحه اوى عشان ميصحيش مامتها، وقالها مالك ياحبيبه قلبي وفرحه عمرى بتعيطي ليه دا انا مقدرتش اروح غير اما اتطمن عليكي قالتله بابا انا زعلانه من نفسي اووى انا كنت قليله الذوق خالص مع الدكتور حسام بس كان لازم اعمل كده، قالها ليه يابنتي قالتله عشان لو هو جواه حاجة من ناحيتي ينساها من دلوقتي احسن، فقال لها ليه بس ياحبيبتي انتي تعرفي ان حسام هو اول واحد لحقك ولولاه كان زمانك بعد الشر ميته دلوقتي ومش بس كده لاء حتي لما وصلتي المستشفى كانوا محتاجين دم ليكي وهو اللي اتبرع لك لدرجه الدكتور نصحه اني يتبرع لك بكيس دم واحد وهو اصر انك تاخدى كل اللي انتي محتاجاه، و، و، و، فضل باباها يحكي لها الحاجات اللي حسام عملها كلها لان مامتها مكنتش تعرف كل الحاجات دي فلقاها زادت في عياطها اوى وقالتله خلاص بقي يابابا دا انا ضيف علي اني قليله الذوق طلعت كمان ناكرة لكل الجمايل دى واحساسي بالذنب زاد عندى فمسح باباها دموعها وقالها فرحه عمرى انا هسألك سؤال وعاوزك تجاوبيني بكل صراحه ومن غير اي هروب ولا لوع انتي بتحبي حسام فبصتله فرح باستغراب ولسه هتاخد وضعيه الهجوم لانها مش عارفه تحدد مشاعرها ولا فاهمه ايه اللي بتحس بيه، وقالت لباباها ايه اللي بتقوله دا بس يابابا انت تفكر عني كده فرح حبيبتك لاء ياسي بابا قاطعها باباها وقال لها ايه يابنتي مين قالك ان الحب عيب او حرام انتي ليه شايفاني شايفك مجرمه او خنتي ثقتي فيكي، ابدا ياروحي مفيش الكلام ده خالص وانا لو لفيت الدنيا كلها عشان ادور لك علي راجل محترم ويصونك مش هلاقي زيه بصراحه وانا مقتنع بيه جدا، فقالتله يابابا صدقني مهينفعش اللي بتقوله ده قالها ليه بس ايه اللي منفعوش قالتله أسباب كتيرة اوى اولا انا لسه في سنه اولي يعني لسه صغيرة اوى ولسه قدامي مستقبلي وانا مش عاوزة حاجة تأثر عليه وعوزاك تكون دايما فخور بيا انت وماما، ثانيا بقي حضرتك جبتنا هنا الصعيد ودا هيكون مشوار طويل جدا من مصر لهنا واعتقد بعد اللي حصل لهم في الطريق لو لسه حاططني في دماغه اكيد هيشيلني، هنا ضحك باباها وقالها لسه عندك اسباب تانيه قالتله ايوة يابابا بس عاوزة اسألك يعني هو طلب منك انه يتجوزني يعني فقالها لاء لسه بس حاسس انه هيعملها قريب اووى. بس انا كنت حابب ارد عليكي في الامور اللي قلقاكي دى اولا يافروحه انتي مش صغيره ولا حاجه ولا الجواز هيأثر علي مستقبلك زى ماانتي متخيله، لو اتجوزتي عن حب انسان يكون ليه نفس طموحك مش هيفرق معاه بقي في سنه اولي كليه ولا اصغر من كده حتي، ومش بعيد يكون هو اكبر داعم ليكي واول حريص علي مستقبلك، وهو اللي بجد هيدلك علي الطريق اللي انتي شايفاه صعب. وهيفهمك اللي مش فاهماه، اهم حاجه يكون في بينكم توافق فكرى وتفاهم، فهمتيني ياقلبي وثانيا بقي ودى الاهم انا يعلم ربنا انا جبتكم هنا بس عشان احميكم من ابو الواد اياه اللي كان عازو يئذيكي انتي واخواتك فجيت هنا واتفقت مع مامتك انك صاحبه القرار الاول والاخير عاوزانا نفضل هنا هبيع البيت والارض اللي في مصر وهنقل لكم جامعتك ومدارس اخواتك ونستقر هنا اما لو حسيتي بالغربه، وانك مش هتقدرى تتاقلمي هنا فاحنا هنرجع تاني علي مصر بس هغير البيت ومش هتروحوا لاي مكان لواحدكم حتي لو هعين لكم حرس مع اني واثق ان ربنا هو الحارس وهو خير حافظا وهو ارحم الراحمين بس عشان اكون متطمن عليكم،اما بالنسبه لحسام واللي حصله في الطريق فانا حاسس انه مش متضايق منه بالعكس انا حسيت انه فرحان انه لقي سبب يقعد بيه هنا معاكي اكبر وقت ممكن، وهو بس كان تعبان علي مصدوم من كلامك، انا بس مش عاوزك تضغطي علي اعصابك اكتر من كده واي حاجه خايفه منها كلميني فيها علطول، وانا ضهرك وسندك وطول ماانا عايش اوعي اشوفك شايله حمل حاجه خالص، حضنت باباها وهي بتمسح دموعها وبتقوله ربنا مايحرمنيش منك ابدا يااحسن بابا في الدنيا كلها، مش عارفه من غيرك كنت هعمل ايه ياابوعلي قالها ايوة اضحكي علي عقلي بكلمتين وتوهي اووى ومتعترفيش قولي يابت انتي الواد ده داخل دماغك ولا لو كلمني اقوله بيتك بيتك وهش هش ياديك الفرخه دى مش ليك 😂ردت عليه بكسوف وقالت معرفش والله يابابا اللي تشوفه حضرتك قالها والله بقي كده اللي تشوفه يابابا وعيونك قلبت علي عيون قطط طيب ماشي خلاص مقولتيش رايك هنفضل هنا ولا نرجع مصر قالتله انا عشت عمرى كله هناك وكل صحباتي هناك مش حاسه اني هقدر اتأقلم هنا يابابا انا اسفه ياابو علي حقك عليا قالها ولا يهمك ياحبيبتي اهم حاجه عندي راحتك بس مش هنمشي من هنا غير بعد اسبوع كده نقضيه مع جدك وجدتك واعمامك اقله تعرفيهم ويعرفوكي دول كانوا هيموتوا عليكي ياحبيبتي قالتله ماشي يابابا قالها هسيبك تنامي بقي شويه ياحبيبتي وانا اروح اتطمن علي اخواتك، باس راسها وغطاها وقالها تصبحي علي خير ونامت وهي علي وشها احلي ابتسامه وخاصه بعد كلامها مع باباها اللي ريح قلبها وبالها،«بقي بالذمه في ابهات بتعامل ولادها بالحب والحنيه دى؟ مش لو كل الابهات زى ابو علي كانت مشاكل كتير جدا اتحلت»، وقالت ضرورى جدا تصلح كل اللي بوظته وفي اقرب وقت وراحت في سبات نوم عميق. والصبح نور الدنيا وكان يوم مشحون جدا ومليان مشاعر كتيره اووى صحي حاتم علي تليفونه بيرن وكان محمود صاحبه بيساله لو محتاج حاجه يجيبهاله معاه وهو جاي قاله هتيجي امتي ياحودا قاله نصايه كده استني ياحتوم كده معايا ويتينج بيبص لقي مامت حاتم بتطلبه فقاله خليك معايا مامتك بتتصل عليا هرد عليها وارجع لك ورد عليها، قالتله بقي كده يامحمود انا زعلانه منك بقي تخونك المكرونه البشاميل اللي مبتكلهاش غير من ايدى وتقعد تشعر لي فيها بقي اخوك حاتم يتصاب ومتتصلش تعرفني قالها متزعليش عشان خاطرى والله مااقدر علي زعلك ابدا بس انشغلت معاه خالص انما انتي فين كده ياحبيبتي انا سامع دوشه شارع قالتله انا داخله علي اسيوط قولي اقابلك فين عشان توصلني لولادى ياحودا قالها عالمكان وقفل معاها ورجع لحاتم وحكاله وعرف منه هو محتاج ايه بالظبط وقفل ومامت حسام وباباه وصلوا لمحمود واخدهم وراحوا كلهم عالمستشفي، وبرضه اتصل فارس بابا فريده برقم حسن واخد منه عنوان المستشفي وكلهم وصلوا تقريبا في نفس الوقت اللي كان قبل صلاه الجمعه بحوالي ساعه وهنا حسن واخواته ومراتتهم كانوا راحوا المستشفي فبعد السلام والاطمئنان علي صحه ذويهم كلهم الرجاله اخوات حسن اخدوا فارس وأسر وتوفيق بابا حسام ومحمود المسجد اللي جمب البيت عشان يصلوا الجمعه، والحريم برضوا اخدوا الستات كلهم وراحوا صلوا واخدوهم علي القصر وصلوا كلهم ولقوا الشغالين نازلين في تحويل الغداء وكانت مقسومه علي مكانين مكان فيه الرجاله كلهم ومكان تاني فيه الحريم واخدوا احلي واجب ضيافه ممكن يخطر علي بالكم في بلاد الكرم كلها بلاد الصعيد سوهاج وهنا في البدايه الرجاله كانوا محرجين اووى بس اخوات حسن واولادهم وابوهم كانوا رجاله يدخلوا القلب من اوسع ابوابه، والاحراج كله داب من حُسن معامله العيله الجميله دى لضيوفها، وقد ايه حسن كان فرحان اووى ان عيلته رفعت راسه وشرفته قدام ضيوفه ولما اخدوا قعدتهم وواجبهم، راحوا تاني المستشفي والمرة دى الدكتور اياد كان معاهم فطمنهم علي حالات اولادهم كلهم وكان بادئ حسام الالم لايذكر مش زى اول يوم ودا لان فرح وصت عليه التمريض فاهتموا بيه اووى وباكله وبمواعيد علاجه، ودا عملته فرح بعد اللي حصل 👇🏻
*قبل كده بحوالي ساعه *
وهنا لما حست فرح ان المكان بقي هادى وكل الرجاله والستات راحوا يصلوا فقالت دى احسن فرصه تروح تعتذر له فيها قبل اما يرجع مصر لانه اكيد هيرجع مع اخوه واهله،
فقامت نزلت من سريرها وقعدت علي الكرسي المتحرك وخرجت من الاوضه وهي بتسال ممرضه عن مكان اوضه دكتور حسام فعرفت طريقها وكانت لسه هتلف وترجع تاني لما افتكرت ان اخوه معاه في الاوضه بس الممرضه قالت لها ان دكتور حسام هو بس اللي جوة لان اخوه لساه سالها علي مكان المسجد في المستشفى عشان يصلي الجمعه من شويه، وهنا دخلت بعد اما خبطت خبطتين ولقت حسام كان نايم وكان وشه احمر اووى ووشه عرقان اووى وباين عليه بيخطرف وعمال يشد في البطانيه وبيقول لاء انا مستاهلش منك كده تعملي فيا كده، انا بكرررررهك اوووى ياهانيا وهنا حست فرح انه تعبان اوى فقربت منه وحطت ايديها علي راسه لقته سخن جدا وبيهذى من الحمي وهنا بتقرب عشان تضغط الجرس اللي فوق سريره وبعد اما ضغطته ، لقت اللي بيلف ايده حوالين رقبتها وقالها اللي زيك لازم يموت ياخاينه وضغط و........
ونكمل البارت الجاي بإذن الله ❤❤