صدفه ومن احلى الصدف قابلتني.

البارت السادس

كاسر : ابد يا ولد عمي تحسبني بعترض لا ولله الا اعتبرها جتك
صقر : هاذا العشم فيك يا ولد عمي
هنا طار صقر من الفرحه و ناوي ان الليله يفاتح عمه في الموضوع و ياخذ نوره ملكه و حلاله
""""""""""""""""""""""""""""""""""""""""""""""""""
(عند البنات )
كانو في حوسه و تجهيز الي تنضف و الي تلبس و الي خلصت و تصور
نوره : شوفو انا لو شفت ام هلال و جلست تقولي متى بتعرسين زي كل مره عادي اذبحها اليوم
منيره : عاد هي ما ادري شفيها عليك شكلها تبيك لواحد
نوره : ععع الله يقرفك لو كان صدق اذبحها عادي
طيف : حشا سفاحه
نوره : اخخ سفاحه عند الي ما اطيقهم
مها : تخيلي يا نوير تعرسين
نوره : لو كان مزيون افف يالبيه بوافق على طول
ضحكو البنات و كملو يجهزون لان التجمع عندهم من بعد العصر
""""""""""""""""""""""""""""""""""""""""""""""""
(عند العيال )
نايف : ياولد شبو النار البرد ذبحنا
رايد : وش قاعد اسوي انا
نايف: تهوجس واناخوك
ضرب رايد كتف نايف بخفه وقال:هيا خذ و شبها يلا
نايف بضحك : ابشر اشبها لو تبي بضلوعي
رايد : لا لا خل ضلعوك لك
دخل ابو نايف المجلس و شاف كل شي جاهز و ما بقي الا ضيوفهم من الديره يجون وقال بفرحه : الله يعطيكم العافيه ما تقصرون يا عيالي علي بالحرام ما يجي منكم الا بياض الوجه
الكل بصوت واحد : الله يعافيك
التفت نايف لرايد وقال : تكفى نبي شاهي
رايد : شف الباب تطلع منه و تلف يمين و الباب الاول على يسارك تقدر تنادي البنات يسوون
نايف : اقول انت اليوم مو عاجبني ولله لااعرف وش فيك روح الحين المطبخ بتلقى شاهي جهزت الهنوف جبه
رايد بضحك : ابشر بروح
توجهه رايد للمطبخ و راح عن باله انه يكون في احد في المطبخ و دخل و شاف باب دولاب طويل مفتوح و توجهه يسكره بس انصدم بوحده كانت عند الباب و قالت بتألم : وجع يوجع العدو سكتت اول ما شافت الي خلف الباب رايد وصد رايد علطول يوم شاف الوعد و طلعت وعد من المطبخ ركض و صدمت في منيره : وشفيك كأنك شايفه جني وشبك
وعد تعرف الي كان في المطبخ زين بس سوت نفسها ما تدري :مدري في واحد من العيال فجعني كنت في المطبخ ودخل و شكله ما انتبه لي
منيره : بروح اشوف يمكن العيال جو ياخذون الشاهي
توجهت منيره للمطبخ و شافت رايد وقالت : الناس يوم تعرف في حريم في البيت تنحنح تقول شي علشان يبعدون ياخوي لاكن ماشاءالله عليك دخلت كذا على عماها
رايد بضحك : اقول اسكتي بتعلميني انتي الادب
منيره : ولله اذا تبي اعلمك ما عندي مشكله
ضرب رايد راسها بخفه وقال : اقولك من الي كانت هنا
منيره :مسوي ما تعرف
رايد : اعرف وش الله يستر عليها
منيره : رايد لا تكابر تراني اختك و اعرفك و لا تنسى اني استخبارات
رايد : ايوه
منيره : اول شي انا و انت نعرف الي في المطبخ انها وعد و كمان اعرف انك تحبها و تهيمها بعد
رايد : بسم الله كيف عرفتي
منيره تخصرت و قالت : تراك واضح ولا نسيت كلمات محمد عبده
(ترا راعي الهوى مفضوح )
رايد بزفره : اخخ اي ولله مفضوح و منهد حيله
منيره : العنبوها الي تهد حيلك
ضحك رايد و اخذ الشاهي و طلع للعيال و منيره فرحت ان تحرياتها طلعت صحيحه
"""""""""""""""""""""""""""""""""""""""""""""""
عند وعد الي كان رايد الين الحين في ذهنها و ريحه العود مع شبه النار الي حفظتها و شكله الوسيم كان طويل و عريض و لابس ثوب اسود و عمامة على راسه و ما قدرت الوعد تنسى التفاصيل ذي ابدا بذات انها تشوف رايد شريك حياتها و ماراح تقبل بغيره ابد قطع تفكيرها صوت منيره و هي تقول : الوعد تهوجس في رايدها
وعد : ها (بمعني ما فهمت )
منيره : اقول لا نكذب على بعض تحبينه
وعد : مين
منيره : وعدد سرك في بير
وعد : اهخخ
منيره : ولله اني داريه
وعد : واضح علي
منيره : الا قولي واضح عليكم
وعد : علينا مين
منيره : يا الهبله كل واحد فيكم يهيم الثاني
وعد : احلفيي
منيره :وربي
وعد : وانا الي احسب انه مو حولي
منيره : من ورانا يا الوعد
وعد : اقرل اسكتي علي بلحرام اني يوم شفته قريب كذا كان ودي اقول له كل شي
منيره : ما اخف منك الا هو
وعد : يختي الحب
منيره : يعني لو تقدم لك بتوافقين
وعد: و مين انا علشان ارفضه
منيره :اخخ منك و منه الله يجمعكم بالحلال
وعد : امينننن
منيره : شكل الضيوف جو
وعد : يلا امشي
""""""""""""""""""""""""""""""""""""""""
(عند الرجال)
اعتلى صوت الرجال بترحيب و استقبال ضيوفهم
ابو نايف : يا مرحبا تو ما نور البيت
ابو الهنوف : اقلطو حياكم الله
ابو كاسر : مرحبا والقلب اوسع من الدار
احفاد مسفر بصوت واحد : اقلطو يا رجال
ابو ثامر : الله يسلمك جعل البيت ما يخلى منكم و من افراحكم
عيال و احفاده مسفر بصوت واحد : امين
جلسو الضيوف و بدت القهوه تلف عليهم وقام ثامر يعاون العيال استوقفه صوت رايد وهو يقول : عيب عليكم يا عيال ذا ضيفنا
ثامر : يا رجال وش الي ضيف كلنا اهل ديره واحده ولا يوم يكون الشي عندنا عادي تعاونوني و انا لا
كاسر : في ذي صدقت و ما يمدينا عاد نتكلم
ضحكو العيال و كملو يلفون ب القهوه و الضيافه على معازيمهم
عند صقر الي نشب له شايب يبي يزوجه يسمونه في الديره ابو خطابه من كثر ما يبي يزوج شباب الديره
ابو خطابه : يا ولدي خلاص وافق معليك اجبلك عروس تونسك
صقر : ياعمي قريب تسمع اني اعرست معليك
ابو خطابه : معك شهر ان ما اعرست تراني بزوجك
صقر : ابشر يا عم
توجهه صقر للعيال و هو يضحك وقال : اخخ يا ذا الشايب نشب لي الا يبيني اعرس
نايف : افف عاد طحت في ابو خطابه وش يفكك
صقر : عاد وهو سبقني الا اليوم بتسمعون خبر يحبه قلبكم بفاتح عمي ابو كاسر فيه
كاسر : اقول بس لا تمون مع ابوي
صقر : اصه
جسار : وش متفقين عليه انطقو
صقر : ولد عمكم صقر ناوي يعرس باخت كاسر
كاسر بمزح : تعقب
صقر بمزح : ما يعقب الا انت
ضحكو العيال و استوقفهم صوت جدهم وهو يقول يا ولد القهوه فزو العيال ملبين ندا جدهم و كملو يضيفون
""""""""""""""""""""""""""""""""""""""""""""""
(عند الحريم)
نوره الي ابتلشت ب ام هلال كالعاده : يا بنتي اعرسي الي بعمرك قدهم عولو
نوره : اي ان شاء الله يا خاله
توجهت نوره للبنات وهي تتأفف : افف ما بغت تخليني في حالي
الهنوف : اجل وش بتقولين لو شفتي حال العيال مع ابو خطابه
نوره : مين ذا
منيره : هاذا شايب سلمك الله يمشي و يخطب لذا العيال ما يفك الواحد الين يعرس
نوره : متزوج ذا الشايب
الهنوف : لا ليه
نوره : نزوجه ام هلال لا يقين على بعض
سلمى : اهخخ جبتيها وربي
شهد : بس خلاص نكلم العيال ينشبون له زي ما ينشب لنا و احنا علينا في ام هلال
البنات بصوت واحد : تم
""""""""""""""""""""""""""""""""""""""""""""""
(عند الرجال )
خلف توجهه للعيال و هو يقول : يلا امي تقول العشاء جهز
رايد : اجل امشو نتعاون بصحون
العيال بصوت واحد : يلا
توجهو العيال كلهم للقسم الي يوديهم على المطبخ و قال رايد بصوته الثقيل : يا ولد طريق
استقبلتهم عمتهم ام نجد : ادخلو مافيه الا انا
دخلو العيال و سلمو على عمتهم
كاسر : وش حاله عمتنا
ام نجد : بخير جعلكم بخير
خلف : عمه فين الصحون حقتنا
ام نجد : شوفها ذي خذوها
شالو العيال الصحون و توجهو للمجلس و كانو الباقين مجهزين السفر و الافواكه و كل شي مع العشاء و حطو العيال الصحون و قال ابو نايف بصوت عالي: اقلطو حياكم الله على عشاء بمناسبه توضيف خالد
خالد توجهه لجده و سلم على راسه وقال : كثر الله خيرك يا جد
ابو نايف : وخيرك و انا جدك
دنو الكل على العشاء وهم يباركون لخالد بتوظيفه
""""""""""""""""""""""""""""""""""""""""""""""
(عند الحريم )
حطو البنات العشاء و ضبطو السفره و كل شي و قامت ام نايف وقالت : اقلطو حياكم الله على عشاء حفيدي خالد
بعض من ردود الحريم : كثر الله خيركم - عساه من تقدم لتقدم يارب
(عند البنات )
نوره : كويس حطيتونا هنا ما ابي اشوف وجه ام هلال
منيره بضحك : بتتعودين عليها زي ما تعودنا
وعد : الا غريبه العشاء بدري حتى ما جت 9
الهنوف : هاذي عوايد جدي دائما يقول احسن يكون بدري الي عندها شغله يلحق يروح يسويها
نوره : افضل شي علشان ما تروح سهره اليوم
نجد : اي ولله لازم نسمع حش العيال في ابو خطابه ابي اشوف مين مسك اليوم منهم
طيف : تحمست
ضحكو البنات و كملو اكلهم و خلص العشاء و راحو الحريم
""""""""""""""""""""""""""""""""""""""""""
(عند الرجال )
ابو ثامر : كثر الله خيركم نستأذنكم يا رجال
ابو نايف : فمان الله
صقر : بما انو فضى المجلس و مافيه الا انتو انا عندي علم
ابو نايف: وش علمك يا ولدي
صقر : من بعد اذن عمي ابو كاسر ابي اتقدم لبنته نوره
ابو كاسر : هاذي الساعه المباركه يا ولدي معليك من ناحيتي انا موافق لاكن الشور الاول و الاخير للبنت
صقر: هاذا العشم يا عمي ابد خذ راحتك
ابو صقر : ولله و كبرنا يا صقر وشو له ما تشاورني
صقر :ولله يا يبه ما ضني انك بترفض بنت اخوك
ابو صقر : صدقت اي ولله الله يكتب الي فيها الخير
الكل بصوت واحد: امين
توجهه ابو كاسر وكاسر وسهم للحريم و قال بصوت عالي: يا ام كاسر تعالي
قامت ام كاسر و توجهت عنده وقالت : سم يا ابو كاسر
ابو كاسر :العلم سلامتك صقر تقدم لنوره شاوريها و شوفي وش تقول
ام كاسر : ولله ذي الساعه المباركه وش رايكم اناديها و تقولون لها
كاسر : ايي بالله ابي اشوفها تستحي لو يوم
ضحكت ام كاسر و نادت نوره وجت نوره وقالت : هلا والله العايله الكريمه مجتمعه
سهم :اي ولله جايبين لك خبر
نوره : شسالفه يبه
ابو كاسر : اسمعي يا بنتي صقر ولد عمك تقدم لك خذي راحتك و فكري واذا انتي موافقه توكلنا على الله
نوره : ابد يا يبه الي تشوفه سوه
كاسر : افف و انا اقول انها بتستحي
نوره : ولله بتكون غبيه الي بترفض صقر
سهم :شف يبه ما عاد تستحي
ابو كاسر ضحك و طلع للمجلس وقال : جتك نوره يا صقر
جلسو الكل يباركون لصقر و هو يرد لهم
"""""""""""""""""""""""""""""""""""""""""""""
(عند البنات )
دخلت عليهم نوره و هي تضحك وقالت : ولله شكل ام هلال عندها الحاسه السابعه
مها : وش السالفه
نوره : تقدرون تباركون صقر تقدم لي و انا وافقت
نقزت طيف لنوره : الله واخير مالي دخل من اول شهر ابي اصير عمه
ضحكو البنات و قعدو يباركون لنوره و انتشر الخبر في كل البيت و التبريكات تجي لنوره و صقر من كل شخص
"""""""""""""""""""""""""""""""""""""""""""""
(عند العيال )
قام ابو نايف وقال : يلا نوم بكرا ورانا ملكه الهنوف
ابو صقر : و ملكت صقر بعد
ابو نايف : توكلنا على الله يلا امسو
الكل بصوت واحد : ابشر
دخل ابو نايف و عياله و بقي العيال في المجلس وقال كاسر : لا يكون بتنامون
رايد : لا اكيد البنات يبون يسهرون و ياخذون علوم الجمعه كالعاده
نايف : و اكيد ام هلال ناشبه لوحده فيهم
صقر بضحك : ومن ذي
نايف : عجوز ما خلت احد في حاله تمشي و تخطب في البنات
ضحكو العيال كلهم و ماهي الا دقايق و جو البنات بعد ما خلصو شغل المطبخ
الهنوف : يلا وش العلوم
نايف : فاتكم نشبه ابو خطابه لصقر
ضحكت منيره وقالت : و فاتكم نشبت ام هلال لنوره
ضحكو الكل و ناضر صقر لنوره وقال : شكلهم حاسين
كاسر : لو يدرون اخخ ابي اشوف رده فعلهم
نوره : حسبي عليها ما بغت تفكني
ضحك الكل على نوره و صقر و باركو لهم
سهم : تراني جيعان شرايكم تسون شي خفيف
رايد : انت دائما جيعان ما تغير شي
وعد : معليكم ظبط لكم بشميل يحبها قلبكم
سهم : انشهد انك كفو
وعد : كفوك الطيب
كملو جلستهم و السوالف و الضحك ماخذ الجو كله و صقر و نوره طول الجلسه يتبادلون النظرات كل واحد فيهم ماهو مصدق ان خلاص ارتبطت اسمائهم في بعض
نايف : يلا يا حلوين نومم ما عاد اشوف
كاسر: جاكم جدي على غفله
رايد : اقول امسي
توجهه البنات للغرفه حقتهم و العيال كل واحد راح لفراشه و نامو بعد ليله جميله على الجميل و خصوصا صقر و نوره الي انتهى يومه بخبر يسعدهم
"""""""""""""""""""""""""""""""""""""""""""""""
اهلا يا حلوين مالي وجه تأخرت عليكم كثير لاكن ابشرو اخلص اختباراتي و اجيكم ببارت جميلل جدا دعواتكم لي يا حلوين و ان شاء الله تستمتعون 💗