الفصل الخامس و الثلاثون
عودة الغائب ( شيطانة ) تأليف سماح عياد .
ستنفذ وصايا ربيكا التي تأكدت من صحتها و تربت عليها و سترحل ذلك هو الخيار الوحيد الذي أمامها .
دخلت بهدوء و جمعت ملابسها و أشيائها القليلة و خرجت دون أن يشعروا بها أحد .
وصلت لأحد البنايات القديمة و هي تنظر للورقة التي دونت فيها العنوان الذي أعطاه لها ذلك السمسار لشقة تكون رخيصة تستأجرها لتعيش فيها وحدها .
صعدت درجات السلم و طرقت أو باب قابلها ، فتحت الباب سيدة عجوز و لكن وجهها يشع منه النور و قالت : عايزه مين يا بنتي .
إبتسمت يسرى أو شوشو رغم ألمها و قالت : أنا مدام يسرى اللي جايه بخصوص الشقة .
فتحية التي تنظر لتلك الفتاة رائعة الجمال و تذكر الله في سرها خوفاً من أن تحسدها .
فتحية : إتفضلي يا بنتي أدخلي .
دخلت يسرى لشقة فتحية ، شقة بسيطة أثاثها متهالك ، أرشدتها فتحية للصالون و بعد أن جلسوا قالت فتحية : تشربي ايه يا بنتي .
شوشو : شكراً ، أنا كنت عايزه أشوف الشقة .
جلست فتحية و قالت : أنا شرطت إن الساكن يكون فرداني ، أصلي مبحبش الدوشة .
شوشو : أنا هسكن لوحدي .
فتحية : أمال فين جوزك يا بنتي .
شوشو أو يسرى : طلقني ، أمه غصبت عليه يطلقني و يتجوز بنت خاله .
فتحية بأسف : لا حول ولا قوة إلا بالله ، أمال أهلك فين يا بنتي .
شوشو : أنا يتيمة و مليش حد .
إبتسمت فتحية و قالت بتردد : أصل يا بنتي أنا كنت عايزه حد يعيش معايا في الشقة يونسني و ياخد بحسي ، و متأخذنيش يا بنتي إني كدبت على السمسار ، فلو يناسبك يعني
شوشو : أكيد يا طنط يناسبني .
إبتسمت فتحية و قالت : مابلاش طنط دي و تقوليلي يا خالتي .
إبتسمت شوشو و قالت : فين أوضتي بقى يا خالتي أحسن أنا هلكانة و عايزة أنام .
أشارت فتحية على حجرة و قالت : تعالي شوفي كده لو تعجبك الأوضة دي .
شوشو : حلوة يا خالتي .
فتحية بإبتسامة : ربنا يحلي أيامك يا بنتي .
شوشو : إحنا متفقناش على الإيجار .
فتحية بخجل : أنا مش عايزه إيجار ، هو إنتي بس تدفعي فواتير النور و المية و الغاز و اللي هتاكلي منه تعملي حسابي معاكي ، و أنا و الله مبكلش كتير ، ممكن رغيف واحد يكفيني طول اليوم .
نظرت لها شوشو بشفقة و قالت : إنتي كنتي بتصرفي منين .
فتحية : كنت بفرش بشوية خضار في السوق و كانت بترزق ، بس تعبت و الصحة بقت في النازل و معتش قادرة على الشغل .
شوشو : أولادك فين .
فتحية : جوزي الله يرحمه مكنش بيخلف ، و عيال إخواتي حملهم تقيل ربنا يعينهم ، و هما بين فترة و التانية بيجوا يودوا عليا .
أخرجت شوشو بعض النقود من حقيبتها و مدت بهم يدها لفتحية و قالت : معلش يا خالتي أصل أنا .
ردت فتحية يدها و قالت : خليهم معاكي يا بنتي ، الحمد لله مستورة .
شوشو : أنا بشتغل في مكتبة و ببقى طول النهار واقفة على رجلي و برجع عايزه أكل و أنام ، فمعلش حضرتك هتمسكي المصروف و أنا هساعدك في الطبيخ و غسيل المواعين و يوم الجمعة هخليلك الشقة دي فلة ، خدي الفلوس بقى .
أخذتهم فتحية و حمدت الله و قالت : إتعشيتي يا بنتي .
شوشو : نتعشى سوا علشان يبقى عيش و ملح .
YOU ARE READING
عودة الغائب تأليف سماح عياد .
Mystery / Thrillerعودة الغائب هي الجزء الثالث من نجع الجن تأليف سماح عياد ، قصة إختلط فيها الواقع بالخيال لعائلة الجن التي سكنت نجع الجن و إكتسبت بعض صفاتهم . و لمن يسأل من هو الغائب هل هو يسرى أم كارم أم هي الضمائر التي غابت ؟ لا أحد يعرف الإجابة فلنتابع القصة لنكتش...
