قطـبت حاجبي و بعدت اللحاف، نهضت بتكاسل و استغراب من حضورها بهذا الوقت
رفعت شعـري على شكل كبايـة و طلعت من الغرفة صادفتني رؤيا و سألتها عنها و گـالت برا مقبلت تدخل
غسلت وجهي و طلعتلها و إني اشـد على ملابسي بلكي احصل دفئ
چانت واگفه بالحوش، ربطتها محاوطه وجهها بإهمال و لابسه قمـصله تعود لأخـوها
ابتسمت بإحراج وهي تگول
- صباح الخير، اعذرينـي إجيت بهالوقت بس كلش مضطرة
- صباح النور، لا عادي خوما أكو شي
- الحجية شوية ما إلها خلگ صارلها كم يوم و خلت كانولا، و هسا ما يقبل الدوا يمشي بيها بلكـي تجين تشوفيها
و بإستغراب گلت
- سلامتها، بس معاذ وين لعد
- معاذ البارحة راح لخوالي، خالي خابره علمود شغله مستعجلة و أمي ما تصبر علما يجـي أيدها كلش توجعها، و هسا ما الگا صيدلية او مضمد مفتح بهالوقت
- تمـام گلبي امشي أشوفها
حچيتها و اتجهت عليها، شفت رؤيا تحاول تحچي وياي بس ما اهتمـيت الها طلعنا اني و نجمة و اتجهنا لبيتهـم المقابل لبيتنا دخلنا للحديقة و استغربت وجود سيارة معاذ بالطرمة تجاهلت الموضوع و دخلنا للمـمر بس توقفت فجأة لمـن لگيت الحجـية بكامل صحتها، واگفه وهي تگول
- حرارته ارتفعت نجمة
التفتت على نجمـه وهمست بـحيرة
- نجمة شكو؟؟
تقربت عليه و هي تجاوبني
- خـاتون معاذ مضروب طلقة، ما أعرف شلون أتصرف
حچـت هيچ و اني حسيت گـلبي صعد لحنجـرتي ما نطقت حرف، و هي كل الي سوتـه فتحت باب الغرفة القريبين عليـها اول شي وگـع بصري عليه، چـان معاذ متمدد على الچـرباية، و كتفه كله دم
.
- أنـت متهم، كل الادلـة موجوده و غـراب صديقـك اعترف علـيك، ليش تلف و ادور
رفـعت راسي و تقابلت مع زوج الاعيـن الزرقاء، بشرة شاحـبة لابس لبـس الجيـش و عينه تقدح نار اتجاهي رجعـت التفتت للـمترجم الي مدنگ عليه و ايده ساندهـا على طاولة التحـقيق
جليت حنجرتـي و اني اتعدل بگعدتي الغير مريحـة، حسيت بحد الكـلبشة بدا يحـفر ايـدي
- شايفنـي اثول لو غـبي حتى أصدگ غراب يعترف عليـه هذا ركض لـلموت علمودي، و اني ما عندي شي شخص مدنـي ما أذي نملة
حچـه المترجـم كلامي للـضابط، الي تقدم عليـه و بدون اي كلام ثاني مـنه ضرب راسـي بالطـاولة و هـو يحچي بعصبية رغم فهمـت كلامة و هو يطـالبـني احچـي وياه بلغتة بس رفضت و انـي احچي بضحكة
- گـول اله، ما يـقبل يحچي لغـة ابن المنـبطـحة المـتسخـة
Oops! This image does not follow our content guidelines. To continue publishing, please remove it or upload a different image.
