تاعي وحدي.

-01-

نضت من بلاصتي مشي قاد ندير حاجة، راسي راهو واجعني ليوم و خويا راه يشخر ، تفو عليه

سڨمت فراشي باش يما كي تدخل تتهنى و رحت نغسل وجهي كاش مانتصحصح، خرجت من دوش و بديت نبدل قشي، شكاير رقاد حدايا ماتحركوش

لبست تريكو عريض جاي حمر قامح مع سروال بيض، علابالي رادي يقولو عميق مايهمنيش، لبست طابلية و خليتها محلولة غير باش يما ماتقوليش وين راها

رفدت ساكودو كان ثقيل بزاااف، ليوم من 8 لل 5  هاربي ربي ربي

حليت لباب و فت للكوزينة، لقيت يما حاطة قهوة، أنا كإنسان خاطيه قهوة تاع صباح سلمت على راسها و خرجت، زعما وليت محترم

حليت لباب و خرجت ايا قابلوني وجوه شر، تفو على معيشة في بلاد كيما ذي

رحت للحانوت شريت ماكسون و كانديا شكولا، حطيتهم في كرطاب و كملت طريقي حتى بانلي ذاك لمعوق تاع صاحبي تقول مريض

- صباح شر ياوجه شر

جا يتمشا حدايا و تليفون في يده

- ناس تقول صباح لخير يالقحبة

عطيته ضربة للظهر حسيته انقسم

- علاه نتا وجه خير؟

رد عليا

- ايا بلع و تمشى قطعتني

خزرت فيه و كملنا طريقنا، مهم نعرفكم بروحي أنا ريان نسكن في وهران و نقرا دوزيام ليسي سيونتيفيك بنقاط أدبي بعقلية جيستيون، نعشق حاجة يسموها قطوط و نبغي كونديا شكولا، بويا ميت عايش مع يما و زوج خوتي كبار، أيمن و فاتح تاواحد مافيه فايدة

حكمتني تقية كي شفت ليسي قدامنا و ذاك لعساس يحوس غير وينتا يبلع علينا ل حمار

وصلنا قبل مايبلع و هذي حاجة تخليك تحس بشعور الإنتقام، بصح مشكل لازم نسمعو نشيد لوطني كامل مع هذيك لمديرة ل تتحمس و تبدا تغني

فات نشيد و طلعنا للقسم، رحت نجمع طابلة ثالثة صف ل حدا الباب، و صاحبي حدايا

ساعة لولا رياضيات ل نديرها حطيت راسي، حتى سمعتها تزڨي و تقول لصاحبي ل بغا يرقد دارهم قدامه

ياو مشكل تاع بيي شكون يجيبه!!

طلعت راسي باش تسكت، ايا دارت تكمل شرح على درس تفكيك الدوال ، رانا هذا وين بدينا العام الله يجيب لخير

قعدت نشوف في سبورة و نخمم في ذاك ل يظل يعس فيا، حتى حسيت بيد تنقز فيا، درت لقيته طارق

- شاك باغي من صبحية ربي ؟

رد عليا بصماطة تاعه، يجمع مورايا افف

- مينوشة مانيش نشوف بعدي راسك

استغفرت و درت باش مردش عليه، بلعاني يدير هاك