You & I *2* ( Chadi & Ikram )

الحلقة 5: مـشـاعـر ورديـة...🩷

« أجرمت في حق نفسي حين أحببتكِ...»

🩷🩷🩷

✨POV: CHADI.✨

تبدلتي من برا... و لكن مزال نتي هي نتي من لداخل... مزال مريضة فكـ*ك و باغية تمرضيني... تا كنقول صافي مابقيتيش تصدميني و كتصرفقي دينمي تا نضور... أنا صافي مابقيتش باغي نفهمك وليت باغي نفهم غا راسي... نص ساااعة... نص ساااعة بالحساب ماكملتهاش معاك و خربقتي ليا مخي تاني... كتهضري على حوايج وقعو هادي تلت سنين بحالا يالاه وقعو غير لبارح... و كتخليني أنا براااسي نحس بيهم وقعو غير لبارح... كتخرجي فيا عينيك و تغوتي عليا بحالا أنا لي غالط... و مافهممممتش كيفاش... كتخليني نحس براسي بصح أنا لي غالط... آش غاندير معاك؟ ساليتيهم ليا... مابقيتش عارف كيفاش نتعامل معاك... كنت ناوي نديرك بحالا ماكايناش و لكن راه مايمكنننش... مكتخلينيش... غير النفس ملي كتخرجيها من نيفك كتنيرڤيني... فينما شفت فيك كنتفكر شنو داز... و داكشي لي داز فيه الخايب و فيه الزوين... و بجوج ملي نتفكرهم كنتعصب... الخايب كيعصبني حيت باقي... و الزوين كيعصبني حيت مابقاش...

بيعتيني العجل... صيدتيني... شديتي ليا فيدي و قلتي ليا مانمشيش... و بقيت... درت فيك راسي و عطيتك نيتي و طحت فيك بلاما نفكر... واخا راه من اللول كان باين البلان... نتي خديتي عاماين باش ترصي راسك و تفكري مزياااان و تاخدي قرار قبلما تشدي فيدي هاداك النهار تحت الشتا... و لكن أنا غير ثانية وحدة لي خديت باش نقول ليك "توحشتك"... هنا كان باين كلشي... كان باين شحال نتي ثقيلة و صعيبة... و كان باين أنا شحال خفيف و ساهل... كان باين شكون فينا غايتقسح... و لكن أنا كنت حمار... كنت سكران بداكشي لي كنت حاس بيه... كان جديد عليا و عاجبني و مخليني بحال الهبيل باغي غير نعيشو و ماتسوقتش لشنو غايجي من بعد... كيفاش كنتي كتقولي ليها؟ Red flag... آه... ريد فلاغ... نتي... كلللك... كنتي ريد فلاغ واقفة على رجلين... و أنا كنت كنشوف مزيان... و لكن غير كيتحطو عليك عيني كيجيني عمى الألوان... و هانا دابا كنخلص...

ماكنتش عارفك دايرة هاكا... و واخا عرفتك دايرة هاكا بقيت طايح فيك... غادي معاك بلا فرانات و كنشوووووف فالحيط قدامي و كنزيييد نكسيري... ماعرفتش آش كان كيقول ليا المكلخ ديال مخي... فاللخر درت كسيدة... و من تماك و أنا هاكا ما عارف راسي واش حي ولا مـ.يت... باغيك و كارهك... موحشك و ماحاملش نشوف كمارتك... مفكرك و باغي نساك... باغي نعنقك و ماكرهتش نصرفق مك حتى يتحولو عينيك... مضارب غير مع راسي... كيما ضاربت معاه نهار بستيني... آه... آه تانا بستك... و كنت باااغي نزيد نبوسك... نتي راك ماعارفاااش آش داز عليا فديك الوقيتة... ماعارفاش باش حسيت و شحال كان خاصني نتقاااتل باش نحبس راسي و مانديرش شي حاجة لي ندم عليها... واخا راني عارف كون زدت بستك ماعمرني غاندم... هاديك حاجة أنا كنت باغيها و لكن حرمت راسي منها باش مانكونش حمار تاني قدامك... و مزال لدابا مافهمتش كيفاش قدرت ندفعك... ماعرفتش كيفاش قدرت نكونطرولي راسي فهاداك الموقف... كنت باغيك... و مزال باغيك... و لكن مابقيتش باغي نمرض...