School Trip: Reborn

LESSON 02: Girl In Mask

"BES!" Ang matinis na boses na iyon ni Melchor ang unang narinig ni Eliza nang pumasok siya sa kanilang classroom.

Nagulat siya sa pagyakap ni Melchor. "I missed you! Two months din tayong hindi nagkita! Nakalimutan ko na tuloy ang face mo!"

Natatawang kumalas si Eliza ng yakap sa kaibigan. "Grabe ka sa pagka-OA, bes! Parang hindi tayo nagvi-video call, 'no?" Pabiro pa siyang umirap.

"Charot lang! Pero, look... magkaklase ulit tayo!" Tumalon-talon na akala mo'y palaka si Melchor. Kita sa mukha nito ang kasiyahan.

Maging si Eliza ay masaya na magkaklase pa rin sila ni Melchor. Sa mga naging kaklase naman niya ay ito ang unang nakipagkaibigan sa kaniya. Isang out na gay si Melchor. Matangkad ito na payat. Masayahin at mapagbiro ito kaya palaging sumasakit ang tiyan niya sa kakatawa kapag magkasama silang dalawa.

"Ano'ng nangyari sa mga kamay mo? Bakit namumula? Ay! May gasgas pa!" puna ni Melchor.

"Wala 'to. Napakuskos ko lang kanina sa may pader habang naglalakad ako," pagsisinungaling niya.

"Dalawang kamay talaga?"

"E, anong magagawa ko kung dalawang kamay!" Tumawa siya upang hindi seryosohin ni Melchor ang sinabi niya.

Nang dumating na ang teacher nila ay umupo na silang lahat. Sa isang classroom ay meron lamang na labing limang estudyante. Sa may unahan sila umupo ni Melchor.

Bago magsimula ang kanilang klase ay nag-roll call muna ang kanilang guro. Isa-isa nitong tinawag ang pangalan ng mga estudyante na nasa hawak nitong papel.

Nagtaka si Eliza dahil tapos nang mag-roll call ang teacher ay hindi niya narinig ang kaniyang pangalan. Itinaas niya ang isa niyang kamay.

"Yes?" Tumaas ang dalawang kilay ng guro kay Eliza.

"Teacher, hindi po ninyo natawag ang pangalan ko."

"Ano ba'ng name mo?"

"Eliza Belmonte po."

Muling chineck ng guro ang papel. "A, ikaw pala si Miss Belmonte. Sorry, nakalimutan kong sabihin sa iyo. Hindi ka sa section na ito for this school year. Sa first section ka, Miss Belmonte."

"Po? Bakit po? Ang text po sa akin ay dito ako sa section ninyo, teacher."

"Nasabi kasi sa akin ng teacher mo last year na matalino ka. Ikaw ang top 1. Nag-decide kami na ilagay ka sa first section dahil matatalino ang nandoon. Sorry kung ngayon ka lang namin na-inform. Kunin mo na ang mga gamit mo at pumunta ka na roon, Miss Belmonte."

Nababahala at may lungkot na nagkatinginan sina Eliza at Melchor. Mahigpit nilang hinawakan ang kamay ng isa't isa.

"Bes..." Malungkot niyang bulong.

"Go na, bes! Deserve mo naman talaga sa first section kasi brainy ka! 'Wag kang mag-alala, hindi ka pupunta sa ibang bansa. Huwag kang OA!" Biro nito.

Labag man sa kalooban ni Eliza ang lumipat ng section sapagkat magkakahiwalay sila ng kaniyang bestfriend ay wala na siyang nagawa kundi ang kunin ang mga gamit niya. Sinabi ng guro nila na sa Room 12-A ang classroom kung saan siya nabibilang.

Mabigat ang mga hakbang niya habang naglalakad sa corridor. Ngunit inisip niya na magandang pagkakataon iyon upang mas ma-challenge siya dahil lahat ng makakasama niya sa classroom ay puro matatalino. Tiningnan na lamang niya ang magagandang bagay sa biglaang pangyayari na iyon.

Ilang hakbang na lang at nasa Room 12-A na siya nang matigilan siya. Napahinto siya sa paglalakad at nanlamig ang buong katawan niya. Paano ay naalala niya na sa section na pupuntahan niya ay naroon si Brittany at ang mga kaibigan nito.