"لمحتكِ..ياريم الفلَا وذبحني هواكِ".

Part 27

-٣:٣٠ العصر-
كانو الاهل متجمعين بالسياره يستعدون بيروحون لشاليه بقرار من الامهات والجده ، فارس كان واقف عند شنطة السياره ومعه هايف
فارس وهو يحاول يصك الشنطه"ابك ماتصك ماتصكك"
هايف"وخر بس"ووخر فارس وقرب هايف من الشنطه وشمر كمه وصك الشنطه غصب ، وقام يتباهى قدام امه بعد ماشافها مرت جنبهم بتركب السياره
ام نايف"والله وانا امك ليتك تحلق شعرك"وركبت السياره
ام فارس"وام نايف صادقه"وركبت جنب ام نايف
ضحك فارس على هايف بطقطقه
هايف"اضحك زين بس ، كنك بطه توقوق"
فارس"البطه توقوق؟"
هايف"شرايك"
عبدالله وهو جاي يتميلح بنظارته الشمسيه "شرايكم يعيال بس"
فارس"يع،وش هالظلام الدامس عيونك انطمسو"
هايف"يالله وين عبدالله لا اراه"
عبدالله"ياخي الغيره شينه ترا"ومسك شماغه يعدله ، قاطع كلامهم عبدالرحمن وهو شايل شناط فوق راسه ومتجه لسيارة عبدالله بدون اي كلام منه
عبدالله"على وين يالحبيب"
عبدالرحمن"اقول افتح شنطتك بس ، انا راسي عضل"
عبدالله"وسيارة هايف وش تشكو منه"
هايف"ياسلام ، شنطتي فيها المارد الازرق بنفسه"
عبدالله وهو يفتح شنطة سيارته"الله يعين"
الجد"ياعبدالله افتح سيارتك بنركب"
عبدالله فتح سيارته"يلا سم ياجد.....نواف!،وشجابك هنا شلون ركبت"جلس نواف الي كان نايم على المرتبه والشماغ مغطي وجهه وخر نواف الشماغ عن وجهه وخز عبدالله
نواف"ابد نطيت يوم فتحت الشنطه لعبدالرحمن وماشافني الغبي بعدين تراك قاطعت نومي"
الجد"ابك وخر لعمانك بس"بينما عبدالله مارد من الصدمه وناظر عبدالرحمن الي يحشي الشنطه للحين
نواف"سم"
-
بسيارة عبدالله"الكل ركب؟"
العيال بصوت واحد"ايه"عبدالله حذف شماغه على عبدالرحمن الي جالس ورا بالنص ، مسك عبدالرحمن شماغ عبدالله
عبدالرحمن"سلاماتت"
عبدالله"خل يكون لك فايده عالاقل"
-
بسيارة هايف"ها بقي شي ولا مشينا؟"
ام نايف"لا مابقي شي،مشينا"
هايف"زين"
الجده،"توقع وانا جدتك"
هايف"سمي"
-بسيارة عبدالله-
كان عبدالله واقف عند الكاشير بالبقاله بعد ما وقف عشان يجيب كرتون مويه ولعل عبدالرحمن نزل معه وابتلش فيه عبدالله راح لعبدالرحمن الي واقف قدام الرفوف ويدف عربيه مليانه
عبدالله"ابك وش تسوي انت،وش هالاغراض من بيحاسب عنها!"
عبدالرحمن"انت طبعا،وبعدين انا ادور فصفص لفارس موصيني"
عبدالله"ابك امشش اخرتنا،هايف وصل الحين وانت تتعلعل"
عبدالرحمن"ها لقيت الفصفص،يلا مشينا"،توجه عبدالله و عبدالرحمن للكاشير ووطا الاغراض عبدالرحمن وطلع يركب السياره،نزل عبدالله نظارته وناظر عبدالرحمن بصدمه وهو ماد بطاقته يدفع ، مسك الاكياس وفتح باب سيارته وحذف الاكياس بوجه عبدالرحمن وصك الباب
عبدالرحمن"منت شايف بشري هناا"
ابو عبدالله"محد قالك تطير فلوس اخوك"
عبدالرحمن"يبه المفروض تفزعلي انا ولدك"
ابو عبدالله"وهو شنهو؟"
-بسيارة هايف-
هايف"يمه متاكده ذا الشاليه"
ام نايف"ابك ايه هو هو ، نوره حاجزته لنا"
هايف"ابك مالقيتي الا نوره"
نوره"ماني ماليه عينك ولا وش"
شذى"اعقبي مب وقتك"
نوره"ابشري"
ام نايف"هاك الجوال تاكد"
نوره"يمه جوالي"
هايف"ماني ماكله"ومسك الجوال بابتسامه خبيثه
ام نايف"معليك معليك ماهو كاسره تاب الولد"
نوره"يمه عانيي كيف يتبوسم"
ام نايف"هايف"
هايف"ابشري يمه" مرت سيارة عبدالله ووقفت جنبهم قدام الشاليه وفتح فارس الدريشه يلوح لاخته المها ولمحته مشاعل ودقت كتف المها عشان تنتبه لفت المها وكشت على فارس ورجعت تكمل سالفتها مع العنود
-بسيارة نايف و ريم-
ريم مدت يدها تطول المسجل وهي تحتري نايف الي نزل البقاله وقعدت تصفق ، طلع نايف من البقاله وفتح الباب ودخل ، وطا صوت المسجل ومسك يدينها الي تصفق ينزلها
نايف"علامك وش جاك"
ريم"اسويلك فعاليات شيعرفك انت"
نايف"من الحماس بناجرك اسمعها من داخل البقاله،هدي"،ووطا الاكياس ومشا
ريم وهي تاشر على سياره جنبهم"هذي ضحى!!!"لف نايف"اي ذي دومة الوليد"وضحك ، ضحكت ريم"ابك تراه يسمع من بعد امتار،لايسمعك"سكتت ريم للحظه وفتحت كيس تشوف وش فيه
ريم"اخس اخس جايب فصفص"
نايف"اي جايبه نقنق عليه ، الطريق طويل شوي،عطيني"ومد يده يحتري ريم تفتح الكيس ، فتحت ريم الكيس وعطته وبدو يفصفصون كسر الصمت ضحكهم بنفس الوقت
ريم"صوت الفصفصه يضحك"
نايف"ماش شي يضحك بس حنا ماعندنا سالفه"
-بسيارة الوليد و ضحى-
ضحى ناظرت الوليد الي حذف شماغه وتحمس مع الشيله وقعدت يهز كتوفه ، تحمست ضحى معه ووطت بيالته وقامت تصفق له
ضحى"عااش ولد عمي"وطا الوليد صوت الشيله
الوليد"ماني بولد عمك لوسمحتي انا رجالك"
ضحى"عاد لازم تشخصن،اقول ارقص بس"وعلت الصوت مره ثانيه،وتحمس الوليد وقام يصايح
ضحى وقفت تصفيق"لحوول،وشجاك انت"
الوليد"خذني الحماس،السموحه"
ضحى"الله يصلحك،عان شاهيك برد"
الوليد"يوه نسيته"واخذ باليته يشرب شاهيه
-بالشاليه-
"٦:٢٠ المغرب"
قام فارس من السفره بعد ماكانو الاهل يتقهوون ، ترك ابو فارس فنجاله"على وين؟"
فارس"بس طفحت قهوه،بروح احرق دهون يبه لابد من النشاط مو مثل ذا،اكل بسكوت وانصرع"واشر على عبدالرحمن الي تبطح جنب السفره
ابو فارس بضحك"رح رح الله يستر عليك"
عبدالرحمن وهو يرفع اصبعه يهدد فارس"بردها يوما ما بس الحين باخذ لي قيلوله"وغمض عيونه ، عبدالله وقف من مكانه"بجي معك يابن خالتي"
فارس"كفوو،هذا المحزم الصح ، يلا مشينا"ومشى ولحقه عبدالله ، وقف فارس قدام المسبح وقعد يستعرض بيدينه عساس عضلات
عبدالله"مافهمت ذا جزء من التمارين؟"
فارس"شيعرفك انت ، سوو زيي وبس"
عبدالله قام يقلده"الله يعين بس"
-بالدور الثاني بالغرفه-
كانو البنات منحبسات بالدور الثاني عشان العيال تحت مايقدرون يطلعون ، كانت شذى تعدل مكياجها وتسوي شعرها ونوره منسدحه بالسرير تهوجس والمها جنبها نايمه والعنود تستكشف حمام الشاليه و ضحى عند الامهات تتقهوى بمجلس الحريم وريم معها ومشاعل جالسه تلعب بجوالها
نوره"هذا ظلم انا لن ارضى بهذا الظلم"
شذى"عانيك منسدحه وساكته"
نوره"شسوي ماقدر اقول لجدتي لا"
العنود"بناتت عندهم صابون الاغنياء"
شذى"عنود تستهبلين،كلنا عندنا صابون"
العنود"لا حقهم فخم بالورد،حقنا بالعود"
نوره"حقنا عبدالله جايبه وش تتوقعين من ذوقه ، ذوق شيبان"
شذى"شقصدك"
العنود"تحسست حرمة الشايب"
مشاعل"اقول بس نوره وخريلي بنام"
نوره"وين احطك ، المها ماخذه المساحه كلها"
واشرت على المها الي بسابع نومه دفت مشاعل المها وانسدحت وكبرت المخده ورقدت
نوره"ابك نشبهه قميي"
-عند فارس وعبدالله-
عبدالله"فارس لنا ساعه نحمي متى نبدا"
فارس"يلا يلا ، اول خط..."ماكمل كلامه بسبب ان رجله زلقت وطاح بالمسبح  شافوه العيال من الشباك وجوه يركضون، نط وراه عبدالله وطلع فارس من شعره
عبدالله"خبلل انت ماتركز ماتشوفف"
نايف"وقته تهاوش انت،اسعفه سو شي"
عبدالله"ابك مافيه الا العافيه عانه يتنفس ، فارس هل انت بخير؟"اشر فارس بيده انه بخير
عبدالله"وراك ماتهرج طيب"
فارس"لساني يعجز عن الكلام،الكلمات تنحاش مني"