قمرة جبدت بيجامة من خزانتها ونهال كانت بدلت ديجا وتكسلت ، دخلت للصالدوبان بدلت وخرجت راحت رمات روحها فوق البونك
قمرة : عييت
نهال : ايه واش كاين واش مكاش ، احكيلي كلش
قمرة حكاتلها مقتطفات تع واش صرا كامل من نهار جات للدزاير حتى لدوكا
قمرة : والان معك عضو في شركة مصطفاوي الرئيسية صاحبة اسهم تان
نهال : مبروك للقزمة
قمرة : شكراا شكرا ، خليني نرقد غدوة نصبح خدامة انا ونتي راقدة
نهال : ما تبداينيش ، اصلا في سبتمبر نولي للخدمة
نهال تخدم بسيكولوغ في كلينيك بريفي تع طب الاطفال
قمرة : بونوي
نهال : بونوي
صباح جديد ومليئ بالأحداث كالعادة ، قمرة ناضت وجدت روحها وخرجت مالدار بلا ما تستقهوة راحت ديراكت للشركة . كي وصلت تلاقات مع أمير وإسلام في نفس الوقت
قمرة : صباحكم ولاد العم
إسلام : صباح الخير
أمير : صباح الخير
دخلوا كيفكيف في ثلاثة هي في وسطهم وطلعوا في الاسنسور للإيطاج تاعهم ولحقوا تفتح الباب وإسلام وأمير كيفكيف دارولها يدهم باش تروح هي لولة
قمرة بابتسامة : ثانكيو
راحت لبيرو سيليا وإسلام دخل لبيروه ديراكت وأمير تان
قمرة : سيليا إذا راهم واجدين البنات معليش دخليهم بالوحدة
سيليا بابتسامة : أكيد مدام قمرة
راحت قمرة لبيروها وحطتها دوزانها وقعدت تستنى دخلت سيليا مع طفلة لولة قمرة ما عجبتهاش لي دخلت بصح طبعا مش رح ترفضها لهاد السبب سألتها شوية أسئلة على الخدمة وكلش شافتها بلي حابة تزوخ برك حبت تخدم عندهم علاجال الإسم وتوري روحها .
فاتو عليها وحد خمس بنات وحدوخرين وقمرة مزال ما لقات ظالتها ، خرجت عند سيليا
قمرة : سيليا لي مزال ما جاو قوليلهم يجو عشية على الزوج
سيليا : اوكي مدام
دخلت قمرة عند إسلام وقعدت وهو كان مركز مع خدمتو زابط وجهو للطرف
إسلام : خير واش صرا تان ؟
قمرة : وحدة ما تصلح حرفيا ولي تصلح ما تعرفش شحال من حاجة ، عييت
إسلام : شفتي علاش قتلك خلي سيليا دير معاهم
قمرة : بصح انا نحب نخير وحدي عندي ديجا شروطي وقوانيني الخاصة لي لازم يمشوا عليها لي رح يخدمو معايا
إسلام : كيما تحبي مالا
قمرة شافتو مشغول وهكاك راه يهدر معاها لذلك قررت ما تجينيهش واستأذنت منو راجعة لمكتبها وبدأت تخدم خدمتها هدو ملفات تدرسهم هدو ايمايلات ترد عليهم ، يعني فوق تعب المقابلات مع المساعدات زادلها هدوك الخدمة وهي ما كلات والو وطاقتها خلاصتها ، دق باب مكتبها
قمرة بتعب : ادخل
دخل أمير وهو في يدو ملف يوريهولها شافها تبان تعبانة
أمير : وشبيك ؟
قمرة : والو عييت
أمير : كشما كليتي مالصباح ؟
قمرة : لالا خرجت نجري مالدار
أمير : علابيها راكي كي زومبي
خرج راح جابلها قرعة جو وشوية مادلان مالكافي لتحت
أمير : هاكي طلعي بيهم شوية طاقة
قمرة : ثانكيو صديقي
أمير : من بعد نوصيهم يجيبولك فريجيدار صغير حطي فيه ماكلة
قمرة : اوكي
كلات شوية مادلان وشربت جو وحست طاقتها تجددت ، خدمت مع أمير هداك الملف وتناقشوا فيه وكملوا .
🎬🎬🎬🎬🎬🎬🎬🎬🎬🎬🎬🎬🎬🎬🎬🎬🎬🎬🎬
أنت تقرأ
قمر الإنتقام
Randomالقصة باللهجة الجزائرية 🇩🇿 القصة من تأليفي وهي قصة خيالية لاتمد للواقع بصلة ، كل الأفكار من عندي . لا أقبل بأي شكل من الأشكال أخذ أي جملة ونسبها لنفسك أو عملك ، أتمنى أن تستمتعوا في قراءتها بالنسبة للشخصيات يمكنكم تخطي فصل الشخصيات وتخيل أي ممثل...
