___🍁🍁___
دخولها جبر العيون الكل تخلي ايلي كانت لاهية فيه وتشهل فيها ...الكل عندهم نفس السؤال ...عفاف شتعمل فم و في هاك الوقت بالذات ؟!
هي كانت عارفة معنى نظراتهم وفاهمة سرها ...تبسمت وهي تتمشى ناحيتهم بكل ثيقة ...خزرتلهم الواحد وراء الواحد قبل لا تحط اوراقها ع البيرو الفارغ و تكتف يديها وهي تواجهم بنظرات كلها تحدي وقوة " حسستوني بالغربة بها الخزرات ...على شوية وباش تاكلوني بيهم ...يظهرلي الحال موش طيب عندكم كي شفتوني معاكم ؟!" هزت اكتافها " الله غالب ...تعليمات من فوق "
في نبرتها بارشا استفزاز وشريان شبوك هكا حستها دنيا ...تتفكر على أول دخولها لفم كانت من أول الناس ايلي تتلاقى بيهم هي عفاف ....لكن بطول المدة ولى الأحساس ناحيتها صعيب يتفسر لكن فيه بارشا نفور ..ومازال عالق في ذكرياتها...هاك الطريقة ايلي نطقت بيها أسم معاوية وهوما في التوالات ..ومازالت باهتة في الهيستيريا ايلي راتها بيها وقت تضرب معاوية ...بارشا فرضيات جات في راسها ..والكل يخلوها عاملة حد طويل و عريض بينهم ...وصعيب يتعدى الهواء طبيعي بينهم .
الكلام كان موجهلها وهي ترحي في افكارها " انسة دنيا ...علاقتنا باش تكون اقوى شوية ...بالضبط كيف ما كانت مع سي معاوية ...قصدي المرحوم ..سي معاوية "
هي زادا حطت يدها على مكمن الداء ..صرت سنونها وكبست صوابع يدها " بالنسبة ليك معاوية مرحوم ..بالنسبة ليا يقعد حي ..واضح...ياريت ها الموضوع ماتحكيش فيه..." هزتها وحطتها " كيما تعرف ...تعليماااات ..وأنت اكثر وحدة تطبق التعليمات "
ضحك الصحبي وهو يرجع لدوسياتو ...الحرب بين هاك الزويز باش تكون حامية شي عجب وياويل ايلي يدخل بينهم حتى للحل ..فخليهم في روس بعضهم لين تخمد نارهم وحدها.
___🍁🍁___
"ايه وقداش عندو غايب ؟! "
سأل وهو يثبت في المرا الخمسينية ايلي قاعدة مقابلتو بوجه شاحب وصوابع مكبشة في بعضها بخوف...صوتو كان ثابت و موزون ..خارج بنبرة فيها قوة و خشونة ...زاد ربثتها وخلى شفايفها بالسيف ماتخرج الإجابة " خمسـ...ـة ايام "
_" موش مسانس يغيب عليكم ها الفترة ؟! "
_" لا...لا...هو كل ..يوم ..يروح للدار "
سأل وهو يقيد ملاحظتو " صارتش مشكلة قبل مايغيب "
_" لا...من ..فترة ...هو بعد ع المشاكل والعرك "
_" نفهم من كلامك أنو من قبل كان مشاكلي وصاحب عرك ؟ "
_" صغر وربي يهدي ...توا تاب وبعد على كل شي "
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Action🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
