،،،،،،سوزان المندلاوي ،،،،،،
طلعت الصبح ..ركبت سيارتي ...مثل كل يوم حر ..وازدحام ..قاتل مرات ..اتمنى اروح مشي وارجع ..مشي بس المسافه كلش بعيدة ...
علما اوصل لدوامي ..تعبانه بعد مابيه حيل ..الشغل ..
وصلت ..طبيت ..
صعدت الدرج ....
صباح الخير ..ست
صباح الانوار ..
وصلت للممر ..
شفت ..كاعدين ..برة ..ناس ..هوايه
عرفت ..اليوم بدايه تعب ..
ابوحسن ..ستقبلني ..
شلونج ست ...
تمام ..
وطبيت ..طب ورايه .
ابو حسن فدوة كلاص جاي وشكرقليل اريد ...وجيب مي ربارد
وعلي درجه المروحه ..هوف شنو هلخنكه اليوم ...
ذبيت غراضي ع المكتب ...
رتبته ومسحته جان اكو تراب ..
شكد اضوج من الهوسه ..
جابلي ..الجاي ابو حسن ..
كتله كولي..
شعدنه ..
كلي ..كم قضية ست ...
وهاي الفايلات ...
خوش ..
فتحت اول فايل ..
اقرهه واشرب جاي.... ابو حسن ...
دزلي ع صاحبه ..الدعوة ...
طلع دقايق ..
وندكت الباب ..
وطبت مره مو كلش چبيره بلعمر ... بسس مبين كلش متعوبه كوة تمشي وتتوجه ع عكازة...
كالت ..
هلايمه ...
اهلا حجيه استريحي ...
حجيه اوراقج كدامي ..بصراحه ..شنو الي تريدين اساعدج بي ...
يمه ماعرف دزوني عليج ..وانه صار ساعه انتظر برة ..
جان اكو مي بارد قدمت الها ..
تفضلي واسمع منج ..
اخذت المي ..وايديها ...ترجف ...وشربت ..احسها صدك..عطشانه ...
اسمع منج حجيه ...سولفيلي ...
كالت ...
انة كمرة ..عمري يمكن 55سنه ...والله يمه ماعرف بالضبط
..
زوجت ..حميد . .وخلفت منه ولد .واحد ..والله اخذ امانته ..لحميد
بقيت ع علاوي كاسرهه ظهري عليه ..
رب العالمين ماكطع بينه ..حميد عاف النه بيت ..200 متر ..
جنت صغيرة ..من مات ..العالم كلها تكول ..ازوجي ازوجي ..ماقبلت ابد ..
وكلت اضل ع راس ابني احسن ..واربي ...
عمامه ..وخواني مقصرو بشي يوميه ..كل يومين يجيون يجيبون مسواك وهل الله قاسمه ...
مرت الايام ..والسنين ...
الاخوان والعمام ..يوم ورة يوم كامو يكطعون عنه ..
لحد ما كام محد يجي علينه ولا يدك بابنه ...
جان علاوي بلمتوسطه ..
شريت مكينه ..مال خياطه .وكمت اخيط بيها ..نعمه من الباري ...هاي هيه اطلع منها اللكمه وغراض المدرسه مال ..علاوي ...واحتياجاتنه
عشنه عليها سنين ...
فديوم
داخيط ...
اجاني علاوي..... بعد ماطب اعداديه
كلي يمه انتي خوما اضلين .
ع هلمكينه ...
كتله يمه شسوي باب رزقي ..
اجه يبوس بيه ...
طفيت المكينه ونداريت
شنو شكد تريد ...
لا يمه مو فلوس ..
لعد ...
اريد سيارة ..
يمه شلك بيها ...
انجح ..من السادس ..وعيوني الك
انجح والله ..
وانت مين تعرف اسوق ..
اعرف ..
عزة ..مين ولك ..
يمه اني اريد سيارة ..خوما احسن مني الي عدهم سيارات ..واشتغل بيها واساعدج
وانه مين اجيب الك ....ماريد منك شغل يامي ..خلينه ع هلمكينه ..
اهووووووو ..راح اضلين هيج ..ماعرف اريد سيارة اني ..
بس اني من اريد شي ..ماعندي وماعندي ..
يمه بس اسمعني ..بيش هاي ..
كال المبلغ ..
عزة بعينك يلمصخم ..مين اجيبهن الك ...
لا جيبين ولا سوين.....ماريد ماريد ...
اذا انتو موكد الخلفه وطلباتها
عليمن تخلفون..وتخلونه نتحسر ع كلشي
وعاف البيت وطله ..
كمت وراه
ولك علاوي اصبر اسمعني يوم ..
ركضت وراه للحوش ..سد الباب وطلع ...
ضليت كاعدة ع الدجه الي بلباب وخاله ايدي ع خدي ..بله انه مين ادبر اله هلكد فلوس واشتري اله سيارة هوة هم حقة ..حاله من حال الشباب ..يريد ..يعيش ..
خلي يجي وانه اكوله راح ادبرها الك ...جنت لامه كم فلس للضيك ..خالتهن ..اطلعهن ..وادبرها ..
اتاخر ...طبيت سويت عشا كلت هسه يجي ضايج وماله ..واهس خلي اكوم اجيب اله لحمات واحمسهن يحبها بلكي الله ويرضى ومايضل بخاطرهه ...
لبست عباتي ورحت ع السوك ..
شافني الكصاب ..جعغر ..
هلا هلا بام علاوي تفضلي اكعدي ..
كتله عيني رايدة منك ربع لحم ..
من عيوني تدللين ..
سالمه عيونك ...
خذيتهن ورجعت للبيت ..
ذبيت عباتي وطبيت للمطبخ ..حمستهن ..حسيت كركعت الباب ..مديت راسي شفت علاوي وصاحبه بلباب ..
صحت علاوي يمه ..جيت ..
كال اي اي ..
انه هم كملت ..العشا ..وانتظرته يطب ..
طب ...
يلا علاوي غسل ..
داجيب الصينيه ..
ماريد ...
ليش حبيبي ...
ماريد ..
اسمع اذا ع السيارة تدلل باجر اروح ع وحدة واخذ منها ..فلوس وارجعهن ..الها من الخياط ..
صدك يمه ..
ي يابعد امك ..
اجه يحضن ويبوس بيه ..
ضليت اشم بي ..
علاوي يوم انه ماعندي غيرك ...
لا تكسر كليبي وتزعل يايمه ..
الي اكدر عليه اسوي الك ..
هسة تشتريها الي ..
اي ...
ثاني يوم رحت ..جبت الة الفلوس ..من وحدة يمنه تحمل عليهن ..وع العندي ...لميتهن ..
كلت المهم ..علاوي ..
شو بيت وعدنه نعمه من الله ..
رحت خليتهن بايدهه ....
جيبلك سيارة ..
هاي شنو ..قليلات
هذول الي دبرتهن...والله ..
يلا اجيب ..بيها ..
واخذهن وعافني وطلع ..
للعصر جاب سيارة ..
وطب فرحان ..
يوم تعاي شوفي ..
وجرني من ايدي وركضني ويا ..
انة ضليت اصلي ع النبي ..وفرحت ع فرحته ...
وبقيت اشتغل اضعاف حتى ..اوفي دينها ..كمت اشتغل للفجر ..حتى اكدر اوفي ...
بهلسنه ..
امتحانات..بكلوريا ..
نجح علاوي ...
وجاب معدل ..زين ..
ودخل كليه ..هندسة ...
فرحتي ..ماتنباع بفلوس ...راح اصير
ام المهندس علاوي ..
لميت ربعه ..وسويت الهم ..احلى عزيمه ..
ووزعت ..حلو ع الجيران ..
وبدة يداوم ..كليه ...
وبدت الطلبات تثكل عليه كتب وملازم ..وملابس ..واحذيه ..
حتى السيارة ماعاد تعجبه مثل الاول ..
انه تعبت جتوفي..وعيوني راحن من الخياطه ..
واهون نفسي واصبرها واكول الله ..يعوضني من يتخرج ..
بس..بدة تغير عليه ..يعيط عليه ..
كام ع كلشي يعيب ..
حتى ع الاكل ..ولبسنه ..وحتى ع كلامي وشغلي ..
لو طالع ..لو ..عازل نفسه بلغرفه ..
وانه مكابله المكينه واشتغل ..دالحك طلباته ..
واعي الله يوفقه ويزيدة علم فوك علمه ..
نجح سنه ورة سنه ..
بثالث ..راد اخطب ..اله ..
وحدة طالبه ويا ..يحبها ..
كتله اتخرج واتعين وازوجك ..
انه ميلي وجيبلي مرة ..
كلي منو يكول تنتظرني لحد ماتخرج ..ماعرف اريدها واحبها ..خطبيها الي ..خوش بنيه ..
علاوي اكعد ..
انت مصرفك مين ..مني ..هدومك وكلشي مني ..ماكدر اجيبلك فوكاهن مرة ..يادوب الحك عليك ..وع طلباتك ..
كلي
انتي شنو تعيريني ...شنو بس انتي دتربين وسوين ..هاي البزون هم تربي ...
اني اريد حصتي من البيت ماتحمل اعيش بفكر بعد ..
يافكر ولك ..
اي فكر لا عبالج ..اني عايش اني اموت بليوم الف موته ..
شوفي الشباب الي ويايه وشوفيني لا سيارة بيها خير ولا لبس ..ولا اكل...
اني ضليت جافله وفاكه حلكي ...ولك علاوي ..شداتحجي انت
هذا هوة يعجبج يعجبج مايعجبج اخذ حصتي من البيت ..
شو 200متر وبس اني وياج..
لو تنطيني حصتي لو تبعين 50 متر من البيت ..وازوج واشتري سيارة بيهن ..
كمت اصرخ عليه ..
واكلكم وشربكم ....انت بعدك طالب ..
شفتي شون تعيرين بيه ....وطامغتني ..بكل شي ..
يارب موتني ..حتى ترتاحيين
اني هم عايفلج البيت الج لوحدج شبعي بي وطالع بعد متشوفيني ...ابد ..
وعافني وطلع ...
بقيت بروحي شسوي ياربي ..مين اجيب اله وازوجه ..
ضليت ابجي ..وادعي الله يرد سالم للبيت ..
مر يوم يومين ..ماكو ولا اعرف خبر عنه .....
يتبع ....
