سم بجرعات لذيذة

أحمد

عرفت نهايتي متعبة وحزينة بس مثل السم يجري بدمي يموتيني ع البطيء بس يريحني وما اكدر بلياه
أبدي بقصتي :

احمد هو اسمي يتيم لا أم ولا اب عمام مقبلوا ياخذوني بقيت يم خوالي أو بالأحرى يم جدي كل الي وعيت عليه هو شغل واني عمري 8 سنين خير من الله اشتغلت بالكراجات وفيترجي وبالشورجة وعمالة وصانع بمحل بس جنت كولشي ما احصل اسبوعيتي كوليتها لجدي

جنت كلاوجي انطيه اسبوعيتي بس احصل غيرها إكراميات اضمها طبعا اسبوعيتي كولشي ما اشوف منها لأنه كل ما اسأل انت داتاكل ودتشرب بلوشي وكعدة بلاش اسكت وكل شي ما احجي

إلى أن اجة اليوم إلى صار بيه عمري 18 سنة كنت اجادل خوالي وجدي مو مثل الاول مكام يضربني ويتحكم بيه بس بعدني فلوسي كوليتها الهم لأنه إذا حجيت يطردوني ووين اروح الدنيا صعبة والعيشة كشرة

بس كمت اطلع وأطب ع راحتي اصدقاء اشوفهم جنت أتعارك علمود طلعة لأنه ما يقبلون ع اساس خايفين عليه بس هم خايفين ع الجيب أو اجيبلهم مشكلة  ' طبعا اني اشتغلت شغلات بكراجات وفيترية وأماكن الله يعلم بيها شنو هي بس كل هذا ما اكلت حرام ولا حرفوني ع الإجرام أو الفساد حجاية الحق تنكال صح جدي جان يضربني ويسبني ويسب امي وابوية بس جان دائما يحجيلي ع الحلال والحرام

طبعا جنت ملابسي وملابس جدي اني اغسلهم اكلي اني اسويه فراشي كل حياتي بإيدي اني وجدي مجان أحد من نسوان خوالي لو خالاتي يدارينة

إلى أن اجة يوم جدي كولش مريض نقلته مستشفى وسهرت الليل علية صح مأذيني بس الإنسان الوحيد الي آلية بالدنيا ما عندي غيرة وبذيج الليلة راح جدي وصفيت وحدي بأرض الله الواسعة ما الي احد بالدنيا شهر حابس روحي بين أربع حيطان واجة اليوم إلى قرروا بيه خوالي يبيعون البيت

محد سأل هالولد شراح يصير بيه صار عمري هنا 20 سنة وطبعا منطوني حصة بحكم ابوية مات قبل جدي مالي اي حصة تعاركت وياهم بس ما فاد شبيدي بس ما دنكت راسي لأحد الفلوس الي جنت مجمعهم من اكرامياتي أجرتلي غرفة ببيت رجال جبير هو ومرتة كاعدين وابو الشغل انقهر عليه لكالي شغلة عند مدير عام اشتغل سايق آلة أودي واجيبة والحمدلله جانت لكمتها حلوة بطرك روحي يكفيني راتبي وزايد بس جنت خايف لأنه عقد ع ساعة يطردني عشت 6 أشهر مرتاح الحمدلله وحسيت الدنيا ضحكتلي وبديت اكون نفسي

ابو علي الرجال الي ماجر منة الغرفة الله ينطيه جان صدوك ابوية ويكولي الله عوضني بيك عن ابني إلى راح بالغربة وبعد ما سأل لا ع أمه ولا ع ابوه وباعنة برخص وبالغالي شريناه

أما ام علي فدوة لكلبها حجية مدعبلة اموت عليها ما اطلع إذا ما ابوسها من اديها وأكلها يخلي الواحد حسين الجسمي من سمين هههههه مثل ما كلت مرت 6 أشهر واني اجمع فلوسي وابو علي يلح ازوج وجيبلي أحفاد بس ازوج واكتبلك البيت بأسمك وام علي تصيح اريد جنة والله متت المهم اقتنعت بسالفة الزواج

قررت ازوج بس بشرط مصرف البيت يصير كوليتة علية وبعد معاناة يلة قبل ابو علي وصار البيت بيتي وما حسيت براحة مثل راحة هالبيت احس رويحتك يابوية بيه وأشم عطرج ييمة بضلوعي

جنت دائما اتذكرهم وما نسيتهم يوم اسويليهم كل خميس ثواب واوزعة وازور قبرهم واترحملهم واحسهم بكل خطوة همة وياية بس ما اذكر فد يوم بجيت ونزلت دمعتي لا ع كبرهم ولا ع جدي وحتى من جنت انكتل متنزل دمعة وحدة حتى ما اذكر فد يوم شفت دمعتي انقهر واحترك من الداخل بس ما تنزل دمعة بس دمعتي نزلت عليها وبيها حسيت شكد أحبها.........

المهم جان يوم السبت جان عمي ابو علي وام علي بالزيارة وجنت وحدي بالبيت كعدت الصبح تريكت وما عندي دوام لبست وخابرت أدهم صديقي نطلع نفرفر طبعا أدهم مزوج وعندة طفلة مثل الكمر فدوة اروحلها اموت عليها' اتفقنا نطلع وجهزت روحي وهميت دا اطلع جان تندك الباب

رحت فتحتة ويا ريت ما فتحتة اجتي زوزة طبعا هي اسمها زهراء بس ما اذكر يوم صحتلها باسمها جمدت بمكاني عبالك مشايف بنات بعمري كلبي كام يدك يمكن اول مرة اعرف عندي كلب كتلها تفضلي كالت منو انت كتلها هو منو الجاي ع منو انتي منو كالت هذا مو بيت ابو علي وينة خالو يمة فدوة للبنات هي تحجي واني سارح بافكاري ع هالوجه كتلها اي تفضلي كالت اريدة انت منو كتلها ابو علي بالزيارة واني مؤجر عندة كالت شلون اريدة ضروري كتلها تفضلي انتظريه لحد ما يجي ما يطول ع رجعتة حخابرة الج خابرتة وجان داخل بغداد وحيوصل بس صوت ابو علي من سمع باسمها اختنك ترخصت مني ودخلت للبيت واني الثول عماني بقيت بصف الباب لا اني طالع ولا اني الي راجع مثل الاهبل واكف وصافن ع الطير هههه ما احس إلا صوت العصفور مالتي كالت اخي شبيك صافن تطلع لو اطب خومايظل الباب مفتوح انوب اريد احجي ما يطلع لساني طبعا اني ابو لسان وجنت اتغزل هواي بالبنات وعندي صديقات مثل كل شاب بس هيج لعب وهن يعرفني ما ازوج وأمانة الله ما حجيت وية وحدة شي خارج عن القانون هههههه بس جنت اتغزل بالعيون والحلك بس السوالف التعبانة ابد ما اتقربلها المهم كتلها اني اترخص وسديت الباب وطلعت المشكلة نسيت اني وين رايح واكف بنص الشارع وأريد اتذكر وين جاي اروح هناك وأجاني راجدي من أدهم لك ناقص صارلي ساعة مصموط هنا من نعلعا شرفك اتعاركت وية الجماعة(زوجته) على ما طلعت طلعت روحي  وين جنت كتلة دسكت غير سطرني العباس.....
وللحكاية بقية........