عاشروهن بالمعروف
الجز 2
نقرأ شويه من مذكرات نوال (اليوم زارنا بيت عمي محمد من كربلاء صار سنين مطابين بيتنا وياهم ابنهم اسمه قاسم يمكن مخبل جايين يخطبوله بت خاله وهو عينه عليه لاربحت مي من هسه عينه على هاي وذيج لعد من يأخذها شلون بس مي احلى منه اكيد قبلت بيه لان مهندس )
رجعنا لبيتنا بلغت امي ماريد مي ماعجبتني امي گلبت الدنيا اخذت جنطتي وسافرت على شغلي للبصره اني هواي احب البصره وتخرجت من جامعتها وعندي اصدقاء هناك وزملاء العمل لاحظوا شي متغير بيه عندي صديقي خالد حچيتله نصحني ااجل الموضوع حتى مااخسر امي بس اني التفكير بنوال مسيطر عليه اني اسكن بيت حكومي وياي اصدقائي ظلوا يصنفون عليه ويگولون تزوجهن اثنينهن
وهي هاي معقوله خلي اخذ نوال وكلشي مااريد بعد
رجعت لاجازه لاهلي حچيت لابوي
يابه موضوع الخطوبه اني ومي انسوه وفهم امي ماريدها من البدايه گتلكم ومفاد وشغله ثانيه اخطبولي نوال بت عمي
حسيت بيك تريد نوال شفتك تباوع عليها واني هم ماريد اناسب بيت خالتك زنگين ومو من ثوبنا لكن امك شلون راح تعتبره تصرف ضدها والخلافات بين النسوان تدري بيها وعمك عنده بنيه اكبر من نوال ممتزوجه ونوال طالبه وعدها بكالوريا
ماادري يابه شوفوا حل احچي وي امي بالبدايه وفعلا ابوي گال لامي سمعت صوت امي العصر
تريد بت حمزيه ومتريد بت اختي طبعا حمزيه ام السحورى شربتك وخلتك متندل دربك بت حمزيه اذا طبت لبيتي اني اطلع منه
يمه ياسحورى هذا زواج واني ولد مو بنيه وتريدين تغصبيني ولاتخافين مراح اخليها عدكم بالبيت تروح وياي البصره قدمت على بيت حكومي
وهاي شوكت خططت انت وياها ويمتى حاچيتها بنات حمزيه مينخاف عليهن ومفكرت اختي شگللها
كوليلها يريد بت عمه واذا تريدين گليلها مسحورله بكيفچ
امي استسلمت وصل خبر لاختها . امي منسمعت اطلع بيت تراجعت عن حچيها مااعرف ليش وقبلت بنوال المشكله بيت عمي احمد مااعرف موقفهم رحنا اني وابوي لبيت عمي وصلنا نوال چانت بفترة مراجعه مال السادس ومتغيره وتعبانه من الدراسه الحلو بنات عمي متربيات تربيه عسكريه ابوهن متاثر هواي بالجيش بحيث الام من تصيح وحده تفز من مكانها حاضر ماما فتحنا الموضوع ويه عمي يصيحوله ابوعلي
خويه ابو علي جايك بطلب كون متردنا
گول ابو ابراهيم ماعاش الي يردك
تسلم خويه قاسم المره الفاتت شاف نوال ويريدها زوجه شتگول
ابو ابراهيم ومي مو راح شافها
ميريدها وامه جابته گوه ومن يومها ثابرنا اريد بت عمي والا بت عمي
وليش مو حنان السنه تتخرج واكبر من نوال
عمي اني رايد نوال
عمي انت الظاهر عليك جني اسمه نوال البنيه زغيره وعدها امتحانات مااگدر اشغلها بهيچ موضوع خلي تخلص وانتوا هم خلصوا موضوع مي
خويه موضوع مي انتهى دزينا خبر واحنا لاخطبنا ولاعدينا حچايه وماصارت هسه انت انطينا جواب
گتلكم ورا امتحاناتها اسالها واردلكم الجواب ومن جهتي اني موافق
عمي يعني بعد شهر هواي اسالها هسه الله يطول عمرك
ابني هي تراجع ومن نوع گوه تستوعب وداخلة الوزاري بقرار وادبي تدرخ وتنسى هسه من اگللها يعني تسقط
بس شوف رائيها
ابو ابراهيم هذا شبيه ابنك شسوتله نوال
مو گتلك ثابرنا
خلص لعيونك الجمعه الجايه اردلكم خبر بس اذا وافقت كلشي يتأجل ورا الامتحانات وكافي بعد لتحچي وتگلي نوال
ظلينا نضحك
شيصبرني اسبوع والخطوط مال التلفونات بين المحافظات چانت صعبه
من مذكرات نوال عن هذا اليوم
(اني فوگ ضيم الاقتصاد والتاريخ جايني هذا قاسم يخطبني خلصت ايام الله كلها الا هسه وبابا مكيف وماما تگول متلگين احسن منه حظي ماما طول عمرها تكره مرت عمي ومرت عمي تكره امي واني الي راح ادفع الثمن بابا گال فكري اگله فكرت وماريد اتزوج قبل حنان والله فكره)
مر الاسبوع نوال مموافقه تتزوج قبل اختها الكبيره هذا مو سبب قررنا اني وابوي نروح واني احچي ويه البنيه ادري انانيه من عندي لان باقي ايام على امتحاناتها شي مو بيدي يريدها ويدفعني الها اليل كله افكر بيها يمكن صدوك سحر هم راضي خليه سحر رحنا اني وابوي عمي اعتذر هواي وگال حچيت وياها وحنان گالتلها عادي تزوجي ماعندي مشكله ومااگدر الح عليها أكثر عدها امتحانات طلبت من عمي احچي وياها لوحدنا عمي راح ديصيحها اجتي وياه لازمه ايد ابوها والخجل مبين عليها وطلعوا اهلنا وظلينا بالاستقبال اني هم مااعرف شراح اگول لازم احچي
شلونچ نوال المراجعه شلونها
ضيم اقرا منا وانسى منا ماكو واحد متعارك قبل الف سنه ماكاتبين اسمه بالتاريخ والرياضيات المساله صفحه كامله تعال دور على قيمه س
اوف
صوچج ليش رحتي ادبي
ليش العلمي سهل شايف قوانين الفيزيا كلها نفس الشي
اي شايفها وأخذت بيها ٩٢
هنيالك
زين تريدين اظل عدكم واشرحلچ رياضيات
لو تشرح سنه مااستوعب
لا مني تستوعبين
وليش يمه منك استوعب
لان بس انتي راح اشرحلچ مو صف مليان طالبات
يجوز صدوگ انت تعرف بالرياضيات
اي طبعا اعرف
والتاريخ التعاريف شلون احفظها
اني انطيچ طريقة اذا شفتي التعريف اسم شخص عربي اكتبي كان قائد شجاع وماكو مثله واذا اسم اجنبي اكتبي كان كلب ابن كلب
ضحكت بصوت عالي وتذكرت اهلنا بالبيت سكتت
هسه شگلتي عندي اجازه يومين ابقى يمكم واشرحلچ رياضيات
ماادري غير تگول لابويه
قابل عمي يطردني بس بشرط نتزوج ورا الامتحانات
قاسم اني زغيره ومن انجح اريد اكمل حتى لو معهد معلمات واختي حنان اكبر مني شلون اتزوج قبلها
كل هاي مو اعذار اذا نجحتي تكملين واذا مانجحتي تعيدين السنه وحنان ماعدها مانع تتزوجين قبلها
والمشاكل بين امي وامك بصراحه انت اكبر مني وتدري بحرب البسوس بين الامهات
هاي من زمان وانتي راح تروحين وياي البصره بس بالبدايه ويه اهلي لحد ميطلع بيت الي
ومي مو خطبتها
شوكت خطبتها رحت شفتها امي لحت هواي واول ماشفتچ عرفت مااريد غيرچ نوال تصدگين حتى بالمعمل حچيتلهم عليچ لاتصعبين الامور وعد مني مراح تندمين واي شي تريديه گولي
خلي امتحن وانجح وبعدين
يعني موافقه
موافقه بس تقريني متروح وانت گول الابوي تبقى هنا صار ابقى لو تريدني العمر كلها ابقى
ليش كم سنه راح اعيد السادس
لا انشالله متعيديه
ظليت يمهم اسبوع اشرح الها رياضيات
تابع
