عاشروهن. بالمعروف
الجز 6
بدينا اثنينه نشتغل ونوفر نونه تشتغل شفتين باليوم واني ادرس حتى اعادل شهادتي واشتغل باليل تجي تعبانه وهم تنظف وتطبخ ومتقبل اساعدها تريدني ادرس مرت ٣سنوات على هاي الحال تخرجت واشتغلت شغل محترم بشركه ردتها تترك الشغل ماقبلت رادت تجمع فلوس بيت وبزنسس تريد تشتري محل كلشي بدولار الي تشتغل بيه يعني هي تتملكه ميهون عليها تصرف فلوس زايد وتلم سلف ويه العراقيات وناسيه شغله مهمه الاطفال ليش ماعدنا وسوتلي عركه على حذاء رياضي اشتريته ٣٠٠دولار
قاسم هاي التقرير مال البنگ ناقص ٣٠٠دولار
اي اشتريت حذاء مايكل جوردان
ومايكل جوردن شيصير منك حتى تشتري حذائه زغيرانت وهيچ تتصرف يعني تعبك يروح على حذاء لعد شوكت نشتري البيت والمحل
وليش متكولين شوكت يصير عدنا طفل ليل ونهار تركضين على شنو گعدي يمكن يصير عندچ حمل
شچاب موضوع الحمل على شغلي هذا شي بيد الله
ونعم بالله وانتي ماقصرتي وياي وصلتيني بس كافي اريد طفل
اني مامانعه الاطفال بس ربك مارايد زين قاسم اذا مصاروا عندي اطفال شتسوي
ميصير عندچ شنو
افرض
ماسوي شي
لا والله تذبني وتنسى كلشي شگد ماافتهم اني هسه عرفتك
اگلبيها مأساة وابچي وروحي نامي والصبح گعدي روحي للشغل
هسه صار شغلي مو زين لو شنو براسك عندك وحده غيري
ياغيرچ ليش تكبرين المساله نونه روحي للدكتوره وشوفي شنو السبب واني هم اروح
مجاوبتني وحاولت اصالحها مقبلت وحتى الحذاء رجعته ومفاد وياها
نونه حبيبتي كافي زعل موحتى الحذاء رجعته
تريد تصالحني العصر راح اروح اشوف بيت معروض للبيع تعال وياي واني اصالحك البيت يجنن واربعةغرف نوم ومطبخ واسع شفته بالصور
اروح وياچ بشرط تروحين للدكتوره
اروح واني متاكده مابيه شي وهسه انت تطلع السبب
لا بالله شلون عرفتي
انت عندك خال تزوج مرتين وماخلف وثلثين الولد على الخال بس لاتخاف مااعوفك ابقى وياك
نونه اخاف صدوگ اني على خالي
ها شبيك داشاقه صدگت
حچيها شغلني رحت وياها على البيت شفناه وعجبنا وقعنا أوراقه ثاني يوم رحت للدكتور ومابقى تحليل ماسويته وجتي النتائج سليمه وظليت الح عليها تروح للدكتوره راجعت الدكتوره وسوت فحوصات وانتظرنا النتائج اقروا النتيجه بمذكرات نونه (ماادري ادگ الطم على حظي النتائج ماعندي امل بالحمل وقاسم شلون المن اشترينا بيت ومحل وخطيه قاسم صار خمس سنين متحمل واهله بالعراق كل مره يسالوه يمكن مااگله )وصلت للبيت نوال مضطربه وعيونها حمر سألتها
نونه حبيبتي شبيچ مريضه
هاي النتائج قاسم اقراها ترجمتها ماعندي امل بالحمل ولاحتى انابيب الا ام بديله اذا تريد تتزوج عليه
بابه شنو اتزوج عليچ سدي موضوع الاطفال ونرضى بنصيبنه اني مااعيش بدونچ الطفل لو منچ لو مااريد ه
هذا مو حچي قاسم انت تريد طفل واهلك كل مره يسالوك
الله يخليچ نونه سدي الموضوع وخلينا نشوف اطباء بغير ولايات بغير دول نروح حتى لسوريا بس فكرت اتزوج غيرچ مستحيل انتي مو بس زوجتي وامي وصديقتي وبت عمي انتي سويتيني لاتنسين
هديتها وبگلبي نار اريد طفل بس من نوال مو من غيرها
انتقلنا لبيتنا الجديد ونوال ظلت بس تروح للمحل ساعتين باليوم خلت واحد يشرف عليه وتعرفت على صديقه جديده اسمها سعاد جايه من سوريا مطلقه وعدها طفل اسمه كرار نوال نشغلت وياها ويه الطفل ويطلعن سوا
ظلينا نراسل اطباء ونسوي تحاليل اخذتها لعياده مشهوره بواشنطن ولسوريا العلاج الي تأخذه اذاها مفاصل وزياده بالوزن وحتى عيونها متشوف بيها كله علمود تجيب طفل بس الله ماراد صارت عشر سنين على زواجنا عمري صار ٣٥سنه
زوجتي كانت زوجه مثاليه ضحت وتحملت وتغربت واشتغلت شغل رياجيل ميتحملوه كونتني وكونت مستقبلي وكل هذا احمد ربي عليه بس الانسان طماع يريد أكثر حاولت اقنع بنعمة الله عليه لكن الانسان عمره ميحمد الله على نعمته
چان رمضان وگاعد بحديقة بيتي ونونه بالاسواق تجيب حاجات الفطور جتي سعاد وابنها كرار وسلمت وگعدت يمي
السلام عليكم قاسم نوال جوا
وعليكم السلام ام كرار لاراحت للأسواق هسه تجي هاي مرتك صايره تطلع ومتگول
اذا محتاجه شي خابريها وتجيبه الچ
لا خليها على راحتها عندي حچي وياك
گولي
اني احب واحد متزوج واريد اتزوجه
خطيه زوجته شنو ذنبها تهجمين بيتها
بيتها مراح ينهجم لان زوجها يحبها بس هي متخلف واني صديقتها واحبها احسن مازوجها يروح ياخذ وحده ثانيه متعرفها وتطردها بالشارع واني مخلفة قبل عندي ولد وادري بيه يريد طفل ياخذني حتى اجيبله طفل تربيه مرته فكر بيها قاسم وردلي الجواب
اخذي الجواب هسه نوال عندي بالدنيا مابدل اظفرها بنسوان العالم
لاتبدلها تبقى زوجتك وصديقتي واجيبلكم طفل يملي حياتكم واني رايده الستر وبيت يلمني ويه ابني ورجال يصرف عليه بدال مااشتغل ثمن ساعات باليل
راحت وظليت افكر بحچيها حتى نوال من تحچي بالي مو يمها مرت يومين اني اشيل الفكره وارجعها لعقلي اني مجرم والي يخون انسان يحبه يستحق اعدام
اتمنى طفل بس مو على حساب نوال ومو بطريقه هاي صديقتها ورجلها اثنينهم يتفقون عليها
اقسم بالله احبها مااتحمل اشوف دمعه من عينها لكن العمر يركض وأقسم بالله حچيت الحقيقه چانت فكره سعاد مو فكرتي ولا فكرة نوال اقسم بالله اقسم بالله اقسم بالله
من حقكم تگولون عليه خائن ولو اني چنت بمكان نوال والسبب من عندي مستحيل تتخلى عني بس اني راح اجرحها جرح عمرها متنساه
تابع
