القوارير

القوارير ١٠

#القوارير ١٠
زينب الموسوي
لا يروح بالكم لبعيد قررت استعيد زوجي واخليه يوگع بحبي من جديد ويتعذب وهو يريدني وميوصلي اني گدرت اهزم السرطان مااگدر على هشام
بس ماكو واحد يحب زوجته من جديد وهو صار عشرين سنه مگابلها وخاصه مريضه وفقدت معظم انوثتها بالمرض والعلاج الكيمياوي بس احنا بعصر الجمال صار بيه سلعه تگدرين تمتلكينها باي وقت تريدين دخلت على مواقع عيادات التجميل لگيت عياده بكندا مختصه بتجميل الثدي بعد عمليه الاستاصال وهواي نساء كاتبات عن تجاربهن اني عندي اخواتي اثنين بكندا كوثر وسفانا اتصلت بيهن وسولي مواعيد بلغت هشام
هشام اريد اروح كم يوم لاخواتي ضايجه احجزلي
وليش مكلتي اروح وياج
اني مهزومه منك مااكدر اشوفك خليني اروح ارتاح
على راحتچ والبنات يروحن وياج
لا لوحدي كتلك اريد ارتاح منكم هو اني اشفت بعمري غيركم ومصايبكم
والله حقچ بس لان منگدر بلياج
عود جيب ماري غيرها تسليك
سافرت لكندا وبديت التجميل اخذت اسبوعين بين العمليه والفحص والنقاهه سويت عمليات خلتني استعيد ثقتي بنفسي وانطيتهم فلوس انطوني جسم جديد وكلشي بيه سووله اعاده تاهيل وتصليح من شعري لااضافري اصلا من كنت شابه مكنت بهالجاذبيه
بعد شهر رجعت لبيتي البنات كانت عدهم عطله نايمات دخلت عليهم
شلونهن بنات اسيل ولجن كعدن شوفن نانسي عجرم كانوا يفتحون عيونهم ويغمضوها
ماما وين جنتي منين شمسويه والفستان ماما تخبلين وعندج صدر
على كيفجن لاتحظنن اخاف يخرب كلشي وتروح فلوسي بابا وين بالشغل
اوكي طالعه وهسه ارجع اذا بابا اتصل لحد تكله رجعت سويها مفاجاءه وسون غدى اضافري تخرب
طلعت رحت لشغله وظليت الى نهايه الدوام اخاف يروح لغير مكان دخل فرن جاب خبز وطلع وراح للبنات بقيت انتظر اخاف يطلع بس البنات اتصلن عليه
ماما وينج بابا دخل نام وانتي ماكو
هو يوميه يطلع بعد الغدا لو لا
لا يتفرج تلفزيون وبعدين ينام اوكي جايه
دخلت زينب صاحت بابا ماما جتي خطيه طلع من الغرفه الصدمه كانت قويه من يوم عرسه مشايفني هيج
اسيل شكد حلوه صايره
ليش اني جنت مو حلوه
انتي طول عمرج حلو بس هسه صايره احلى
يله بنات انطوني اكل اي شي وخلي انام تعبانه كعدت اكل والبنات راحوا لغرفهم
وين حتنامين اسوله
بعرفتي قابل انام يمك
على راحتج اروح انام حمدالله على السلامه تصبحين على خير
طبعا مستغني حضرتك صار شهر تعقد على هاي وتعوف هاي
لا بس اعرف شتريدين من كل هذا ترى بدون متسووين اي شي اني نادم وتعرفين كلش زين احبچ وادري انتي راجعه من الصبح نسيتي تضمين الجنط اسيل كافي شي صار وانتهى واخر مره اكلج اسف وسامحيني
دخل لغرفته واني رحت لغرفتي
ثاني يوم كان بالدوام اتصل بيه
وين انتي اسوله
بالمستشفى اشوف هذا الشهر حالتي
انشالله خير حبيبتي خلصي واتصلي بيه
انشاالله
شبيج خايفه من التحليل
اني كل شهر اعيش هذا الخوف والمشكله ماعندي غيرك اشكيله اخواني كلمن ملتهي بعائلته وحياته واكول اذا رجع عليه المرض شراح تسووي انت اكيد تشمرني بالشارع
ليش شمرتج قبل حتى اسويها هسه
الي يسمعك يكول شلون مخلص ووفي انت
انتي متوتره وخايفه تريدين تطلعين قهرچ بيه
هو قهر وبس لو تعرف شايله بگلبي منك
خلصي واتصلي بيه
طلعت النتيجه سليمه والعمليات مماثره على صحتي اتصلت بهشام التحاليل سليمه هشام
اوكي اسوله جاي عليچ. انتظريني
وصل واخذني لمقهى زغير كنا دائما نروح بيه اني وياه
احجي كل الي بكلبج من قهر
شلون هان عليك تعاشر غيري
مااريد احجي بالموضوع بس اكلج صعب
چذاب
والكفل زينب مااجذب
ليش ماتزوجت عليه لو كنت محتاج مره
مااگدر احب غيرج وانتي حايره بنفسج وصحتچ مردتج تشيلين همي اسيل انتي عشتي وياي عمرج كله عرفتيني مو طبعي الخيانه
هذا القاهرني مو طبعك شلون خنت
ماادري ولااعرف ابرر
هسه شلون نخلص اني وياك فاطمه على وجه زواج
شنو نخلص اسيل ليش مصره تطلعيني من حياتج
فقدت الثقه بيك ومااگدر اسامح
اخذي وقتچ لحد متسامحين بس رجعي لغرفتج البنات يفتهمن مسوويه كل هالتغيير ونايمه بغرفه ثانيه
رجعت للبيت وبديت اكتب اني وفاطمه بالاشياء المحتاجتها للعرس
باليل انتبهت هشام نايم بغرفتي
شتسوي هنا البنات شيكولن
شيكولن نايم يم امهن شنو غريبه
انت النسوان الي عرفتهن طلعن عينك وصرت متستحي
ظلي مجليه النسوان والنسوان
اي انت ابو النسوان مجذبه قابل والله عباله اذا اجى للغرفه راح انام وياه قحط شياب
مجاوبني ونام نمت على قنفه بالغرفه وتندمت على ردي عليه بس الخطه لازم يتعب وينجرح مثل ماجرحني
گعدت من الصبح اريد اروح ويه فاطمه نجهز انتظرت يكعد حتى اشوف اخاف متاثر من حجي مكعد دخلت للغرفه ادفر بالباب واطكطك بالكعب يا عزا هذا شبيه
ابو فاطمه اريد اطلع اني وفاطمه محتاج شي قبل لااطلع
باوعني شبيج تخبلتي شنو هذا المكياج انتي العروس لو بنتج
الله يسمع منك وانخطب واعرس
كافي ولج امسحي وجهچ لااكوم اكسرج
الخطه دتمشي ورد
رحنا للمشوار ورجعنا كنت تعبانه والدنيا تدور بيه على الغدا كلنا موجودين عندي صديقه اتفقت وياها اتفاق
دگ تلفوني واني على الغدا اخذت التلفون وگمت
ركضت شفت الاستغراب على وجوهم
ظليت اسولف وياها ساعه بهمس واحجي على كيفي من دخل هشام سديت التلفون بسرعه
ويامن دتحجين وعفتي الغدا
صديقتي بس متفيدك متزوجه
تصرفاتچ غريبه اسيل ترى انتي مو زغيره
لا زغيره وحلوه انت الي چبير
ثاني يوم بالريوگ اندگ تلفوني اخذته وتعمدت يسمعون جمله
مو اتفقنا منتخابر بالنهار وين الاتفاق
هشام ركض اخذ التلفون مني وصاح الووو
جاوبته صديقتي شلونك ابو فاطمه لعد ام فاطمه وين راحت
انطاني التلفون واني اضحك وهي تضحك طلعوا البنات
اسيل شدتسووين
اعيش حياتي بين ميكتشفون المرض رجعلي اذا ميعجبك تگدر تطلگني اريد اعيش طفولتي ومراهقتي الي حرمتوني منها
اني ماحرمتچ من شي انتي الي ابتعدتي
ولا اني حرمتك من شي المرض حكم عليه وانت خنت هسه مايربطنا غير البنات سوي الي تريده معليه بيك
شوفي طول عمري محترمچ لكن والله اذا عرفت تغلطين وتمشين بغير دروب اراويچ هشام ثاني وحتى بناتج اخليج يتبرن منهن
بناتي كبار بعد ميحتاجني وهشام الثاني شفته خاين ويركض ورا صديقاتي
انضربت واول مره يضربني

نعسانين لونكمل