طلابة عشگ ١١
زينب الموسوي
الايام الي بعدها بقيت بالمستشفى وعلاج وگدرت اگعد بدون مساعده احد واخطوا خطوات بسيطه وبمساعدة الممرضات وعكازات احسان كان يعرف الوقت الي يمشوني بيه ويحضر حتى يسندني
جونم هسه من اروح البيت ابقى انتظر يمتى يجي ثاني يوم والزم ايدچ وامشيچ تعرفين كم مره تعاركت ويه نورهان علمودچ
جا ليش تتعارك وياها موش هيه خطيبتك وتحبها
خطيبتي صار ثمن سنين وكل مااريد اخذ قرار واتزوجها اتراجع
حرام هليك هيچي عمرها يضيع لاانت مااخذها ولاانت هادها
والله اكثر من مره اتركها واهلنا يرجعونه
هي گرايبك عيب تتركها واهلكم يتخاربون
جونم ترى الحب واضح ما تحتار بيه متحتاج ثمن سنين حتى تقرر اهلنا قرروا من احنا ازغار وكبرنا. وقررنا نفذ رغبتهم
والله ماادري شكلك انت اعرف بكلبك
يوم تاخر مشيت وياي الممرضه ورجعت گعدت من وصل
اسف تاخرت اليوم شغل يله جونم نمشي
مشيت الممرضه مشتني
لا شنو هاي الخيانه مو اني يوميه امشي وياچ زعلان عليچ
انه الزعلانه لان تاخرت وين چنت
عد خطيبتي طلعنا وافترينا وبعدين تذكرت انتي بالمستشفى گتلها جونم اخذنا الوقت ولازم اروح اشوف گمره
ها خطيه لو باقي وياها اني الممرضات يساعدني
ها شبيچ صدگتي وجهچ انگلب
وانه شلي غرض بيك انت وخطيبتك
اسكتي لچ هسه انتي مشغوله بصحتچ بس تصيرين زينه ورا يومين تحبيني وتموتين عليه ماكو وحده صادفتها بحياتي ماحبتني
ليش ياهو انت كاظم الساهر وانه ماادري
لعد بس انتي خمسه مسودنتهم
همه اربعه منين جبت الخامس
الگاعد يمچ الخامس
يا انت هم تسودنت
وداعتچ من ثاني يوم دعمتچ وشفتچ نايمه بيتنا گلت ويه روحي تبارك الخالق في ماخلق
احسان انت خاطب وخطيبتك گرايبك
شوفي جونم اني ونورهان من عمرنا عشر سنين اهلنا قرروا نورهان لاحسان كبرنا ونسمع هذا الشي خطبتها من عمري عشرين صار ثمن سنين اكو واحد يحب وحده يظل خاطب ثمن سنين وحتى شغلي بالعراق ودراستي حجه حتى ااجل
وليش ضيعت عمرها ليش ماگلت وخليتها تشوف نصيبها
گتلها مرتين وتركنا بعض وضغط الاهل والقرابه رجعتنا
وشراح تسوي
اهلي يدرون اريدچ واخذت الحادث حجه فهمت اهلها مااگدر اعوف كمره زوجتي واني السبب بمرضها وابقى وياها واخاف اهلها يكتلوني
شني يمتى اهلي گالوا نكتلك اذا ماتاخذها ترى عيب هيچ تكول
لعد شكول غير اعيش الدور واخلص من الخطوبه لو انتي متريدين مسودن خامس
مااريد مسودنين اريد واحد عاقل يحبني بعقله طول عمره
اني جونم بس نتزوج اعقل واصير حباب بس نرجع للعراق
انه هم اريد ارجع للعراق عد اهلي
اهلچ شتسورين يمهم نروح لبغداد شغلي هناك ومن تجي امي اوديچ يمها وشوفي اهلچ
ودراستي احسان بودي اكمل وابوي يشوفني معلمه
تنقلين لبغداد والتقارير الطبيه تفيدچ هسه عوفينا من الدراسه وشغلي سالت الدكتور على زواجنا
شبيه زواجنا ليش
لا والله شبيه؟ خو ماتريدين زواجنا يبقى هيچ الدكتور سالته گال تتزوج بعد ست اشهر من العمليه افتهمتي
افتهمت صدگ ماعندك حيه وخجل
اگلچ خلينا من هذا الحچي نسوي عرس هنا يم اهلي وتبقين يمهم حتى الاطباء يشرفون على حالتچ وارجع للعراق لشغلي وبعدين اجي اخذچ
چا ليش تعوفني هنا ست اشهر اخذني وياك
هسه من احجي تكول ماتستحي لچ بابا شلون ابقى يمچ والاطباء يگولون الزواج بعد ست اشهر افهتمي عاد
چا عدمن ابقى هنا عند امي ترى تحبچ والله وتحب اهلچ
وانه هم احبها گمره عندي سوال نايف چنتي تحبيه
احسان انه حچيتلك كلشي علاقتي بيه كانت فتره امتحانات وشي ممنوع اسويه هو من عشيره عدها طلايب ويه عشيرتي ردنا نعاند وخلص مااريد اچذب عليك بس اگولك شي يريح بالك عمري ماتندمت على شي مثل ماتندمت على معرفتي بنايف
خلص جونم حتى اسمه بعد مااريد اسمعه وترى احسن من قسمة الله ونصيبه ميصير ربنا حاكم عادل مقسومين ليعض اني صار ثمن سنين اتهرب من الزواج وانتي اربع مخابيل مااقتنعتي بواحد منهم
كافي كل شويه اربعه واربعه انسى عاد
طلعت من المستشفى بعد ٢١يوم اگدر اوگف واگعد وامشي بخطوات بطيئه
بعدها بعشر ايام صارت حفلة زواجنا انه واحسان بيت اهله وحضر اخوي سعدون وعمي عادل ونسوان اخوتي تعرفوا على عائلة احسان بعدها باسبوع احسان سافر للعراق وكملت علاجي وتحسنت صحتي ورجعت للعراق وتزوجنا زواج فعلي صار عشر سنين وعدنا اولاد وبنات وكملت دراستي بغداد وتخرجت اعيش بالسيديه وازور محافظتي واهلي
نايف تخرج وتزوج من بنات عمه
بدر انشق عن العشيره بفخذ عن العشيره الاصليه ال زون وال الازرگ انتهت الخلافات بينهم ورجع علاقه التصاهر بينهم
جبار المسودن عثروا عليه مقتول ومااعرفوا القاتل لحد الان خضعت لعمليه ثانيه بعد خمس سنوات من الاولى والحمد لله صحتي جيده
احسان خلص معهد قضائي ويعمل قاضي
القصه موجهه الى شيوخ عشايرنا الكرام ورجاء الهم بتحسين ظروف المراءه في الريف بهاي القصه وبعيدا عن الحب الكثير من جوانب الظلم للمراءه تبدي بام نايف الي تزوجت حتى يتم زواج ابن شيخ عشيرتها لامراءه ثانيه ونعمه الي كانت رغبه من رغبات ابن الشيخ دفعت الثمن وكانت عقوبتها التشويه والحرق والفضيحه والطلاگ والموت وگمره الي رغم سمحوا بدراستها منعوها ان تختار شريك حياتها وانطوها لابن عمها
لاتجعلوا من المراءه ثمن لخلافاتكم مع العشاير الثانيه
القصه توسل بكل شاب اذا حبيت وبنيه وضعت ثقتها بيك معناها اعتبرتك رجال وگد الثقه التهديد برسائل والصور دليل ضعفك ونقص في تربيتك
القصه لكل بنت تبحث عن الحب مرات الشر يجينا على هيئه قصه حب بريئه صح كل ممنوع مرغوب بس كل ممنوع وراه عقاب فكري قبل لاتسلمين گلبچ ومشاعرچ
القصه لاولاد العم بت عمك يعني تعمك تخصك لو يوم احتاجتك وگتلها عد عيناچ معناها الله يحبك واختارك لمساعدتها ونصرتها
اشكركم والله يحمي عشائرنا جميعا
اذا تحب عشيرتك علق ؟منتظرين تعليقاتكم شنو الي عجبكم بالقصه ؟👌
قصه جديده تنزل بعد ساعتين بس انريد تفاعلكم واشكر كل الاخوان والاخوات الي علقوا وانطوا لايك ممنونه منكم
