زمــــــــــن الضيــــــــــــــــاع

زمن الضياع 1

لطفا وليس امرا .. صوتوا للرواية .. كي تحفزونا على تقديم المزيد

نجمة وهضيمة  1

او - زمن الضياع -

من وعيت على الدنيا لگيت امي مريضة .. على طول نايمة بالفراش ودايره وجههَّا على الحايط .. لو تباوع على السگف .. لا تصد ولا ترد ..!! لا تحچي وياي .. ولا تلاعبني مثل ما تلاعب بقية الامهات بناتهن .. ولا تعلمني .

ما كان عندي غير بس اخت واحدة .. اصغر مني بخمس سنين ..

ابوي كان بنفسه يصير عنده ولد, حتى يعينه بكبرته .. بس كل ما تحبل امي بولد يصير عندها نزيف ويوگع قبل الولادة ..

سبع مرات حبلانة امي وطارحه بالولد .. سبحان الله .. وما يعيش لها .

مرة گالت لي خالتي .. انُّو امي بعد ما جيت اني للدنيا بسنة حبلانه وجايبه ولد .. وطايرين بي من الفرحة .. جايبته في بداية الشتا .. ومن الخوف عليه من البرد .. ما مطلعته باب الحوش ولا حتى مسبحته .. ورغم ما كان كلش حلو مسمينه تكرمون - - زباله - .. يخافون عليه من العين ..

بس عاد شنو الفايدة .. ياريته حاله حال البقية وواگع من بطنها قبل لا يجي للدنيا .. !!

فد يوم .. من صاير عمره تسعة اشهر .. كانت الدنيا صيف وكانوا نايمين فوگ السطح .. وسطح بيتنا كان كلش زغير .. الصبح عايفتني اني ويا بفراشنا فوگ السطح .. ونازله دا تحضر لأبوي الريوگ وتجهز له نجانة الاستكاين .. حتى ياخذها للچنبر مالته .. وتنظف الحوش مثل كل يوم ..

فالولد صاحي من النوم .. وحابي من فراشه ومتقرب من حافة السطح ومطبب راسه من بين فتحات المحجل .. وياستار .. واگع بالحوش على راسه .. كانت امي خاله صينية الريوگ بالطرمه .. وگاعدين هي وابوي دا يتريگون .. فواگع اخوية بنص صينية الريوگ .. وحشاكم بمكانه ميت ..

ابوي بوقتها جان جنونه ومتخبل .. شاگ زيگه ولاطم مثل النسوان .. وطالع لفوگ السطح رايد يشمرني بالحوش ويخلص مني .. بس الجوارين ملحگين عليه ولازمينه وما خذيني من بين ايديه ..

بوراها باقي ما اعرف كم شهر معتكف بالبيت .. لا يحاچيها لأمي ولا يطلع لا منا ولا منا ..!! حتى للشغل ما يطلع .. كل يوم يگعد بنص الحوش وينصب مناحه بالمكان اللي وگع بي اخوي .. ويبقى يدگ ويلطم ويلوم بأمي .

باقي على هذا الحال اشهر .. الا كاتله الجوع وشايف بعد ما منها .. لازم يشتغل حتى يعيَّشنا .. ياله راجع للشغل ..

بوقتها خال الملامه كلها على امي .. على لو ما هاملته .. !! لو .. من نازله من السطح منزلته وياچ .. ولو .. ولو .. !! ما كان صار اللي صار .. !!

بس الملامة واللو بعد ما يفيدن .. اللي صار .. صار ..!! واللي راح بعد ما يتعوض ..!!

فوگ قهر امي وضيمها .. النوب كاتلتها ملامة ابوي .. من ورا موتت اخوي صايره بيها حالة .. وگايمين يركضون بيها على السادة والأئمة .. ما مخلين سيد وإمام ما موديها عليه ..