Paano ka ba namin mapasasalamatan aming inang mahal?
Na nagtanim sa amin ng magagandang asal
Biyaya ka sa amin ng Poong Maykapal
Dito sa mundo kami' y iyong niluwal.
Hindi masukat ang tuwa ninyo ni itay
No'ng una kaming makita ngiti ay sumilay
Tuwa at saya ay sadyang walang kapantay
Samahan ninyo'y lalo pang tumibay.
Sa gitna ng hatinggabi lagi mong nilalambing
Hinahaplos mo kami habang tulog na nahihimbing
Hindi mo hahayaan na kami'y lamukin
Lahat ng pag-aalaga ay iyong gagawin.
Nasaksihan namin sa aming paglaki at paglago
Ang iyong hirap pati lahat ng sakripisyo
Kahit kailan hindi narinig ang iyong pagsuko
Kahit na nga ang palad ay nangapal na sa kalyo.
Hindi ka ipagpapalit sa lahat ng sinuman
Mawala na silang lahat, manatili ka lamang
Walang katumbas ang humilig sa 'yong kandungan
Tila isang sanggol na himbing sa ugoy ng duyan.
