متاهات

زواج

مساؤكم عافية وهنى...ماعرف شنو الصار ومديحمل البارت عدكم...رجعت مرة ثانية عدت نشره بلكت يفتح....تحياتي
متاهات
همس ليل
البارت العاشر
مر شهر على اخر لقاء وية هشام...
بعدها لا خابر ولا سأل...
اني توقعت خلص قنع...وجنت انتظر الطلاك
مهند خلال هالوكت جان مشغول عبالك أباله شي
جنت اتمنى اروح اسال مهند واكوله...
ماحجى وياك هشام....
صح فسخت من نفسي...
بس داخلي مشتعل نار...
ومرة خلصنا غدة...كام كل واحد راح بجهة بقة بس مهند
_شنو رايج أتسويلي أستكان جاي...
وتجين نسولف...
_صار
كمت بسرعة سويت الجاي...
جيبتله كلاصه...ولي واحد وكعدت مقابيله...
_عاشت ايدج...
اباوع لاخوية وهو يشرب جايه...
شلون ذبلان حبيبي...ربي ينطيك الاحسن
_هسة نحجي...صبا صار شهر لا حس ولا نفس من هشام...
سكتت وبديت ادير بكلاص الجاي...
_يعني مو عبالج ناسيج وملتهي...
بس اني اعرف الصار...
وكلت لابوية حتة مايسألج...
_مين تعرف
_هشام حجالي...
_عموما ذهبه موجود حتة الملابس...
الي لبستها عود انطيه فلوسه
_بس انتي بعدج على ذمته...شنو عبالج بس فسختي انتهى الموضوع...
_اعرف خلي يطلك
_هشام مايطلك هاي اول حجاية كالها...
_مافهمت هو صار شهر ماكو ...توقعت خلص
_لا ماكو خلص...هو عافج ترتاحين هالفترة وحتة
سكت
_احس بغلطي...كملها ليش سكتت
_هو انتي فعلا غلطانة ...
صبا حبي...يوم هشام خطبج ماجان يعرف بشغلتي
وية
سكت مجان يكدر حتة يذكر اسمها...
_وانتي وافقتي...الي صار وياي ماله علاقة بيج
لنفترض جنتوا مزوجين...
شنو تطلكين علمود رفضوا اخوج
_لا مو هيج...بس ليش يرضون لنفسهم مايرضون لغيرهم
جر نفس...احنة نبقى ندور بنفس الحلقة للصبح
خطوبتج مالها علاقة بموضوعي...
الولد ماقصر وياج...ومثل ما اني ادور مصلحتج
من حقه يدور مصلحة اخته
_هنودي مامجبورة ادخل هيج عائلة...
خليني اكمل كليتي...وبعدها الله كريم
شفته سكت ودنك...شوي رفع راسه
_صبا لازم تعرفين الي يصير...
اني كل الي جمعته راح أبني بيه محل لابوية مصدر رزق
واحاول اعين احمد...حتة جزء من راتبه هم يساعد اهلي....
اني ظليت اباوع عليه...وعقلي يشتغل اريد اعرف
لوين يريد يوصل...
_وبقى انتي اريد اطمن عليج...واعرف هشام راح يصونج...
_مهند اشو خوفتني ليش هيج تحجي
_لان اني اريد اهاجر
_لا...صحت بصوت عالي...وين تهاجر...وليش...واذا ماقبلت بيك قابل نهاية العالم...
اتعين وابني نفسك...والف وحدة تتمناك...
لا تعوفنا عفية مهند....
جنت احجي سريع ودموعي وحدها بدت تنزل...
لزم ايدي يهديني...
_حبيبتي...لازم اشوف حياتي...رتبت حياتكم بلي اكدر عليه...
_ماعليك منا...شوف حياتك بعد بس لا تهاجر..
عفية منو لنا...
حسيته دمعت عينه...
_صبا...خيتي لخاطري لاتكسريني...اريدج قوية
توكفين وية اهلنا...
_خلص مادام هذا قرارك...احترم قراري ...
ماريد ارجع لهشام
_عبالج سهلة...هشام عنيد...
وممكن يخليج معلكة سنوات ومايطلك
_مو بكيفه
تنهد ...اول مرة اعرف بيج عنيدة...
خيتي شوفي هشام مو مثل ماشوفيه صعب...
الظروف هيج خلقت منه...
ماتحصلين مثله يصونج ويحافظ على بيته...
ريحيني خيتي....
وارجع واكولج لا تربطين شي بشي....
_زين اذا وافقت تواعدني تبقى ماتهاجر...
دموعي ينزلن عشرة عشرة....
مد ايده ومسحهن....
_ اوعدج حاليا ما اسافر لحد ما ارتب اموري...
وبعدها ماتعرفين شنو الظروف ...
هسة اريد منج اتصالحين خطيبج...
هزيت راسي ب لا
_ليش صبا ماعندي خاطر يمج ولا تثقين بحجايتي
_مو هيج....بس ما اريد اعلمه اني اصالحه
ضحك...اثاريج مو هينة...
مو مشكلة اني ارتب الوضع...
كام باسني من راسي...اريدج اختي الذكية الحبابة
طلع بعد مادخلني دوامة جديدة...
طلعت بالحديقة جان شهر الثامن والدنيا حارة تحرك
كعدت بالحر ابجي...ماعرف شسوي...
لا اني كادرة اعوف هشام ...
رغم احبه بس احس دينفرض علية فرض..
ولا كادرة امنع اخوية يسافر ويعوفنا...
احس داخلة بدوامة ماعرف بدايتهة من نهايتها...
شنو الصح.....ماعرف
مر كم يوم ومهند ماحجى شي بعد ...
واني روحي لايبة...لا اكلي ولا نومي مثل الاودام...
ثالث يوم بالليل....جنت اشر هدوم بالسطح...
سمعت صوت مهند يصحيني...
نزلت ركض....ودخلت راسا للصالة...
جنت لابسة بيجامة نيلي وعليها قميص ابيض منقط نيلي...
شعري رافعته بقراصة بشكل مخربط وخصل منه نازل ...
وجهي احمر من نزلة الدرج السريعة والهث
_ها هنودي صحتني...
مهند جان كبالي اول مادخلت...
من شافني اتبسم...وحسيت نظره توجه لوراي...
انداريت اريد اعرف لمن يباوع...
تفاجات بهشام كاعد على القنفة ...
جانت نظراته تتفحص مظهري...
نحرجت حيل...
وظليت مرتبكة لا اكدر ابقة بهوستي...
ولا رجلية يوصلني للباب حتة اطلع...
مهند كسر لحظة الاحراج....
_شو ما سلمتي...عموما...يكولون ياداخل ببن البصلة وقشرتها...
هاي انتي وهاي خطيبج اتفاهموا سوة...
عافنا وطلع سد باب الصالة...
واني بقيت على وكفتي...وهشام على كعدته...
_هاي هيج جنتي بالسطح...
باوعت على نفسي....
عبالي يقصد لبسي مخربط
_دأشر هدوم قابل طالعة حفلة
_والي أدشر تطلع بدون حجاب وبهيج لبس ...
بلة واحد بالسطح ....
افتهمت شنو يقصد....
رجعت ليورة وكعدت ....
_اظلم السطح ماينشاف شي بيه
_وان يكن لا تصعدين بعد هيج
ماجاوبت .....بس جنت العب بالحلقة الي بيدي...
_شو لابستها...مو فسختي
رفعت راسي اباوع عليه...
ماعرف شنو اجاوبه...
_هاالمرة سويتيها وسكتتلج....
بس اياج تكرريها....
وكفت...بلشنا نهدد
وكف وتقدم ناحيتي بثانية...
وقبل ماعرف شيريد يسوي جرني من ايدي بأتجاه
_شوفي صبا...مو اني الي مرة تمشي كلمتها علية
لو تلوي ذراعي...
خلي هالحجي ابالج للمستقبل...
جنت اباوع عليه واحس عيونه تريد تطلع من العصبية...
فتحت حلكي اريد اجاوب....
بس رجعت سكتت...
_زين تسوين...
مد ايده للقراصة الي بشعري جرها...
ومااحس الا اني بحظنه...
وقبلته احسها جانت نوع من العقاب...
حسيت الهوة انكطع عني ...
ومثل مابدى فجاة بعدني فجأة....
_كدامج اقل الشهر...رتبي امورج بداية التاسع نزوج
عافني وطلع مصدومة من حجايته...
ومرتبكة من قبلته....
ثاني اليوم الظهر مهند كال هشام راح يدز امه
حتة تطلع وياج تكملون جهازج...
كتله ما اريد خليني اجهز براحتي...
ماعارض مهند...حسيته تفهم الوضع...
عدت كم يوم واني حايرة شلون اجهز...
شو فلوس ماعندي...غير هو يدز
واستحي اكول لمهند...
وطبعا لو اموت ما اكول لهشام...
الي اصلا بعد لا اتصل ولا حجة...
دخت شنو هالوضع...راح اخلصها وياه بهالشكل
معاند ...لو شلون
خابرت هبة...كتلها ماكدر اجي تعاي انتي...
اجت وشكيتلها همي...
_صبا ليش تعاندين...
خلص صرتي امام الامر الواقع...
لا تخربين على نفسج...
_لج ماتشوفين تعامل امه....عبالك
شلت ايدي عاجزة اعبر عن تصرفها
_وانتي شدسوين هسة...
داتنطيها مجال تحقق الي تريده
الولد لوما شاريج جان ماتمسك بيج...
شنو يمنعه يزوج البنية الي رادها
_عادي يجوز صاير شي...
_وان صار شي...المهم هو لمن اختار
لج ثولة...اكسبي لجانبج...
هذا زواج مو لعبة....
ولا تنسين انتي تحبيه...
احركي كلبها مثل ما حركت كلب اخوج
راحت من يمي وعافتني افكر بكلامها...
شفته صح...هو خلص راح اصير بالامر الواقع
ليش ما اتعايش وية الوضع...
بيومها خابرني هشام كال حضري نفسج بالليل امرلج
اجاني المغرب...
اخذني للمنصور......ودخلني للمحلات كال اختاري
ماسأل ليش ماردتي امي...
اخذنا فرة طويلة بالسوك...
بس جنت احسه مامرتاح وضايج...
حتة عشى اخذلي جاهز للبيت...ومن وصلني نزل الاغراض وراح...
ثاني يوم دزلي فلوس وية مهند حتة اكمل جهازي..
كمت اخذ هبة واطلع اجهز...
شفتها احسن لي هاي الطريقة...
والتهيت لان جان باقي اسبوعين للعرس...
هو هم جان كل يومين يخابر تحتاجين شي
اكوله لا...
ينتهي الموضوع بينا....
مهند كال ايريد يرتب شغله علمود الزواج
قبل اسبوع من الزفة خابرت امه...
كالت راح امر عليج حتة نختار بدلة العرس واخذج مركز تجميل...
وفعلا اجت واحسها ضايجة وكوة تحجي...
وحاولت تفرض علية بدلة مانطيتها مجال...
اختاريت الي عجبني...
ومن كد ماضجت من تصنيفاتها...
من خابر هشام كتله لا تحجز قاعة للعرس...
اريد زفة عادية...
ماكال شي...والحنة كتله ماريد اسوي بس شي بسيط
وفعلا يوم الحنة...
لبست بدلة بسيطة...وعزمت هبة وبنات خوالي
سويت شي بسيط بس حلوة جانت وكلش تونسنا
هبة طول الحفلة مابطلت ركص...وخلتني وياها على الواهس...
غيرتلي جو...
طبعا امه ما اجت تحني ....
وخابرت دكولي هواي خطار عدنا وبيتكم مايكفي
لو مسويتها بقاعة...
جانت تتقصد....
وصبح يوم الزفة ...الليل كله مانمت..
بحيث الصبح عيوني ذابلة...
مية فكرة ابالي...
راح اعوف اهلي....
اروح عالم جديد...ماعرف عنه شي
احبه...بس ماعرف طبعه...
ماعرف شلون اتعامل وياه...
ماشفت منه بس التعامل شبه رسمي
يعني ماكو ذاك الحجي بين المخطوبين مثل ما اسمع من البنات...
هواي افكار اخر شي قررت الغي كلشي من بالي...
واحاول اعيش اللحظة...
اجى هو اخذني للصالون وياه اخته رند
جريت نفس من شفت لا امه ولا لارا...
مجنت حابة اشوفهن اثنينهن...
بالصالون اخذت راحتي...
اختارين التسريحة والمكياج...
بحيث من خلصت ولبست البدلة ...
وكفت كدام المراية...
حسيت هاي مو اني...
جنت فرحانة بنفسي طالعة هيج
رند كالت هشام جاي...لبستني الكب
حسيت كلبي كام يضرب سريع
طلعنا وتفاجأت وية هشام مهند...
كلش فرحت بشوفته...
رحنا اخذنا صور...من نزعت الكب ...
التفت على هشام ردت اشوف رد فعله...
وجه جان يضحك ونظرة عينه جانت تحتويني...
ردت اطول هاي اللحظة...
رجعنا للبيت....وهشام راح
جنت اعد الدقايق...اريد يخلص اليوم...
ومن سمعت الموسيقى...
ايدي كامن يرجفن احاول اسيطر على نفسي مداكدر...
لحد مادخل هشام...غابت الدنيا من حولي...
وشفته بس هو....وصل يمي وماكعد....
راسا اخذني وطلع...
سلمنا على اهلي...وبعدها من ركبنا سيارته
هو يسوق...ظليت اسال وين نروح....شو مو طريق البيت...
ماعرف ليش مايطلع صوتي واسأل...
جان مشغل اغنية راشد الماجد...والله تحقق مناية شوفوا حبيبي معايا....
لحد ماوصلنا كلشي مامفتهمة بس راسي يطن..
من نزلنا اعرفت احنة جاين لفندق...
صعدونا للغرفة...وجانت بنت خالي وياي نزعتني الكب...
شفت امه واكفة ورند ...
_هسة على شنو الفندق...لو مسوي العرس بقاعة وراجع للسويت مالك مو احسنلك...
حجت امه...
_خلص امي انتهينا من هالموضوع...
حسيتها ضاجت من حجايته...
سلمت وباركت لنا وطلعت....
وهنا بدى عندي خوف من نوع ثاني...
*****
فتحت عيني ...الدنيا الصبح...
اني وين احس نفسي مسطورة...
عيوني لفت حولي...هاي مو غرفتنا...
شوية صفنت...اذكرت البارحة زفتي...
باوعت على جهة الثاني شفت هشام نايم..
سحبت نفسي بهدوء وكعدت امكاني ...
ردت اتأمله وهو نايم...
جان عبالك طفل بنومته...مال واحد مرتاح ومسترخي...
ردت امد ايدي العب بشعره..
خاصة هاي الشعلة ...نفسي اتقرب واشوف بياضها عن قريب...مثل الشيب لو تختلف...
بس خفت لا يكعد...
باوعت للغرفة...جانت البدلة بالكاع...والبركع ...
رجعت اتمددت واني اذكر الصار بعد ماطلعوا اهله
سد الباب وراهم...
رجع علية...كومي للغرفة حتة تبدلين وتاخذين راحتج..
طبعا جان حاجز سويت...غرفة وصالة معاها...
كمت وراه ...ومن دخلت للغرفة...
صار وجهي اصفر من الخوف...
وايدي اريد اسيطر على رجفتهن ماكدر..
هو شال الجنطة وخلاها على الجرباية...
_هاي جنطتج...
من رفع راسه لي...شبيج اصفريتي...
لا تخافين...مادام ماتريديني...
ما افرض نفسي عليج....
ولخاطر مهند تممت كلشي....
عافني وطلع من الغرفة...
بقيت واكفة بمكاني ارجف بس هالمرة مو من الخوف
من الصدمة...
شنو لخاطر مهند...معقولة جان يريد يفسخ ومهند جلب بيه...
حسيت الدم كام يضرب براسي...
شلت بدلت وطلعت وراه...
لكيته نازع السترة...وديفك الرباط
_شنو لخاطر مهند سويتها...
التفت عليا....ماردت اكسر حجايته
_لا والله كلبك طيب....
جنت احجي بعصبية وهو يجاوبني برود
_وهسة كمل جميلك ورجعني لاهلي...
_روحي للغرفة ارتاحي
جاوبني وكعد على القنفة ينزع حذائه
_اذا ما توصلني راح اخابر مهند
رجعت للغرفة اتعثر بدلتي...
بس احس اريد اطك...وادردم وية نفسي...
مسوي فضل مزوجني ...دتطير انتة وامك وفلوسك
جنت مدنكة على الجنطة اكلب بيها اريد موبايلي
نبشتها نبش
_شدسوين....
جان واكف اباب الغرفة يباوع علية...
ماجاوبته....بس لكيت الموبايل...
فتحته وايدي ترجف...
سحب الموبايل من ايدي...
_شدسوين كتلج
_اريد اخابر مهند...يجيني
_شبيج تخبلتي...
_ليش انتو خليتوا بية عقل...كل واحد من جهة
جيب التلفون لو توصلني...
_شتكولين للناس راجعة بليلة عرسج
_معليك مني....كافي اتضحي علمود الاخرين
كلتها باستهزاء...
تقربت اريد اجر التلفون منه...رفع ايده فوك
_انطينياه...
جنت اجر بذراعه حتة اخذ التلفون
_لج اوكفي خلي نتفاهم...
_ماريد اسمع شي ...ماريد
كمت اصيح...وعفته وكعدت على الجرباية
غطيت وجهي بايدي وكمت ابجي بحركة ...
حسيت جرحني من كال الحجاية...
شوي وكعد هوة يمي...
_جرحتج حجايتي...
لعد من جبتي الذهب وشمرتيه بوجهي بدون سبب مافكرت هالشي ممكن يجرحني
_ماشمرته بوجهك...
حجيتها واني اشهك...
مد ايديه وجر ايدي عن وجهي...
_ما شنو
_ما...شمرته... بوجهك...
تبسم لان جنت اكوله مقطعة وياهة شهكة بجي
_كافي تبجين وجهج صار خريطة...
_خلص رجعني واسكت
رفع وجهي له..
_ماصدكت صرتي بين ايدي ارجعج...
من كل عقلج...
_مو كتلك ماريدك تقدم تضحيات
_هو اكو بالازواج خواطر...
اقترب يقبل خدودي...دمعج مالح...
ايده حاوطت خصري يقربني...
وبدت شفايفه اتجول على وجهي...
وكام فجأة وجرني وياه....
وبلحظات ضعت بلمساته وقبلاته...
تبسمت واني اذكر الي صار ...
وبنفس اللحظة انمدت ايده وسحبني لحظنه..
_شو كاعدة من وكت
_لا انتة متاخر
_طبعا اذا الليل كله شلعتي كلبي يلا تممنا الشغلة
خجلت وماكدرت اجاوبه...
_يلا كوم نتريك
فتح عينه ...اوكفي خلي نتأكد كلشي تمام
مافتهمت  شقصد الا من بلشت قبلاته
تنطبع على وجهي ...
بعد ما كعدنا وتريكنا وبدلنا ...نزلنا جوة لكيت
مهند جاي ...
سلم علينا وباركلي...واخذنا بالسيارة...
بس مو للبيت للمطار ومنه طلعنا للشمال...
كضينا اسبوع...
خلاله شفت وجه ثاني لهشام...
شفته شلون مرح وكريم...كلشي يعجبني لازم يشتريه...
وشفته حنيته ...
وشفت شلون يضيع ويصبح شخص ثاني بلمسة ايدي...
خلصنا اسبوع ورجعنا للبيت...
وباول دخلة لنا بعد وصولنا من المطار...
جانت تنتظرنا مفاجأة...
وتستمر الحكاية